ஜRooney ஜ
موضع شيق و حلو و أحب أشارك فيه
- تجهيزاتك للسفر :أول شي الإستخارة ثم الإستخارة
و عقب المشاورة بيني و بين بو جمال و نحدد مواعيد السفر و مدة السفرة .
و طبعا النت أفضل وسيلة الواحد يسوي بحث عن الوجهة اللي يباها و قراءة تقارير الناس اللي راحو لهالبلد و طبعا اختيار ما يناسبني و يناسب أسرتي .
و عقب نجي للميزانية و كم بنحط للتذاكر و كم للسكن و كم مصرف يومي و كم بنعطيه للعيال حق مشتريات و بعدين نختار شركة طيران مناسبة للميزانية و تحديد الأماكن اللي بنسير لها و تحديد شركة تأجير السيارات و كل الأمور المالية .
و عقبها نشوف الملابس اللي نباها و أغراض السفر و الشنط في الأغلب نشل ويانا الأشياء الخفيفة للعيال اللي تنغسل و تنشف بسرعة لو اطرينا للغسيل و بالنسبة لي و بنتي نشوف العبي اللي استهلكناها طول السنة و نقصرها لأن بنلبس فلاتات و عشان العبي ما تسحب بالأرض .
و طبعا نشوف شو اللي ناقصنا من أغراض و نكملها .
- التذكآآرات من المدينة التي ذهبت إليها وماذا تختار ؟ وعلى اي اساس اخترت ذلك ؟
بالنسبة لي ما أحب التماثيل أبد أبد بس لو في معلم سياحي أو شي للديكور و يناسب لبيتي آخذه
- طريقتك في السفر ؟الحمدلله كل عايلتي من النوع اللي يحب الهدوء في السفر و الخضرة و الجو البارد و ما نحن الصخب و لا الصجة و الأماكن اللي فيها عبث و أصلا نحن نخطط لأماكن فيها استجمام و راحة و المولات تجي بآخر اهتمامتنا و التسوق يكون لأشياء مب موجودة عندنا في البلاد أو بتنزل بعد فترة طويلة .
و أحب أعطي انطباع كويس كمسلمة و اماراتية لأهل البلد اللي بسافر له و أشل معاي شوية هدايا بسيطة للناس اللي بتعامل معاهم مثل التمور و الكتيبات و نحب أنا وزوجي ندخل في حوار و مناقشة مع أهل البلد عن طبيعة الاسلام و نشرح لهم عن عاداتنا الاسلامية و نبين لهم عن سماحة الدين الاسلامي و اننا فخورين بديننا و نعتز به .
- احب استخدام الطياره في كل سفراتي ؟
مب شرط ساعات السفر بالسيارة ممتع جدا و تجربة المواصلات بكل أنواعها جميلة جدا خاصة بأوربا .
- طريقتك واسلوبك في الطعام ؟
الأكل بالنسبة لي مشكلة حتى في البلاد لأني ما أقدر استسيغ أكل المطاعم لفترة متواصلة و خاصة اللحوم و كنت قبل من اشد المعارضين للطبخ في السفر بس بعد تجربتي الأخيرة حبيت الطبخ بالسفر خاصة مع وجود الخضروات الطازجة و طبعا مب كل يوم طبخ و نفخ و العيال أمورهم ماشية أهم شي الأجبان و البيتزا و الكرواسونات و الباستا
و طبعا معلبات بالسفر من غير طبخ نووو ووووي أبدا ما سويناها
- تحب السفر الطوويل مهما كان ؟
هيه نعم لو فيه متعة و مناظر تشد العين أحب السفر الطويل و هذا حصل معنا الصيف اللي طاف ضيعنا الطريق من ميلانو لين زيوريخ و هالشي كلفا 14 ساعة طريق لأن أخذنا الطريق الجبلي القديم و كانت من أروع التجارب اللي مرينا فيها و لازالت ذكرياتها عالقة في مخيلتنا و نتذكر الوضع و نضحك من القلب .
-الأماكن المميزة في السفر التي تزورها ؟ وتهمك ؟
أحب القرى البسيطة اللي أقدر أشوف من خلالها الحياة الحقيقية لأهل البلد و أحب الطبيعة و في شي لازم نسويه أنا وزوجي بكل سفرة و يمكن يستغربها البعض أننا نزور السوق الشعبي بكل مدينة نروحها و سوق السمج
و سوق الخضار و الفواكه أدري بتقولون ليش بس هذا نعتبره اكتشاف للمدينة أو البلد .
- ماهو بدايه تمتعك بالسفر ليلاً أو نهاراً ولماذا ؟
لكل بلد ميزة خاصة و أوربا عموما أحب أوصل لها الصباح بدري و شرق آسيا العصر أو المغرب وفي كل بلد أوصل لها لازم أول يوم أصحى الفجر عشان أشوف الشمس و هي تطلع كيف تأثر على شكل المدينة .
- مواقف ممتعه حصلت لك في أحد البلدان ؟
الحمدلله كل لحظة كانت ممتعة بأسفاري لوجود زوجي و عيال معاي .
- دروس استفدتها من أحد البلدان ؟
تايلند : شفتهم يحترمون كبار السن بدرجة فضيعة و تكون لهم مكانة خاصة بالعايلة .
تركيا : أغلب الشيبان تلقاهم مع زوجاتهم يتمشون سوا .
النمسا : الناس اللي بالريف و القرى يحبون يجيبون عيال كثير و ما يحددون النسل و متقيدين بالدين المسيحي بشكل فضيع أكثر من أهل المدينة .
- بلد تتمنى زياارته ولماذا ؟
فرنسا : ديزني لاند
تايلند : بلد فيها تنوع بكل شي و بساطة و كل ما زرتها أشتاق لها أكثر
- كيف تصنع متعتك الخاصه في السفر متى تكون وكيف ؟
أول شي قبل لا أسافر لازم أتوكل على الله و أجمع لي كم فلس خاص فيني غير ميزانية السفر اللي تكون على زوجي و المبلغ اللي عندي حق الترفيه البحت لي و للعيال و أحب آخذ بنتي للأماكن القريبة من الفندق اللي نسكن فيه و نجلس بكوفي شوب و نسولف و نضحك و نتسوق بروحنا .
و العيال اذا نقص عنهم مصرفهم أعطيهم و اذا أبوهم محد طلع و هم محتاجين بيزات أصرف من اللي عندي و هالشي أعتقد لازم يكون بين الزوج و الزوجة .
و طبعا لا ننسى الجلسات اللي نجلسها مع العيال و ما نتركهم بروحهم بالسفر مهما كان خاصة الشباب منهم و في السيارة نسوي جو مسابقات و أسئلة و الحمدلله الوناسة الله منعمها علينا دوم حتى لو ما سكنا بفادق خمس نجوم ... أذكر كنا طالعين للعمرة و أول مرة نطلع للسعودية و العيال معنا و رحنا للحدود و ردونا بحجة أن السيارة معمم عليها من البنك مع أن ورقة البنك كانت معنا بس في السيستم ما لغوها و كنا واصلين على الساعة 2 الفجر و قال لي زوجي في غرفة للإيجار شو رايكم نريح فيها لين باجر الصبح بدل ما نرجع كل هالمسافة قلنا له نتوكل على الله و يوم دخلنا الغرفة انصعقنا من المنظر غرفة متر في متر فيها سريرين حديد تقول سكن عمال
و نزلنا فرشنا و فرشناه على السريرين و تصورو أنا و زوجي و بنتي و العيال الثلاثة و الشغالة طول الليل لين ظهرت الشمس نضحك على بعض و ما نمنا و كل واحد فينا يعلق على شي بالغرفة و بنتي تصور و تقول بحطه بالنت
و لين الحين الصور موجودة و نشوفها و كلما اعترضو على فندق او سكن يقول أبوهم : اسكتو لا أردكم الغرفة هذيك و يضحكون
الحمدلله بكل الأحوال .
وشكرا من القلب على هالمساحة الجميلة
b189
الي نحمد الله ونشكره عليها 
الوضع العادي
