منتديات شبكة الاقلاع ®



الانتقال الى الصفحة الرئيسية عضويات التميز (الفضية + الذهبية + التجارية) موقع ieqla3 متخصص بجميع منتجات شركة apple أنظمة وقوانين وتعليمات الموقع   وقف شبكة الإقلاع الخيري مركز رفع الصور والملفات تابعونا على موقع تويتر بوابة الانباء
اقلاع بلاك بيري البحث السريع برامج الإقلاع المجموعة البريدية جوال الإقلاع أنظمة وقوانين وتعليمات الموقع للإعلان في شبكة الإقلاع
العودة   منتديات شبكة الاقلاع ® > المنتديات الإقلاعية > منتدى العيارين
التسجيل التقويم التأشير على جميع الاقسام بالمشاهدة


إغلاق الموضوع
 
أدوات الموضوع طريقة عرض الموضوع
قديم 05-02-2011, 05:35 PM   #1
جراك
من كبار شخصيات الإقلاع
 
الصورة الرمزية الخاصة بـ جراك
جراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحب

تسخير الجان لمنفعة الإنسان.!!

"أرخت تلك الليله سدولها الكستانئيه على تلك الاستراحه الشامخه عبر العصور ببنيانها المتهدم وأبوابها الحديديه وقطرات الندى على تلك الأبواب فتزيدها بهاء ورونقا خاصا .. ويكتمل جمال المنظر بصوت طير يسمى (بومه).. وتنصت إلى صوت البومه وصوت المجاري ينساب بهدوء في مجراه ولاشي يعكر صفوه.. وكأن صوت الضفادع والبلابل يغرد في أذني يارباااااااااااه ياربااه ماهذا المنظر الخلاب وكأن الماضي والمستقبل أنصهر في بوتقة اسمها الحاضر عزيزي القاريء لو اطلعت عيناك على هذا المنظر سوف تذرف دمعا ودما مختلطا وكأن حرب ضاريه قد اشتعلت لتو.. لمن ياترى هذا المكان الساحر المتبلفق بلفقتن لم أراها في حياتي .. ألتفت الى السياره الكيا المتوقفه بشموخ وعزه كانها فرس اصيله تستعد لسباق عظيم. نعم عرفتها انها فرس جراك وهذه استراحة جراك هنيئا لك ياجراك بهذا المكان ..
( ماودكم عضو بالعيارين يبلط بالادبي اكيد النهايه بتصير كذا !!)
كان جراك جالس بفناء الاستراحه وفجأه وقع نظره على غرفة في اخرها.. وهي غرفة عرفج الذي بنى هذا البيت الشعبي.. ومن باب ماجاء في الفضول واللقافه قال جراك لنفسه هالغرفه من يوم جدي اشترا هالمكان مااحد دخلها!. ابقوم وادخلها واشوف وش السر انها للحين مقفله.. فتح جراك الغرفه بعد ماكسر القفل ولقى العنبكوت معشش فيها..
وشاف له شنطة حديد وراح لمها ولقى فيها رمث ومحش واغراض واجد مايدري وشي.. بس يوم قام يحثبر تحت لقى كتاب اصفر ومكتوب عليه بالازرق انتظروا صديق نفسه.! لا عاد امزح عليكم الصدز لقى كتاب اصفر ومكتوب عليه بالاحمر تسخير الجان لمنفعة الإنسان.. استغرب وش اللي جاب هالكتاب هنا؟!. واخذه وفتح الكتاب يبي يقرأ وطاحت منه ورقه!! وبدا يقراها.. بعد ثمانين عاما سياتي شخص مقرود والدنيا لاعنتي جدفه لعن .. وبيحثبر بالشنطه وبيلقى الكتاب حتى بالماريه عليهم مطر وهو غايب عن الدوام .. قال جراك ايه ايه صح وشلون درى .. كمل جراك القراءة إذا هو مكتوب سياخذ هذا الكتاب ويتعلم مافيه من السحر والشعوذه ويصبح من اغنى الاغنياء حتى قروض الراجحي يبي يسددها .. فتح جراك خشته واستانس وقال أخ ليته قال بطاقات السواء بعد .. فجأه يوم قعد ينظر بالورقه لا فيه احد يكتب عليها ..وكتب وحتى بطاقات السواء يبي يسددها ياثور اقولك من اغنى الاغنياء وتقولي بطاقات .. جراك قام ينتفض وطش الورقه وحط رجله لم باب الاستراحه .. وهو يركض والورقه تطير بجمبه ويركض ويركض وهي مازالت تطير بجمبه .. ويلتفت ع الورقه لا مكتوب عليها والله لو ناصل جيزان .. جراك وقف وقام يصييح ويصييح.. وحس انه لامفر ولازم يرجع يقرا الكتاب.. رجع جراك وفتح الصحفه الاولى .. وبدأ يقرا وبدت تجيه هواء قويه والابواب قامت تصافق ويسمع صفير .. جراك قام يقرا بصوت عالي ويحسب انه يتهيأ له من الخوف .. وبعدها بلحضات طلع دخان بجمبه كثيف وجراك يكمل القراءه بعدها حس ان فيه احد جالس عنده وسمع صوت فيه نغطه قشرا.. يقوله خلاص سكر الكتاب لايجون القبيله كلهم ابكفيك انا .. جراك قام يتنافض والتفت شاف قطو اسود متكي على المركى .. وقال له معك شرنموخ مدرس صفوف اوليه لتعليم السحر!!. جراك اغمي عليه وماصحى الا والقطو شرنموخ ماسك لي المويا ويرش عليه.. ويقول ماحنا ناقصين نتأخر بالمنهج وتقعد تطلع علينا اشاعات اننا من استلمنا التعليم بدا يدج!. جراك ماقدر يتكلم وكل ما كلمه شرنموخ قعد يصيح.. وحاول فيه شرنموخ وقال له ترى الاسبوع الاول مافيه دراسه وكله عصيرات وبساكيت خلاص اسكت ياشاطر!. وبرضوه جراك ماسكت واستمر يصيييح ويصييح ولسان حاله الا ياليت الصياح يفكني.. قام القطو شرنموخ وبوبز على المركى وشبك اصابع يديه وقال اسمع ياجراك ياحبيبي انت دارس دارس صحيح ان الدراسه تقويم مستمر بس والله يا الواحد ماتاخذها الا اذا كنت تستاهلها ولا صكيتك باربعه ورح خل لجان الضعف تنجحك. جراك وهو متلعثم قال هالحيين انت قطو قطو اللي انا اعرف .. قال شرنموخ لا ماني قطو انا دجاجه وش تشوفني انت وجهك؟؟. انا جني بس متلبس بقطو.. اجل تبيني اطلع بوجهي الحقيقي عشان يزوغ عقلك لا خلنا كذا وعساك تفلح.. قال جراك طيب ياخوي الله يهديك ويثيبك! تراك مكبر المسأله وانا والله وقسم ويارب اموت هالحين وقسم بعد ماكان براسي اصير ساحر .. قال شرنموخ انت قريت التعزيمات اللي بالكتاب ولا لأ .. قال ايه قريتها بس والله والله وياربي انشـ.. قاطعه شرنموخ لاتقعد تمثمث خلاص قريته لازم تصير ساحر.. وانت اصلن مع خشمك وشكلك الملخبط ذا لو اني شايفك من مبطي ابعرف بذهانتي انك مشروع ساحر.. وقام شرنموخ ومسك جراك مع يده ودخل الى المجلس..
مشاهد متقطعه من ايام الدراسه!.
- القطو شرنموخ وجراك منبطحين على الارض وشرنموخ يناضر بالورقه ويشرح ويأشر بالقلم ومتحمس وجراك يهز راسه يعني فاهم..
- القطو شرنموخ مدخل راسه بوسط الزباله ياكل وجراك يلف على سطل الزباله ومعه الكتاب يراجع منه..
- جراك يحل الاختبار والقطو شرنموخ جالس يعسل بشيشة جراك.. صحيح الصاحب ساحب!!
- القطو شرنموخ يصحح الورقه ويضرب راسه بالجدار ويتفل ع جراك!!.
- جراك يحل الورقه مره ثانيه وشرنموخ يغششه بصوت منخفض لا احد يسمعهم!!.
- القطو شرنموخ يصحح الورقه ويناقز من الفرحه ويضم جراك ضمه ابويه!!.
- جراك اخير اخذ شهادته ومكتوب فيها ينقل الى الصف الثاني مع وجود مادة ضعف في سحر العطف!..
وبعد ما تخرج جراك ودعه شرنموخ وقاله السحر امانه عندك.. ورد عليه جراك وقال ابشر باللي يرفع راسك.. بس ودي انك علمتني وشلون اسخط الاودام فيه كم واحد قاهريني .. وقال شرنموخ: بعدين اعطيك كورس فيها.! بعد ذالك قرر جراك ان تكون غرفة عرفج هي غرفة العلميات وفيها بيضبط السحر لناس.. وجراك مثله مثل أي سعودي .. المسلسلات المصريه والافلام شكلت الكثير من تفاصيل خياله واول حاجه سواها مر العطار واشترى بخور وجاونيه.. وسوى له حساب بالفيس بوك وبدا يسوي لنفسه دعايه..
وفي يوم من الايام وجراك جالس يستقبل الناس بغرفته.. وكان اول من جاه وحده عمرها 20 سنه وقالت انا احب واحد بس هو مايدري اني احبه احبه واموت فيييه وابيك تسحره عشان يتزوجني .. ناضر جراك بالبنت لاهي مزيونه لين تقول مزيونه إكة هاص والباقين سبعة شريا .. قال جراك وش اسم امه قالت عمشا .. قال معك صوره له .. قالت ايه. انفجع جراك الولد حتى كلمة قبيح ماتكفيه وصف .. قال انتي متأكده انك تحبين هالشيء؟؟ قالت واموت فيه .. قال ليتك تموتين والله انتي الكسبانه.! هذا يامجنونه بششع بششع هذا لو ابكرهه انا وابي اسخطه! وش اسخطه؟؟ هذا مسخوط خلقه!! لعنبو غيرك حبيني انا اصرف لك .. قالت احبه احبه وهي تدلع .. قالت يابنتي انتي زي القمر وشوفي هو وشلون شكله.. هاذي جريمه كونيه في حق الانسانيه .. اخاف اشارك فيها ويلعني التاريخ.. لكن اسمعي انا والله مستخسرك بها الادمي لكن عندي كتالوج بمجموعة اسماء الفنانين اللي نقدر نخيلهم يحبونك ويشحنون لك بعد .. تشوفين الفنيله ذي؟؟ هاذي فنيلة تامر حسني ... الشعره ذي شعرة مهند.. العلبه ذي فيها سعابيل اللمبي تراه يمشي الحال مع خفة دمه. قالت لا لا لا ابي صنيتان حشاشة جوفي قال بكيفك اجل عطيني شيء منه.. قالت معي سرواله السنه وشعرة من صدره .. جراك ضحك ضحكه خبيثه وبطها مع بطنها وهو يقول اكيد انها شعرة من صدره ماهوب من مكان ثاني .. قال جراك خلاص روحي واعتبري زواجكم الخميس الجاي .. قامت البنت وعطت جراك بوسه .. قال جراك ماتبيني اسحر ابو صنيتان بعد؟؟
بعد ماطلعت البنت .. جاه واحد من عيال حارتهم واسمه غالب وقال انا ماني مصدق انك ساحر.! جراك انتفض من الغضب وحس بالاهانه.! قال احترم نفسك لا اسخطك هالحيين خنفس وافعصك برجلي.. ناضر بوجهه لاهو ماش تقل ماهو مصدق ولا خاف منه.. قال جراك انت تشوف البرعصي اللي ع الجدار ذا !! تراه خويي حمود البارح نكبني بالبلوت وقطع وانهزمنا وسخطته برعصي الكلب لين يتادب.! طارت بوهة غالب وبدا يخاف وقال بس حمود انا شايفه قال جراك تكذبني وانا الساحر رح دور حمود هالحيين اتحداك تلقاه.. تحمس جراك وجنب عن نفسه وقال تشوف النمل ذولي تراهم شيبان الحاره دبلو تسبدي البارح ع عشاء عند ابوي وسخطتهم نمل.! وهذاني حاط لهم سكر ياكلون وبعد شوي ابحطت لهم سم يذبحهم الكلاب.! قام ينتفض غالب وهو يصيح قال تكفى سامحني تكفى سامحني.. قال جراك انقلع فكك الله بغيت اسخطك ذبانه واتولجك بالفلييت..
بعد ماطلع غالب دخلت عليه وحده عمرها 38 سنه والظاهر وزنها فوق الميه.! وقالت ياشيخ زوجي اخذني لحم ورماني عظم, زوجي طلقني وتزوج علي.! قال جراك انا مدري وشلون تزوج عليك انتي المفروض مع هالوزن تنطرحين اكتتاب وعساهم يبدون فيك.. قالت تكفى ياشيخ ابيك تخليي زوجي يعذبها عذاب ماشافته بحياتها.. ابي لو انها اخذه لها سنه بسجن قوانتنامو كان ارحم لها من هالزوج .. قال جراك ابشري وصلتي والله لاخليها تتمنى سجن ابو غريب ماهو قوانتنامو وبتشوفين بعينك بعد يومين ..
وبعدها وجراك جالس في صومعته..الا الباب يطق وفتحه لاهو حسني مبارك.. حسني بص ياعم جراك .. انا ابتهدلت والقماعه ئلبوها كوسه على دماغي .. قال جراك ابشر باللي يقلبها فلفل احمر على روسهم بس فيه مشكله تقدر تجيب لي ثمانين مليون سروال سنه؟ثمانين مليون شعره؟؟ هاذي المشكله يابو جمال.. مركز خدمة العملاء للجن مايقدر يغطي هالعمليه .. قال حسني .. وانا يعني حنسى؟ماقبت لك شعرة قائد القيش .. انتا زبط لي القيش وسيب البائي علي.. قال جراك المصري ابن عفريته بالفطره خخخخ اخذ جراك الشعره وضبط له السحر وقال خذه معك وتقوم بكره تلقى الجيش طاحنهم طحن ..استانس حسني ويوم جاء بيطلع .. قال بص ياعم جراك .. انا ماحكمتش ام الدنيا تلاتين سنه عبث.! وانا بصراحه اليومين دول مش ضامن اي حد.. وخايف امشي وتطب عليك القزيره وتفضحني وانا مش ناقص. وطلع مسدس وقال لجراك انا استقدعتك عشان كذا حتموت رميا بالرصاص وفيه احلى من النهايه المشرفه دي؟!. دنا بتمناها دلوقتي بس مش قادر.! قال جراك لاااا يابو جمـ.. بعدها سمعوا الناس ثلاث طلقات وطلع حسني وهو داق اللطمه وحط رجله و جراك غرقان بدمه..
تمت..
القفله.
قال الله تعالى{وَلَا يُفْلِحُ السَّاحِرُ حَيْثُ أَتَى}
كم هي الآيات التي تحدثت عن السحر والسحرة في كتاب الله تعالى؟! وأخبرتنا عن ضلالهم وخسارتهم في الدنيا والآخرة؟! ومع هذا فيتعجب المؤمن أشد العجب من رواج سوق السحر والشعوذه في بلاد الإسلام!ليس العجب من ساحر يسعى لكسب الأموال بأي طريقه! لكن العجب من أمة تقرأ هذا الكتاب العظيم وتؤمن بصدقه وتقرأ ما فيه من آيات صريحة واضحة في التحذير من السحر وأهله، وبيان سوء عاقبتهم ومآلهم في الدنيا والآخرة، ومع ذلك هناك من يقف من أبناء الأمة أمام عتبات أولئك السحرة المجرمين؟! سواء أمام بيوتهم، أو أمام شاشات قنوات السحر والشعوذة، يلتمسون منهم التسبب في إيقاع الضر بأحد أو إزالته عن آخر
تمت..

وحشتوني





اخر تعديل كان بواسطة » جراك في يوم » 05-02-2011 عند الساعة » 05:37 PM.
جراك غير متواجد حالياً  
Facebook Twitter

قديم 05-02-2011, 06:00 PM   #2
نملة متديرمة
مقلع وعيار
 
الصورة الرمزية الخاصة بـ نملة متديرمة
نملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحب

محجوز محجوز محجووووووووز

,,,,,,,,,,,,,,,
هههههههههههههههههههههههههههههههههههههـ
ـههههههههههههههههههههههههههههههههههههه
هلااااااااا جراك حيا الله القاطع يااهلا وسهلا يامرحبا مليون ومليون ماتيزيك صب القهوة ياولد للشيخ جراك << جميع انواع الترحيب انت بس طب وتخير وترى هالترحيب موب عشان خشمك لا والله ابي منك خدمة شعوذية وجالسة اتمصلح معك
جراك وش انت مهبب يالمخيس
وقسم بالله قلت بجلس ارحب فيك ولاحقه ع الموضوع بقراه بعيدن .. بس ماش بديت اوله وماقدرت اوقف
وش ذا يالمجرم وقسم بالله موضوعك موب صاحي
تخيل اختي قبالي وتصب لي قهوة قلت اصبري اصبري بس بخلص شغله واجيك المهم وتشوفني انفض ضحك حتى انها شكت وش انا جالسه اسوي
تعال خل نشوف وش انت معطينا
إقتباس »
أرخت تلك الليله سدولها الكستانئيه على تلك الاستراحه الشامخه عبر العصور ببنيانها المتهدم وأبوابها الحديديه وقطرات الندى على تلك الأبواب فتزيدها بهاء ورونقا خاصا .. ويكتمل جمال المنظر بصوت طير يسمى (بومه).. وتنصت إلى صوت البومه وصوت المجاري ينساب بهدوء في مجراه ولاشي يعكر صفوه.. وكأن صوت الضفادع والبلابل يغرد في أذني يارباااااااااااه ياربااه ماهذا المنظر الخلاب
يااااااه وش هالمنظر ياجراك
ماتمنيت الا ان معي تريمس قهوة وقدر حنيني على هالوصف واجلس قبال الباب اللي فيه قطرات الندى واجلس اتقهوى وامد يدي على الباب وامسح القطرات همين العط يدي

إقتباس »
( ماودكم عضو بالعيارين يبلط بالادبي اكيد النهايه بتصير كذا !!)
يرحم والديك لعد تصير مثقف انت بالذات المفروض ماتعتب عندهم لكن ممكن ترسل خشمك عنك يمكن يناسبه اكثر منك حيث انه كبير وعاقل

إقتباس »
قام يحثبر تحت لقى كتاب اصفر ومكتوب عليه بالازرق انتظروا صديق نفسه.!
ههههههههههههههههههههههههههههههههههههههههههـ
مجرم ياجراك

إقتباس »
كمل جراك القراءة إذا هو مكتوب سياخذ هذا الكتاب ويتعلم مافيه من السحر والشعوذه ويصبح من اغنى الاغنياء حتى قروض الراجحي يبي يسددها .. فتح جراك خشته واستانس وقال أخ ليته قال بطاقات السواء بعد .. فجأه يوم قعد ينظر بالورقه لا فيه احد يكتب عليها ..وكتب وحتى بطاقات السواء يبي يسددها ياثور اقولك من اغنى الاغنياء وتقولي بطاقات
جراك للحين انت وبطاقات هالسوا
الظاهر ماربّحهم الا انت
شكلي والله العالم بتعرف عليك همين بفتح لي بقالة بس لبيع بطاقات سوا والله انها تجارتن زينة في زمن الغلا

إقتباس »
جراك قام ينتفض وطش الورقه وحط رجله لم باب الاستراحه .. وهو يركض والورقه تطير بجمبه ويركض ويركض وهي مازالت تطير بجمبه .. ويلتفت ع الورقه لا مكتوب عليها والله لو ناصل جيزان
ههههههههههههههههههههههههههههههههههـ
ـهههههههههههههههههههههههههههههههههه
ياويلي على هالمقطع تمزعت منه
طيب الورقه مامدت يدها تسلم عليك؟ كني اشوفك انت وياها طاقين الحنك بالسواليف وانت تهرول

إقتباس »
انا جني بس متلبس بقطو.. اجل تبيني اطلع بوجهي الحقيقي عشان يزوغ عقلك
اجل بيزوغ عقلك؟ والله ماهقيته وانا اختك
اللي اخبره ان شكلك محد بيوصل مواصيله يعني لو قايل ان القطو بيزوغ عقله من شكلك صدقناك لكن هذي اللي قلتها قبل شوي والله عجزت ابلعها

إقتباس »
- القطو شرنموخ وجراك منبطحين على الارض وشرنموخ يناضر بالورقه ويشرح ويأشر بالقلم ومتحمس وجراك يهز راسه يعني فاهم..
- القطو شرنموخ مدخل راسه بوسط الزباله ياكل وجراك يلف على سطل الزباله ومعه الكتاب يراجع منه..
- جراك يحل الاختبار والقطو شرنموخ جالس يعسل بشيشة جراك.. صحيح الصاحب ساحب!!
- القطو شرنموخ يصحح الورقه ويضرب راسه بالجدار ويتفل ع جراك!!.
- جراك يحل الورقه مره ثانيه وشرنموخ يغششه بصوت منخفض لا احد يسمعهم!!.
- القطو شرنموخ يصحح الورقه ويناقز من الفرحه ويضم جراك ضمه ابويه!!.
- جراك اخير اخذ شهادته ومكتوب فيها ينقل الى الصف الثاني مع وجود مادة ضعف في سحر العطف!..
ههههههههههههههههههههههههههههههههههههـ
ـهههههههههههههههههههههههههههههههههههه
ههههههههههههههههههههههههههههههههههههـ
لاااااااااااا تعليق
عليك وصف
جلست اقرا هالمقطع كانها عشر مرات فهي شوية


راجعة لك اكمل الباقي بس اخاف يخلص وقت التعديل
ان خلص ترى بقولك ان موضوعك ابطل شي بالحياة
وصدق من طول الغيبات جاب السنع


.................................

<< جايه تركض وتلهث
اقولك شي ياجراك ولا تضحك علي
ترى كذبت عليك قلت لك بحط ردي قبل يخلص التعديل والا الصدق اني لابسه عبايتي بطلع مشوار
تخيل مصعت فيش اللاب ولفزته ببطي وطلعت اركض كني خبله
لا واللي يضحّك زود اني راكبه مع اخوي واقوله اسرع اسرع قبل يخلص وقت التعديل<< ادمان العيارين الله يكفيك شره
ويوم وصلت المشوار ولاهم مغيرين الباس حق النت واجلس اركض مره ثانيه ادوره << ضاع يومي مراكض عشان موضوعك ياحقير

إقتباس »
وفي يوم من الايام وجراك جالس يستقبل الناس بغرفته.. وكان اول من جاه وحده عمرها 20 سنه وقالت انا احب واحد بس هو مايدري اني احبه احبه واموت فيييه وابيك تسحره عشان يتزوجني .. ناضر جراك بالبنت لاهي مزيونه لين تقول مزيونه إكة هاص والباقين سبعة شريا .. قال جراك وش اسم امه قالت عمشا
هذي اكيد انها انا
لان اللي احبه اسم امه عمشا وبالضبط كنك توصفني بس اللهم ان هي عمرها عشرين وانا توني ام 14

إقتباس »
قال معك صوره له .. قالت ايه. انفجع جراك الولد حتى كلمة قبيح ماتكفيه وصف .. قال انتي متأكده انك تحبين هالشيء؟؟ قالت واموت فيه .. قال ليتك تموتين والله انتي الكسبانه.!
ههههههههههههههههههههههههههههههههههـ
ـهههههههههههههههههههههههههههههههههه
يابن الحلا الرجال مخابر موب مظاهر << تحاول ترقع له
على قولة امي هذا حنا عشنا واعرسنا ومذرقنا ولو انهم شيون << ملاحظ انها تسب ابوي عيني عينك
عاد امي طبق الاصل انجلينا جولي عشان كذا مايقنعها شي

إقتباس »
هذا يامجنونه بششع بششع هذا لو ابكرهه انا وابي اسخطه! وش اسخطه؟؟ هذا مسخوط خلقه!! لعنبو غيرك حبيني انا اصرف لك
الحين بديت احس بمدى القبح اللي تتكلم عنه دامك انت قلت حبيني اصرف لك

إقتباس »
لكن عندي كتالوج بمجموعة اسماء الفنانين اللي نقدر نخيلهم يحبونك ويشحنون لك بعد .. تشوفين الفنيله ذي؟؟ هاذي فنيلة تامر حسني ... الشعره ذي شعرة مهند.. العلبه ذي فيها سعابيل اللمبي تراه يمشي الحال مع خفة دمه
ههههههههههههههههههههههههههههههههههـ
طيب جراك ما القى عندك شعره من طارق ذاك اللي بالارض الطيبه تكفى قل ايه عندك

إقتباس »
قالت لا لا لا ابي صنيتان حشاشة جوفي قال بكيفك اجل عطيني شيء منه.. قالت معي سرواله السنه وشعرة من صدره .. جراك ضحك ضحكه خبيثه وبطها مع بطنها وهو يقول اكيد انها شعرة من صدره ماهوب من مكان ثاني
برب استفرغ وراجعه

إقتباس »
قال جراك انت تشوف البرعصي اللي ع الجدار ذا !! تراه خويي حمود البارح نكبني بالبلوت وقطع وانهزمنا وسخطته برعصي الكلب لين يتادب
وقال تشوف النمل ذولي تراهم شيبان الحاره دبلو تسبدي البارح ع عشاء عند ابوي وسخطتهم نمل.! وهذاني حاط لهم سكر ياكلون وبعد شوي ابحطت لهم سم يذبحهم الكلاب
ههههههههههههههههههههههههههههـ
أجل تهقى انا معمولن لي عمل وتحولت نملة؟ يمكن ليه لا

إقتباس »
بعد ماطلع غالب دخلت عليه وحده عمرها 38 سنه والظاهر وزنها فوق الميه.! وقالت ياشيخ زوجي اخذني لحم ورماني عظم, زوجي طلقني وتزوج علي.! قال جراك انا مدري وشلون تزوج عليك انتي المفروض مع هالوزن تنطرحين اكتتاب وعساهم يبدون فيك.. قالت تكفى ياشيخ ابيك تخليي زوجي يعذبها عذاب ماشافته بحياتها.. ابي لو انها اخذه لها سنه بسجن قوانتنامو كان ارحم لها من هالزوج .. قال جراك ابشري وصلتي والله لاخليها تتمنى سجن ابو غريب ماهو قوانتنامو وبتشوفين بعينك بعد يومين ..
ههههههههههههههههههههههههههههههـ
ياحياتي هالعظم اللي رماها .. مسيكينه من حر ماتونس قامت تخذرف

إقتباس »
قال الله تعالى{وَلَا يُفْلِحُ السَّاحِرُ حَيْثُ أَتَى}
جراك متأكد انه انت اللي كاتب الايه؟ بديت اشك بصاحب الموضوع ورجعت اشوف اليوزر مره ومرتين وثلاث ابي اتأكد عيوني صاحيه والا يبيلها تزييت

إقتباس »
وحشتوني
اقول انقلع لاقينا انت وغيرك
كل ماهذا هفيتو مايندرى عنكم حيين والا ميتين همين تجون تقولون وحشتونا


بطل ياجراك وموب غريبة على خشمك طال عمره << فوق ماهو طايل؟؟
بصراحة الموضوع جا بوقته وخاصه ان رجولي تحفرت من كثر ما ادخل العيارين وما القى شي يفتح النفس
حتى تخيل ياجراك الشتشته منعونا منها

المهم خلاص مع السلامه لو بجلس اهذر ماخلصت ولا بكره
<< عذرنا الدائم لتقفلة الموضوع




اخر تعديل كان بواسطة » نملة متديرمة في يوم » 05-02-2011 عند الساعة » 07:56 PM.
نملة متديرمة غير متواجد حالياً  
Facebook Twitter
قديم 05-02-2011, 06:17 PM   #3
جراك
من كبار شخصيات الإقلاع
 
الصورة الرمزية الخاصة بـ جراك
جراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحب

إقتباس »
الرسالة الأصلية كتبت بواسطة نملة متديرمة »
محجوز محجوز محجووووووووز
نمله مسألة انك بكل موضوع اول رد لك .. اسمحيلي اسميك ساهر العيارين .. وانا بصراحه اشير عليك انك تتعاونين مع المشرفين .. عشان يعم الامن والامان بالعيارين .. خبرك هاليومين الله يحفظنا الدعوى خربانه .. اجل انا اعيش اعيش اعيش واخرتها اسمع ان نساء بالرياض مسويات مظاهره يطالبن نايف بن عبدالعزيز الله يحفظه بمطالب .. اي والله يطالبنه!! عشنا وشفنا صدز..
>> واضح ان هذا العضو فيه كمية وطنيه كبيره جدا .. ولا يمكن في يوم من الايام يصير بلطقي مثل اخوانا المصاريه (ايه هين )
نرجع لموضوع الامن والامان للعيارين .. انصحك تعقلين وتتركين الشله الفاسده الجندي الاصلع وانتسبوا وكثرة الشتته .. تراي مراقبكم يوم تتفقون على الشتته بوسط الاسكميات .. وللاسف الاسكميات صار مكان حقير ومتمرد لوضع خطط حقيره تثير مشاكل عده للمجتمعنا العياري..
وانا من هذا المنبر اطالب نمله متيرمه ان تكون مع النظام ولا شي سوى النظام .. لانه من جد يا اخوان النظام اذا جينا للعلم الوكاد فوق الجميع ..

>> يالربع ترى له اسبوع وهو مقابل الجزيره



إقتباس »
الرسالة الأصلية كتبت بواسطة توصي شيء »
اااااع داخله مستانسه بقوول محجووزز يالله ثاني اجل
توصي شي والله ابد سلامتك ما اوصي شي ولا ناقصني شي ..
وابد اعتبري نفسك الاوله لان نمله مثل ماوضحت قبل .. انسانه ضد النظام وانا مع النظام حتى صورة هتلر ابغيرها وابحط جواد العلي ..





اخر تعديل كان بواسطة » جراك في يوم » 05-02-2011 عند الساعة » 06:26 PM.
جراك غير متواجد حالياً  
Facebook Twitter
قديم 05-02-2011, 06:48 PM   #4
توصي شيء
عضو مهوب جديد
توصي شيء عداده على الزيرو

إقتباس »
الرسالة الأصلية كتبت بواسطة جراك »

"أرخت تلك الليله سدولها الكستانئيه على تلك الاستراحه الشامخه عبر العصور ببنيانها المتهدم وأبوابها الحديديه وقطرات الندى على تلك الأبواب فتزيدها بهاء ورونقا خاصا .. ويكتمل جمال المنظر بصوت طير يسمى (بومه)

^
لاحول ولا قوة الاا بالله .. اماا (البومه) هو صدق فيه هذا الحيوان انا احسه بس على ايامنا بأفلام الكرتون
وشاف له شنطة حديد وراح لمها ولقى فيها رمث ومحش واغراض واجد مايدري وشي.. بس يوم قام يحثبر تحت لقى كتاب اصفر ومكتوب عليه بالازرق انتظروا صديق نفسه.!
^
خخخخخخخخ اجل انتظروا كومينق سوون

فتح جراك خشته واستانس وقال أخ ليته قال بطاقات السواء بعد .. فجأه يوم قعد ينظر بالورقه لا فيه احد يكتب عليها ..وكتب وحتى بطاقات السواء يبي يسددها ياثور اقولك من اغنى الاغنياء وتقولي بطاقات ..
^
وجه فقر


مشاهد متقطعه من ايام الدراسه!.
- القطو شرنموخ وجراك منبطحين على الارض وشرنموخ يناضر بالورقه ويشرح ويأشر بالقلم ومتحمس وجراك يهز راسه يعني فاهم..
- القطو شرنموخ مدخل راسه بوسط الزباله ياكل وجراك يلف على سطل الزباله ومعه الكتاب يراجع منه..
- جراك يحل الاختبار والقطو شرنموخ جالس يعسل بشيشة جراك.. صحيح الصاحب ساحب!!
- القطو شرنموخ يصحح الورقه ويضرب راسه بالجدار ويتفل ع جراك!!.
- جراك يحل الورقه مره ثانيه وشرنموخ يغششه بصوت منخفض لا احد يسمعهم!!.
- القطو شرنموخ يصحح الورقه ويناقز من الفرحه ويضم جراك ضمه ابويه!!.
- جراك اخير اخذ شهادته ومكتوب فيها ينقل الى الصف الثاني مع وجود مادة ضعف في سحر العطف!..

^خخخخخخخ اجل خربت شرنموخ الله يستر عليك بس
قال ليتك تموتين والله انتي الكسبانه.! هذا يامجنونه بششع بششع هذا لو ابكرهه انا وابي اسخطه! وش اسخطه؟؟ هذا مسخوط خلقه!! لعنبو غيرك حبيني انا اصرف لك .. قالت احبه احبه وهي تدلع .. قالت يابنتي انتي زي القمر وشوفي هو وشلون شكله.. هاذي جريمه كونيه في حق الانسانيه .. اخاف اشارك فيها ويلعني التاريخ..

هههههههههههههههههه ياربيييه مقرودة الحظ بس عادي هذي الدنيا يقولك كل ساقط وله لاقطجراك ضحك ضحكه خبيثه وبطها مع بطنها وهو يقول اكيد انها شعرة من صدره ماهوب من مكان ثاني ..
^
هههههههههههههههههههههههههههههههههههههههههههههه عيب عليك ياولد
قال الله تعالى{وَلَا يُفْلِحُ السَّاحِرُ حَيْثُ أَتَى}
كم هي الآيات التي تحدثت عن السحر والسحرة في كتاب الله تعالى؟! وأخبرتنا عن ضلالهم وخسارتهم في الدنيا والآخرة؟! ومع هذا فيتعجب المؤمن أشد العجب من رواج سوق السحر والشعوذه في بلاد الإسلام!ليس العجب من ساحر يسعى لكسب الأموال بأي طريقه! لكن العجب من أمة تقرأ هذا الكتاب العظيم وتؤمن بصدقه وتقرأ ما فيه من آيات صريحة واضحة في التحذير من السحر وأهله، وبيان سوء عاقبتهم ومآلهم في الدنيا والآخرة، ومع ذلك هناك من يقف من أبناء الأمة أمام عتبات أولئك السحرة المجرمين؟! سواء أمام بيوتهم، أو أمام شاشات قنوات السحر والشعوذة، يلتمسون منهم التسبب في إيقاع الضر بأحد أو إزالته عن آخر

^
صدقت


تمت..

وحشتوني


^
وحتى انت وشحتنا [color="blue"]< لاتقول وش دخلتس توتس جديده ترا متابعه المنتدى منذ مبطططططططيييييي لي ويين بس اقرا وقبله خشات خفيفه بس انا يومي بسنه توني افكر اسجل[/color



توصي شيء غير متواجد حالياً  
Facebook Twitter
قديم 05-02-2011, 09:12 PM   #5
مربوش المربوش
من كبار شخصيات الإقلاع
 
الصورة الرمزية الخاصة بـ مربوش المربوش
مربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحبمربوش المربوش فوق  هام السحب

هههههههههههههههههههههههههههههه تدري ليه اضحك تذكرت اخر رسالة لك حسيت ودك تدوس ببطني وتلعن ابوالطيب فيني

حيالله جراك الذيب ياخوي تدري وش امنيتي بالحياة اشوف الكيا والكورلا مايباخ وبورش تاكيين بجنب الاستراحة المذكورة ووقفتهم منورة شوارع البلد اللي ظافني معك ومتوهق بالعربي فينا والا ع الحياة والقصور مابي ومتنازل بها لصالح قلعه وابوتيماوي خلهم يتبلطعون فيها مثل مايبون وانا وانت خلنا ع المواتر ياخوي حالتنا صعبة حتى ايام المطر ماترقى الارصفة والله معاناة ولين دخلت بنقعه مطر اول مايطري على بالك يارب ماتوقف واتوهق مدري متى الله يفكنا منهن ويرزقنا بمواتر عليها الكلام ولين دخلنا شارع العالم تطق لك تحية وهي تقول هالوجه يركب هالزين سبحان الله يدي الحلق للي ماله اذان ..

اذكر مقابلة قريت عنها مرتن من المراريت عن ساحر تايب يقول اكثر الزباين عنده من ناقصات العقول والدين وان طلباتهم سخافه بسخافه كلها ازواجنا نبيهم وياليت تعلقهم فينا اكثر ومايناظرون غيرنا والا ياليت تخلينا نتحكم بهالعايلة كل ابوها نبي نلعب بهم البيضة والحجر لكن الشي اللي كان يخليه يفتح الباب لهم انهم مايكاسرون بالسعر ولو تطلب حليب السباع جابوه بليلته ولحظته والاهم انهم يجون لو الوحدة فيها زكام قالت انا مسحورة ابيك تطلع اللي فيني وعاد هنا الرجال يعطيها مضاد حيوي ويقول هذا اللي وصوا عليه الجن ومن قربان خروف للدجاجة والا كمن قرش يضحك عليه فيهم .. بس اتوقع انه ماتاب بانه رجع لربه وخاف من الاخرة اتوقع الرجال مل من هالحريم وقال يبوووي اتوب ازين من مقابل طلبات هالحريم مدري وشلون المتزوجين مستحملين الله يعينهم عليهم بس

إقتباس »
وتنصت إلى صوت البومه وصوت المجاري ينساب بهدوء في مجراه ولاشي يعكر صفوه.. وكأن صوت الضفادع والبلابل يغرد في أذني يارباااااااااااه ياربااه
هههههههههههههههههههههههههه
ابو من علمك الكتابات الادبية اجل بومه ومجاري وضفادع مدري حسيت ان وجهك قمط يوم اعتمدت الموضوع والا انك كاتبه بحمام سيفونه يطلبك الحل

إقتباس »
بس يوم قام يحثبر تحت لقى كتاب اصفر ومكتوب عليه بالازرق انتظروا صديق نفسه
هههههههههههههههههههههههههههههههههههههههههه
ماصديقنا الا أنّا هذي عقوبة اللي طول عغمره بامريكا ويدخل وسط وصخ ويسوي انا حكيم الصحية اخرتها بتلقاه بنتف شعر راسه ويقول هم يحبوني والا يبون البطولات بس وصدقني من وجه نظري راح يقرع من معرفتي فيهم ولا راح يوصل للقرار الاخير

إقتباس »
فجأه يوم قعد ينظر بالورقه لا فيه احد يكتب عليها ..وكتب وحتى بطاقات السواء يبي يسددها ياثور اقولك من اغنى الاغنياء وتقولي بطاقات
ههههههههههههههههههههههههههههههههههههههه
زين ماطلع من الكتاب يدك صحتك براشدي يفر رقبتك فعلا ملحط انت والكيا حقتك

إقتباس »
- القطو شرنموخ وجراك منبطحين على الارض وشرنموخ يناضر بالورقه ويشرح ويأشر بالقلم ومتحمس وجراك يهز راسه يعني فاهم..
- القطو شرنموخ مدخل راسه بوسط الزباله ياكل وجراك يلف على سطل الزباله ومعه الكتاب يراجع منه..
- جراك يحل الاختبار والقطو شرنموخ جالس يعسل بشيشة جراك.. صحيح الصاحب ساحب!!
- القطو شرنموخ يصحح الورقه ويضرب راسه بالجدار ويتفل ع جراك!!.
- جراك يحل الورقه مره ثانيه وشرنموخ يغششه بصوت منخفض لا احد يسمعهم!!.
- القطو شرنموخ يصحح الورقه ويناقز من الفرحه ويضم جراك ضمه ابويه!!.
ههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههه
هالمقطع يحل امور كثيرة عندي ويجيب على تساؤلات عديدة بمخي يوم كنت اخثرق معك بالحالنا الحين عرفت ان القطو رغم انه معلمك السحر الا انه باذن الله تعالى مغفور له وع الجنة من غير حساب

إقتباس »
.. تشوفين الفنيله ذي؟؟ هاذي فنيلة تامر حسني ... الشعره ذي شعرة مهند.. العلبه ذي فيها سعابيل اللمبي تراه يمشي الحال مع خفة دمه
ههههههههههههههههههههههههههههههههههههههههههههههه
ههههههههههههههههههههههههههههههههههههههههههه
اما سالفة اللمبي من جد ياخوي هالانسان رغم انه مسوي خفيف دم الى ان الغدد التفلاوية هايجة من السعبلة عليه سعابيل اعوذ بالله تقل واحدن جالس يقرقع من الماخوذ لين طرش على زولية << تخيل النظر خلاب يوازي فم اللمبي

إقتباس »
وهذاني حاط لهم سكر ياكلون وبعد شوي ابحطت لهم سم يذبحهم الكلاب.! قام ينتفض غالب وهو يصيح قال تكفى سامحني تكفى سامحني.. قال جراك انقلع فكك الله بغيت اسخطك ذبانه واتولجك بالفلييت..
والله يانت بطران نمل وسم وذبانه وفليت النمل داوه بالفليت والذبان بجريدة لاف ام امها الف وهاتك ياتمغيط لين تغدي الطاولة فيها كساح من الحماس وبالاخير جادع ام الجريدة وصاك الباب بلعنتين

إقتباس »
انا ماحكمتش ام الدنيا تلاتين سنه عبث.! وانا بصراحه اليومين دول مش ضامن اي حد.. وخايف امشي وتطب عليك القزيره وتفضحني وانا مش ناقص. وطلع مسدس وقال لجراك انا استقدعتك عشان كذا حتموت رميا بالرصاص وفيه احلى من النهايه المشرفه دي؟!. دنا بتمناها دلوقتي بس مش قادر.! قال جراك لاااا يابو جمـ.. بعدها سمعوا الناس ثلاث طلقات وطلع حسني وهو داق اللطمه وحط رجله و جراك غرقان بدمه..
خخخخخخخخخخخخخخخخخخخخخخخخخ
نهاية ساحر شجاع اقولك الشعب عقب المطالب قالوه علينا يبوجال انت الحين لاعبن بحسبتنا 30 سنة والحين تبينا نصدقك اقول تقلع من الكرسي عطنا اللي بعدك صحيح انه بياكل من اول وجدي بس الاهم نشوف غيرك يمكن الجديد يعطينا وياكل مهوب انمت تاكل ماتشبع وتبي تولي ولدك بعدك يكمل مسيرتك

بس اللي ضحكني لوحة مع حدى هالمصارية متربع تقل بيطق بلوت والاخ كاتب لوحة وماسكها تقول ماتمشي ياحسني بأة دنا ايدي تعبت

حبيب القلب الشيخ جراك وانت بعد وحشتنا ودخلت علينا بموضوع نطالب الاعضاء بكتابة مثله من ناحية لاتعطينا ردين وتقول انا الافضل عطنا لو رد فيه قصة وعيارة وفايدة رايقه نعتبره قوي ومميز ولاهنت عالولكم باك وان شاء الله ماعاد تقاطعنا لبى خشمك

لاعدمتك

مثبت وردودك الخبلة المعهودة ع الاعضاء راح يميزه بحوش طخ ابن طيخ



مربوش المربوش غير متواجد حالياً  
Facebook Twitter
قديم 05-02-2011, 09:14 PM   #6
جراك
من كبار شخصيات الإقلاع
 
الصورة الرمزية الخاصة بـ جراك
جراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحب

ودي احط تنبيه اني مازلت ساحر..! بس حركة اني اموت بالقصه .. هذي سويتها لاني شفتها بفلم واحد سوى نفسه ميت وضجك على الهيئه والى هالحيين مااحد مسكه .. > > وش هالفلم اللي فيه هيئه ..
لا صحيح يعني تبون اقولك اني مازلت سااحر وينقز واحد ويروح يبلغ عني واروح بابونكله..
واحب انوه مره ثانيه اني ساحر مايستقبل الا النساء .. ارجو من الاخوه الزلايب يعذرونا .. وانا وغرفة عرفج تحت اوامركم ,, واللي مايقدر يجي للموقعنا الموقر .. ترى مستعدين نقصر عنوته ونجيه .. واكرر وأوكد الجنس فقطط خخخ

نمله متديرمه..

إقتباس »
هلااااااااا جراك حيا الله القاطع يااهلا وسهلا يامرحبا مليون ومليون ماتيزيك صب القهوة ياولد للشيخ جراك << جميع انواع الترحيب انت بس طب وتخير وترى هالترحيب موب عشان خشمك لا والله ابي منك خدمة شعوذية وجالسة اتمصلح معك
جراك وش انت مهبب يالمخيس
الله يسلمك بس من اللي قالك اني قاطع والله العظيم حتى الشعيب اللي بالديره مبطي ما رحت له .. >> اخبر مايقطعون الا فيه
وبعدين الخدمه ابد امري وتراي مانقطعت الا عشان اتعلم شي ينفع بنات جنسي الله لا يخلينا ..



إقتباس »
يااااااه وش هالمنظر ياجراك
ماتمنيت الا ان معي تريمس قهوة وقدر حنيني على هالوصف واجلس قبال الباب اللي فيه قطرات الندى واجلس اتقهوى
خخخخخخخخ بالله عجبك المنظر ..
ترى ابيع الاستراحه هاليومين .. تسان احد بيشتري بالربع تراه تصلح ..


إقتباس »
يرحم والديك لعد تصير مثقف انت بالذات المفروض ماتعتب عندهم لكن ممكن ترسل خشمك عنك يمكن يناسبه اكثر منك حيث انه كبير وعاقل
الله يهديك يااخت نمله .. هالحيين كم مره قلت لك .. لاتمزحين مع اللي ماتمونين عليه ..
هالحيين انا زميل بالقسم لكن خشمي تذبين عليه وتمزحين معه من متى الميانه معه ؟!!..
>> على اساس انهم اثنين


إقتباس »
اجل بيزوغ عقلك؟ والله ماهقيته وانا اختك
اللي اخبره ان شكلك محد بيوصل مواصيله يعني لو قايل ان القطو بيزوغ عقله من شكلك صدقناك لكن هذي اللي قلتها قبل شوي والله عجزت ابلعها

انتي تتهزين بخلقة ربي !؟؟.. يعني خشمي صار كبير وطلعت شين .. انا وش ذنبي .. تكرهوني حياتي ليه ..
تصدقين انا والله شاك ان خشمي هو السبب الرئيسي لتشويه شكلي .. ولذالك بدأت تجيني قناعه ان خشمي ذا ماهو لي ..
اكيد انه خشم واحد ثاني ..منهو وله هالخشم الله اعلم .. نتركها للاجيال اللي بعدنا يمكن احد يكتشف منهو له(طلع ابو الهول ذا) .. لكن انه لي مستحييييل >> ياناس ارحموه والله جته نفسيه .


إقتباس »
اقولك شي ياجراك ولا تضحك علي
ترى كذبت عليك قلت لك بحط ردي قبل يخلص التعديل والا الصدق اني لابسه عبايتي بطلع مشوار
يعني تعترفين انك تسذوب !! .. طيب مدامك تسذوب تشوهين سمعتي وان خشمي كبير ليييه ..
حرام عليكم سمعه الشباب والله الواحد راس ماله سمعته ..


إقتباس »
هذي اكيد انها انا
لان اللي احبه اسم امه عمشا وبالضبط كنك توصفني بس اللهم ان هي عمرها عشرين وانا توني ام 14
ههههههههههههههههههههههه
ههههههههههههههههههههههههههه
ياربي رباه اجل عمرك 14 .. اجل انا توني بالابتدائي بس تراي اعرف ..

إقتباس »
طيب جراك ما القى عندك شعره من طارق ذاك اللي بالارض الطيبه تكفى قل ايه عندك
وشو طارق ذا .. طالع لنا جديد ذا ..
ترانا ماحنا ناقصين كل شوي واحد محطمنا ومحطم مشاعيرنا ومحاسيسنا ..


إقتباس »
أجل تهقى انا معمولن لي عمل وتحولت نملة؟ يمكن ليه لا
هههههههههههههههههههه يمكن ليش لأ.. بس لاتصير متعشيه معنا ذيك الليله ..


منوره الموضوع يانمله وحضورك مميز بالعيارين ..




توصي شي

انا والله اولى ماوصيتك بشي .. لكن هالحيين ابي اوصيك تفكينا من الصناديق .. انا تجيني غلقه من صناديق الرد ..
ماتحمل احد يحشرني بزوايه ضيقه .. يمكن تصير نيته ماهيب زينه ولا شي ..


لاحول
إقتباس »
ولا قوة الاا بالله .. اماا (البومه) هو صدق فيه هذا الحيوان انا احسه بس على ايامنا بأفلام الكرتون
خخخخخخخخخخخخخ
خخخخخخخخخخخخخخخخخخ ايه فيه حيوان اسمه بومه ..
بس الغريب بالامر انه حيوان ويطير .. سبحان الله له في خلقه شئون ..

إقتباس »
خخخخخخخ اجل خربت شرنموخ الله يستر عليك بس
خخخخخخخخخخخخ
خخخخخخخخخخخخخخخ
انا الحمدلله ان اللي حولي مايتركوني على كيفي .. ولا اخرب بلد كامله خخخ.. بس اخربهم بشي ينفعهم خخخ( ايه هين )


إقتباس »
لاتقول وش دخلتس توتس جديده ترا متابعه المنتدى منذ مبطططططططيييييي لي ويين بس اقرا وقبله خشات خفيفه بس انا يومي بسنه توني افكر اسجل
بالعكس نقول مرحبا فيك بالقسم .. ويمكن حنا القسم الوحيد بالاقلاع اللي اعضاءه من اول رد كله ميانه وكاننا نعرفه من زمان ..
والشي ذا سبحان الله من ربي .. صحيح ان اكثرنا خبول واي واحد نسولف ونمون عليه بسرعه..
وهو يفرح بالشي هذا بس ترى حنا من كثر مانخربها نضيع بعضنا ولا ندري وش السالفه
>> اقول تلايس ولا عاد ترحب باحد!!

تفضلي







اخر تعديل كان بواسطة » جراك في يوم » 05-02-2011 عند الساعة » 09:39 PM.
جراك غير متواجد حالياً  
Facebook Twitter
قديم 05-02-2011, 09:28 PM   #7
نملة متديرمة
مقلع وعيار
 
الصورة الرمزية الخاصة بـ نملة متديرمة
نملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحبنملة متديرمة فوق  هام السحب

إقتباس »
نمله مسألة انك بكل موضوع اول رد لك .. اسمحيلي اسميك ساهر العيارين .. وانا بصراحه اشير عليك انك تتعاونين مع المشرفين .. عشان يعم الامن والامان بالعيارين .. خبرك هاليومين الله يحفظنا الدعوى خربانه
صحيح اني ساهر بس على الاقل ساهر بذمه
اجل قد شفت ساهر يدخل ويطلع بموضوع لجراك عشان يزيد عدد القراء
قد شفت ساهر يشتشت ويبيع يوزره عشان يجمع اكبر قدر من الاعضاء بالهيارين << غلطت بالحرف وحلفت ما ارجع اغيره من حرّ مافيني
قد شفت ساهر يدخل يرد بالموضوع عشرطعش مره عشان يعبي الصفحات ردود
بالله قد شفت ساهر مخلص بهالقدر؟؟
ياخي ساهر الشوارع اللي في اليابان ماسوا سواتي

إقتباس »
اجل انا اعيش اعيش اعيش واخرتها اسمع ان نساء بالرياض مسويات مظاهره يطالبن نايف بن عبدالعزيز الله يحفظه بمطالب .. اي والله يطالبنه!! عشنا وشفنا صدز
يامال الحقران اللي يقطع المصران
ورانا طايحين من عينك؟ هذا وانت تخسر راتبك كله على سوا؟؟
اجل لو انك تحبنا يامعشر النساء وش بتسوي؟؟ اتوقع بتوزع ايفونات تكفى اذا وصلت فيك المواصيل توزع ايفونات علمني اجي اصف طابور عشان تصير صديقي

إقتباس »
نرجع لموضوع الامن والامان للعيارين .. انصحك تعقلين وتتركين الشله الفاسده الجندي الاصلع وانتسبوا وكثرة الشتته .. تراي مراقبكم يوم تتفقون على الشتته بوسط الاسكميات .. وللاسف الاسكميات صار مكان حقير ومتمرد لوضع خطط حقيره تثير مشاكل عده للمجتمعنا العياري
ههههههههههههههههههههههههههههههههههههههـ
اثره انت اللي ابثرني ويسألني وين موضوع الشتشته؟؟
بصراحه توقعتك طرش والا حدا هالمشرفين بيجس نبضنا لا ومن الدباشه فيني جالسه اقول له اي موضوع اللي تقصده؟؟ يعنني استغبي المشكله السؤال اللي قبله كنت قايله ترى الموضوع بينزل 10 ونص يعني حتى التصريف ماعرفت اصرف مثل الخلق والعالم

إقتباس »
وانا من هذا المنبر اطالب نمله متيرمه ان تكون مع النظام ولا شي سوى النظام .. لانه من جد يا اخوان النظام اذا جينا للعلم الوكاد فوق الجميع
ياخي بلا نظام بلا بطيخ
ازعجتونا بهالنظام اللي ماشفنا منه شي
بعدين من اللي يتكلم؟؟ جراااااااااااااك؟؟ آخر من يتكلم عن المظام انت << اعتذر عن الغلط المطبعي بس متعيجزة ارجع اعدله
انت اكثر واحد دايم معترض ودايم مايعجبك شي بس شكله كبر راسك عقب كبار العيارين وقلت يلله خل اجرب اصير مع النظام كودي آخذ الكرسي
احب اقولك بعيد عن عينك وكرسي حصني مبارك اقرب لك من كرسي قلعة ومربوش

إقتباس »
توصي شي والله ابد سلامتك ما اوصي شي ولا ناقصني شي ..
وابد اعتبري نفسك الاوله لان نمله مثل ماوضحت قبل .. انسانه ضد النظام وانا مع النظام حتى صورة هتلر ابغيرها وابحط جواد العلي
ههههههههههههههههههههههههههههههههههههههـ
اموووت على نظامك وصدقني ترى جواد اصرف لك




اخر تعديل كان بواسطة » نملة متديرمة في يوم » 05-02-2011 عند الساعة » 09:48 PM.
نملة متديرمة غير متواجد حالياً  
Facebook Twitter
قديم 05-02-2011, 11:24 PM   #8
الديلكو
من كبار شخصيات الإقلاع
 
الصورة الرمزية الخاصة بـ الديلكو
الديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحب

السلام عليكم ..
ومساكم الله بالخير .. ولكم باك ياجراك والله لايحييك ماكثرت مواطيك ..
ابعلمكم عن سر يخص المذكور اعلاه ..
وسوس .. انهبل . اخر قائمه امنيه طلعت من وزارة الداخليه ماشفته ولا كلمني .. يوم وصلوا حرف الميم واركز اتحرا اسمه يطلع فيها ..
لحس مخي .. مره يحدث علي ويشريلي مسبحه ويكلمني عن الاستغفار وفوائده وبعدها ساعه لقيته يحمل اغاني طلال .. وقطع التحميل وفتح موقع العريفي وقال بكره بنصلي معه الجمعه في جامع البواردي ويتل جهازي ويحفظه بالمفضله ..!!!
انا بلعتها قلت يمكن صارت له هزه نفسيه ويوم يومين تعدي .. بعدين طولت ..!!
مره يضبط الجمر على الشيشه ويقول حياتنا يافيصل خساره لاذكر ولا دعوه الى سبيل الله وفوق هذا نحش بالعباد ونفسد بالبلاد ..!!
انا سحبت عليه .. قلت ان طولت اجلس معه بكره ابلقى نفسي بالفلوجه وهو متكي بالاستراحه يشيش وفال ابوها ..
على العموم دامك لسه تنزل مواضيع بالعيارين وتعطي اشارات اباحيه معناته انك مازلت داعر فاجر فاسق وهذا مؤشر ايجابي < الله من زين الهرج

اجل ساحر ياجراك وجني ..
ياخوي انت جني براسك .. باقيلك شوكة ابليس وقرون وذنب طويل اخره مرسى السفينه ..
ياخي تدري .. كنت اشوف العجوز اللي بالكراتين اللي على مكنسه بيضاء وشعرها ابيض وهاتك ياتفحيط
ليت شرنموخ سخطك مثلها عاد انت شوشه وخشم يعني بس تغطلس بتطلي عشان تصير غرنوق ابيض كلك والمكنسه موجوده ..
..
موضوعك ماضحكني بالعكس بكيت ( عناد) ..
وبكره ان شاءلله موعدنا مع الشماته الأبديه لالزخكم الاتحاد ياحبه محلي



الديلكو غير متواجد حالياً  
Facebook Twitter
قديم 05-02-2011, 11:59 PM   #9
lymo
عضو مهوب جديد
 
الصورة الرمزية الخاصة بـ lymo
lymo واجدين الي يمدحونه عساه يصمل

ههههههههههههههههههههههه

ااااه يابطني بموت من الضحك

اسلوب حلوووو والقصة رهيييييييبة

الله يعطيك العافيه


<<< لا زالت تضحك



lymo غير متواجد حالياً  
Facebook Twitter
قديم 06-02-2011, 01:15 AM   #10
ktkata
عضو مهوب جديد
 
الصورة الرمزية الخاصة بـ ktkata
ktkata فوق  هام السحبktkata فوق  هام السحبktkata فوق  هام السحبktkata فوق  هام السحبktkata فوق  هام السحبktkata فوق  هام السحبktkata فوق  هام السحبktkata فوق  هام السحبktkata فوق  هام السحبktkata فوق  هام السحبktkata فوق  هام السحب

يالله يا أنت كم مذهل بصياغة موضوعك الرائع << شوتوها للعامه
من جد ..،
مقدمتك عيشتني جو غريب اعوذ بالله منه فرآغ + مناظر تسد النفس + بومه + قطوه متجسنه = جراك ههههه

إقتباس »
مشاهد متقطعه من ايام الدراسه!.
- القطو شرنموخ وجراك منبطحين على الارض وشرنموخ يناضر بالورقه ويشرح ويأشر بالقلم ومتحمس وجراك يهز راسه يعني فاهم..
- القطو شرنموخ مدخل راسه بوسط الزباله ياكل وجراك يلف على سطل الزباله ومعه الكتاب يراجع منه..
- جراك يحل الاختبار والقطو شرنموخ جالس يعسل بشيشة جراك.. صحيح الصاحب ساحب!!
- القطو شرنموخ يصحح الورقه ويضرب راسه بالجدار ويتفل ع جراك!!.
- جراك يحل الورقه مره ثانيه وشرنموخ يغششه بصوت منخفض لا احد يسمعهم!!.
- القطو شرنموخ يصحح الورقه ويناقز من الفرحه ويضم جراك ضمه ابويه!!.
- جراك اخير اخذ شهادته ومكتوب فيها ينقل الى الصف الثاني مع وجود مادة ضعف في سحر العطف!..
هههههههههههههههههههههههههههههههههههههههههههههههههه ههههههه
ياااربيه قطعت قلبي من الضحك يا انك شخص فلااااوي
أجل سحر عطف .........؟ هههههههههههههههههه


إقتباس »
وبعدها وجراك جالس في صومعته..الا الباب يطق وفتحه لاهو حسني مبارك.. حسني بص ياعم جراك .. انا ابتهدلت والقماعه ئلبوها كوسه على دماغي
والله ووصلت شهرتك للاخوان الاشقاء يآآجراك ما اصير وحده من معاونيك ..؟ هع
يمكن القضيه المصريه تنحل على يدي ويكنسلون حسني مبارك وينتخبوني انا واخليك نائبي << يقالك تغريه بالعرض الفنتاستك ،،

إقتباس »
قال الله تعالى{وَلَا يُفْلِحُ السَّاحِرُ حَيْثُ أَتَى}
صدق الله العظيــم ..~ من جد النـآس صايره تستهين بالـ سحر
فك السحر بالسحر والعلاج بالسحر وبلاوي متلتله

موضوعك بطل قدآ قدآ قدآآ . صغته بطريقه عياريه قمليه اوي

ربي لا يحرمنا من خبـآلك << ادعي لك ولا عليك ..؟ loool


يستــآهلك الــ < ورد >




اخر تعديل كان بواسطة » ktkata في يوم » 06-02-2011 عند الساعة » 01:17 AM.
ktkata غير متواجد حالياً  
Facebook Twitter
إغلاق الموضوع

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح

الإنتقال السريع


الوقت المعتمد في المنتدى بتوقيت جرينتش +3.
الوقت الان » 12:50 PM.

الأن حمل تطبيق منتديات الإقلاع

 

هام: لجميع مستخدمي ايميلات شركة مايكروسوفت (hotmail,msn,outlook......الخ)
 

في حال تاخر التفعيل او اي مشكلة طارئة او ما يخص العضوية الذهبية او التجارية من استفسارات يمكنك ابلاغي هنا وتسعدني متابعتك   

تنبيه : كل ما يطرح من مشاركات يمثل رأي كاتبه ولا يمثل رأي إدارة الموقع

ترقية وتطوير » تحميل دوت كوم
Powered by: vBulletin Version 3.8.7
Copyright ©1999 - 2014, Jelsoft Enterprises Ltd.
جميع الحقوق محفوظة منتديات الاقلاع - شبكة الاقلاع