منتديات شبكة الاقلاع ®



الانتقال الى الصفحة الرئيسية عضويات التميز (الفضية + الذهبية + التجارية) موقع ieqla3 متخصص بجميع منتجات شركة apple أنظمة وقوانين وتعليمات الموقع   وقف شبكة الإقلاع الخيري مركز رفع الصور والملفات تابعونا على موقع تويتر بوابة الانباء
اقلاع بلاك بيري البحث السريع برامج الإقلاع المجموعة البريدية جوال الإقلاع أنظمة وقوانين وتعليمات الموقع للإعلان في شبكة الإقلاع
العودة   منتديات شبكة الاقلاع ® > المنتديات الإجتماعية > منتدى الاسرة
التسجيل التقويم التأشير على جميع الاقسام بالمشاهدة


إغلاق الموضوع
 
أدوات الموضوع طريقة عرض الموضوع
قديم 26-06-2012, 06:01 PM   #1
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب

مميز منتدى الأسرة || ديرتي منبت غضا .. ديرتي أنا القصيم ( مشارك )










اخر تعديل كان بواسطة » وقفة شموخ في يوم » 26-06-2012 عند الساعة » 07:05 PM.
وقفة شموخ غير متواجد حالياً التبليغ عن مشاركة سيئة  
Facebook Twitter

قديم 26-06-2012, 06:02 PM   #2
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب






يالله ان تحيي قلوبهم ياهلا ومسهلا بكل عين طبّت هالمتسان سوااً عضو ولا زاير الي هو هو ... يالله ان تحييهم وتبارك بماطاهم وخطاهم ..
ارعوا بالكم يامعاليدزي ... حنّا ترانا هنا نبي نعطيكم نبيذه عن القصيم وكوده تجوز لكم < نبيذه لا يروح فكركم لانثى النبيذ يابعدي ههههههه لا ترانا نقصد به نُبذه!!
ترى القصمان يبرالهم تصغير الكلمات وتسذا ..


هالحيين انتم تدرون وين هي بوه هالديره الي تفضخ العقل,
ولا بس تدربون دمايجكم وتنكتون عليهم وتقلدون حتسيهم على الهبني ؟!
سالفة اللي سكن مع قصيمي بامريكا والله نسيت وش جنسيته اهم شي انه تعلم اللهجه القصيميه
وصار من الفرحه كل شي يدخل بوه النون الساكنه : اسمن يوسفن اعيشن في بلدن غربين اتمنن ان ازورن مدينتن القصيمن
ولا اللي لاقلت له: انا من القصيم الله يسلمتس .. قالت (أهاآ بوه مير نيم؟؟ )!!
يقال انه لخّصتلي لهجتي ..ياعمّي روحي هناك والله ماتدرين وين هو بوه الله حاطتس

المهم خلّونا بالديرة القَبله ..نفلّ حجّانكم بالحتسي عنه وعن علومه وعلوم اهله ..
القصيم ترى معناه الشي من الارض اللي سهلٍ وتسثييرتن شجيراته والقصيم منبت الغضى والارطى والسلم و هي رمله ..
القصيم الله يسلمكم متمرتسية بازين متسان ببّسط المملكه العربيه السعوديه
و محاوطتن به الرياض وحايل والمدينه ,
وودنا اننا راسمين لكم خريطه تمقّلون به بس ماحصل لكننا نشدنا عن الشكل التوضيحي العام له قالوا لنا انه تسنه شكل المستطيل !! ..
ومن استراتيجيته واهميته تلقونه دايم تجي بالترتيب بعد اهم المدن بالمملكه الرياض, مكه والمدينه ..

والجو الي تتميز بوه القصيم الله يسلمكم جميدةٍ بالشّتا, وفرنٍ بالصيف هههه بس طبعاً فرن بالنهار..
ولا لا غابت الشمس محد يقدر يفوّت روعة هالهوآء اللي يهفف ويشرح الصدر
وريحة هالمزآرع والسما الصافيه والنجوم اللامعه وهدوء هالليالي القصيميه اللي كلن يتغزّل به ويالله من عطاء الجنه ..
والقصيم له سحٍر يبدا شغله لا نزلت الامطار الشتويه يالله من فضلك شي ولا بالاحلام ..


ولو جينا للاوديه بوه عندنا وادي الرمه اللي غدا من اهم واطلق الظواهر الطبيعيه بالقصيم ..
هالوادي تراوه اطول وادي بشبه الجزيره العربيه و يشق القصيم شق من الغرب ألين الشرق ..
امّا مساحته يقولون انه تسبييييييره وكل ماله بزووود والحين يمكن انه تسذا يجي له حوالي (127.350 كم مربع) حرتنّه كبر الامارات او اكبر < طبعاً مع الخبوب والطوالع ..
واكثر واكبر مساحات القصيم تحتلّه المزارع اللي منتلية شجر وخضرةٍ وتمييير من كل شكل يالله لك الحمد
ومن اجود وازين واطعم والذ الانواع اللي مايجهله جاهل .. ولا به ادناة شك ان اول تسلمةٍ تخلي الزبون بسوق الخضره يشري وهو مغمض لا قيل له : ترى هذي توّه جايتن من القصيم ..
اهلَه وربعَه ..هم من اكبر الأسر اللي ماشالله اشتهرت بعياله من امرا ومن علماء وكتاب ودعاة وأدباء ,
ويرجعون ل شتى القبايل من اللي كانوا يحيطون به من كل جهه بذاك الوقت و كانوا ينزحون له .. خبركم ارض مبروكةٍ زراعية وتجاريه مغريه وماتنتفوت ..








اخر تعديل كان بواسطة » وقفة شموخ في يوم » 26-06-2012 عند الساعة » 06:12 PM.
وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 06:11 PM   #3
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب






واللحين بأحتسي عن بعض محافظات القصيم
بريدة:
ارض التعايش والمعايش على ماقال العلم والعلماء
وهي العاصمه اكبر مدن القصيم مساحه الي به المقرات الاداريه المهمه للمنطقه,
واسم بريدة بلحاله يبرد القلب لانه اصلن مسميتن بوه من كثرة برودة الماء اللي به,
وقالوا بعد انه مسميتن على الصحابي بريده لانه حفر به بيرٍ ارتوى منه الناس
واذا جوا يوصفونه جغرافياً ِقبَلهم يعلمونك انها تقع على الهضبه, هالوصف ييزي يخليك تحس بالبرادات
ويبقى المثل البيرداوي القديم الشهير (يحول ياللي ماله بريده ) ناشبٍ بألسنَة اهل بريده وين ماوصلوا من ديار لازم يتنهتون ويقولون هالكلمتين
يقلدون ابو صدام صاحب المثل, من اشهر أصحاب الرعيل الاول ببريده الي بدوا بسواقة السياره اول ماطلعت كإختراع مبهر يعني وخّر على ايامه ولا كابتن طيار
الله يرحمه يقولون كان وادزف على منتزه اشتوره من اجمل مصايف لبنان وكانت الطبيعه تحته, انهار وفواكه وجو يرد الروح,
فقالوا له خوياوه < ياجماعه ضروري تنطقونه خوياوه اللهجه تتطلب لوي الحنك
قالوا له: (ها يابو صدام ايهم احسن) يقارنون بجو بريده طبعاً,
ومير يتنهت ابو صديديم من اقصى صدره وقال (يحّول ياللي ماله بريده)
وبريده قال عنه مستشار الملك عبد العزيز الله يرحمه الكاتب حافظ وهبه:
(هي من المدن النجدية وأحسنها نظاماً ونظافة وطرقها أوسع من طرق الرياض القديمة ومن طرق أكثر البلدان النجدية)
وشوفوا وش يقول عنه الرحاله المستر توتشل انه من انظف الاسواق النجديه واكثرها تجاره وحركه.
وبريدة به سوق الابل اللي يعدّ من اكبر الاسواق واشهرهن بالعالم
هالسوق كتبوا بوه المؤرخين والرحاله العرب والاجانب من كل شكل, يجون ويتعننون عشان ياخذون بوه لفه ويسجلون انطباعاتهم,
والنهضه الجديده ببريده ولمسات التطور والفنادق الفخمه والمراكز التجاريه اضافت له نقاط ذهبيه بحسابه,
وبدت تجذب اكبر عدد من كبار الشخصيات بالمملكه وحتى خارجه وخصوصا وقت قيام المهرجانات والمناسبات الموسميه.

عنيزه:
يقول امرؤ القيس:
تراءت لنا بين النقا و(عنيزة )
وبين الشجا مما أحال على الوادي
هالبيت خلاهم يقولون ان عنيزة كانت موجودة من قبل الاسلام! ولا هين بعد الاسلام مابه كلام
كسبت اهميته من اشياء تسثييره منهن انه كانت بطرِيدز الحجاج, وبه بيرٍ حافرينه من عهد عثمان بن عفان رضي الله عنه,
وبه هناك تشوفون اماكن آثاره تدل على تردد الحجاج من عنده,
ثمّن غدت بجماله ومزارعه تسنه سحر الواحه ببسط الصحراء
الله وهب هالديره زين العروسٍ بيوم زفافه
انفتحت هي واهله على الدنيا اسرع من غيره ومن كل المدن النجديه اللي محيطتن به عشان تسذا سموّه (باريس نجد) واشتهرت بوه ,
ومن عقبه بتلت الالقاب تنكب ماشاء الله على عنيزه من كل صوب
وهالرحاله والمؤرخين يتنافسون ويتفننون بوصفه: مليكة القصيم ومدينة النور والانوار ومملكة التمور,
وعد واغلط من هالالقاب والغزل والتغزل وشويه عليه لؤلؤة القصيم وديرة الذوق والادب وديرة ابن عثيمين الله يرحمه ويسكنه جناته

الرس:
يالله من فضلك من ابهى واملح مدن القصيم
ماشالله اخذت حقه من الاتساع حتى انه صار يتبعه يجي 200 قريه او اكثر
وهي من المدن الرئيسيه بعد بريده وعنيزه, وكانت معروفه من ايام الجاهليه انه مورد المَا, حتى ان اسمه يعني شي من هالمعنى,
وهي مثل خواته بالمنطقه مشهوره بمزارعه وخضرته بس اكثر شي تميزت بوه الفلفل اللهاليب
حبحر الرس الحار اهله يعشقونُه وورَدوا هالعشق بعد فصار على هالحبحر طلبيات كثيره محد يقاوموه

البكيريه:
ديرة الشيخ صالح اللحيدان الله يطول بعمره
واشهر اعيان وعلماء ومشايخ القصيم منه
غير شهرته بمعركة البكيريه المعركة الفاصله مع ابن رشيد, واقوى واشهر ماخاضُه الملك عبدالعزيز ..
تميزت بأهله من قديم الزمن وتكيتفهم ووقفتهم بوجه اقسى ظروف منطقتهم
قاوموا قساوة الصحرا والمياه اللي غارت بذيك السنين وصبروا وتحملوا وتساقوا من آبار بعض,
ومرت سنين كله صبر وكسافه عليهم, لكنهم بعون الله وبإصرارهم وتعاونهم قدروا بزمن قياسي يخلونه من اكبر المناطق اللي حولهم
وباقل من خمسين سنه قامت مبانيه ومزارعه القريبه والبعيده وصارت تتبعه كومة مراكز ماشالله منه الشيحيه والهلاليه والضلفعه وغيره
وانتعشت البكيريه وتطورت بمجالاتٍ الى قبَل,
ومنهن المجال الصحي اللي منه اختارته منظمة الصحه العالميه المدينة الصحية الأولى على مستوى المملكه والشرق الأوسط في مسابقة الامم الراقيه عام 1999م

البدايع:
وماادراك مالبدايع, الديرة الهاديه والمليحه
واللي مايعرفه لازم يعرف انه يحتسي عن ديره ماتعرف الاشارات الضوئيه مكتفين بالميادين ومريحين انفسهم
وترى عموماً بلدية القصمان تخصصهم الدوارات متحلفين به
بس عاد بلا اشارات, وين انت بوه يالشقيري تعال شف بدايعنا وابداعنا
وقالوا عن البدايع (بلد الماء والغذاء والدواء),
ودخلت مجموعة جينيس للارقام العالميه عشاانه سوت اطول "شعار لسرطان الثدي "
وهذا رابط تغطيه عن الشعار شغل سماهر هنا
فعلاً هالمدينه اسم على مسمى اشهد انه ديرة البدايع والروايع بعد,
مزارعه اللي على مد النظر ووفرة مياهه الجوفيه و اماكنه التاريخيه تخليه تستاهل اسمه اللي جا منه ابتداع الافكار والمميزات

و فيه من مدن القصيم ومحافظاته المذنب, والشماسيه, ورياض الخبراء, والاسياح,
وعيون الجواء ديرة بني عبس واثار معركتهم داحس والغبرا اللي قامت هناك وشاعرهم عنتر بن شداد وصخرته هو وياعبله
وغيرهن مدن من اللي يستحقن اننا ناقف بهن وقفات ونسرد شي من انجازات اهلهن بس اخاف الوقت مايدعينا !!






اخر تعديل كان بواسطة » وقفة شموخ في يوم » 26-06-2012 عند الساعة » 06:53 PM.
وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 06:15 PM   #4
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب






العقيلات وش هن العقيلات ؟!
العقيلات من أشهر التجاراة من أول ومشهورتن بالقصيم وخاصتن بريده
ويعتبرونه من تاريخ أجداد أغلب تجار وكاشات هالقصيم يعني أثرى أثريائهم
بس يابعد تسبدي والله ياأنهم تكسفو وذاقو المّر والتعب وقته عشان هالبيع والشرى
يعني لاتحسبون هالدراهم طالعات من شي هين

إن تسانهم داخل القصيم, يركبون عقيلاتهم من عنيزة وبريدة الصبح أو الضحى,
همن يطلعون لصعافيدز ديرتن حول عنيزة والعوشزية ويبدون يضفون من الغضا
ويحملون على ظهور البعارين، وطول الطريق وهم يشيلون هاالشيلات اللي تشرح الصدر ماودك يسكتون ،
ولا جا حول العصر أقبلوا من حدا بوابات عنيزة وتوجهوا يم الحيالة وباعوا الغضا اللي معهم وتكسبوا ماشاء الله عليهم

وتسانهم بيطلعون برى يجونه يتجمعون من نجد واللي ببريدة نفسهم وعنيزة والرس والبكيرية والخبراء والبدايع
وعيون الجواء وقصيباء والمذنب والقرعاء والشقة والطرفية والشماسية والربيعية واوثال
ويتجمعون ببريده, وينطلقون منَه وما ينتتمون لقبيله معينه كلهم تجمعهم (عقيل) مهنتهم التجاريه وبس..

همّن يخلون اهلهم وعييلهم بالشهور والسنين , همّن يروحون ويكدحون ويتحملون الشقا ويطلبون الرزق والخيرات,
ويالله لك الحمد ربي ماخيبهم ولا ضيع تعبهم ماشاء الله ونكس الخير لهم ولديرتهم ,
يسد انهم ربطوا الدول العربية والإسلامية اقتصاده وتجارته وسياسته جِميع ..

وقعدوا لهم يجي 400 سنه على هالتجاره
ونِقلَت عنهم قصص بالصدق والوفا والامانه والشجاعه والصبر اللي مثلوّه بديار الشام والعراق ومصر والكويت وغيره ,
اويلاه لو تنقش على جباهنا من شد ماهي تشرف وترفع الراس
اجل يقولون بالشام بوه كلمه صارت تتداول بمعاملاتهم بالبيع والشرا (خلك عقيلي ) <يعني يقصدون بمعاملتك الزينه

والعقيلي تجارته بالابل بالدرجه الاولى يشترونه من جنوب افريقيا وينقلونه للبلاد العربيه,
يشرون من باقي البضايع ,
والتجاره بالمثل يعني يجيبون من العراق السكر والشاهي والقهوة والهيل,
ومن الشام يجيبون الملابس ,
عاد ييجبونه لمنا بنجد وامير الرحله يصير معه الطباخين والخويا والقهوجيين والرعايا والملاحيق <تسن ودي اني لاحقتن عليهم
والعراق والشام يشترون من القصمان العقيلات , لانهم يدورون إن بعارين القصمان جيّده تتحمل الكرف والطريق

والعقيلي ترى يختلف عن الرحيلي اللي يشبه الجمّال المختص بشرا البضايع اللي يحسون عليه طلب من الكويت والبحرين ويجون يبيعونه بنجد..

وطبعاً يطولون بالروحة والجية يعني منهم من يقعد شهور ومنهم من يقعد أسابيع كلن وحسب بعارينه ،
البعارين الجيدة ماتوقف إلا مرات قليلة، أما اللي بعارينه مهيب ذاك الزود توقف كم مرة،

وعلى ماقال الشاعر :
يا ركب يااللي من عقيل تعلوا .. اكوار كوم كاملات الكلايف
< في حال احتجتوا لشرح البيت الرجا مراجعة المشرف شابور





وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 06:16 PM   #5
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب






^ يآخيتي يكفي حتسي خلين أحتسي لهم وأعلمهم بعاداتنا وتقاليدنا
ماعلينا ترى عاداتنا وتقاليدنا وش حليلهن مثلنا ,,
وحتى بيننا ي محافظات القصيم تختلف العادات شوي ..

يعني مثلاً عروسنا ي أهل القصيم
مهنا تشرط بالمهور غالباً اللي يجي من الرجل زين ورزق ,,
ومعروفن بيننا ان مهورنا بحدود الـ 50 ,,
فيه ناسن أكثر وناسن أقل بس الاغلبيه حوله مايبعدون واجد ..

وأمور العرس من محافظة لمحافظة تختلف ..
يعني مثلاً حنا ي أهل البكيرية الملكة يجي كم رجلن من اهل الرجل ,
حزة مغرب او عصر او مسيآن ويوقعون العقد وخلاص صارت مرته على سنة الله ورسوله
والعرس عاد بكل المحافظات على أهل المره

وعندكم أهل عنيزة مثلاً ,,
عندهم زودن علينا شبكه .. وتكون عزيمة حريم ,,

والمدة بين الملكة والشبكه ياربي لك الحمد ماتطول
ناسن شهرين وناسن أربع وناسن ست

وأيييه صح عندنا ي أهل القصيم بالعروس شيء يسمى الجنب
طبعاً فيه جنَبن للحريم وجنَبن للرجال ..
طبعاً الرجال يجتمعون لهم ب أستراحه .. ( أهل المعرس )
يبدون يتجمعون من حزة المغرب ,,
واذا صار العشاء وصلو وبدوا يتضبطون ..
مشت السياراة للقصر ,, وطول الطريق ماغير إزعاج لخلق الله بواري وتصوير
مير ياحبهم للتصوير ذالجيل ..
واذا وصل يبدأ ينزل ويدخل ويرحبون ويهلون فيه ..

وحنا يالحريم اذا وصلوا عيالنا للقاعه رجعو لنا للبيت ..
ونمشي ونصير متصلين على اخياتنا وخالاتنا وعمومتنا ومتفقينن على مكان ,
وإذا أقبلنا على العررس طنبوا هالعييل بواري يعني إننا جينا ..
ولا دخلنا للقاعه اثاري أهل المره يرحبون بنا ويهلون ويزغرطون

ومن ضمن هالعادات اللي عندنا ,,
تسان عندنا عرس او حفله عزيمة تسبيره ,
لزوم نربي الحنآء قبل بيوم ولا جاء الليل تحنيت أنا ام محمد
وكل هالحريم اللي حولي أكيد يحبن الحناء ..
خبري بهن يوم تجيب أم عبدالعزيز ذاك الحنا اللي ماقد شفت مثله
يوم يتهاوشن كل وحده تبي شوي منه

وبعدد من أول كنت أشرط لعييلي اذا اجتمعوا ,
مير اني عارفتلهم مايتسابقون علي الا عشان هالشرط ,
ومااحب اني اطلع مرّه ,, اكون مجهزة هالشرط واذا جو شرطته لهم ()

ويوم بارك الله لوليدي وتوظف واللي منه ..
وأخذله الراتب الأول ,, مسكته وقلتله رح أقرص أذن جديدك
خزيه من الله أول راتب وتسذا ,,
مير إن وليدي حبيب جعلي أشوف عيال عياله قولوا آمين
صار قآرصه قبل ماأقوله .


واللحين بحتسي لكم عن الأمثال اللي تضرب بيناتنا ,,

مرتن جاين محمد وهو صغير وكان اقشر الله يصلحه ,
وجالسن يسب عبدالعزيز ولد هيله وأخبره وهو صغير كان محسرن بأمه ,/
وماقويت أقوله الا الشبكة تعاير المنخل ياوليدي
يعني كل وآحدن منكم أردى من الثاني ..

وعلى طاري محمد , من أول كانوا يزعلون علي هو وأخوته ..
عشان حبي للسلمي غير عنهم ,
وكانوا يقولون يحول ياحنا , ليت يجينا بعض اللي يجي السلمي ..
وكنت أقولهم لاتلومونن بكرى اذا كبرتوا تعرفون يآعييلي أحبكم كلكم بس القعده حبه رعده

ووآحدن من عيآلي الله يصلحه , توه متخرج ,
وماغير يحن ويرن بالبيت يبي وظيفة ,
وأقوله ياوليدي معيتسيس (معيكيس) تجيك وظيفة وأنت جالس , هج إثمك يرزق الله

ودامنا بالأمثال خلون أقولكم ذالقصه ,
خبري بوحده أعرفه ررآحت تدور لولده وإنمدحت له بنت نآس
مير إن يوم جتهم واللي جايه تشوف وأم البنت والبنت جالسات ,
مير يطلع صوت من البنت غصبن عنه ":
والضيفه بباله تقول ( واخزياه وجه بن فهره )
وتتفشل يحول الأميمه ويوم جت تطلع الضيفه لحقته الأم وفكت مجوله وعطته إياه ,
وقالت له أستري علينا ربي يستر عليك
ومير تشوفهم البنيه وتجيكم تدابتس وتسحب المجول ,
وتقول والله ماتسوى الـط*** من الشباع والشباع من حلال أبوي

عاد أبشركم يوم رجعت الحرمه وقصت لولده السالفه ,
قال أبددد مآأبي الا هي , هي اللي بتحافظ على فلوسي وحلالي وبيتي

عآد واحدن من ذالأمثال خبري بأمي ماكان يجوز له ,
واللي هو رأسن مابوه هوى موته وحياته سوى ,
يعني الواحد اللي مابوه طرب ماله داعي بيننا ,

وأذكر مرتن شفت وحده الله يستر علينا وعليه , سمعته شينه بيننا ..
ماتخلي أحدن بحاله , كلن يطوله شره ..
ومرتن من المرات كنا بعزيمة وتشوفه أم صالح وماكانت تعرفه ذاك الوقت
وكانت هالمره مسويه بين الناس انا الحبيبه اللبيبه
وتلف علي ام صالح وتقول ياخيتي حبيت ذالمره شكله حبيبه ,
مير إني مااحب اتكلم بالناس وأقول بداخلي ,, لابستن خلاخل والبلا من داخل .

يابقه بالدعيسه ,
^ بتقولون هآو وشو ذا ,
البقه أكيد كلكم تعرفونه الشيء الصغير مره ,
والدعيسه هذولي شجرن وش كثرهن ماشاء الله ببريده
فالواحد اذا بدأ يدور شيين صغير بين كومة أغراض يقولون له يابقة بالدعيسه

طيب تعرفون المثل اللي يقول من حفر حفره لـ أخيه وقع فيها ,
عندنا مثله بس نقول إتسثح ياثور قال على قرونك ..
يعني الثور وأنتم بكرامه يبدأ يحوس هالتراب برجلينه وترجع على قرونه .

راحت تروي وأعرست ,
هذآ المثل يقولونه للوحده اذا وصوه على شيء ,
وطولت ماجابته ,

وخلون أقولكم ذالمثل
أضحى الضحَى ماشفت بالقصر دخان
عزِيل من يرجِي الغداء من رقيه
طبعاً ينقال للواحد اللي يحتري شيء ومطول على مايجيه
ولا اللي يطلب من واحدن جامد يالله يتحرك .

وآخر شيء صورت لكم قصة مثل
للي ودو يقراه





وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 06:18 PM   #6
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب




بعض من تراث القصيم

تعالوا أقروا هالكلام وصدقون بتستمتعون
بحتسي لكم عن شيء من ماضي القصيم
من ملابس وألعاب وطريقة التواصل قبل

أول شيء خلون أحتسي لكم من أول وش كانوا يلبسون
كان ملابس الحريم تتميز بألوانه وتصاميمه وإستخداماته ,,
أيه شيً يستخدم للبيت وشين للصلاة وشي للزواج وشي للزيارات ..


طبعاً الملابس كثيره أنواعه ولو بحتسي لكم كله بتنحاس عليكم ,
فبقولكم أبرز وأشهر الملابس

المقطع
يقولون إنه ثوب مخمل مطرز بخيوط حرير ملونه ,
واللي أخبره ومعروف بيننا هو مثل ثوب العجايز
شفتوا البنيه اللي بالصور ماشاء الل هذا اللي عليه هو المقطع

الكرته
ثوب من حرير غالباً يطرزونه بخيوط زري ,
ويكون فيه زم
وترى رجعو له اللحين لو تشوفون بعض أشكال الفساتين

سروال خط البلده
سروال يلبس تحت المقطع غالباً يهفهف
بعد العجايز تلقونهن للحين يستخدمونه
جدتي الله يرحمه كانت تلبسه
وتكون ميزته وسيع ومخطط

الغدفه
مثل الطرحه او الشيله اللي تسمونه
بس غالباً تكون قطن وساده

هذي أبرز الملابس الشعبيه المشهوره بالقصيم ,
واللحين تلقون فيه ناس يجتمعون ويخصصون يوم ويلبسونهن
حنا مع خوالي ليلة عيد الفطر نجتمع بإستراحة خالي ,
واللي بيجي يلبس مقطع عاد بعضهم يلبسون سروال خط البلده
ونجي وأثاري بعضناً مجدلين شعيراتنا جدايل الأوليين بعد

واللحين خلون أحتسي لكم ألعاب من أول
والألعاب معروف تصلح للكبير والصغير , بس بعض الناس مقتنعين ان الألعاب للصغير
مير من تالي صارت الألعاب بيد الكبير قبل الصغير

عظيم ساري
هاللعبه مشهوره من أيام العصر الجاهلي , بس كانت مشهوره بالقصيم
]وهاللعبه تلعب دايماً في الليالي المقمره , وهي ينقسمون هاللي بيلعبون فريقين ,
ويجي أمهر واحد فيهم يرمي العظم إلى أبعد مسافه , ويقول ( أعظيم سرى ) ..
وبعدين يدابتسون كل هاللي يلعبون يدورون عليه , واللي يلقاوه يقول ( سرى )
ويرجع بسرعه لمكان البداية , وييركضون وراوه كل اللاعبين ,
اللي ضده يحاولون ياخذونه منه , واللي معه يحاولون يمهون عليه
اذا وصل والعظم معه , احسبت لهم نقطه
واذا اخذوه منه انحسبت النقطه ضدهم ,[/
والفايزين اللي يجمع أكثر نقاط

الدوامه
هاللعبه يجيبون لهم شيء شكله مخروطي يعني أشبه بالقمع
ويثبتون عليه من تحت مسمار صغير
ويجيبون هاللي بيلعبونه خيط قوي ويلفونه عليه بقوة
ويطلقون الخيط منه بقوة , وأحسن لهم يلعبونه بمكان صلب ,
وبتدور بسرعه مره حتى بتتخيلون انه واقفه من قوته
والفايز اللي أخر واحد دوامته توقف

الكعابه
يجيبون لهم مجموعة من مفاصل الضأن , ويحطونهن على الأرض ,
وكل لاعب يصير معه كعب يسمونه ( الصول ) ,
وبعضهم يحط بوسطه رصاص ويسمونه ( كعب مرصص ) , عشان تكون الرمية أقوى ..
ويحطونهن فوق بعض , ويقوم أحد اللاعبين بتصويب صولته عليهن ..
اذا طخ وحده لعب مره ثانيه , واذا مالمس ولا شيء لعب اللي بعده وحاول يكسب أكثر
تقريباً الكعابه تشبه البولينق

المقلاع
يجيبون لهم صوف طويل شوي , ويحطون بوسطه قطعة منسوجه من الصوف ,
ويحطون بوسطه حصاته , فيصوب لأي شيء يبيه ويطلق أحد أطراف الحبل
والمقلاع دايم يستخدمونه راعين المزارع على الطيور اذا بدت تاكل زرعه

الطابه
يجيبون لهم كورة صغيره يزينونه من الورق او البلاستيك , ويحفرون له حفرة بالأرض ..
ويلعبون به اثنين , ويصير مع كل واحد عصا مقوسه من الطرف ,
ويحاول واحد منهم يرمي الكوره بالعصا بالحفره والثاني يحاول يصد الكوره عن الحفره
وهاللعبه تشابه لعبة الجولف اللحين

وبعد كان فيه من الألعاب يركبون عسيف النخله ويراكضون بين هالبيوت
وتقول من أمي من أول , يوم طلعت السيارات نراكض وراه ونتمسك بالاخير وننسدح على الارض
وبعد تقول كنا نسويه بالبقره نمسك ذيله اذا شفناه وخليناه تسحبنا
وطبعاً هذولي كانت أشهر الألعاب المشهوره بالقصيم ,
وأكيد البنات لهن ألعاب بس دايم تغلب عليهن الأناشيد وهن يلعبن






وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 06:38 PM   #7
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب




واللحين يوم قلتلكم عن هالألعاب خلون أقولكم كيف كانوا يتواصلون من أول ,
مثل ماتعرفون ماكان فيه لاتلفونات ولا شيء ,
فكانوا يتواصلون بالرسايل وتلقون الرساله يمكن شهور ماوصلت
يعني تلقون الأهل يرسلون لبنتهم المتزوجه رساله وتلقونه توصله بعد أربع او خمس شهور ,
وعلى ماترد عليه وترسله توصلهم بنفس المده او اكثر على حسب المدينه اللي هم به
ولزوم يسألون عن الكل ويخبرون عن كل شيء صاير
هذا نموذج مثلاً

أختي الغاليه أم محمد ,
السلام عليكم ورحمة الله وبركاته
خطك الشريق وصل وفرحنا بوه , وكثر الله خيركم على المقطع والغدفه اللي كزيتيهن لي ..
وأبشرك أخبارنا تسرك , البقره أضنت, والبيض فقش, والدجاجه الرقطا راجنه
وإن محمد العلي أعرس, ونوير إنخطبت, وعبيد فطمناوه من الرضاع ,
وسويره رفعناها من السقاط, وصويلح شراله دنانه , وسليم ختم المصحف , وعزيز الصالح طاب من الطنان,
وعزيز ولد مضيوي بدا يحبي, والحمدلله طاب الحجام اللي بعينه , وأنتي الصادزه حطينا عليه تبنه
وحصيصه طابت قطوفه اللي برأسه , وأم سويلم طلعت من الماجب, وتممنا لسويلم
ومقطع الروز خبناوه, والدوشتز غيرنا قطاعته, والزبيل مليناوه حتات من نخلتنا ,
وشرينا سحّاره ولقيناه منكسره .. والله يهديك يخيتي أم محمد ,
البزار اللي كزيتيه شوي الكركم بوه :" , والمسنه تقل رماد مابه ليمون , والفتيت مسري, والكليجا تقل عظامه
وإذا بغيتوا تكزون شيء, كزوا شيً يبل الريق ويواجه عند الحموله
معتس علم إن حمولتنا ناس نقاده, وخالتي شراهّه, وحريم عمومتنا صرت أنا هرجتهن
وجذاعينهن شيبان كبري يترددون على هالجصه قضوا على النعمه الله يهديهم
وأنا ماودي أطول عليتس بالحتسي , عسى مايخلين منتس
]وسلميلي عليك نفستس خاصه ومن يعز عليتس ,
يالله حسن الخاتمه والعمل الصالح وأسلمي وأنتي سالمه
مع السلامه .. أختك أم سليمان

شفتوا وشلون , كل هالحتسي وتقول إنه ماطولت بالأخير حبني له أم سليمان
وشفتوا وشلون يحول من أول ماغير بهالرسايل ,
وشوفو هذي رساله من عمي يوم انه بأمريكا
طبعاً الأسامي اللي ماسحتها اسامي عماتي



بحاول أترجم لكم واللي ماعرفت وشو بحط لكم ......
إلى الأخ صالح المحمد المحترم
بعد التحيه والإحترام
دام الباري عليكم وعليكم نعمة الاسلام , وجب الخط بلاغ السلام إلى خاصه تقبل
والأخ عبدالرحمن وعياله , وعلي العبدالعزيز وعياله , وخالتي وعياله وجميع من سأل عني
( مدري عجزت اقراه واللي بعده ) الوالد والوالده والأخوان عبدالله وسليمان ,
والأخوات وعيالهن , وخالي عبدالله وعياله ,
مالزم والسلام
ملاحظه
وأرجوا رد الجواب بسرعه بعنوان عبدالله
أخوك 1395

ومن أول بعد ماكان فيه كميوترات ولا شيء , فكانوا يكتبون العهود والمواثيق بيدينهم
بوريكم كذا صورتين والذكي اللي يفكك الطلاسم


^^ يبدو إن سالفتهم يتكلمون عن تسليب اللحيدان بأمهات الذيابه
ويبدو إنه بيحطه وقف , هذا والله أعلم


^^يبدو إن واحد من عيال الحسون مدين واحد من عيال الحسون
وإنهم تصالحوا ودفع المبلغ الباقي للي هو 30 ريال
وكان فيه شهود طبعاً

وكثير من المواثيق بس أقتبسنا لكم أفضل شيء




وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 06:55 PM   #8
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب







يومن من الأيام مجتمعين عندي عيالي وبناتي وحريمهم وبزرانهم،
وتعرفون ازعاج هالبزران اللي يركض واللي يغم عيونه واللي يتزحلق ويتمرجح ،
ومادرينا إلا بزعاق البزران هيلة انفتح راسه ،
يوم قالوه وأنا أنقز مادري وش هالنشاط اللي جان و لو مهيب هيلة ماتحركت من محلي ،
قلت ياتسبديييه جيبوه لي خلون أشوفه الله لايعيدكم يابزران قريح راكبكم إبليس ،،
يوم جابوه ياعردزي وإلا دمه تقل نافورة وأنا أصرخ على بنيتي:
قومي جيبي المسمار خلين أسد به جرحه ..
وأفصخ غدفتي أبعصب راسه ، وتجي مرت ولدي قالت :
وش تسوين ياخالة لا تحطون له مسمار يثور دمه تنزف بنيتي خل نوديه للمستشفى يخيطونه له
أقول بلا هبال المسمار زين يوقف الدم واتركي عنتس الخفة ،
ويجي ولدي أبو هيلة ويلقطه من حجري :
لا ياميمتي المسمار يثور دمه بروح أوديه للمستشفى
قلت الله يرحم حالك أقول ، أول لانفتحت روسنا مايلمه إلا المسمار ،
لكن بنيتك وانت حر وده وخل جوالك مفتوح أبزهم عليك لا تشغلن على بنيتك ،
لقط البنية ووداه المستشفى ،

وقاعدتن وحولي بناتي وأقول لهم :
الله يرحم حال هالجيل لو ينغزهم دبوس قالوا يالله الدكتور، من أول كلن طبيب نفسه وعلاجاتنا من بيوتنا ،
المرة والحلتيتة والحلب والصعوط نصعط به البزران من أول لا شفتي خشيماتهم تقل مثورن به بندق منه ،
ولا طاح من بطن أمه وقطعو سره عالجناوه لين يلتم ويغدي ماهنا زين شكله ،
ولا انكب الحار على أحد مابه مثل الحنة نربيه بميّه همن ندهن بُه مكان الحار وماشاء الله ماتقل جاه شي ،
حتى الصعارير لاجاتس البزير وإلا الصعرور تقل فنجالً من كُبره أخذنا لنا هللة وإلا نص ريال وإلا ربع ,
همن حطيناه على الصعرور وعصبنا راسه لين يغدي ماشاء الله مابه إلا العافية ،

والحين شوفي البزران التالين روسهم تقل جراوة ( شمام ) وإلا تقل كابون من قل سنع أمهاتهم ،
من أول نحط كيس رمل تحت راس المولود عشان ينفضخ ويتعدل من ورى مايصير ناقز ،

ومن أول بيوتنا ماتخلى من المرة ، كنا نقول : مايسهر حر وبالبيت مر
حتى الملوع لا انملع البزر إما من الشيل أحد يشيله غلط وإلا هو من التمغط يملع نفسه,
قمنا ودهناوه بزيت همن مسكنا رجله اليمين مع إيده اليسار وقربناهن لبعض همن العكس نمسك رجله اليسار مع إيده اليمين ونقربهن لبعض همن عاد ندهن كتيفاته همن نمهده,
ونخليه بنفس مكانه مانشيله لين يزغل ويكرم السامعين نعرف عاد إنه ماشاء الله ربي رفع عنه ،

ومن أول لا انتفخ بطين البزر وقام بس يرغي وماغير تمغط نعرف إن به أخت, وناس يسمونه شقيقة ببطنه ،
همن عاد نوديه لأم سلامة وتكويه مع بطنه وتعطينا معه صعوط ناخذ منه شوي وننقعه بفنيجيل ونشرّبُه ،
وناخذ بودرة الصعوط ونفرك به خشيمه وماشاء الله ربي يرفع عنه ويشفيه
وتسان البزر بدأ يسنن ويرغي جينا وحطينا على سنونه صعوط ،

حتى الحريم الحين الله يرحم حالهن مايولدن إلا بعمليات ,
من أول ولايد الحريم طبيعية ماعرفنا العمليات إلا من تالي ماغير يبجدون ببطون الحريم ويمصعون البزران ،
من أول لاولدت الحرمة وقطعوا سر الوليد جت اللي ولدت أمه ولفت أصابعه الثلاث بشاش همن دخلته بأقصى حلقه ,
وبدت ترفع وتنزل إصابعه سبع مرات همن ماشاء الله يتعدل حلق البزير ومايجيه لوز ولا يسقط حلقه ومايعرف الأمراض ويرضع زين ،،

والحمدلله ان للحين فيه حريمن يعالجن ، يعالجن اللي مايعالجنه المستشفيات ، فيه بالقصيم وحده تسمى أم الذيبيه بامهات الذياب ، وام البنية بالخبراء

أقول الله يخلف بس كثروا الدكاترة وكثرت معهم الأمراض





وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 07:07 PM   #9
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب





تعآلوا وأقربوا تسانكم تبون وسعة الصدر والنفوس الطيبه الصافيه
والناس اللي تحب الخير وتسعى له
بقولكم قصة رجلين راعين خير

خلون أقولكم قصة ( جهاد ) خال أميمتي ()
طبعاً أسمه محمد بن إبراهيم بن عبدالله الحسون
وأبوه اللي هو جد أمي كآن مزواج بس مافرط ب أم جهاد
وأمه كانت شاعرتن معروفه وللحين أمي تقصد لنا قصايده ,

كان جهاد معروف بين الناس يحب الخير واجد, ويحب يساعد المساكين والفقراء والأيتام
وكان بيته ومزرعته مفتوح للمحتاجين , وجهاد معروف بأخلاقه , وكان هو يلتمس حاجة الناس بنفسه ..
وكان معروف بالحكمه, وقلة الكلام, ويكره أحد يمدحه
ويتونس اذا حضروا المساكين لمجلسه

ودوكم هالقصه وحده من قصص كثيره ,
كان فيه رجل فقير ماعنده الا ثلاثة أريل :" , وماكان وده يفرط به أبد ,
وكان متزوج وعنده أربع كلهم صغار , وماعنده شيء يملي جوعه لاهو ولا عياله ..

وزوجته دايم تحن عليه إنه يشتري بهاللي معه عيش , وكان وقته الصاع بريال ..
وزاد إلحاحه عليه وقال مالي إلا جهاد أروح أشتري منه العيش

ويوم إنه راح لجهاد رحب فيه جهاد واخذ منه الثلاث ريال وعطاه ثلاث طعش صاع عيش
ورجع لبيته والدنيا موب واسعته من الفرحه , زاده جهاد عشرة أصواع

وجاء وقال لزوجته سوي لنا خبز وانا بروح أصلي , ويوم إنه رجع من الصلاة ,
يقول أستقبلتن زوجتي وتقول أبشر بالثلاث ريالات لقيته بالكيس
يقول بتسيتس بتساء قوووي , لان جهاد كان يعرف بحالتي وفقري

ويوم إنقضت أيام جهاد وتوفى , انتشر الحزن بالبكيريه كله ,
وكانو يسمونه أبو الفقراء والمساكين

واللحين بقولكم عن الفريق أول عبدالله بن راشد البصيلي
بعد هذا واحدن من القرايب ..

بداية عمره أستأذن من أبوه يسافر للرياض يدور له شغله, ولقى وظيفة جندي في الحرس الملكي
وبعد كم دورة , أصدروا قرار يرقون بعض الدارسين , وكان هو من ضمنهم , فترقى إلى رتبة ملازم
وبعدين إنتقل وصار من ضمن اللي حرسوا الملك عبدالعزيز
وتدرج في كذا شغله, مرتن ركن عمليات ومرتن ركن تموين ..
وعاصر الملك عبدالعزيز والملك سعود
وفي عهد الملك فيصل عين العقيد عبدالله البصيلي قائد الحرس الملكي , وبعدين رقوه لرتبة لواء ..
وفي عهد الملك خالد رقوه لرتبة فريق , وفي عهد الملك فهد رقوة لرتبة فريق أول

وبعدين طلب التقاعد سنة 1407 هـ ووافقوا على طلبه ,
بعد 21 سنه كان فيها قائد للحرس الملكي , كان يعرف بإنه الرجل المخلص الكفء
وكان تقدير الملك فهد لخدماته أن تم تعيينه مستشاراً بالديوان الملكي بمرتبة وزير ..

من أعماله الخيريه ,
بنى ثلاثه وثمانين مسجد بالمملكه وبخارج المملكه
ويوم توفت زوجته بنى له عشرين مسجد وقف له
وسوى ثلاث وحدات لغسيل الكلى في البكيرية وتبوك وأبها ,
( بآخر عمره كان يغسل كلي )

وأقام مشاريع خيريه للأيتام في أبها وحائل وشقراء والبكيريه , ومعهد للتربيه الفكريه ببريده ..
وسوى بيوت لذوي الحاجه, ودعم الجمعيات الخيريه وصناديق البر
ومدارس تحفيظ القرآن الكريم بالرياض والقصيم
وأقام مبنى توعية الجاليات ومبنى التأهيل الشامل بالبكيريه وحايل
وأنشأ 52 شقة للفقراء في مصر
والكثير الكثير من الأعمال هذا اللي بحثنا وعرفناه غير اللي كان بينه وبين الله

ويعد عبدالله بن راشد البصيلي من أعظم الرجال اللي كانوا يعرفون بالخير وتقديم المساعدات سواء داخل المملكه او برا

كان يتصف بالأخلاق والتواضع والكرم والزهد وحبه للخير والعطاء وإخلاصه للوطن

في آخر عمره تعب ووافته المنيه العام , قبل سنه من الآن ..




وقفة شموخ غير متواجد حالياً التبليغ عن مشاركة سيئة  
Facebook Twitter
قديم 26-06-2012, 07:09 PM   #10
وقفة شموخ
حكيم عيادة الإقلاع
وقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحبوقفة شموخ فوق  هام السحب





أكيد فيه منكم اللي يحب الشعر وفيه أحد يتذوق الشعر
حتى اللي مايحب الشعر لو قرأ هالرد بيحبه صدقون

من أول القصيم تعج بالشعراء وبعضهم شعره تحبه لان وانت تقرأ تدري وش المقصود
يعني على سبيل المثال ..

سليمان البصيلي ,, جد جدي << كل الناس يقربو له
توفت زوجته وقال به هذي الأبيات , طبعاً كان يكلم ولد بنته

- قم يالفريحي وأنتبه وأشعل النار ( الفريحي ولد بنته )
قم سو فنجالً جلا الهم عني ................
- والله ماهمّن غروسٌ ولا أبكار (يعني ماهمته بعد وفاته هالمزارع وكذا )
ومحالهن بالصبح لا لجلجني ( المحال اللي هي السواني )
- ماهمن إلا أمً لهن شمعة الدار (أم لبناتي راحت كانت شمعة الدار )
حزايب عقب أمهن يعولني ( يقصد بالحزايب بناته )

والشاعره الثانية والدة صالح الجفير
قالت هالقصيده جالسه تقارن بين حاله يوم عجزت وبين حاله يوم كانت شباب

- أمنول مشيي بالأقفاي شلي......................................
وردفً يشيل الثوب لا أقفيت ذباح ..................................
- وذريّعات للتجميل زهني (تقصد ذراعاته يعني كانن زينات مره )
لافهقن كنه محاجين ملاح ( يعني اللحين يديني طايرات على ورى )
- واليوم مشيي ياجنيني تدري......................................
أمشي بهون وأكثر المشي دلباح (يعني بشويش ومدبحه منزله راسه )

الخ القصيده القصيده بمجمله نعت بشكلة يوم صارت عجوز

وأخيراً أطلق شاعره بالنسبه لي
تعرف بمسعوده ( نورة المحمد الحمد المسعود اللحيدان )
أم جهاد هذاك الكريم
وتصير مرت أبو جدتي

طبعاً أي إجتماع بيننا ( خالاتي ) لازم يجيبون طاري قصايد مسعوده
ويبدون يصفقون وواحد تغني من خالاتي او امي والباقيين يصفقون
( امي له مقطع صوت وهي تغني أحد اغانيه وبموال بس بنجلد لو احطه )

خلون أبدأ ب قصيدته يوم جت تخطب لزوجه
لان زوجه كان مزواج وراحت تبي تخطب له وقالت هالقصيده للبنت اللي بتخطبه

- يابنت ودي ماردي تار دينه......................................
عدٍ عليه الورد ماهمب يبطون ( يعني ترى الحريم معه مايبطون )
- الا بني زيدً تحالو قطينُه ( اتوقع ان بني زيد جدة امي ).....
زادت بهم يعلهم مايزيدون .......................................
- سجيت أنا وياه خمسة عشر عام ( يعني لي 15 سنه وانا معه )
أحلى من السكر عذين شرابُه ................................
- جوه الخضير وجوه نقوة بني زيد ( الحريم اللي طولن معه )
حالوا عليه وكدرولي شرابه ..................................

عاد لأنه تجوز لي مررره بقول كذا قصيده له
طبعاً هالقصيده تقوله على لسان جدتي ( جدتي وقته كانت تحبي )
وجدتي تصير بنت رجله

- تقول ساره واحلالاتي يايوه .................................................. ..
ولاتس مثل العام شيخة زمانتس ( طبعاً تقل ساره تمدح امه)00000000000000000
- تدخل سلولا لادخلتي تخضين ( طبعاً سلولا خادمه عندهم )0000000000000
تشب لتس ضو العشاء من جلالتس ( يعني من حشمتك تخدمك وتروف بك )00000
- واليوم وش علمتس عن الخض تنحين ( هذا تقل ساره تقول لمسعوده هالكلام )0
واللي عجوزً مالحقتي عيالتس ( تقل ساره تقول لمسعوده انك مقابلتنا وتاركتن عيالك )
- ياما حلا جدعتس اذا جاء أسمر الليل ( تقول ساره يازيننا لو نجدعك بالبير بالليل )
بالبير مايدرى وين الله ضوالتس ( يعني بالبير مايدرى وينك اذا جدعناك )00000000
- والله لو أنتس جدعتين بالبير ( مسعوده ترد على ساره )000000000000000
مع الغروب أطلع وأزلزل مقامتس 00000000000000000000000000000
- وأصير عندتس مثل تساذن على العين ( يعني بنشب بعينك )0000000000
وأغث ياجعل المراهيف بالتس ( وأغثك )0000000000000000000000000

ودي صراحه تسمعون القصيده صوت جميله جميله جددداً
يعني اقصد لو تسمعون شلون اللحن , لولا الحياء كان سمعتكم صوتي

وكان مسعوده عنده بنت صغيره أسمه هيله عمره 8 سنوات
وكانت ترعى الإبل وراحن لمزرعة احد الجيران , مير يطلع ولد الجيران ويجلده
فرجعت لـ أميمته وهي تبتسي
فقالت مسعوده بالولد قصيده , بقولكم ثلاث أبيات منه

- أول ظفر هر الحطب دق هيله ( صيغة تصغير للولد )0000000000000000000
كيف الجعل ينهض على الريم يمناه ( طبعاً الجعل الولد والريم بنته )0000000000
- العفن ماطرد رعايا إعتيبه ( العفن يعني الولد جودُه على بنتَه ولا رعايا عتيبه مايقواهم )
بين المناصب وإن تناخو مغباه ( يعني يخاف منهم ويتغبى عنهم داخل البيت)0000000
- ياحلو نشله بالقدح للعجينه ( جالسه تسبه وتقول إنه مكانه المطبخ وكذا )00000
وقرمً على المرقوق لادلبح يجفاه (مابوه قرامه الا على المرقوق اذا يبي يجفاه بالتزدر )

آخر بيت بقوله لكم
طبعاً هي أغلب قصايده بمحمد ولده اللي هو جهاد
عاد هذا بيت من قصيده له ,, كانت تكلم خوات محمد من ابوه ..

- حلال أبوتس مطرف دونه الباب
ومحمد ما أبي حلاله تجونه





وقفة شموخ غير متواجد حالياً التبليغ عن مشاركة سيئة  
Facebook Twitter
إغلاق الموضوع

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح

الإنتقال السريع


الوقت المعتمد في المنتدى بتوقيت جرينتش +3.
الوقت الان » 01:20 AM.

الأن حمل تطبيق منتديات الإقلاع

 

هام: لجميع مستخدمي ايميلات شركة مايكروسوفت (hotmail,msn,outlook......الخ)
 

في حال تاخر التفعيل او اي مشكلة طارئة او ما يخص العضوية الذهبية او التجارية من استفسارات يمكنك ابلاغي هنا وتسعدني متابعتك   

تنبيه : كل ما يطرح من مشاركات يمثل رأي كاتبه ولا يمثل رأي إدارة الموقع

ترقية وتطوير » تحميل دوت كوم
Powered by: vBulletin Version 3.8.7
Copyright ©1999 - 2014, Jelsoft Enterprises Ltd.
جميع الحقوق محفوظة منتديات الاقلاع - شبكة الاقلاع