[مـــراهـــق]

لقد ساءني واحزنني في الاونة الاخيرة ماتلاقيه بعض البنات المسكينات العاقلات من عملية خداع من بعض الشباب الطائشين الذين ليس فيهم خوف من الله.
تلقى البنية اول ما تطلع على الدنيا وش حليلها في حالها ملتزمة بتعاليم دينها .ثم تبدأ تسمع بقولة فلانة تكلم وفلانة تواعد .واذا سمعت يشمئز قلبها ويرتعش جسمها وتنطق بقولة استغفرالله العظيم ,هذا في بداية الامر.
وبعدين تلقاها تصادق وحدة لها في الامور هذي يعني المكالمات والمواعد وغيره.
ومع كثر ماتسمع من الكلام وتعيش في جوه تحس ان الامر عادي ومافيه شي ومجرد سعت صدر ينتهي متى ما ارادت.
ثم تبدأالبنية في التجربة الحذرة طبعا في بداية الامر .ودايم اللي يكون جديد على الشي يكون جاهل فهي تكون جاهلة حبيبة ماتدري وش الطبخة. تسمع بالحب اللي يزعمونه عن طريق التلفون وتبحث عنه.
ثم حظها ونصيبها من تطيح فيه وان طاحت في واحد ما يخاف الله وهم 90% من اللي يكلمون.فسوف يبدأيكذب عليها ويعطيها من الرخيص انا حبيتك من اول ماسمعت صوتك ,انا ارتحتلك تصدقين اني توني احس اني عايش يوم عرفتك وغيره من الكلام الحلو.
وعلى هاطريقة الى ان تبدا تنجرف البنية ناحيته وتصدق كلامه وتقعد تهوجس وتسهر الليل وهو ما جاب خبرها,ثم يروح عند ربعه يتباها شفتواوالله سحبت فلانه على وجهها.
وبعد ماتتعلق البنت يبدا هو يفرض نفسه عليها واوامره ,وهو طبعا في بداية مكالماته حمل وديع.ما يبي منها الا انها تكلمه .
ويبدا اول طلب كما انتم عارفين الشوفة ومع الظغط والاصرار تبدا البنت بالموافقة مع انها ماكانت تتوقع ان يصير هذا كله لنها كانت ماخذت الدعوا مجرد سعت صدر.ومع طول الوقت تلقاه ماخذ منها صورة لها ورسايل وغيره من الاشياء ثم تكون هذي الاشياء زي السلاح في يد الشاب على البنية بس بطريقة غير مباشرة .وطبعا اللي يصير بينهم وصورها ورسايلها لازم كم شخص من ربعه يشوفها علشان يتباها عنده وانه مهوب سهل .
والبنية غارقة في حب الوهم . وبعد مايخلص منها وياخذ جميع مايبغاه منها واهم شي عند المرأة طبعا شرفها. يزحلقها بطريقته الخاصة يعني بأدب ان كان عنده اخلاق شوي. واكان ماعنده اخلاق جحدها وحولها على واحد اخر من ربعه وقاله بالطريقه هذي _ تراي خلصت منها كانك تبي تكلمها كلمهاوهذا رقمهاـ

وكم فيه من وحدة الحين عايشة تحت التهديد إما لاجل صورة اوشريط كسيت ,اورسائل غراميه اوغيره.
وكم من وحده تركوها الشباب الاجاويد ما تزوجوها بسبب ماجنته هي على نفسها من مكا لمات هاتفيه , وهي تحسب انها مادرى عنها احد.
وتلقاها ماتزوج الا رجل غريب من طالعي السعة ماتدري وش اصله وفصله والا رجل رخمه يعني ما يفهم في امور الحياة.
وياقل ماتطيح في رجال سنع لانه قبل ماياخذها يبي يصير سائل عنها وعارف حتى جررتها.

وياشباب خافوا الله في البنيات اللي في حالهن لاتبلونهن لانهن ضعيفات ومسكينات.
وترى ربي فوقك هو اللي رايح يحاسبك ورايح يبلاك في اخواتك او بناتك او حتى زوجتك.

وقد يقول واحد او وحدة انا اعرف واحد وحدة تزوجوا عن طريق التلفون. فأرد عليه واقول انت تعرف واحد لكن انا اعرف 100 ما تزوجوا ولا عندهم نية. يعني تصبح النسبة1من 100.

تعليقات:
واحد اعرفه جاء يبي يسافر للخارج ومامعه فلوس يعني مطفر اتصل على حبيبته كما يزعم وقال لها والله اني محتاج فلوس وامر بزنقة.
قامت البنت من دافع الحب وجمعت اللي عندها وباعت شوي من ذهبها ووفرت المبلغ واعطته الفلوس
وسافر بها.

واحد ثاني موريني بطاقة الصراف وحنا في المجلس ويحلف انها حقت صديقته ويقول انها تقول متى ما احتجت اسحب. قال واحد معنا الله يلعنك جبها لي او عرفني عليها قال والله مقدر لاني اخاف تزعل.

شوفوا وين وصلت المواصيل والخافي اعظم لكن الحذر ثم الحذر. وهذي نصيحة اللي يبي ياخذها ياخذها واللي مهوب ماخذبها يتركها ويقولون : العاقل خصيم نفسه.

وارجو مايزعل علينااحد بسبب كلامي هذا وارجو من الله ان يهدي ظال شباب المسلمين ويردهم اليه ردا جميلا.

[هوىنجد]

الموضوع فيه زواج
راح يمتنع عن الكلام فيه
ايه والله شقراء وبس

[عــــناد]

اجمل مافي الموضوع ان
الخاتمة هى شقراء وبس

[بنت الاجاويد]

السلام عليكم

(وشهد شاهد من اهلها)اهلا اخوي مراهق فيك معنا في منتدى الاسرة وعز الله انك ماانت مراهق على هالكلام اللي كتبته والشرح المسهب ..الله يجعله في موازين اعمالك يارب ...ويكفينا واياك الشر وكل مسلم ..
لو اقولك اني تفاجات يوم قريت كلامك اكون اكذب ...والله من كثر مانسمع هالسمفونية ..صارت عادي عندنا .. وكانها طقس من طقوس حياة السعوديين للاسف.....وكان المعاكسات وماتجره من شوفات وعلاقات غرامية شي عادي ..لاحول ولاقوة الابالله ...هذا زماني انا اجل زمان..

بنتي وش يبي يصير ؟؟؟؟؟الله يكفينا الشر وكل من فيه شر ..

تعليق على بعض نقاط الموضوع …
1-وبعدين تلقاها تصادق وحدة لها في الامور هذي يعني المكالمات والمواعد وغيره.
قال الرسول صلى الله عليه وسلم (المرء على دين خليله فلينظر احدكم الى من يخالل )
فصحبه الاخيار يفوح شذاها عطرا ..
اما صحبة الاشرار والعياذ بالله تفسد المرء واخلاقه ...وتجعل المكان موبوء بالمرض..

2-ومع كثر ماتسمع من الكلام وتعيش في جوه تحس ان الامر عادي ومافيه شي ومجرد سعت صدر ينتهي متى ما ارادت.هذا البلا انه مع الوقت والتعود وعدم انكار المنكر يصير الشي عندها عادي وكانه طقس من طقوس حياتها اليوميه...

3-بالطريقه هذي _ تراي خلصت منها كانك تبي تكلمها كلمهاوهذا رقمهاـ الم يعلم هؤلاء الشباب انه متى ما تعفو تعف نسائكم ولم يدركوا قصة لو زدت لزاء السقاءماعندهم اخوات يخافون عليهم
للاسف همهم اللعب والتسليه فقط باعراض المسلمين

اخوي هوى نجد الموضوع عن المعاكسات ماهو عن الزواج يازعيم المنظمه

وهناك مواضيع في المنتدى تتكلم عن نفس الموضوع على هذه الروابط للاخ بووو ومناقشة لوضع البنات والشباب الحالي مع المعاكسات تقريبا نفس فكرة موضوعك بعرض مختلف
http://www.eqla3.com/cgi-bin/cgi/ult...&f=22&t=001079


وهذه القصه المتميزة من الاخت جريشه
http://www.eqla3.com/cgi-bin/cgi/ult...&f=22&t=001080

وهذا موضوع لخالنا كورن فليكس عن حماية البنت لنفسها من الشباب
http://www.eqla3.com/cgi-bin/cgi/ult...&f=22&t=001066


الله يعافيكم ويقويكم