منتديات شبكة الإقلاع ®


الصفحة الرئيسية البحث انظمة شبكة الإقلاع سوق الاقلاع عضويات التميز (الذهبية والفضية والتجارية) جوال الإقلاع حمل صورك من هنا من خلال فتح موضوع خاص بك
بوابة الأنباء ieqla3 اختصر روابطك من هنا البرامج اعلن معنا حساب الشبكة في موقع تويتر اعلن معنا
العودة   منتديات شبكة الإقلاع ® > المنتديات الاكاديمية والثقافية > منتدى ابناؤنا في الخارج
التسجيل التقويم التأشير على جميع الاقسام بالمشاهدة




إضافة رد
 
أدوات الموضوع طريقة عرض الموضوع
قديم 08-04-2011, 06:01 PM   #1
فارس بدون سيف
من كبار رياضيي الإقلاع
 
الصورة الرمزية الخاصة بـ فارس بدون سيف
فارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحب
اذا بتروح امريكا ..او توك واصل ..تعال هنا لازم...عاداتهم Vs عاداتنا ..طعات يحذر منها



مساء الخير والأحساس والطيبه للجميع قراء وزوار

ياهلا وغلا

امسي بالخير .. لكل مبتعث ترك اهله واصحابه وتغرب علشان يحقق طموحاته وتطلعاته وتطلعات اهله ..

امسي بالخير لكل مبتعث يحظر نفسه وشاغله التفكير وباقي له ايام قليله ويسافر علشان تبدا دراسته .. ويترك اهله هنا واخوياه .

حبايبي ... اكتب لكم موضوع اليوم هو عباره عن خلاصة لي في امريكا ... طبعا ماودي اتكلم عن نفسي كثير .. لا .
لكن الي بقول له كانت دورتي هناك ومارست عملي هناك بعد.. حتى اجازاتي هناك .. عاشرت المجتمع الأمريكي .. حتى والله قبل ما اتخرج من الدراسه كان اصدقائي بالسعوديه والله امريكان...

علشان كذا بكتب لكم اشياء تهمكم في عالمهم .. من واقع خبره .... والي عندهم عادات كثير مختلفه عننا ... مثل مالهم بالظبط عاداة حنا مانتقبلها ونستغربها

لكن اذا الواحد كان في ديرتهم لازم يحترم ويتبع عاداتهم في مالايتعارض دينه طبعا .. ويعطيها طابع الأحترام مهما كانت هذه العادات

وطبعا حتى لو ماطبقها لازم يتبع جزء منها للتعايش في بلد مثل بلدهم .

راح اتكلم عن العادات الاجتماعيه اللفظيه


راح اتكلم عن العادات الاجتماعيه السلوكيه ...


راح اتكلم عن اشياء قويه لازم الواحد يحذ منها ولا يفعلها .. وممكن بدون قصد يتحول مافعلت الى جريمه تقضي على مستقبلك ... رغم انها شي عادي عندنا ونشوفها يوميا

راح اتكلم عن تنبيهات عامه جدا لازم الواحد يتبعها ..


طبعا اكرر الموضوع هذا موجه فقط للي بيبتعثون الى امريكا ... والي توهم واصلين وما امداهم ينسجمون لسا بالمود



مقدمه /

عزيزي المبتعث لأمريكا او المبتعثه ... اول شي مبروك القبول في البعثه .. وخلونا نتكلم بالبدايه بكل صراحه شوي قبل مانخش بالموضوع الأصلي ...

كلنا نعرف تماما انه اول ماتوصل راح يجيك انبهار تام بالحضاره هناك بمعنى انه راح تشوف تطور هناك وراح يسبب لك نوع من Culture shock او مانسميها بالعربي صدمه حضاريه

طبعا عادة هذي الصدمه هي تدوم لمده بسيطه مايقارب الشهر الى شهرين ثم بعون الله تزول ..
بسس ان كل شي تغير .. حتى الجو تغير عليك .. راح تشوف فعلا فصل صيف وفصل خريف وفصل شتاء وفصل ربيع ...

كلها بتشوفها ... مب زي هنا شتاء وصيف .. واحياننا ميكس ... الي بأوصله لكم من انه كل شي تقريبا بتشوفه هناك ...

راح تشوف امطار راح تشوف ثلوج ..راح تشوف خضار راح تشوف كل شي

راح تشوف اشياء العالم عايشه فيها من زمان .. مثل واحد يطلب بيتزا بالنت .. ويبخشش بالنت ... راح تشوف العالم كيف تسوق السيارات .. وتشوف كيف الله ساتر علينا هنا بالسعوديه

راح تشوف النظام الي يمشي عالصغير والكبير ..راح تشوف كل شي مختلف عندنا .للأحسن للأسوء ههههه انت قرر ...

فطبيعي طبيعي يجيك حاله من الانبهار

اخواني وخواتي المبتعثين .. لاننسى شعور ال home sick وهو شعور جدا طبيعي .. ويجي كل واحد فيننا

وهذا الشعور بالعربي يعرف انه اشتياق وسرحان كامل بالوطن واهلك واصحابك .. وكل مايتعلق بوطنك حتى محلات الي بديرتك والبوفيهات حقت الكبده بالجبن

احب اطمن كل واحد راح يروح بعثه هناك ... انه الوضع جدا طبيعي جدا جدا .. و 99% كلنا جاننا ... اللا الي ماله اهل ولا يشتا لهم ..

طبعا هذا الشعور جدا عادي ... وتتغلب عليه ... اذا كيفت نفسك بمحلك واستمتعت بوقتك .. وكان عندك اصدقاء ينتشلونك من جو و موود الحزن .. الى جو الفرح والمرح ...
واهم شي اذا مرت على الواحد هذي الحاله لازم يلجأ لأحد ينسيه هالموضوع . لأنه راح يأثر على مودك وتعاملك ودراستك اعتقد .. على بلاطه يخليك مالك نفس لشي ابد

طبعا اريحكم امريكا ... شعبها يمكن من افضل شعوب العالم مرح ورهيب وكلا بحاله .. قليل تشوف زي في الأفلام بصراحه

طبعا على بلاطه علشان مايقول بعضكم من الفئه الي تحب تنبرش عالواحد .. انا بعرفكم على نفسي واعلمكم السبب ليش

انا ماكنت مبتعث للدراسه هناك لا ... انا بعثني وطني لطبيعة عملي ..عملي الآن طيار حربي ... فدوراتي كانت هناك الحمدلله

يعني معاشرتي كانت مع الأمريكان كانت كثيره شوي ..طول الوقت معهم .. مريت بامريكا في ارضها وسماها ... وغير اجازاتي بعد كانت هناك بأمريكا

يعني فتره من العمر متكرر كنت هناك تقريبا


هذي مقدمه كامله عن الموضوع ... وراح اخش الحين بالموضوع..


ابد اتكلم عن العالدات الاأجتماعيه اللفظيه .. مثل sir ..mam ...mr...miss...mrs ..thanks ..please

MR
نبدأ بكلمة mr
هذي الكلمه في امريكا واتوقع بالعالم الغربي كله .. تستخدم قبل التعريف بالأسم ..
يعني هنا عندنا ننادي الواحد بأسمه .... هناك لا

ينادون الواحد قبل اسمه ب mr ثم اسمه ... يعني راح تشوفون حتى الدكتور او المحاظر عندكم ..ينادون طلبتهم ب هالأسم

فيجب انها تستخدم هناك قبل الأسم دائما .. ولا يذكر الاسم بدون هذه الكلمه ...


miss

ستخدم كلمة miss .. نفس استخدم mr لكن للأنثى العازبه ... وعادة اذا الشخص لايدري هل هي متزوجه او عازبه .. تستخدم لأفتراض ان التي امامه .. عازبه .. مالم يرى خاتم الزواج

طبعا هناك كيف تعرف انها متزوجه ... بدبلة الزواج تعرف انها عزابيه او او متزوجه .. وبناء عليه تعرف تخاطبها ...

لكن الأكثر والاغلب تستخدم هذه الكلمه للعموم مالم المرأه نفسها تصحح لك


mrs او ms
تستخدم لنداء السيده .. يعني اذا تيقنت انها متزوجه .. تناديها mrs واسمها

مثل mrs jeny



sir

هذي الكلمه اذا تكلمت مع احد ولا تعرف اسمه .. وتستخدم في اخر الجمله مثل yes sir ... ok sir....Excuse me sir

مثل كذا بالظبط ... يعني لما تتكلم مع مديرك او اي احد بالشارع .. يعني زي ايه طال عمرك عندنا ...

mam

نفس كلمة sir بس للأنثة ... تستخدم في اخر الجمله ... ولكن مثل ماقلت لكم هذي للأنثى


thanks
طبعا كلنا نعرف معناها وهي شكرا... بس الفرق هناك انها لازم لازم لازم تستخدم اذا قدم لك احد شي او عرض عليك شي
يعني هنا اذا عطانا الهندي شي او شالنا .. يمكن مانستخدمها .. لكن هناك تستخدم حتى لو واحد خدمك وبفلوسك .. يحبذ استخدام هالكلمه .. وراح تشوف الصغار والكبار يستخدمونها ...


please

هذي من اهم الكلمات وتستخدم بعد اي طلب ... حتى لو كان من حقك ... صح ان معنااها ارجوك عندنا ... لكن هناك لا ماتستخدم بهالمنطق .. انما تستخدم لأظهار التقدير والفضل من مقدم الخدمه ...

يعني طلبت اي شي مثل بيبسي .. لازم تدف هالكلمه في اخر الطلب
can i have a pepsi please ?
زي كذا بالظبط .... خلاصة الموضوع لازم الكلمه هذي تعود لسانك عليها في اي طلب لك ...

ـــــــــــــــــــــــــــــــــــــــــــــــ

كذا تقريبا خلصنا من العادات اللفظيه ... نتكلم على العادات الاجتماعيه ... وهي لاتقل اهميه .. بل يمكن اهم ...


hold the door when you coming throu.....



امسك الباب عند المرور... هذي العاده حنا هنا بديرتنا نفتقرها من جد ...
يعني عادي نفتح الباب ونمر فيه بالسوق ونخليه ينصك على الي ورانا وعادي ولا كننا سوينا شي

بأمريكا لا ... اذا انت اول من مر ... الله لايهينم تمسك الباب علشان الي وراك يمر واذا مروا تتعداهم .. مع انك اول من دخل ...
وراح تشوف الصغار والكبار .. النساء والرجال يسووونها لك ...... وعلى فكره وللمعلوميه ... تراهم يدرسون عيالهم بها الشي من الصغر

ـــــــــــ


stay in the line ...



اللاين او اللطابور... هو شي مقدس في امريكا ... بمعنى انه لايفرق بين اي احد .. صغير او كبير ... ذكر او انثى ===<<<راحت عليكم يالسعوديات مافي تجون اخر شي وتطمرون بالصراف ولا الخطوط

اللاين عندهم مايفرق بين ولد وزير ولا امير .. كل العالم متساويه بالظبط ...
وتذكر عند مخالفتك اللاين .. توقع اي واحد يزعق عليك ويقول لك ارجع مكانك ... ويحرجك قدام الناس

علشان كذا مهما تشوف اللاين طويل .. لاتتوقع انك بتطمر عليه ابدا ... ودايما حاطين لك كذا حل ..ز ياتخلص امعاملاتك بالنت او بالتلفون او من الكاشير ...



ـــــــــــــــ

always SMILE



الابتسامه عندهم في امريكا .. زي السلام عندنا ...
هنا عندنا اذا انت مار وابتسمت لأحد بيقول لك ..سلامات .. ولا وش فيه ؟ ... ولا فيه شي يظحك ؟!

هم لا الابتسامه عندهم عن قولة hi
يعني وانت تمشي ومار من ناس في wellmart طقه بأبتسامه ... لأنك بتشوف كل الناس اذا رحت هناك .. تسوي لك كذا ...وهذا عادي عندهم

طبعا اخواني العزاب اذا ابتسم لك احد لاتلتفت لخويك وتقول شف خقت علي .. ترى الوضع هناك طبيعي وعادي ومعناها غي المعنى اللي ببالك


ــــــــــــــــــــ

why you staring at me ?!!!



انبتهوا انتبهوا ... وانتوا تمشون بسوق ولا بشارع ... تناظرون شخص بعينه ... هناك كل واحد بحاله .. يعني يمشي .. ماتدري وش يناظر ..

في مقوله بأمريكا تقول .. LOOKING WHAT ARE YOU HEADING
يعني ناظر للمحل الي بتروح له بس او الي تبيه ومتجه له


عادة اذا ناظرة واحد بعينه وانتبه لك ..وطولت وانت تناظره .. على طول بيجي يسأل .. وبيقول فيه شي ..

يعني عود نفسك وانت تمشي ماتناظر احد بعينه .. اللا اذا الشخص هو حط نفسه محل للأستعراض ويبي الناس تطالع له ..


يتبع



 

 


اخر تعديل كان بواسطة » فارس بدون سيف في يوم » 08-04-2011 عند الساعة » 08:41 PM.
فارس بدون سيف غير متواجد حالياً
Facebook Twitter 0 اضافة رد مع اقتباس
قديم 08-04-2011, 06:02 PM   #2
فارس بدون سيف
من كبار رياضيي الإقلاع
 
الصورة الرمزية الخاصة بـ فارس بدون سيف
فارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحب
ـــــــــــــــــــــــــــــ


keep some distance whenever you talk whenever u sit



طبعا معنى الكلام هذا .. انه اذا جيت تجلس وركزا معي تكفون بهالنقطه لأنها مهمه شوي ..

اذا جيت تجلس بكرسي انتظار في سوق .. في محل ... انتبه تجلس جب واحد لاصق فيه .. انتبهوا

الوضع هناك .. انه اذا جيت تجلس جنب شخص غريب .. تترك بينك وبينه محل شخص تقريبا
...

طبعا مايجلس جنب بعض او لاصق ببعض ... اللا العشاق او المتزوجين تقريبا ..


ونفس الشي اذا جيت طبعا تتكلم مع احد... لا تلزق فيه او تكون المسافه قريبه مثل عندنا ... لا هم الوظع الطبيعي عندهم انه تكون مسافه يقدر يدخل واحد بينكم


ــــــــــــــــــ


don't raise you voice please



طبعا حنى العاده اذا جينا نسولف مع بعض .. مع الحماس نرفع صوتنا ولا نزاعق شوي .... هنا لك اذا رفعت صوتك ... يحسبون ان فيه مشكله ولا تتهاوش ...

صار لي موقف مره .. كنت اسولف مع خويي السعودي زي العاده وصوتنا كان عالي .... الامريكان يعرفون اننا اخويا.. المهم يخلصنا السواليف جوني .. قالوا سلامات وش السالفه وراكم تتهاوشون ؟!! جلسنا نظحك انهم يحسبوننا نتهاوش .. وحنا نسولف اصلا ..

فالعرف عندهم انك اذا جيت تتكلم .. تتكلم بصوت واطي مسموع طبعا بدون نبره مرتفعه .. وعادة مايستخدمونها اللا بالهواش او النقاشات عندهم

عشان كذا هدوا الوضع وروزقوا وانتم تسولفون مع بعض ولا معهم

ـــــــــــــــــ

don't touch my hand when we walk



طبعا هذي من اكثر العادات الي تقع بيننا اول مانجي امريكا ... طبعا حنا بالسعوديه متعودين وحنا نسولف ولا نتمشى .. نشبك ايديننا مع اخويانا

بأمريكا لا ... الي يشبك يدينه وكان ولد مع ولد يعتبرونه شاذ '' GAY '' .... الي يشبكون ايدينهم هناك هم ال coupls والمتزوجين .. او الأطفال مع اهلهم ... لكن ولد مع خويه يشبكون ايدنهم وهم يمشون هنا وقعت بالمحظور


ـــــــــــــــــــ

no SAUDI KISS in USA !!!



هذي اكثر غلطه بأمريكا غير مقصوده تحدث مننا اول مانجي وشفنا اخويانا

التبويس على سلام الخشوم هناك يعتبرونك GAY على بلاطه وبدون مبالغه ....
طبعا افضل اني اكتب هالتحذير وتعرفونه احسن من انه يصير لكم .. وكلن يشوفكم هناك بأستغراب ...
في قصه صارت لواحد من اخوياي قدامي

كنت مع واحد من اخوياي الأمريكان واقفين .. وشفنا سعودي توه واصل بكرتون امريكا ويسلم على خويه .. المهم .. الامريكي الي معي انصدم .. وقال ياخي هذا شفته امس مع بنته .. وكيف يصير GAY .. قلت له لا لا ههههه هذا كذا عندنا السلام مب زيكم ...

فالي بقول لكم السلام بدال مايكون تبويس .. خلوها بالاحظان زي سلام الزوله

ــــــــــــــــــــــــ

don't forget the TIP



ال TIP في امريكا هو البخشيش .. وهي شي مهم وذوقي لاتنسى تسويه..

طبعا ليش لازم نبخشخش .. لأن بقول لكم شي بأمريكا المظيفين والجراسنه حقين المطاعم ياخذون اقل شي بأجر الساعات ..والسبب هو انهم المطعم معطيهم حرية اجرهم من البخشيش .. بمعنى اسهل لكم ... البخشيش هو الراتب الأساسي للجرسون او الجرسونه .. وهو الي يعتمد عليه اكثر من راتبه ...

طبعا البخشيش في امريكا هو عادة من 15% الى 20% كحد اقصى اللا اذا انت تبي تزود لأنك مبسوط مره منخدمة الجرسون ..

وطبعا البخشيش تقدر تحطه كاش او اذا انت تحاسب بالبطاقه تخليهم يسحبون بعد الحساب حق البخشيش

طبعا انا ما انصحك .. اللا تعطي البخشيش كاش قدر الأمكان ..تجنب انك تبخشش بوصل البطاقه

وعادة هالشغله ماراح تفهمونها اللا اذا رحتوا هناك وشفتوها بعينكم

بس الي ابيكم تتذكرونه ان البخشيش خلووه كاش دائما وبس
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــ

طبعا الحين خلصت من اهم العادات والسلوكيات ... راح اتكلم الحين عن بعض العادات التي لازم لازم نتجنبها ... واذا ماتجنبناها راح نضع انفسنا بدون ماندري في مخالفات قانونيه او جريمه .. ممكن تقضي على مستقبل الواحد فينا .. مع اننا ماقصدنا ولا تعني عندنا اي شي ابد


وارجوكم ارجوووكم ارجوووكم ركزوا معي بهذا القسم في موضوعي


يعني الي فوق كنت اتكلم عن الذوق واذا ماسويتها ماتتعرض لأي قضيه........ لكن الحين الي بتكلم عنه لو سويتها تأكد انك دخلت في قضيه جنائيه في النظام الأمريكي ... مع انها ماتعتبر مخالفه عندنا في مجتمعنا ابد

علشان كذا ركزوا معي ...

ـــــــــــــــــــــــــــــــــ
Sexual harassment === التحرش الجنسي

التحرش الجنسي .. هذي عندهم من اخطر القضايا ومن الجرائم التي تحاسب بدون رحمه عادة بالقضاء الأمريكي .. وراح اتكلم عن بعض العادات عندنا تعتبر عندهم من انواع التحرش الجنسي

طبعا التحرش الجنسي .. يكون باللمس او النظر او التلفظ
ظحايا التحرش الجنسي هم الأطفال ثم النساء ثم بالمرتبه الاخيره الرجال pb02


اعذروني راح اتكلم عن هالموضوع شوي بأريحيه ... واكيد اخواني واخواتي الي هناك مبتعثين منذ مبطي راح يعذروني ولا راح يلوموني لأنه من جد قضيه مهمه جدا جدا جدا

ـــــــــــــــــــــــــــــــــــــ
don't touch me please



حلو اللمس هو نوع من النواع التحرش الجنسي ... بمعنى انه يحق للشخص الملوس ان يرفع قضيه تحرش جنسي

طبعا لو تلاحظون حنا تقريبا عادي عندنا الوضع .. لكن هم لا ... وجادين بهالشي
يعني اخوي العزابي او المتزوج ... لا تتهور وتمون على وحده مافيه معرفه تامه بينكم .. وتسولف وانت حاط يدك على كتفها ولا شعرها .. ولا حتى على يدها .. لأنك بتروح غلطه من جد لو اشتكت عليك

طبعا ودي اقول كلمه مهمه لأخواتي المبتعثات ... اذا حثل لكم اي شي .. لاتعتقدون انهم على نياتهم ولايقصدون .. لا تأكدوا انهم عارفين نظام ديرتهم ويتوقعون انكم انتم الي ماتدرون.. فأذا لاسمح الله حصل لكم بأي مكان .. لاتترددون انكم تبلعون المسؤولين عنكم بأسرع وقت .. والله يحفظكم

ــــــــــــــــــــ
take your hands on my kid !!!

هذي من الأخطاء الي تودي بداهيه في امريكا وهي عندنا مافيها اي شي .. بمعنى عندنا بالسعوديه عاديه نلمس شعر البزر .. نرفعه .. نبوسه ... نحطه بحجرنا

هنا بأمريكا .. انتبهوا تشوفون طفل عمره 5 سنين مملوح وتجون تحطون يدكم عليه .. ولا تبوسونه ... هاصه قضية البوس انتبهوا ..

يعني اخواتي البنات .. سالفة ياقلبووووووووووو ولا يازينووووو وتجين تلمسين البزر ولا تمطخينه .. من البزر على السجن لو شافوك اهله يقدرون يرفعون عليكي تحرش جنسي ... وطبعا راح يكون اخطر لو كان المبوس ولد يعني من جد بوقتها اتوقع تروح غلطه

بقول لكم سالفه صارت قدامي لواحد من اخوياي ...

كنت بالبيت وعندي خويي الامريكي وزوجته وولدهم عمره 5 سنين ... المهم جاني سعودي توه جاي بكرتونه من السعوديه وقال بسير عليك .. قلت حياك
المهم جا ... وجا سلم على الضيوف الي عندي الأمريكان ... المهم جا شاف البزر جا شاله .. وحبه .. اهله حسيت انهم تظايقوا شوي .. بس يقال لهم مسحوها بوجهي ..
المهم راح الوقت وجانا البزر عقب ماخلص لعب .. جانا وجا خويي وشاله وحطه على حجره ...

طبعا عندنا عادي ولا نروح نقول شي ... بس عندهم من جد قويه ..

المهم طارت عيونهم .. جيت انا على طول تداركت الموقف وقلت له وخر البزر .. من حجرك .. خويي هاف وقال ليش .. وبغا يحلت البزر من الخوف

المهم انا اعتذرت لعائلته .. ووظحت لهم انه عادي عندنا مره وكذا نلعب مع البزران ... وتفهموا .. وبعدين شرحت لخويي وش سوى وانه غلط هنا ... واكيد بعد هاللدغه الي بغت توديه بداهيه.. ماراح ينسى وش سوى


يتبع



 

 


اخر تعديل كان بواسطة » فارس بدون سيف في يوم » 08-04-2011 عند الساعة » 07:24 PM.
فارس بدون سيف غير متواجد حالياً
Facebook Twitter 0 اضافة رد مع اقتباس
قديم 08-04-2011, 06:03 PM   #3
فارس بدون سيف
من كبار رياضيي الإقلاع
 
الصورة الرمزية الخاصة بـ فارس بدون سيف
فارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحب
ـــــــــ

watch your mouth please



طبعا مثل ماقلت ان الكلام الغزلي لشخص ماتعرفه او الكلام من السره للركبه عند شخص ماتعرفه يعتبر تحرش جنسي

يعني حبايبي العزاب انتبهوا انتبهوا انتبهوا ترى ماابالغ وانا احذر .. وكم من واحد جاب الطعه علشان شي بسيط

ـــــــــــــ

what are looking at ?!!



النظر او مايسمى عندنا القزقزه ... القزقزه هناك تعتبر نوع من انواع التحرش الجنسي ايضا ..يعني تجي تطالع نظرات وحشيه وغريبه .. تأكد انه راح تجني على نفسك ويحدث شي لايحمد عقباه
لذلك اخواني العزاب هدوا اللعب تكفون ... واذا معزمين وملزمين .. خلكم حذرين من جد

ومن مبدأ اني حذرتكم انها جريمه في الدنيا .. فمن الاولى ان احذركم واذكركم انها خطيئه في ديننا الحنيف .. وهناك حديث للرسول صلى الله عليه وسلم فيما معناه ان النظر يزني .. وزناه النظر

طبعا انتهينا من انواع التحرش الجنسي تقريبا .... راح الحين اتكلم بأشياء عامه ومهمه ... وتعتبر ايضا مخالفات قانونيه ايضا .. وتعتبر عاديه عندنا بعض هذه الممارسات .. لكن تعتبر ايضا جريمه في امريكا او في اغلب دول العالم الغربي





kids are a serious case in USA




الأطفال ...هم اهم قضيه في امريكا ... وتصنف قضاياهم انها اخطر القضايا التي لايلتمس فيها الرحمه للمذنب..
من الممارسات العاديه عندنا ان الاب احيانا اذا عصب يدبج ولده .. ولا مخمس خطافي ... ولا يصرخ عليه لين يخليه من الخوف .. الله يكرمكم يعمله الولد على نفسه

هناك لا ... ممنوع ظرب الأطفال في اي حال من الأحوال .. وممنوع الصراخ بشكل وحشي على الأطفال ..
وانتبه مهما سوا لك طفل شي تروح تعصب عليه وتلعن خيره ... فيه طرق عديده تعالجها وهي انك تعلم والديه .. او تتلافاه خير شر .. وبكذا تبعد عن المشاكل وترتاح

ـــــــ


the minors....underage




القصر ... لايختلفون خطوره عن الأطفال اذا لم يكن اخطر بسبب كثرة الأحتكاك بهم سواء المقصود وغير المقصود ...

وطبعا يختلف سن القصر من ولايه الى اخرى ..فأعلى الولايات تعتبر القر الى سنة 18 وبعض الولايات تعتبر الشخص قاصر الى 17

طبعا تعد خطورتهم بأمريكا ... انه من الصعب تعرف ان الذي امامك قاصر او لا ...
ولنتكلم بوضوخ وعمق شوي ...تجد امامك فتاه مكتملت النمو .. من الوهله الأولى تعتقد انها بالعشرينات .. ولكنها بدون مبالغه بسن 16

ونفس الحال للشباب .. تظن الذي امامك بالعشرينات ويطلع الاخ عمره 16 سنه

طبعا من الأشياء التي يجب الحذر منها هي التعامل الجاف معهم مثل الظرب ....
او مثال عامي ... يجيك واحد وانت تدخن .. يقول لك عطني سيقاره ويطلع قاصر !! وهنا تروح غلطه

طبعا .. نصيحه لأخواني العزاب ... انتبهوا انتبهوا انتبهوا من التهور مع هذه الفئه ...

وهذه الفئه معروفه اصلا بخطورتها مع الامريكان نفسهم ... فكيف السعودي الي يناظرونه منظور فيه طمع ..

فأنتبهوا وأبعدوا من هذه الفئه

ويمنع تصويرهم .. او التجول معهم ... للمعلوميه هذه الفئه تجدها بشكل كبير في صالات السينما لأنها هذي اماكن ترفيههم المسموحه لهم ..

فأذا كان غصب تتعامل مع واحد وشاك .. مافيها مشكله تقول can i see you I.D.
يعني اذا شكيت لو واحد بالميه اطلب ID مافيها شي ... حتى لو طلب سيقاره منك

وهذا تقريبا كل شي عنهم .

ـــــــــــــــــــــــــ

smoking area


طبعا اخواني المدخنين وانا منهم ... ترى رحتوا فيها ...

سالفة تدخن بسوق ولا مطعم على كيفك ولا بحديقه ولا بملاهي على كيفك ... لا .. وانسى
في كل محل هناك اماكن مخصصه للمدخنين .. وغيره ممنوع تدخن بالاماكن الي مافيها شعار التدخين مسموح ...
طبعا لاتستغرب لو عابطت وولعت زقارتك يجي واحد ولا وحده وتصرخ عليك وتقول لك لو سمحت طف زقارتك يا ابو الشباب .. لأنه يعتبرونه مو من حقك تلوث هواهم .. وان لك مكان مخصص دخن فيه

والمكان الوحيد المسموح االي تدخن فيه بحريه .. هو الشارع

طبعا فيه تنبيه بسيط .. الفنادق بعد ممنوع التدخين فيها .. وفيه فنادق تسألك انت مدخن او لا .. والسبب بذلك علشان تحطك بغرفه مسموح التدخين فيها اذا عندهم .. وعادة يخصصون دور كامل لغرف المدخنين..
طبعا عقوبات اغلب الفنادق لو شموا ريحة دخان والغرفه ممنوع التدخين بها .. تقريبا 250 دولار .. هذا لو شموا او شافوا اثار تدخين ..يعني تقرياب 960ريال غرامه
طبعا بتقول بدخن واغبي الاثار .. انتبه .. في 99% فنادق امريكا بكل غرفها حساس للدخان يرن عليهم لو طلع دخان ... غير ان الهاوس كيبر لو شكت راح تحفر وراك لين تلقا اثر وتنكبك

فالقضيه جداجدا هامه وخويي واخوي هههه قد اكلوها مع انهم على قولهم محتاطين


ــــــــــــــ

Copyrights



قضية حفظ الحقوق .وهي اخر فقره بتكلم عنها في الموضوع. هي قضيه مهمه جدا في الجانب الأمريكي ..يعني شغلت copy للأغاني والبرامج انسوها انسوها

راح انبه انه القانون الامريكي الفيدرالي لحفظ الحقوق تصل عقوبته الى 250 الف دولار عند انتهاكه .. طبعا الي يحسبني ابالغ او مو مصدق ..يشتري فلم ويشوف تحذيرهم عليه ويشوف كم العقوبه عند انتهاك حقوق الطبع او النسخ

يعني شغلت موقع طرب وموقع الحان انسوووووها وانتبهوا انتبهوا ... ترى كل ip يدخل النت يتابع من ال fbi واذا شافوكم تنزلون برامج او اغاني .. راح تعرضون انفسكم لعقوبات من السجن الى الغرامه هذي
وعلشان كذا تشوفون الشعب الامريكي ماياخذ اغانيه اللا من i tunes
فأنتبهوا

غير كذا زملاي المبتعثين .. انتبهوا من سالفة سرقة البحوث بالنت
.... انا اقسم بالله العضيم ان واحد من اخوياي باقي له اسبوعين اعتقد ويتخرج من دورته هنا بأمريكا وسرق بحث بالنت وغير اسمه .. وانطرد !
يعني بعد ماتعب وكل شي انطرد علشان بحث .. ولو ماتدخلت السفاره لأنه ظابط وعنده دوره ويعد دوبلوماسي .. ولا كان راح فيها

فأنتبهوا انتبهوا ... هالشي عندهم مقدس وياخذونه جد


ـــــ

always take the shopping receipt... always always



الفاتوره بأمريكا .. من الضروريات مثل السلعه الي اشتريتها بالظبط
هي اهم شي يخليك تسترجع وتبدل .. هو الشي الوحيد الي يثبت لهم حتى لو كان الموظف يذكرك تماما انك اخذت من عنده امس .. ماراح يسترجع لك او يبدل اللا بالوصل

مالها اهميه بالسعوديه ولا نحتفظ فيها ...هنا لا ... شي مهم جدا عندهم وفيه ناس تحفظ فواتيرهم بملفات عندهم بالبيت من اهميتها ..تخيلوا !!

طبعا فيه شغله مهمه جدا جدا .. اذا تقضيت من محل مشهور لا ترمي الفاتوره وانت بالسوق .. لأنك ممكن تدخل محل .. ويرن عليك الانذار صدفه لأنه معلق او الكاشير مادخل ارقام السلع الي اشتريتها . وتتفشل .. طبعا راح يفتشونك ..ومارات تحمي نفسك اللا بالفاتوره ...
يعني اهم شي وانت بالموول خل فواتيرك معك في كل كيس لأي محل تقضيت منه .. لاترميها ابد
تذكر يمكن ماتعجبك السلعه وتجي تبدلها .. او تسترجعها.. فهي من الضروريات المهمه الي حنا ماتعودنا نحتفظ فيها بالسعوديه

وبالنهايه


اخواني الي بيروحون امريكا قريب او اي توهم واصلين ولا احتكوا بالمجتمع بعد ... صدقوني ماكتبت هالموضوع اللا من حبي لكم ومن حرصي كل الحرص ان ما احد يغلط غلط غير مقصود .. وممكن هذا الغلط يكلفه مستقبله
وتأكدوا اني كتبت هالموضوع من خبره وعصارة تجارب وعصارة حياه هناك واحتكاك معهم

وابيكم تتذكرون ان العادات الايجابيه .. هي اصلا عاداة الأسلام امر بها عندنا .. لكن للأسف نلاحظ انهم هم الي يتبعونها مثل الأحترام لأنسانية الشخص .. العطف على الحيوان ...احترام الوقت ...وغيرها من العادات الايجابيه راح تشوفونها هناك ... لكن للأسف حنا الي ابعدنا عنها ..
اخواني واخواتي ... اتمنى لكم التوفيق ... صدقوني مثل ماقلت لكم كتبت الموضوع هذا وتعبت فيه من حبي لكم ...

صدقوني اهم شي يهمني انكم تدعون لي بالتوفيق .. ووالتقييم انتم وظميركم
بس اهم شي لايجيني واحد ينبرش ويتلفظ علي بكلام بايخ بالموضوع .. وهذا كثير يحصل ..لأنه من جد احباط وفيه عدم تقدير لكاتب الموضوع

تحياتي لكم واتمنى لكم التوفيق ..وحاظر لأي استفسار بالموضوع

ودمتم بحب



 

 


اخر تعديل كان بواسطة » فارس بدون سيف في يوم » 08-04-2011 عند الساعة » 08:44 PM.
فارس بدون سيف غير متواجد حالياً
Facebook Twitter 0 اضافة رد مع اقتباس
قديم 08-04-2011, 06:35 PM   #4
الـ سحر ~
عضو فعال
الـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحبالـ سحر ~ فوق  هام السحب

بالاجمال كلها نصائح لها اسس بديننا الاسلامي بس مين يطبقها هنا

الله يعطيك العافية ويعيننا كلنا ..



 

 

الـ سحر ~ غير متواجد حالياً
Facebook Twitter 0 اضافة رد مع اقتباس
قديم 08-04-2011, 06:46 PM   #5
F A H E E D
موقوف بإصلاحية الإقلاع
F A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحبF A H E E D فوق  هام السحب
إقتباس »
مكآني
بآآآك

موضوعك اسطوري بكل معنى الكلمة

-

إقتباس »
يعني اخواتي البنات .. سالفة ياقلبووووووووووو ولا يازينووووو وتجين تلمسين البزر ولا تمطخينه .. من البزر على السجن لو شافوك اهله يقدرون يرفعون عليكي تحرش جنسي ... وطبعا راح يكون اخطر لو كان المبوس ولد يعني من جد بوقتها اتوقع تروح غلطه
ههههههههههههه والله انك صادق بناتنا من يشوفون بزر خموة ههههههه

-

موضوعك جدآ مفيد والله

فية كثير من العادات الي نجهلها شكرآ اخوي بحجم السماء

الله يوفقك ويسعدك على هالتنبيهات

راح احفظة بالمفضلة واحفظة براسي مابي اتورط

شكرآ



 

 


اخر تعديل كان بواسطة » F A H E E D في يوم » 08-04-2011 عند الساعة » 06:53 PM.
F A H E E D غير متواجد حالياً
Facebook Twitter 0 اضافة رد مع اقتباس
قديم 08-04-2011, 06:48 PM   #6
منسم النسيم
رياضي مميز
 
الصورة الرمزية الخاصة بـ منسم النسيم
منسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحبمنسم النسيم فوق  هام السحب
يآ سلآم عليك .. إبدآع والله ..

تنسيق وصور وحركآت وخفة دم .. وطيار .. ياخي أنت توحفة

بخصوص الأشيآء اللي ذكرت كلهآ أشوفهآ حقوق منسية عندنا أو مو مفعلة ..

ما عدآ قصة الصغار والتحرش وكذآ ..

يعني لو فيه ولد صغير أبتسم لي أروح مثلاً أبتسم أو أطق حولة عآدي ولآ ؟

وبخصوص الأشياء المنسوخة وكذا .. لو مثلاً أخذت لاب توبي معي .. وفيه أغاني وأفلام وحركآت ؟ يفتشون عليهآ ؟

ما علمتنآ كيف تعامل الأمريكآن مع السعوديين يعني نظرتهم لنآ .. إيجآبية ولا سلبية ؟ وش اللي تسمعه منهم بما إنك عشت معهم وعاشرتهم .. ؟

سؤال أخير ..
بمآ إنك عآيش عندهم وساحب على ديرتك وأهلك .. ما فكرت تآخذ أمريكية ؟


-



 

 

منسم النسيم غير متواجد حالياً
Facebook Twitter 0 اضافة رد مع اقتباس
قديم 08-04-2011, 06:53 PM   #7
فارس بدون سيف
من كبار رياضيي الإقلاع
 
الصورة الرمزية الخاصة بـ فارس بدون سيف
فارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحب
إقتباس »
الرسالة الأصلية كتبت بواسطة منسم النسيم »
يآ سلآم عليك .. إبدآع والله ..

تنسيق وصور وحركآت وخفة دم .. وطيار .. ياخي أنت توحفة

بخصوص الأشيآء اللي ذكرت كلهآ أشوفهآ حقوق منسية عندنا أو مو مفعلة ..

ما عدآ قصة الصغار والتحرش وكذآ ..

يعني لو فيه ولد صغير أبتسم لي أروح مثلاً أبتسم أو أطق حولة عآدي ولآ ؟

وبخصوص الأشياء المنسوخة وكذا .. لو مثلاً أخذت لاب توبي معي .. وفيه أغاني وأفلام وحركآت ؟ يفتشون عليهآ ؟

ما علمتنآ كيف تعامل الأمريكآن مع السعوديين يعني نظرتهم لنآ .. إيجآبية ولا سلبية ؟ وش اللي تسمعه منهم بما إنك عشت معهم وعاشرتهم .. ؟

سؤال أخير ..
بمآ إنك عآيش عندهم وساحب على ديرتك وأهلك .. ما فكرت تآخذ أمريكية ؟


-
بخصوص سؤالك عن اللاب توب والأشياء المنسوخه ... شف يالغالي نصيحه لك .. لاتحط نفسك ابد بموقف زي كذا .. لأنه يمكن تتعرض بالمطار للتفتيش .. وصارت مع ناس اعرفهم .. بس كانوا الحمدلله محتاطين

وبخصوص نظرتهم ... طبعا من اول كانت بطله والحين شوي تغيرت بعد 11 سبتمبر .. لكن هدت الاوظاع شوي ...

مجملا هم مايفكرون اللا بيومهم .. وبعضهم بدون مبالغه مايدري اللا يحسبك بير نفط ..خاصه بالجنوب عندهم ولايات الأباما وطقتها


بخصوص سؤالك الأخير .. والله مدري هو استهزاء ولا لكاعه ولا طقطقه بس ابشر برد

انا بديرتي السعوديه الحين الحمدلله ... والي يروح لغرض هدف بعثته الدوله مايعتبر ساحب على اهله .. ولا صاروا كل الي هنا ساحبين على اهلهم ...

وعلشان اجاوبك شخصيا على سؤالك الأخير الهزلي .. ابتعثتني دولتي السعوديه جعلها العز ...علشان اصير طيار حربي .. واذا جت حرب لاسمح الله والله لايقوله ... انت تتغطى بالبطانيه او جالس بالقبو بيتكم وانا في السما ادافع عن وطني ووصيتي مكتوبه

انا هناك كنت علشان عملي يتطلب اني اخذ دوراتي من هناك ... وعملي الحمدلله لخدمة الوطن ولي الشرف


وياليت لاهنت تتنقي وتترقى بألفاظك شوي .. والمشكله انك معك رتبه يعني عندك خبره كيف ترد ..

قدر شوي شعور كاتب الموضوع وقدر انه تعب فيه علشان يوصل الفائده للقراء
وترى هالموضوع مخصص للمبتعثين مو الي ساحبين على اهلهم


واشكرك على مرورك



 

 


اخر تعديل كان بواسطة » فارس بدون سيف في يوم » 08-04-2011 عند الساعة » 07:21 PM.
فارس بدون سيف غير متواجد حالياً
Facebook Twitter 0 اضافة رد مع اقتباس
قديم 08-04-2011, 07:12 PM   #8
دحــوومْ
خبير اقلاعي
 
الصورة الرمزية الخاصة بـ دحــوومْ
دحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحبدحــوومْ فوق  هام السحب
فعلا موضوع آفآدني بأشيآء كثير

آشيآء مآ كنت آعرفهآ وعرفتهآ , وآشيآء آيضآ كنت سآمع بهآ وتأكدت منهآ هنآ خصوصآ الكوبي رآيتس

الله يجزآك خير ويوفقك بدرآستك ..~

بآقي لي سنه وآقدم على البعثه هنآك .. (f)



 

 

دحــوومْ غير متواجد حالياً
Facebook Twitter 0 اضافة رد مع اقتباس
قديم 08-04-2011, 07:19 PM   #9
فارس بدون سيف
من كبار رياضيي الإقلاع
 
الصورة الرمزية الخاصة بـ فارس بدون سيف
فارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحبفارس بدون سيف فوق  هام السحب
إقتباس »
الرسالة الأصلية كتبت بواسطة دحــوومْ »
فعلا موضوع آفآدني بأشيآء كثير

آشيآء مآ كنت آعرفهآ وعرفتهآ , وآشيآء آيضآ كنت سآمع بهآ وتأكدت منهآ هنآ خصوصآ الكوبي رآيتس

الله يجزآك خير ويوفقك بدرآستك ..~

بآقي لي سنه وآقدم على البعثه هنآك .. (f)

الله يوفقك والله وهذا هو المغزى بالموضوع ...
وترى مخلص الدراسه يالغالي وعقبالك



 

 

فارس بدون سيف غير متواجد حالياً
Facebook Twitter 0 اضافة رد مع اقتباس
قديم 08-04-2011, 07:44 PM   #10
ToOFi *
مميز تقنية الاتصالات الحديثة
 
الصورة الرمزية الخاصة بـ ToOFi *
ToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحبToOFi * فوق  هام السحب
كحيلان ايام المراهقه

-




أغلب المذكور أعلاه بالذات الجزء الأول إسلامنا وصى فيه ,

اللي روعّني صدق واستغربت منه سالفة إذا حبيت البزر ولا لميته !!
يمكن لأنهم متعودين ع ذا السوالف ,
وتصير عندهم كثير فـ أي أحد يحب الطفل يحسبونه تحرش :s !

استمتعت صراحة وأنا اقرآ الموضوع ,
وأحس إني استفدت : )

مجهود تُشكر عليه ,
والله يرجع المبتعثين بالسلامة وبشهادات تنفع وطنهم ودينهم ,





 

 

ToOFi * غير متواجد حالياً
Facebook Twitter 0 اضافة رد مع اقتباس
إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح

الإنتقال السريع


الوقت المعتمد في المنتدى بتوقيت جرينتش +3.
الوقت الان » 05:27 AM.

الأن حمل تطبيق منتديات الإقلاع
 

تنبيه : كل ما يطرح من مشاركات يمثل رأي كاتبه ولا يمثل رأي إدارة الموقع

ترقية وتطوير » تحميل دوت كوم
Powered by: vBulletin Version 3.8.11
Copyright ©1999 - 2020, Jelsoft Enterprises Ltd.
جميع الحقوق محفوظة منتديات الإقلاع - شبكة الإقلاع -1999-2017