[مايؤرقنا]

[مايؤرقنا]

البيانات الشخصيّة العمر : 23 الجنس : ( أنثى ) مكان الإقامة : ( --- ) الحاله الاجتماعيه : ( متزوج/ـة ) اذا كنت متزوج مدة الزواج : 4 أشهر وجود اطفال من عدمه : حآمل طبيعة العلاقه بين الزوجين ( مستقرة ) مصدر الدخل : ( وظيفة حكومية ) الحالة المادية : ( ممتازة ) المستوى التعليمي : جامعي البيانات الأسريّة نوع السكن : ( فيلا ) ، وهل هي : ( تملك ) عمر الأب : 60 عمر الأم : 45 مستوى تعليم الأب والأم ؟ الأب: ثانوي ، الأم: ثانوي عدد الأخوة والأخوات: 11 ، ترتيبك بينهم ( رقمياً ) : 8 الجو الأسري في البيت العلاقة بين افراد الأسرة : ممتاز طبيعة علاقة صاحب المشكلة مع بقية أفراد العائلة : ممتازه الجو الاسري بشكل عام في العلاقة فيما بينهم : ( ممتاز ) البيانات الطبيّة : هل يوجد أمراض عضوية تعاني منها ( لا ) .. هل يوجد أدوية تستخدمها حالياً ، ( لا ) .. الوضع الصحي والبيئي في الحي السكني من ناحية الخدمات والمرافق : ( متدني ) البيانات الدراسيّة : هل التحاقك كان في سن نظامي ؟ نعمهل كان هناك اي تعثر في مستوياتك الدراسية انسحاب او رسوب او انقطاع : ( لا ) مستواك الدراسي على مختلف المراحل الدراسة: ( ممتاز ) المرحلة الدراسية المتواجد بها حالياً : ( مخلصه دراسة جامعة ) اذا كان هناك تخصصات في مستواك الدراسي .. فما هو تخصصك : تخصص علمي البيانات الإجتماعيّة : هل هناك أي هوايات او أنشطة أو ممارسات تتقنها : تستهويني الهوايات الفنيه الالكترونية هل لديك ميول للاختلاط الاجتماعي والمشاركه في أنشطة ومناسبات مع افراد الحي او زملاء الدراسة والعمل او الاقارب : لا وهل هناك معوقات تحول دون ذلك : نعم الجو الاجتماعي العام حولك ( اصدقاء - زملاء - جيران - اقارب ) من ناحية علاقتك معهم : سيء المشاكل الأسرية : طبيعة المشكلة ؟ بين: ( الزوجين ) معدل فترات حدوث المشكلة ؟ كل شهر تقريبا ، وهل تتكرر ام تتغير لاكثر من سبب ؟ نعم ماهي نقاط الاختلاف بين اطراف المشكلة ؟ مكان السكن ماهي نقاط الاتفاق بين اطراف المشكلة ؟ متفقين في كل شيء من المؤثرين في المشكلة ؟ زوجي ووالدي ، ومن المتأثرين في المشكلة ؟ أنا وزوجي هل كانت هناك محاولات للتدخل من خارج الاسرة ؟ وماهي نتيجة ذلك ؟ حاليا لا ماهي العوامل المؤثره التي تساهم في الاصلاح ؟ الانتقال من مكان السكن وماهي العوامل التي تعيق في محاولات الاصلاح ؟ رفض الانتقال اذكر مشكلتك الآن : السلام عليكم ورحمة وبركاته من فترة وأنا أتردد في كتآبة المشكله ، مأادري من ؤين ابتديّ وبأي طريقه انتهي وكيف أوصل إحساسي اللي أقرب النآس لي لو تحدثت معهم بالموضوع مايفهموني ويفكرونه ' دلع وغيره ومقارنة حيآة بالآخرين ' وأنا مستحيل يكون تفكيري بهذي الطريقه . رآح ابتدي من قبل 5 سنوآت من البدآية ، بعد مإخلصت من الثانويه وجآني القبول فالجامعه خطبت لأحد أقاربي ماكنت مقتنعه بالرجآل لأن في فرق بالمستوى التعليمي والمادي لكن قبل مأانخطب له كنت اصلي القيام باستمرار وادعي ان ربي يرزقني بشخص معين كنت أتمنى الزواج منه وإذا ماكان لي خير معه يرزقني الله بزوج صالح فكنت أقول يمكن هذي نتيجة دعآئي ، لأنه فعلا كلن يمدح فيه ومافيه مشكله إلا الفرق بيني وبينه وكآن وقتهآ يشتغل فالرياض والمستوى التعليمي مايهمني دام الولد واعي وتفكيره مو رجعي أبد والمستوى المادي أنا إلحمدالله قنوعه من هالناحيه وماعندي مشكله أصبر وأتوظف وابني حياتنا حبه حبه ، اشترطت ان الزواج يكون بعد مأاكمل الجامعه وهذا اللي صار ، المشكله بدت قبل الزواج ب 6 أشهر تقريباٌ ، قدم نقل لعند أهله قريه بسييييطه مافيها أي مستشفيات على مستوى زين ولا مدارس ولا أسواق ومجعات ؤسوبرماركت السوبر ماركت حقهم كأنه بقالة الحي عندنآ طبعاٌ أنصدمت وانقهرت أنه كيف يأخذ هذا القرار لحاله وأنا حياتي مرتبطه بحياته كنآ لسى مو مملكين وإصلا من عاداتنا أنه مافي ملكه إلا قبل الزواج بيوم ولا يومين ومافي أي اتصال بيني وبينه ، وصلت الموضوع لامي وأخواني وخواتي أنه ما أبيه ومستحيل أعيش معه أو اتقالم فالحياه معه الحياه هنآك خابرتهآ أسبوع واحد وأمرض ونفسيتي تتعب وماأقدر اقعد أكثر ، لكن الكل خائف من وآلدي وهنا المشكله والدي طيب ويحبنآ ومدلعنآ واي شيء أبيه يجيني ـ بيتنا من أفضل البيوت أي شيء جديد عندنا مانلمس شيء فالبيت شغالات وسواقين إلا في موضوع زواج البنت والولد على السوآء ! مستحيل نتزوج من خارج القبيله ، مالنا حق نختار اللي نبي إذا انخطبنا لشخص قريب جدا ووالدي له معرفه بوالده مستحيل يردهم ويوافق أصلا من غير يأخذ رأينآ ويشوف أنه هو إدرآ بمصلحتنا ومالنا حق نقول لا وياويل اللي تجي بعد الزواج زعلانه مع زوجها أو تبي تطلق ، بتتهزأ وتنضرب وكل الدلع اللي أول بتفقده يعني لا تفكر أنه حياتها بعد الطلاق بتكون أفضل من زواجها . كلهم خافؤا منه وشالوا يدهم من الموضوع كنت أبكي واستخير ألف مره باليوم ، كلمت أبوي بالموضوع قام يتهزأ فيني وأخذ الموضوع باستهبال وتطنز وضحك وطلع من البيت ! تعبت والأيام تمر بدون أي تطور لدرجه فكرت أنه أنا أكلمه بنفسي وأقوله ماأبيك تصرف ! لكن خفت من ردت فعله ، أخاف يعلم أحد اني اتصلت فيه ويوصل الموضوع لأبوي . بدوآ إخواني وخواتي يقنعوني ويمدحونه وإخلاقه وطيب وحنون وأكيد بيقتنع ينقل بعدين ، واللي تقول أنا حلمت أنه نقل ومدري وشو . لين رضيت بالواقع واستلمت واستخرت ، تم الزواج على خير . بعد الزواج أول الأيام مع زوجي سافرنا شهر كامل شهر عسل وحبيته كثيررر وكان في تقارب فالتفكير والأشياء اللي أحبها والجو اللي أحبه ، في تشابه كبير بيني وبينه انبسطت معه فهالشهر وماقصر معي أابد ماحسيت بفرق فحياتي قبل وبعد الزواج ، وزي ماقالوا فعلا طييب وحنووون وحسآآس ويتمنى رضآي بس . لين خلص الشهر ورحنا لبيتنآ والمكآن اللي بنسكن فيه كان هو مبسوط أنه بيشوف أهله ، وأنا كان شعوري عادي لسى مبسوطه بالجو اللي عيشني إياه ، لين دخلت ديرتهم ولا شعورياَ انكتمت وأمقدرت أتنفس وقعدت أصيح وقف هو السياره على جنب وقام يهديني ويعطيني مويه وكذا ’ لين هديت ودخلنآ ويوم دخلنا آآآآه حيآه ثانيه الحاره سيئه بالمره البيت غييرر عمري مادخلت بيت زي كذا ( بيت أهله لسى ماشفت بيتي ) الناس غريبين نفسياتهم خائسه وفي دقآت بالكلام وسؤالف أنا مو متعوده عليها ، بعدها رحت بيتي واكتشفت أشياء تصدم غرفة النوم مستعمله المطبخ قدييييم الصاله المجالس مو مأثثه ، الحمامات عدم حمامات عربيه أنا مو متعوده عليها مأاعرفلها ومافي مكان للشورّ

[مايؤرقنا]

أول يوم كنت تعبانه وسكت ونمت ، ثاني يوم جلست معه وبكيت وقلتله ليه كذا وكذا قال أنا قلتلك قبل السفر البيت ناقص تبين نسافر ولا نروح نأثثه قلت نسافر وهو فعلا صار لكن كنت متوقعه أقل شيء الحمامات كويسه في غرفة نوم جديده مطبخ جديد ونظيف الصاله التلفزيون ، هذي اسمها البيت عدم مو البيت ناقص البيت ناقص يعني ممكن مجالس ولا غرفة طعام أغراض للمطبخ ، مو كذا ولا شيء !! أول شيء تهاوشنا وعصب أقوله البيت ناقص يقول أنا ناقص وش تبين فيني ! أقوله أنا أتكلم فالبيت وجلست أصيح وجا راضاني وقال اللي تبينه يصير ونزلنا الرياض شريت إلاثاث المهم وعدل الحمام بديت ارتاح شوي فالبيت ، لكن المكان شيء إذا ضاق صدري مافي مكان نروحله نطلع نفر بالسياره حفظت الشوارع مو من كثرها أصلاَ إذا أبي أقضي ملابس ولا أغراض بيت لازم أطق مشوار للرياض مافي أماكن هناك أبد ! مأاعرف هناك وإذا حضرت عزائم مع أهل زوجي النآس غير عني مرررره تفكيرهم غير ملابسهم غير أحس اني إذا دخلت كائن فضائي وإذا رحت لاهلي مأارتاح من تعليقات الناس وهمزهم ولمزهم وتطنزهم وبكره عيالك بيصيرون بدو ومدري وشو كرهت إشوف أحد أخاف أسمع كلام ينكد علي خاصه اني أنا كارهه المكان ومضغوطه فاتحت زوجي بالموضوع وكل مره ينتهي بهواش وصراخ أقوله مو ذنبي لو اني موافقه عليه وهو هناك مالي حق أتكلم ! بس هو ظلمني بنقله بدون يفكر فيني أو يأخذ رأيي آخر مره أمس فتحت معه الموضوع وانفعل وقال ظروفي أبوي مريض وعملي هنا مريح إروح أوقع ؤارجع البيت ومدري أيش وهو أصلا له سنين أبوه مريض وهو بعيد عن أبوه مافكر ينقل إلا قبل الزواج وله إكثر من 10 سنين بالرياض من أول مإخلص الثانويه وعنده إخوان كثيرر هناك 5 وعنده 3 برا يعني لا هو الوحيد اللي بيكون هناك ولا هو الوحيد اللي بيطلع برا آخر شيء قألي ماراح أنقل ولا فبالي قلتله بتوصلنا لطريق مسدود ترا لأني حتى أنا مستحيل اتحمل الحياه هناك قال خلاص اختاري يأترضين بوظيفتي هنا يا ننفصل قلتله خلاص ننفصل قال خلاص طيب قلت بس أنا ماراح أتكلم لأني لو أقدر أتكلم ماتزوجتك قال خلاص أنا بتكلم وأقولهم أنه مو مرتاحين مع بعض وبس ماله داعي يعرفون تفاصيل وقفلنا على كذا وأرسلتله رساله استخير وأنا باستخير بعد والله يكتبلنا اللي فيه الخير ( هذا كله الصباح ) اليوم المغرب دق يقول ( ايوه حبيبتي ... ) قلت لا تقول حبيبتي قال إلا حبيبتي قلتله استخرت قال لا قلت ليه قال ماأبي قلتله أنا استخرت ترا وقريت فموضوع طلاق الحامل والكل يقول أنه يقع عادي ( هو قألي مايقع وانتظري لين تولدين ) قال مأ أبي وجلسنا ربع ساعه ساكتين لين أنا تكلمت وجلست أبكي قلتله قهرتني تعرف أنه غصبا عني مو قادره اتحمل وتعاملني كاني أتدلع ( كل مأافاتحه بالموضوع يقول انتي بس علشان خواتك ساكنين بالرياض وجده ) وأنا مو كذا قلتله أنقل أي مكان ماأبي زيهم بس مكان أقدر استقر فيه مو زي كذا ! ماحسيت باستقرار أبد بعدها جلس يبكي ويقول أنا أحبك ومو قصدي إزعلك وخلاص قومي غسلي وجهك وأكلي شيء وكذا وقام يراضيني وقفل الموضوع بدون أي حل أنا ماأبي الطلاق بس ماأبي أعيش هناك وإذا كان آخر الحلول الشكوى لله بأرضى فيه ولا عيشتي هناك هو مو مقصر معي يحبني واحبه ويحاول يعوضني بأشياء ثانيه وكل شهر ننزل الرياض نأخذ أسبوع كذا نتمشى ونقضي ، بس أحس بنقص فضيع أنا ذلحين خفيفه بس بكره بيجيني عيال ماأبي ادخلهم مدارس زي كذا عيالهم أربع وعشرين ساعه بالشارع بعد الساعه 8 مانطلع من البيت يقول الشوارع كلها دشير أبي أتوظف الوظائف هناك للمرأه بس تدريس وأنا مأاحب هالمجال ووظائفهم قليله ، مأاتخيل عيالي بكره وين بيدرسون إذا صاروا بسن الروضه ؤين بإدخلهم أحس بيصير فرق بين مستواهم ومستوى غيرهم مأاقدر اتقبل فكرة اني بأستقر هناك وأصير من أهل هالديره ِ، تعبببببت اليوم مو قادره أكل ؤبس أحس فجسمي إرهاق مو طبيعي وهالهم سببلي نزيف ، عايشه حياتي ان هذي فتره وبينقل وبتنتهي أحس مو مستقره أبد أنا مأعندي مشكله ماراح أمنعه من أهله نروح أسبوع نسلم عليهم ونرجع نروحلهم فاعياد بس أعيش هناك مأاقدر ! طولت عليكم ، لكن ارتحت كثير لما فضفضت لاني مو قادره أفضفض لأحد ومحتآجه مشورتكم بعد ذكر المشكلة : مدة المشكله من بدايتها الى الآن : 4 شهور مدى شدة المشكلة : ( تعيقك عن أنشطة الحياة ) تأثير المشكلة هل يمتدّ للمحيطين بك أم أنّ أثرها يتعلق بك : يتعلق بي وبزوجي هل سبق وراجعت مختص أم لأ : لا إذا كان هذا حديثك الأول عن المشكلة ، فما هو سبب لجوؤك لطرحها هنا والمأمول من تعقيبات الاعضاء : احتآج المشوره كيف أقدر اقنع زوجي بالنقل وش الحلول الثانيه أبرز الأشياء التي تدعمك .. والتي تساهم في حل المشكلة ؟ طيبة زوجي وحبه لي * ما هي الأسباب التي تعمل على زيادة المشكلة ، وماهي الاسباب التي تقلل من نسبة تحقيق الحلول ؟ والدي والأشخاص اللي يأثرون على زوجي

[مايؤرقنا]

" إنّ مع العُسر يسرا " وحدها كافية لنُدرك أنّ كل شيء سيمضي، سينتهي.. الفرق هو في شكل النهاية، كيف ستكون؟ وكيف سنكون حينها؟ الإنسان مُعرّض للمشاكل والضيق كيفما كانت وفي أي وقت يشاؤه الله. وهذه إشارة من الله إلينا أن في الضيق حكمة، وفي الحزن حكمة، وفي الظروف الصعبة حكمة أيضاً قد تكون إحدى حكمها هو العودة إلى الله، التضرّع إليه.. والتقرّب منه مالذي عليك فعله حين تكون تحت وطأة المشاكل؟ التركيز على عاملين رئيسين في حل جميع المشاكل : اولا : علاقه الانسان مع ربه / عليك أن تقوم بمراجعة نفسك، المراجعة الشفافة الصادقة، التي تجعلك صريحاً في النظر إلى تقصيرك.. عليك أن تؤمن أن الله هنا، يسمع العبد حين يدعوه، ويمدّ نعمه حين يرجوه.. فاسعَ إلى ذلك جدّد توبتك، واعمل على تصحيح أخطائك مع الله، في صلاتك.. في خُلقك.. في كلّ ما يربطك به ومعه تمسّك بصلاتك، حافظ عليها، اجعلها جوهرتك التي تحميها من شرّ الدنيا، لتحميك من عذاب الآخرة اجعلها ملاذك وملجؤك الذي تفرّ إليه من ضيق الدنيا وكدرها لتنعم براحة وسعادة عظيمين ، حتى تكون قرّة عينك فيها اعلم أنّ صلاتك هي ركيزة دينك، وهي طريقك للتواصل مع الله بلا حاجز، وهي حجابك الحاجز عن الفتن والمعاصي، وأنها من ستحميك من الوقوع في أي ذنب تعلمه ولا تعلمه وتذكّر أن دينك يقوم عليها، وأنها أول ما ستُسأل عنه، وأنها البطاقة الأولى التي إن نجحت في المحافظة عليها فالدنيا نجحت في جعلها كافية للعبور بسلام في الآخرة ثق بأنّها راحتك، أمانك، وأنها الوسيلة التي تقوّيك أكثر، وتجعلك صامدا أكثر، واثقاً بالله وبأنّه معك وسيعينك على تجاوز محنتك رطّب لسانك بذكر ربّك، استغفره قدر ماتستطيع.. واعلم أن استغفارك خير لك، وأن استغفارك هو فرجك، هو وقودك للحفاظ على الأمل وقُم بدعاء ربّك كثيراً.. فدعاؤك هو حديثك مع الله، اسأله ماتُريد، ألحّ عليه في الدعاء، وثق أنّ دعاءك لن يخيب، فالله يحفظ دعاءنا له، وسيحقّقه لنا هُنا أم في الآخرة فإن كان الخير أن يتحقّق دعاؤنا في الدنيا فسيحقّقه الله، وإن كان الخير أن يتحقق في الآخرة فسيحفظه الله لنا للآخرة بأي شكل يشاء تذكّر أن الدعاء في كلّ وقت هو خير، وأن عظمة الدعاء ومكانتها عند الله جعلته يُخبرنا أن آخر ساعة من يوم الجُمعة مستجابٌ فيها الدعاء، وأن الدعاء بين الآذان والإقامة كذلك، وفي جوف الليل أيضاً تذكّر قول الله: [ ادعوني استجب لكم ] .. هذه الآية وحدها كافية لنؤمن أن الله لا يخيب ظنّ عبده به، فاحسن الظنّ بالله ثانيا : مواجهة المشكلة / عندما يساورك القلق على مشكلتك ، اختلي بذاتك و أجِب عن الأسئله التاليه : ( 1 ) ماهي المشكله ؟ ( 2 ) ماهو سبب حدوث المشكله ؟ ( 3 ) ما أسوأ الاحتمالات التي من الممكن أن تحدث ؟ ( 4 ) ماهي الحلول الممكنه والمتوفره لدي ؟ ( 5 ) وماهي أفضل الحلول وما مدى تاثيرها في حل المشكله ؟ بعد أن تتوصّل إلى مصدر المشكلة عليك أن تبدأ في البحث عن الحل .. تحديدك للمشكلة كفيل بأن يجعل الحلول تتبادر إلى ذهنك للظهور .. اجلس في مكان هادئ وحاوِر نفسك، قُم بمحاولة ترتيب أفكارك حاول معرفة مالذي يجعلك تُسيطر على مخاوفك و تستعيد ثقتك بنفسك ؟ اخلق في نفسك رغبة قوية في تغيير الواقع وتسيير الأمور إلى حلّ مُناسب حتى تخرج منها بأقل الأضرار.. تذكّر / يجب على كل شخص أن يهوّن موضوع المشكلة مهما بلغ حجمها؛ فكلّما تعاظمت بعقله فسيجدها أكثر تعقيد وسيواجه ضغوط نفسية شديدة لا تسمح له بالتفكير في حلّها ففي بعض المشاكل يجتمع الطرفين على الشدّ سواء في رفع مستوى الصوت أو حتى البُكاء أو أيّا كانت تلك الصور ، وهذا خاطئ !.. فالخلافات لا تنتهي بشدّ من الطرفين، من يقوم بالشدّ على الآخر أن يرخي قليلاً مُحاولاً أن يُحادث نفسه مُردداً [ اهدء/ي .. على ماذا اتفقنا، اتفقنا على التزام الهدوء .. لا داعي للقلق .... الخ ] لا تنسى أيضاً .. أن تجعل الاستخارة رفيقك في كلّ وقت، في كل مرحلة من حياتك.. وحتى حين ترى نفسك في مشكلة أو محنة استخر ربّك فيها، واطلب منه إن كان في تلك المحنة خيراً أن يُريك إياه، وأن يجعلها قوة لك، زيادة في خبرتك في هذه الحياة لتُحسن التعامل فيما بعد في كل ما يواجهك تصدّق كثيراً بنيّة الفرج، بنيّة الخير، بنيّة السعادة.. واعلم أنّ الصدقة تُطفئ غضب الربّ، وأن محنتك مشيئة من الله، فتصدّق وادعو ربّك ألا تكون هذه المحنة غضبا من الله عليك أخيراً.. تذكّر: [ ومن يتقّ الله يجعل له مخرجاً ] وتذكّر: [ أنا عند ظن عبدي بي ، وأنا معه حيث ذكرني ]

[L A M A ~]

ياحبيييلك يختي أحسك مرة مرة مرة تسرعتي
ويين طلاق عشان هالسبب ؟
اقري لك كم موضوع هنا وبيشيب شعر راسك وبتحمدين ربك ،
يختي دامكم متفاهمين وكذا وشو له الطلاق + إنك حامل ، وعندي طفلك يدرس بمدرسة مو زينة أهون من إنه يعيش بدون أب صح ولا لا ؟
وبعدين والله ماقصر يجيبك للرياض خلاص وش تبين أكثر وغير لك الأثاث الله يجزاه خير
وشي طبيعي تزوجتي تتغير حياتك وماتحسين بالاستقرار لو بيتك جنب بيت أهلك ،،
أما سالفة المدارس أكيد كلن وده عياله بأحسن المدارس بس عاد الشكوى لله إنتي اهتمي بعيالك والله بيحميهم إن شا الله و ثقفيهم بنفسك موب لازم مدارس راقية وكذا ، هذا إذا قعدتوا لين ذاك الوقت بهالديرة
الله يوفقك ويسعدك ويكتب لك الخير

* أول مرة أرد على موضوع زواج بس حسيت مايبيلها عشان كذا رديت : )

[كووريه دآجه~]

وش آحسن تتزوجين واحد يسكنك في مدينه ويغثك بتصرفاته والا زوجك الطيب معاك وفي قريه!

احمدي ربك مو كل مره بتحصلين رجال يحترمك ويقدرك..

[فيز يّا ء .]

الله يعينك يا اختي ..
من جد اللي عاش في المدينة صعب يتأقلم على حياة القرى
لكن صار اللي صار ..
نصيحتي لك .. دام زوجك طيب لا تفرطين فيه ابدا ابدا .. وتذكري انك في يوم من الايام دعيتي واستخرتي وقمتي الليل وان شاء الله ان ربي عطاك في هالزوج الصالح
ابدأي شوي شوي غيري منظورك عن الموضوع .. احنا ما نقدر نتحكم بالظروف لكن نقدر نتحكم بأنفسنا
وفي نفس الوقت لا تيأسين من سالفة نقله .. لكن اكيد بدون حنة وزعل وصراخ ..
وعليك بالدعاء .. الله يفرجها عليك

[تفاؤل وأمـــل..!]

الله يصلح قلبك يااختي

اسكني معه لو بخيمه دامه طيب وعاقل ورجال
وقولي الحمد لله اللي رزقك برجل نعمه مثل كذا
علشان مظاهر تتركينه
مايصير
وش تبين بواحد يسكنك بقصر ويغثك ومايهتم فيك ومايراعي شعورك
تعوذي من ابليس مع الوقت راح تتاقلمين هونيها وتهون
ودقي عليه وقوليله متى تجي تاخذني اشتقت لك
والله يوفقكم ويصلح حالكم

[عطر السحااااااب]

ياقلبي انتي كفايه بس الحب اللي بينكم تبارك الله
صح صعبه عليك مرررره بس خذيها بمنظور ثاني
واذا على العيال والمدارس انتي اللي علميهم وثقفيهم
وربيهم احسن تربيه وان شاء الله يطلعوا صالحين
واذا على اللمز والهمز ماراح تسلمي منه لا بالديره
ولا بمدينتك الناس ماتخلي احد بحاله ولاتنكئبين
ولا تجلسين بلحالك ماعليك باحد اطلعي وخليك
واثقه من نفسك وحياتك وراح تكسريهم
صدقيني كل شي يهون الا المحبه بينك وبين زوجك
ادري و الله بشعورك ويمكن تقولي مافهموني
ولا جربنا نفس اللي جربتيه لكن ثقي بدعائك وصلاتك
لان لك رب ماراح يضيعك ابد
حياه سعيده ملؤها الحب والتفاؤل اتمناها لكِ

[( كرامتي عاليه)]

شوفي الله يلوم الي يلومك بعذرك

بس خلاص تقبلي الحياة الي تعشينها الحين حاولي على الاقل الفتره هذي تسوين لك جو بالبيت ينسيك
اقري كتب شوفي برامج تحبينها اطبخي اشياء مميزه غيري وبدلي

كوني لك صداقه اختاري البنات الي بعمرك ورتحت لهم واعزميهم

وبعدين لا تنسين اكبر واجمل شي بالحياة
انا عند ظن عبدي بي فليظن عبدي ماشاء
وش ظنك بربي العظيم
الي خلقك وخلق معك عيالك
قادر سبحانه يعلمهم احسن تعليم ويرزقهم احسن الاخلاق
بس دعوات دعوات اسجدي وادعي
مافي بالدنيا احد الا ربي ابتلاه بشي بعظهم كبير و هو درجات الابتلاء
بس ربي حط لهم هذا مثل الاختبار
انت وش بتصيرين

قيام الليل يا الله سبحان من جعل في الراحه والنور حتى انشراح الصدر سبحان الله استجاب الدعوات والامنيات
كثري شكر( وَإِذْ تَأَذَّنَ رَبُّكُمْ لَئِنْ شَكَرْتُمْ لأَزِيدَنَّكُمْ وَلَئِنْ كَفَرْتُمْ إِنَّ عَذَابِي لَشَدِيدٌ.)
تصدقي بنيه ربي يحقق اشياء بالك
استغفري وسبحي سبحانه اذكريه بالليل والنهار( ومن اعرض عن ذكري فان له معيشه ضنكا )

ولا تنسين دعوه قالها نبي الله موسى
(رب إني لما أنزلت إلي من خير فقير)
تدرين بعد هذا الدعاء رزق رزق كبير سبحان الله

وبعد ابتسمي و لا تضيعين شباب عمرك بالهم ترا الدنيا قصيره
ولا نبي الا الذكر الحسن
فعشان كذا لا تخلين اختلاف الطبقه بينك وبينهم شي مرره كبير من تواضع لله رفعه
يعني خلي التميز الي فيك
بعد تميز باخلاقك وتعاملك وكرمك معهم

دايم ادعي ربي اجعل لي من كل هم فرجا ومن كل ضيق مخرجا وارزقني ربي من حيث احتسب ومن حيث لا احتسب
ربي اسعدني واكتب لي الخير حيث كان ثم ارضني به


وبالنهايه لا تصيرين سلبيه ابدا