[بدوره الاموره]

لكل الي يردون ويقولون اني خفيفه ومزعجه وكل هذا الكلام
انا مازعلتني صراحتكم لان هذا الواقع وهذا شي انا اعرفه وابي حل
لو سمحتو قولو لي وش اسوي كيف اتعامل معاه
ابي اتغير مايصير اظل بنفس وضعي ! ابي اكون غييييييييييير
عشاني قبل كل شي عشان انجح وافتك من دراستي عشان اقدر اعيش يومي مبسوطه
عشان اكون مرتاحه , عشان لو ماتغيرت ماراح اكون سعيده معاه ولا مع غيره ولا مع نفسي

انا تصرفت غلط واعترف وندمانه بس ابي احد يقول لي كيف اتغير وش الطريقه
ابي حل يساعدني في حياتي معاه ومع نفسي

[a7la -7la]

إقتباس »

الرسالة الأصلية كتبت بواسطة أماني ‘’ »




بصراحة المشكلة فيك انتي مو فيه هو ، الكلام بيكون قاسي عليك بس لازم تعرفينه ..
انتي قاعدة تعاملينه كأنك امه ، و تبين منه يعاملك على انك حبيبته كيف تجي ؟

غير انك للأسف الشديد لازقه فيه بزياده ، طبيعي الولد يمل ! ، طبيعي يستغلّك لما تكونين بهالضعف قدّامه ..
الوسطيه حلوه في كل شي ، و للأسف علاقتك فيه ما فيها وسطيه ولا اعتدال أبداً ..
فيه تقرُّب زايد منّك له و نفور زايد منّه لك ، لو فيه اعتدال بالمكالمات و المشاعر و كل شي طبيعي الطرف الثاني يعتدل ..
اما لا صار طرف لازق بزياده و مُضحّي بزياده و ماشي ورا الثاني بزياده طبيعي الطرف الثاني يكون نافر منه بزياده و مُستغل له بزياده و يتأمّر عليه و يتحكّم فيه بعد ..

شوفي يا اختي هو يطلب منك فلوس استغلالاً لك ، و انتي تعطينه لأنك حاطّه براسك ان الفلوس هي اللي تجيبه
و انتي كاتبة له بكل برامج المحادثة - والله كثير ! - انك تبين الطلاق عشان يتحرّك و يراضيك ! ، يعني تبين تلوين ذراعه ..
و يوم شفتيه ما يقرا كلامك انهبلتي الا يراضيني و يخاف اني اروح منه !! ، قمتي اتصلتي (و هذا اكبر دليل على ان كلامك له لمُجرد التهديد) ، و الحين خايفة يشوف الكلام و يقول لك خلاص بأطلّق ، اذاً انتي مو قد هالكلام و عارفه انه مُمكن يضحّي فيك بسهولة ، اذاً ليش تقولينه ؟


عموماً باقي سنة كاملة على الزواج ، يعني معك وقت ان شاء الله ..
حاولي تخفّين على الرجّال و تمسكين يدك عن الصرف عليه ، الحنّه الزايدة تخليه يحس انك زي الواجب عليه و ينفر منك ، و الصرف عليه ما يجيب قلبه لك قد ما يجيب " طمعه " فيك ..

المكالمات لا تكلمينه الا مُكالمة مُقابل 3 مكالمات له ، ولا تطوّلين فيها رجاءاً ..
بالبيبي سولفي مع الناس عادي مو بس كأن ما احد عندك باللسته غيره ! ، قد ما تقدرين حاولي تخففين من التواصُل ..
حتى لا كلمتيه لا يكون كل كلامك احبك و اعشقك و اموت فيك و تحقيق معه وين رحت و وين جيت و وش تاكل و و و ، تكلمي و سولفي عادي جداً و حاولي ما تطولين بالمكالمه 10 دقايق الى ربع ساعه كفاية ..
حبيه و اهتمي فيه بس بحدود ، حبيه بس مو لدرجة تهملين نفسك و دراستك و تتركين عالمك كلّه و تخلينه هو محور حياتك ..
عيشي مثل حياتك قبل لا تعرفينه بس زيدي عليها انه موجود فيها مو انه يملكها :sm4: ..

و دام الولد طمّاع و يسحب منك فلوس ، حاولي لا خففتي من مكالماتك و ضبطت الأوضاع بينكم انك تطلبينه كل فترة فلوس ، ما فيها شي هو ما استحى يطلبك و هو الملزوم فيك فـ سويها عادي ..
و انتببببهي تعطينه لو ريـال واحد لأنه استغلالي ، و لا طلبك قولي له ما عندي ! ، تسلف من اخوانك او اخوياك ..

+ اشغلــــي نفسك ، انشغلي بدراستك و حطّي لك هدف مُعين فيها ، و انشغلي بتجهيزك و ابدأي فيه من الآن حتى لو ان الزواج توّ الناس عليه ..
و حاولي تكثّفين من جلستك مع أهلك و خاصةً امك ، ترا هم اللي بتروحين و تخلينهم مو هو اللي تبخلينه
و يُفضّل بعد تشتركين في نادي او تاخذين لك دورات على العصر ، عشان فعلاً يكون ما عندك مجال تلزقين فيه ..

+1

[>فزولها<]

إقتباس »

الرسالة الأصلية كتبت بواسطة بدوره الاموره »
لكل الي يردون ويقولون اني خفيفه ومزعجه وكل هذا الكلام
انا مازعلتني صراحتكم لان هذا الواقع وهذا شي انا اعرفه وابي حل
لو سمحتو قولو لي وش اسوي كيف اتعامل معاه
ابي اتغير مايصير اظل بنفس وضعي ! ابي اكون غييييييييييير
عشاني قبل كل شي عشان انجح وافتك من دراستي عشان اقدر اعيش يومي مبسوطه
عشان اكون مرتاحه , عشان لو ماتغيرت ماراح اكون سعيده معاه ولا مع غيره ولا مع نفسي

انا تصرفت غلط واعترف وندمانه بس ابي احد يقول لي كيف اتغير وش الطريقه
ابي حل يساعدني في حياتي معاه ومع نفسي

من جدك
كل الردود قالولك الحلول
عيشي حياتك بكل تفاصيلها(مذاكره-اهل-صديقات-ترفيه-عنايه-ثقافه)
وشيلي الرجال من بالك خليه هو المبادر بكل شي
البلاك بيري لازم ينشاف له حل
وبس

[وش انا مسويه]

بعض الاحيان التعمق في تفاصيل الاخرين .. ينتج لنا امرين اما : التعلق اكثر او الرحيل بصمت وهنا يكون للاستغباء لذه و أحيانا نبتعد قليلا لكي لانخسر كثيرا

[فيز يّا ء .]

عزيزتي بدوره ، الأخت LaroOonh من وجهة نظري ما قصرت بإقتراحتها الذكيه لك ، والأسلوب الأمثل للتعامل معه
وأنا بدوري أنصحك إنك تتغيرين لنفسك أنتي . مو عشانه
وبخصوص الفلوس بما إنك سألتي : كيف تسترجعيها ؟
أنا من وجهة نظري لا تسترجعيها اللحين بعد هالهوشه . لأن بيكون " مو وقته " ويمكن يفهمها غلط
اذا استقرت الامور بينكم ، بإمكانك تقولين : انا باديه أجهز للعرس "أو أجهز الاساسيات الكبيره اللي بالعرس " واذا ظروفك يا فلان اللحين تسمح ياليت ترد لي المبلغ اللي اخذته لأني محتاجته .
وان شاء الله بيردها .

بالتوفيق

[e7sas 6flah]

اثقلي اثقلي اثقلي
البنات كلهم ماقصروا
اشغلي نفسك بدراستك حاولي ماتجلسين لحالك كثير
لاتخلي الجوال فيدك24 ساعه عشان ماتصيرين تكلمينة كل شوي

مسالة انك تعطينة فلوس هذا اكبر غلط انتبهي تسووينها مرة ثانية


والله يوفقك ويسهل امورك

[مختلفة عنهم]

يا حبيبتي اللي أطلبه منك هدي بالك , هدي بالك , هدي بالك !!

حتى إنك مو قادرة تركزين و لا قادرة تتخذين قرار , و محتارة ! كله بسبب انفعالاتك الداخلية !

يا بنت الحلال اذكري الله , و اطلبيه العون , و استغفري عشان يفتحها عليك , و استرخي !

ما راح تقدرين تحلين مشكلتك الا بتوكلك على الله إلجأي له و ادعي بما شئتِ و أسأليه التغيير للأفضل !

و لا يضيق صدرك , ما تدرين يمكن هاللي صار لك خيرة ! عشان تتعدلين و تتغيرين من بدري !

و ما دام الحياة فيها نبض و ماشية ما زال فيه أمل و كبير إنك تتغيرين و إنك حتى تقدرين بشطارتك وحنكتك تغيرين نظرته فيك !! شدي حيلك يا حلوة و ورينا شطارتك

و بالنسبة للفلوس تقدرين تسترجعينه بطريقة لبقة , مثلًا ترسلين ان عندك بارتي و انك تستقبلين الهدايا في البيت و هيك تقدرين تنسقين الرسالة اللي تعجبك !
طبعًا لا تسترجعين الفلوس الا بعد ما تعدون هالمرحلة بوقت عشان ما يفهم غلط !

اما بالنسبة للثقل و الهيبة !
باختصار ( اثبتي ذاتك )
بمعنى أولاً : حسني علاقتك بربك !
ثانيًا : علاقتك بوالديك طوريها للأفضل !
ثالثًا : طوري ذاتك و ثقفيها و اقرأي بأي مجال تحبينه !
رابعًا : تقدرين تلجئين لأشرطة و دورات في التغيير و تطوير الذات و يا كثرها !
خامسًا : اشغلي نفسك بدراستك و قولي هالمستوى راح اجيب افضل و أعلى معدل ! ترى العظماء طلعوا من أضيق الظروف و أصعبها ! و أنتِ بمشكلة و لا تسمى مشكلة تبين تخربين مستقبلك ! و تقولين ابي افتك من الدراسة !! ( ترى دراستك هي معطيتك قوة , و ثقة , و رفعة ) لذلك افتخري بنفسك و علمك و تخصصك
سادساً : تقدرين تقرأين عن كيفية التعامل مع شريك الحياة من خلال الكتب المخصصة لذلك !
سابعاً و المهم : إنك تقللين اتصالاتك فيه , ترى عادي يمر اسبوعين بدون لا تسمعين صوته !
ممكن رسالة كل يومين ثلاثة , و بيني له بطريقة غير مباشرة إنك عندك التزامات و أشغال و هيك << بكذا راح يقدر قيمتك و إنك إنسانة مهمة

ودي أفيدك أكثر بس هذا اللي طلع معي !!

لا تحطين كل آمالك فيه , لأن مصيره راح يخذلك .. بإختصار ( ما فيه كمال بشري ) الآن !!
لذلك لا تخلين الواقع يصدمك و يآخذ منك صحتك من هول الصدمة به !


رب يفرجها عليك و ييسر أمرك و يسر خاطرك بما هو جميل

[كيوت111]

أحسك من كثر ماأنت مدللته خنقتيه

أنت تعاملينه زي ماتبين هو يعاملك ونسيتي أنه رجل وطبيعته غيرك
الرجل يمل من كثر الإهتمام والحب عشان كذا هو يحاول يبعد عنك وأنت لاصقه

الموضوع كله كوم والأسلاف اللي كل شوي كوم ثاني
أنا استحقر الرجل اللي يتسلف من حرمته أو يرضى ياخذ منها فمابالك أيام الخطبه أو أول الزواج
حلوه يعطيك المهر بيد وياخذه من الايد الثانيه

الحب شي والماده شي ثاني
أنسي أنك تتعطينه فلوس مره ثانيه أو تحسسينه أن معك فلوس

نصيحتي لك
غيبي هالفتره لحد ماتهدون كلكم وبعدين ارسليله مسج غزل بما أنك أنت اللي بديتي بالهوشه

موفقه

[دنيا العجايب]

لالا تحاولين تسترجعين المبلغ راح يفهم انه انتي تغيرتي وغيرتي اسلوبك عشان الفلوس
الفلوس وسخ دنيا لاتطلبينها ولا تفكرين ترجعينها انتي ساعدتيه وقفتي معاه و هذا شي يرفعك
بس خلاص لاتسلفينه نهااااااائي السبب انه ماعندك وانك تجهزين نفسك بعدين عيب يطلبك بس مادري كيف يفهم

[h.32]

للامانه انا ما كملت قراءة كل المشكلة .. بس على طول فهمت نوعيتك من البنات ..
هذا النوع من البنات للاسف متشر بشكل كبير .. لانها تعتبر زوجها كل شي بحياتها
لا... غلط .. :sm4:

إقتباس »

بالليل قعدت امزح معاه واسولف معاه قال لي احنا مو قايلين بعد 12 مافيه مكالمات عشان الدراسه انا زعلت بقوه وتضايقت قام كتب لي لاتفهميني غلط مو قصدي لاتزعلين انا مارديت عليه وقمت الصبح وفتحت البي بي ومارديت عليه وعرف هو اني قريت
ارسل برود كاست ومارديت وارسل باسمي ورديت بعدين قعد فتره وقال اسمي ورديت ! وبعدها مافتح محادثتي ابد لليل نمت مافتحتها قمت لقيته فاتحها الفجر !! مافتحها كل شوي انتبه اشيك لقيته فاتحها ومارد علي وماقال لي شي
عصبت انقهرت ليش مطنشني ليش مايفكر فيني ويداري خاطري !!

انتي تفكرين بمثل هالطريقة وما تبغين الرجال يطفش وتقل مشاعره تجاهك

لا والله.... الا كثر الله خيره يوم هو باقي معك وانتي كذا !!

المشكلة عندك مو عند خطيبك يا حبيبتي ..

انتي متعلقة فيه بشكل يخنق .. وحاطته هو كل حياتك .. وين حياتك وين اهتمامك بنفسك .. وين اهتامامتك ..

راحت جاذبيتك ووراحت هيبتك .. وراحتك اهميتك عنده والدليل يوم تقولين :

إقتباس »

صار قليل يكلمني او مايكلمني الا اذا انا طلبت واذا قلت له ماتشتاق لي يقول الا بس انتي ماتعطيني فرصه !

بعدين كيف تبغينه يشتاقلك ويتلهف عليك وانتي ماعندك حياة او تجارب او قصص تحكينها له .. الا هو
يا اختي الرجال يحب التجديد .. الحين وش الجديد عندك .. وانتي كل همك شي واحد اللي هو خطيبك ..
خليتيه هو كل اهتماماته

اذا تبغينه يتلهف عليك ويجي يكلمك بنفسه .. اشتغلي على عمرك واهتمي بها عشان تزيد جاذبيتك
ويسير غصب يكلمك .. ويخلي اصحابه ويجيك .. خلي عندك حياة واهتمامت غير زوجك
وبتشوفين كيف بتكبرين بعينه .. وبيهتم فيك اكثر

ترا الشغله موواجب ولازم يأديه .. انتي باسلوبك بتحببينه فيك وبتجذبينه لك ...

بعدين تدرين ليش هو يحب اصحابه ويبديهم عليك .. لانهم يونسونه اكثر .. وعندهم طلعات وفلة .. وبسطة .. وعندهم اهتمامات مشتركة اكثر ..عكسك انتي تماما ..
اللي كل ما دق عليك بس تتشرهين .. وتعاتببين . ترا انا متاكده ان هذي وجهة نظره وهذا هو السبب انه يبعد عنك

إقتباس »

ياناس ما اعرف اسيطر على مشاعري تجاهه احبه احبه

انت ما تحبينه .. انتي ما قدرتي تحبين نفسك فصرتي تفرغين كل طاقتك بالحب تجاه خطيبك .. صدقيني

حبي نفسك كثير .. واهتمي فيها .. واعتقي نفسك من التعلق بخطيبك .. وبتشوفين انك بتسيرين جذابة بعيونه اكثر ..

الله يوفقك