منتديات شبكة الاقلاع ®



الانتقال الى الصفحة الرئيسية عضويات التميز (الفضية + الذهبية + التجارية) موقع ieqla3 متخصص بجميع منتجات شركة apple أنظمة وقوانين وتعليمات الموقع   وقف شبكة الإقلاع الخيري مركز رفع الصور والملفات تابعونا على موقع تويتر بوابة الانباء
اقلاع بلاك بيري البحث السريع برامج الإقلاع المجموعة البريدية جوال الإقلاع أنظمة وقوانين وتعليمات الموقع للإعلان في شبكة الإقلاع
العودة   منتديات شبكة الاقلاع ® > المنتديات الإقلاعية > منتدى العيارين
التسجيل التقويم التأشير على جميع الاقسام بالمشاهدة


إضافة رد
 
أدوات الموضوع طريقة عرض الموضوع
قديم 18-02-2012, 08:15 PM   #1
جراك
من كبار شخصيات الإقلاع
 
الصورة الرمزية الخاصة بـ جراك
جراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحب

مسلسل المصاقيل (مساحه لذب والتنتيف )

السلام عليكم ومساكم الله بالخير..
قسم العيارين في الاقلاع هو منتدى للوناسه وسعة الصدر وللذب اللي احيان يكون ذب بناء واحيان يكون طقطقه على راس اللي يستاهل ....
وبما ان العيارين للضحك والوناسه في المقام الاول والكوميديا بجميع أشكالها فطبيعي إن أعضاء العيارين يكونون المتلقي الأول لكل نشاط كوميدي ومن ضمنها المسلسلات اللي ينقال عليها كوميديه واعوذ بالله من الذنوب ..
ايوالله اعوذ بالله من الذنوب هذا اللي قلته بعد ماشفت المسلسل اللي انا جايبه لكم وهو مسلسل المصاقيل من انتاج ثامر الصيخان



مسلسل ينقال عنه كوميدي للاسف ولو جتني فكرته بالعيارين ذبيته للماصله مع اني اشك ان اللي له موضوع بالماصله بيرضى ان موضوعه يكون مع ذا الخمبقه في مكان واحد..
مطرسه .. حواق .. مصاله.. قلة دبره .. هذا هي المصطلحات اللي طلعت معي يوم شفت العمل وقلت بفتح موضوع للعيارين للذب على هذا المسلسل ولاشيء غير الذب لنحول المطرسه الى عمل متكامل.. والحواق الى شيء سنع.. والمصاله الى ظرافه مقبوله.. وقلة الدبره لحسن التصريف ..
اذا هم ناوين يعاقبونا رمضان الجاي ان شاءلله بجزء ثاني مع اني اعتقد انهم ارحم من انهم يسوون فينا كذا..
وقبل ابدا في الانتقاد والذب على الجريمه الكونيه اللتي ارتكبت في حق الشعب السعودي من خلال هذا المسلسل احب اقول ان الاشخاص اللي قايمين على العمل لشخوصهم كامل الاحترام(ايه هين) لكن بما انهم طرحوا عمل فني لازم يتحملون وجهات النظر عليه >> فيس ناوي يستاثم

عنوان الحلقه السائل السحري

اقتباس جزء من النص وانا والله ماني جايب مقاطع يوتيوب جاكم ماكفاكم برمضان
إقتباس »
جراح راكب فرس ابيض ويقول وين ما تكونين يا بعد تسبدي راح اجي لتس حتى لو حطوكي باخر الارض
لعيونتس راح احارب الوحش و اكسر الحصاء كله لعيونتس يابعد قلبي
شيريهان داخل قلعه وتصرخ ياويلي ويلاه يا ويلي ويلاه من ذا اللي بيخلصني من التنين الشرير ؟
جراح وصل / أسمع يا التنين الشرير تراني حافرن حفرتك مندي كبرك علي الملازيم ملازيم الرجال لا قالت فعلت
اني لا أقسمك ثلاث اقسام , قسمن اعشي فيه الربع وقسمن اعشي فيه الجمعيات الخيريه وقسمن برميه للتسلاب
شيريهان / يا الله وش ذا الصوت اللي اسمعه جاني حبيبي
جراح بدا يحارب التنين / جراح اهب يا وجهه < وموت جراح التنين
احد ضحك؟ احد حتى ابتسم؟ وش هالسيناريو المكتوب في قهوة المسافر على خط القصيم؟
لحظه لحظه ..!
لعيونتس/ اجي لتس/ لو حطوكي ..!
اصمل ياخي انت من نجد ولا الغربيه
اجل اسمع يالتنين الشرير تراني حافرن لك حفرة مندي .. ياعيال اضحكوا تراه ينكت
ابو متعب الله يحفظه .. انشأ هيئة لمكافحة الفساد ,, وحنا بالعيارين قررنا نسوي هيئة لمكافحة المصاله ... وانا اشوف ان المصاقيل وفكر اهله هم اولى الناس بالمكافحة الجديده .. الماصل مشكلته بثارته واقتناعه بأنه ظريف وهاذي مصيبه يعني ترجاه تحب يديه يابن الحلال انت ماصل ورب الكعبه ماصل وفوق مصالتك بثارتك ارحمنا عندنا فلسطين محتله والعراق ملعون ابو كوثره والسودان قسموه وسوريا قابعه بليفه يعني لاتزيد مصايبنا مصيبه ..
يعني مكافحة المخدرات او على مايقولون الشباب مكافحة الوناسه .. سجن وقصاص الين يقضون عليهم.. والحشرات نكافحها بالفليت لكن المصاله مالها مكافحة الا بالذب والذب احد وسائل الاقناع الاقلاعيه بانك ماصل ..
اصحاب هالمسلسل مشكلتهم انهم قطة استراحه ماصلين ويعززون لبعض وتسني اشوفهم هههههههه كفك وهههههه وربي انك فاصل وهههههههه وههههههههه انت مقلع هههههه
بينما استراحتكم باقيلها لوحة تحذير مكتوب عليها ممنوع الاقتراب منطقة تحوم التسبد وانا متأكد ان مسلسلكم ذا طرى عليكم الضحويه وانتم مصبحين والعصر بديتوا فيه.. وانت يالصيخان لو تشوفه بعيد عن هالشله الماصله اللي تعزز لك ونكبتك انا متأكد اني بلقاك ثاني يوم بمسجد في قندهار لحيتك شابكه مع شعر بطنك ودموعك تطلع حتى مع سرك تدور لك اقرب امريكي تقبع فيه وتموت عشان الناس تغفر لك كارثتك اللي سويتها

وانا بصراحه ماكنت خايف الا ان ام بي سي يعيدون المسلسل الصبحيه بعد العيد عشان يعيدون فينا صدق ثم رح دور طالب يروح لمدرسته والا موظف يقوم لدوامه يسنع اشغال المسلمين ولا زوجه تسنع اهل بيتها
كل الشعب بيواصلون للفجر عشان يرقدون عن هالمحنه اللي ألمت بالوطن
يا اخوان مو مشكله انك تغلط في حق شخص ولا شخصين .. بس انك تخطي في حق مجتمع كامل بأحلامه وطموحاته ويكون خطاك موثق ومصور وممكن أي احد يشوفه لو بعد عشرين سنه هاذي ماينفع معها بدر ابن عبدالمحسن يكتب قصيدة اعتذار ويغنيها عبادي هاذي ماينفع فيها الا ان الواحد يجمعكم في حوش ويرفع عليكم مدفع مضاد للطائرات ويرشكم فيه جزاء لما ارتكبتموه
وانا جالس استعرض اسماء القائمين على العمل وصورهم .. تمنيت يكون احد منهم يشبه احد من قائمة الثمانين المطلوبين للداخليه عشان على طول دق 990 وبلغ عنه وياخذونهم بالشبهه يخيسون بالسجن منها نفتك منه ومنها نقرش لها كم مليون والملايين اللي تجي من الداخليه اصرفها على علاج اللي تابعوا العمل في ارقى مستشفيات الصحه النفسيه واستحدث لهم بدل غثاثه وعساهم يرجعون لحالتهم الطبيعيه لاني بصراحه اشوفهم هم والارهابيين واحد .. الارهابي يشيع الرعب ويقتل الانفس وذولا يشيعون الكآبه ويقتلون البهجه




المنتج الفني ثامر الصيخان ذات شربة هوى بعد عرض المسلسل!
ماقدر يا توم كروز .. اروح فيها يابراد بيت .. توقع لاتفقع ياجون ترافولتا
ارحمني ياللي يمشي على البساط بيستلم الاوسكار .. شفتوا؟
شفتوا نهاية تعزيز الاخويا وين وصل بالمسكين ذا؟
لو تدري هوليود انك تحتك فيها احتلتنا امريكا من بكره
وقبل تحتلنا بتسوي علينا حضر وتحذفنا من المسنجر
والمجتمع السعودي اللي يقولون عنه مجتمع شاب بيروح غلطه بسبتك
انت ممتاز وانت ظريف وانت مكس عادل امام وطارق العلي بس خلك
عندنا لاتسويلي فيها عالمي وانت نص حبه محلي مع الرز..


]

عمار بكار المشرف العام على المسلسل

حضرة الدكتور المبدع عمار بكار
يزيدني شرفاً أن أبعث لك برسالتي هذه آملاً أن تجد طريقها لإهتمامك قياساً بما تنوء به من ارتباطات ومسئوليات..
وفقك الله واثابك وياليت تتواصل مع الإخوان في المخيم يدبغونك قصدي يعشونك لما تستحقه من كرم الضيافه
حضرة الدكتور عمار بكار .. اتمنى منك انك تتعطف وتترحم وتحنو علي والشاعر يقول ونقسوا احيانا على من نرحموا ..
انتظر منك التلايس الأبدي وان تنقطنا بسكاتك وتقعد فيذاك تحاضر على اللي مخدوعين فيك ..
اجل دكتور ومشرف عام واخرتها تطلع لنا بذا الكارثه اللي ماتخارج حتى تجي على القناه الاولى عام 1407 هـ ..
يادكتور عمار انت دكتور وشو بالضبط؟ لاتصير زي الدكتور مرسي اللي ذل ايماني يوم سكن جنبي وراح الدكتور وجاء الدكتور واخرتها طلع دكتور بيطري
ومع انه طلع دكتور بيطري.. بس اسم انه دكتور شبكته وتميلحت عليه وفي النهايه ثلاث ارباع حلال الجماعه جيّف بسبة وجهه .. نكبنا زي مانكبتنا انت بمسلسلك ..
يادكتور عمار انت رجل اكاديمي ورجل مجتمع ورجل تعايش التفاعلات الكيمائيه للمجتمع وتفهم..
بس البثاره اللي اشرفت عليها تعطيني انطباع انك ماتفهم البقل وين مكانه في خضم الصميل ..
هالحين عرفت انا من اللي يعزز لثامر الصيخان ولا فيه الا قوة اقتباس للردود وخذ +1 ..
ياسفابك يادكتور اجل دكتور وفاهم وشغال تعزيز وتقييم اخضر للصيخان < مشكله اللي كل حياته الاقلاع
دايم كل نكبه وكل جريه تلقى وراها شخصين .. الشخص المنفذ والشخص المعزز ..
ماكنت اتمنى انك تكون انت المعزز والمحرض على هالجريمه اللي ارتكبت في حقنا كشباب سعودي مقبل على الحياه ..
يعني تخيل نصراوي ولا اتحادي شاف المسلسل ثمن حاقها فريقه كالعاده .. تضمن مايقبع في عمره بريال بنزين؟؟ في ذمة من هالمشجع؟
قلبي وروحي غضبانين عليك كش عليك يامتوحش ياللي ماعندك دبدوب احمر ولا دليت درب الرومنسيه ولا مطاعم بيت الشوايه


يتبع ..



جراك غير متواجد حالياً التبليغ عن مشاركة سيئة  
Facebook Twitter اضافة رد مع اقتباس

قديم 18-02-2012, 08:20 PM   #2
جراك
من كبار شخصيات الإقلاع
 
الصورة الرمزية الخاصة بـ جراك
جراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحب

....
فيه امر اخر ودي اتكلم عنه .. غير المصاله والبثاره .. وهو أمر جلل > فيس كاتم الضحكه ..

قبل عرض مسلسل المصاقيل ,,

إقتباس »
اثار الرسام علي البياهي ضجه اعلاميه بأتهامه لثامر الصيخان بالسطو على فكرة المصاقيل ورسوماته ..
وقال انه عرض المسلسل على الصيخان لانتاجه ورفض مدعيا ان قناة ام بي سي لاتعرض مسلسل كرتوني الا باحترافيه عاليه .. > طلعت احترافيه بالمصاله ..
وقال البياهي ان الكاتب سعد المدهش على اتم الاستعداد لشهاده على ملكيتي للفكره ..
طبعا أكلها بلحيته البياهي لانه ماسجل الفكره عند لجنة حقوق الملكية الفكرية في وزارة الاعلام..
الى هنا ممكن ناس تصدق البياهي وممكن ناس تكذبه وهذا شي طبيعي ..
رد عليه ثامر الصيخان ورفع دعوى قضائيه وصار الرجال قادح ..
وهذا جزء من تصريحه ..

إقتباس »
وأقام الصيخان القضية ضد خصمه لدى لجنة النظر في المخالفات في وزارة الثقافة والإعلام. وقال في بيان تلقت "الوطن" نسخة منه، "إن لديه شركة سيناريو التي تبنت أكثر من 40 كاتبا وكاتبة، وهؤلاء كفيلون بصناعة عشرات الأعمال الكوميدية من صلب أفكار مبتكرة ومتميزة دون الحاجة للتكرار أو الاقتباس".
انا كمتلقي وبيني وبينكم ماعلي من الاثنين .. بس ابوريكم الي شفته وانا ماتابعت الا كم حلقه بس ؟؟


في حلقة زياره فضائيه..

..سرق عيني عينك .. ومن مين ياسامعين؟
من جاك نيكلسون ههههههههههههههه
تسرقون واحد العالم كله يتابعه؟ اسرقوا مني ولا من قلعه على دجتنا اقلها محد يعرفنا...
في فيلم جاك نيكلسون المريخ يهاجم .. كانت المخلوقات الفضائيه احتلت الارض ولاقدروا البشر يتخلصون منهم الا بالموسيقى العاليه ..
والاخوان بدل الموسيقى حطوا ربابه ماشاءلله عليهم ذبحتهم الامانه ونخلصو منهم بالربابه العاليه ..
ويوم تفقعت روسهم هي نفس المشهد في فيلم جاك نيكسلون
وحتى اشكالهم قريبه من الي بالفيلميعني افلاس حتى الضياع
يعني سروق وماصل ومفلس بعد مالها طب ابد خخخخخخخخخ
وهذا المقطع من الفيلم ..

http://www.youtube.com/watch?v=58vB-...eature=related


عنوان الحلقه للبدو مواهب

ليل وبرد وكحه وسيل ..!
ترا ملينا من الذب على برنامج عرب قوت قبلكم فهد البتيري ذب عليهم وتمساحه ابرك منكم وكانت الحلقه كارتونيه
يعني مدري هذي اسميها سرقه ولا اقتباس ولا توارد خواطر ( فشلتوني الله يفشل العدو احاول ارقع لكم )
وبالنسبه لي انا رجل ذمتي وسيعه .. يعني ماعندي مانع يسرق ويسبع عمره .. لكن ضحكني يامال الغنيمه .. اقل شي ذنبك مايروح خساره
الى هالدرجه مفلس؟ الى هالدرجه منقطع؟ تسرق دولي ومحلي؟ لا ويقولي عندنا كتاب محترفون ولايحتاجون للاقتباس ولا التكرار ..
انا توني عرفت وش يحتاجون له .. يحتاجون تعلمهم فن السرقه على اصولها عشان مااحد يكشفهم
جاك نيكلسون ماوفرته والبتيري ماوفرته؟ الله اعلم من انتم سارقين منه بعد ..؟

طبعا انا كان ودي اقعد اتابع باقي الحلقات .. وكنت على اتم الاستعداد اني اتحمل حومة التسبد الي بتجيني .. عشان اقدر انقد اكثر ..
لكن يوم فكرت بيني وبين نفسي ؟؟ لقيت اسم المسلسل المصاقيل مسروق! .. وفكرة المسلسل مسروقه! .. واكثر من حلقه مسروقه! ..وحسيت اني قدام شبكة حراميه محترفين ..
مااخفيكم اني عضيت على ثوبي وحطيت رجلي لا يجي احد ويسرق المشاهدين بعد



وهالحين المايك لكم .. نبي ذب بدون تجريح ولاسب ولاشتم ..
نبيهم يستفيدون منكم لمصلحتهم..
عشان السنه الجايه ان شاءالله يقلبونها كيرم والبودره علينا



جراك غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 18-02-2012, 08:21 PM   #3
ql3t_eqla3
من كبار شخصيات الإقلاع
 
الصورة الرمزية الخاصة بـ ql3t_eqla3
ql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحبql3t_eqla3 فوق  هام السحب

عليكم السلام وحياك الله جراك الغثيث .. ياخي مسكين انت وحالتك يرثى لها واحيان ارحمك واحيان اقول لا يستاهل جزاه وعساه من ذا واردى .. كل شوي وانت طابن لي تسالني وش رايك وش رايك يخوي خل لك راي << هذا اللي بيفضح بك بين العربان خخخخخخخ
إقتباس »
قسم العيارين في الاقلاع هو منتدى للوناسه وسعة الصدر وللذب اللي احيان يكون ذب بناء واحيان يكون طقطقه على راس اللي يستاهل
ياسلام عليك ياسلام .. يعني انا على سبيل المثال ما خلاني اصلع الا من كثر مايطقطقون على راسي وهذا مثبت علمياً (ايه هين D .. وتخيل معاي اني يالعيار مبسوط ولانيب قايل لا .. كله عشان النقد والذب البناء .. ومع هذا للحين راضي << هو بكيفك اصلا؟!
لكن تخيل بكره النهار يجيني ادمي ومعه سكين ويشلخ راسي يحسبنه جحه من كثر مايطقطقون عليه الاوادم .. وقتها وين بتلقون لكم ادمي تطقطقون على راسه؟! << كيف الفدائية بس ؟!
إقتباس »
طبيعي إن أعضاء العيارين يكونون المتلقي الأول لكل نشاط كوميدي ومن ضمنها المسلسلات اللي ينقال عليها كوميديه واعوذ بالله من الذنوب ..

خخخخخخخخخ على قولتك العيارين هم المتلقي الاول وهم المصدر الاول لاي نشاط كوميدي .. يعني النكته تكون مكتوبه ومسموعه .. والمسرحية والمسلسل تكون بشكل مكتوب ثم ممثل ثم مسموع ومعروض .. وانا ياطويل العمر والسلامة ربي قدر علي واقدم لك ذا المعروض وفيه شرح لحالتـ ...... << ماصدق لقاله درب هالعاهه !!
إقتباس »
قلت بفتح موضوع للعيارين للذب على هذا المسلسل ولاشيء غير الذب لنحول المطرسه الى عمل متكامل.. والحواق الى شيء سنع.. والمصاله الى ظرافه مقبوله.. وقلة الدبره لحسن التصريف

اللي يعجبني فيك هالمره انك مسوي دور فيصل القاسم خخخخخخخخخخخخخ

خلنا نشوف جزء من سيناريو حلقة الساحر مدري وشو !!
إقتباس »
جراح راكب فرس ابيض ويقول وين ما تكونين يا بعد تسبدي راح اجي لتس حتى لو حطوكي باخر الارض
لعيونتس راح احارب الوحش و اكسر الحصاء كله لعيونتس يابعد قلبي
شيريهان داخل قلعه وتصرخ ياويلي ويلاه يا ويلي ويلاه من ذا اللي بيخلصني من التنين الشرير ؟
جراح وصل / أسمع يا التنين الشرير تراني حافرن حفرتك مندي كبرك علي الملازيم ملازيم الرجال لا قالت فعلت
اني لا أقسمك ثلاث اقسام , قسمن اعشي فيه الربع وقسمن اعشي فيه الجمعيات الخيريه وقسمن برميه للتسلاب
شيريهان / يا الله وش ذا الصوت اللي اسمعه جاني حبيبي
جراح بدا يحارب التنين / جراح اهب يا وجهه < وموت جراح التنين
خخخخخخخخخخخخخخخخخ ايه انا ضحكت .. بس مهوب على النص .. ضحكت دلع وتميلح ومن قدي
اسمي مع شريهان .. لحظه بس لحظه خلني ابتعطر واتزكرت قبل اكمل الرد (فاهم التميلح غلط)
لكن اللي ماغصني بهالسيناريو ومخلي تفكيري مبوش يوم يقول : (وموت جراك التنين) .. هو يقصد انه ذابحن اثنين؟ يعني اثنين نفر؟.. لاتلومني وانا اخوك من قريت هالحواق (حطوكي، لولاكي لولا لولا لولا ، الشرير) .. وانا قلت شكل شريهان مشاركتهم بالسيناريو .. لبى قلبها بس << عاش وضعه خخخخخخ
إقتباس »
الماصل مشكلته بثارته واقتناعه بأنه ظريف وهاذي مصيبه يعني ترجاه تحب يديه يابن الحلال انت ماصل ورب الكعبه ماصل وفوق مصالتك بثارتك ارحمنا عندنا فلسطين محتله والعراق ملعون ابو كوثره والسودان قسموه وسوريا قابعه بليفه يعني لاتزيد مصايبنا مصيبه ..
خخخخخخخخخخ وسجل عندك بعد ايران مبهذلتنا بالعراق والبحرين كل شوي ناغزين لهم كم عربيد ودازينه بقوارير المخزي .. والحوثيين بالجنوب والسودان فوله وانفلقت نصين .. ومصر مالهاش كبير خخخخخخخخخخخخ ياخي يوم شفت هالمصري بغيت اموت ضحك لكن ربي كتب لي عمرن جديد << والله لو انه بيصدمك !!

عاد محنب ناقصين اكتئاب وكبت واكتئاب وكبت .. وش ذا القرف ياخي مقابل وجهك ياجراك ومصالة ذا المسلسل واحداث بالعالم الاسلامي .. اشوا ان ربي منعم علينا بنعمة الرضاء بالقدر وحنا مؤمنين باللي كتبه الله وراضين به .. ولا لو غيرنا من الاوادم تلقاه انتحر مسكين خخخخخخخخخخخ
إقتباس »

المنتج الفني ثامر الصيخان ذات شربة هوى بعد عرض المسلسل

خخخخخخخ معليش تسمح لي ياثامر اسالك .. كم ضغط الهواء بخدودك (صورة كفر مبنشر) !!
نعنبو ابليسك ولا قبل العن ابليسك المسكين ... خلني اسالك سؤال ثاني ان سمحت لي طبعاً << والله اني اخلاق
هالحين من حالف عليك .. وقال لك عقب ما صمخت الغداء مندي ومكثرين زعفران .. ولحقتها ببراد شاي اسود .. ترى بنسوي معك لقاء وبنصورك؟ .. يخوي لاتبتسم تكفى .. اول ماشفت صورتك وانا ماسكن خط ومنتصف بطريق الحجاز دقيت ام الفرامل .. تهيالي ان سنونك وبراطمك سفتي امن طرق .. احمر واصفر .. يرحم امك لاتبتسم الين تاكد ان الصفار راح .. ولو اني خابرن الصفار يجي للمواليد لكن شكله مستمر معك بضروسك خخخخخخخخخ
إقتباس »


عمار بكار المشرف العام على المسلسل

معليش يادكتور واسمح لي ابقتبس تعليق من كلام لك زمان قلته على هالرابط

http://sindibad-business.com/blogs/h...-short-videos/


تقول ذيك الايام هالكلام :

إقتباس »
الفيديوهات القصيرة، التي تنشر على موقع ”يوتيوب” ويتداولها الناس على مختلف الشبكات الاجتماعية والمواقع والموبايل، هي المستقبل، خاصة إذا تم تنفيذها بجودة عالية من حيث المحتوى والاحتراف والإنتاج، بل إن هذه الفيديوهات قد تمثل في الحقيقة مستقبل التلفزيون القريب.

لاحظ ان ذا كلامك مهوب كلامي .. يعني يادكتور انت بتفهم كلامك اما لو ابخاطبك بكلامي شرط ان تقول ذا يحضر جن
اوافقك يوم تقول ان الفيديوهات باليتويوب والجوال .. لكن سالفة انك تزرف فكرة من واحدن ادمي مسيكين .. وزودن على ذا تزرف ذبات اوادم وافكارهم مثل خوينا فهد البتيري يوم يعلق على عرب قوت تالنت مدري وشو اسمه !!
اللي سويتوه يادكتور هو الانتاج والاحتراف .. طبعا الاحتراف بالزرف واللطش .. كذا اوافقك تمام مية بالمية

ولا يادكتور هالشيء يرضيك بالله عليك ؟! خصوصا يوم انك تقول :

إقتباس »
المشكلة الأساسية في هذه الفيديوهات أن الفكرة يجب أن تكون قوية في إبداعها وسحرها؛

طيب لاحظ معاي هالاقتباس للافدغ جراك يوم يقول :
إقتباس »
في حلقة زياره فضائيه..
..سرق عيني عينك .. ومن مين ياسامعين؟
من جاك نيكلسون ههههههههههههههه
تسرقون واحد العالم كله يتابعه؟ اسرقوا مني ولا من قلعه على دجتنا اقلها محد يعرفنا...
في فيلم جاك نيكلسون المريخ يهاجم .. كانت المخلوقات الفضائيه احتلت الارض ولاقدروا البشر يتخلصون منهم الا بالموسيقى العاليه ..
والاخوان بدل الموسيقى حطوا ربابه ماشاءلله عليهم ذبحتهم الامانه

خخخخخخخخخخخخخخخخخخ ولو اني ما اسامح جراك يوم يقول اسرقوا مني .. لاني مطفر وان جيتم بترحموني .. شوفوني من اول الموضوع وانا اقول معروض معروض
لكن جيت ابربط بين كلامك المقتبس جعلها تقبس في جراك .. وبين الواقع .. وين القوة والابداع في سحر الفكره اذا كانت مزروفه من جاك نيكلسون .. يعني معليش تحسبونا مانعرف نيكلسون ذا تراه واحدن من اعضاء العيارين بس انه متواضع .. ورتبته بعد خبير اقلاعي من قوة تواضعه << قال وش دراك انها نصبة خخخخخخخخخ

خلني اوافقك يوم تقول سحر الفكرة .. بس وينها الفكرة اصلا وهي مزروفه؟ .. الانتاج عندكم حليو وعجبني بصراحه


لكن انتقادي هو للمسلسل ككل .. خصوصا سالفة سحر الفكرة .. وعلى طاري السحر .. المسلسل يعكس ثقافة مجتمع .. ومجتمعنا في اغلبه مازال متمسك ببداوته .. تجي عند الحضري تقول له ياحضري يزعل عليك يقول انا بدوي وهو مالفحته الشمس الين شهب جلده ولا فضخ عينه العج .. ومن هالمنطلق قلتم انكم تبخلون المسلسل عن عائلة او قبيلة بدوية بالصحراء ولكن متطورين وعندهم تنكلوجيا مدري وشسمها << واحدن من البدو اللي يصلح يمثل معهم خخخخخ

تجي وتحط احد الادوار الرئيسية دور الساحرة .. طيب هالشيء معروف حكمه شرعاً والمجتمع ككل يكافح السحر ويعاني من السحرة والمشعوذين .. تقومون تعلمون الناس بان الساحرة انسانة كويسة << امحق تعبير .. طيب وعيالنا اللي متبطحين قدام التلفزيون ويشوفون هالشيء .. واطفالنا المساكين اللي ينغرس فيهم ان الساحرة طيبة وعندها كورة يطلع منها دخاخين كنها خشم جراك .. وش نسوي بهم بالمستقبل هاه؟



نقطة ثانية و ارقتني كثيراً (جراك تعلم هالكلمة تراي اسولف مع الدكتور ولزوم اقولها له عشان يدري ان فينا واحدن فاهم) .. هالنقطة قلت لزوم اثيرها يادكتور ويا ثامر..ويا فريق العمل ككل .. اجل 40 كاتب وكاتبه؟! من جدكم انتم


بالله عليك بندز لك 5 من كتاب العيارين والعيارات وحتى 5 كثير شوي .. شرط يادكتور ان ناكل سوق ثامر ونخلي يلحس كوعه .. وبافكار مبدعه مهوب مزروفه من احد .. بس عط سداح فرصه يادكتور .. وشف معروضي طال عمرك تراه مرفق باخر الرد << واحدن يتجمل و يقضبه مع علباه ويبلغ عنه مكافحة التسول
!!

مثبت للنقاش والتنتيف

واللي عنده سيناريو حلقة للمصاقيل ولا تعليق يسدحه هنا خلونا نعدل المسلسل الاعوج




اخر تعديل كان بواسطة » ql3t_eqla3 في يوم » 18-02-2012 عند الساعة » 09:03 PM.
ql3t_eqla3 غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 18-02-2012, 08:23 PM   #4
رسـام داشـر
من كبار العيارين
رسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحب

إقتباس »
جايك انت وهالمسلسل الماصخ البثر<واضح الي حاقد

لا حول ولا قوة الا بالله
انا لله وانا اليه راجعون .. لله ما أخذ ولله ما أعطى
انا يا جراك اشره عليك واعتب عليك أشد العتب وما توقعت هالحركه بتطلع منك
كنت متوقعه من أكبر عضو بالعيارين بس ما توقعتها من مشرف ..!
جراك انت تعرف هالمسلسل الي حاطه انت وتعرف انه ماصل وماصخ وسامج وبثر
شلون تحطه بالعيارين ؟ الحين المراقبين ومسؤسسين الإقلاع حطوا منتدى خاص بالمصاله
وقالوا أي شي ماصل حطوه هناك .. ليش ما حطيته هناك وثبتوا الموضوع..!
مفروض يثبت هالمسلسل وفكرته والسرق الي صار فيه .. بدستور كل منتدى
ويحطون عنوانه ( كيف تهرب عن المصاله )
يا جراك انا اكلمك الحين وودي أطرش .. أكلمك وانا معي لبن اكتيفيا وسفن وعلك لامي .. ويالله بالله بهضم هالمسلسل ..!!
والله وانت ما حلفتني يا جراك اني كنت أكره فايز المالكي لأنه سامج ولا يمتلك أي كوميديا
وفجأه يوم شفت مسلسل مصاقيل تحولت نظرتي لفايز المالكي انه كوميدي وانه قريب لعادل امام
تدري يا جراك اني الحين قاعد أتسائل وجالس مع نفسي جلسه كامله وما غير أسئل نفسي سؤال وحيد ..!
اذا هو ما تزوج .. شلون يبي يتزوج ؟ وين يبي يودي وجهه اذا قال لأبو البنت ( انا ثامر الصيخان جايك طالب يد بنتك)
بتقنعني ان الأبو موب تافل بوجهه وبيقول له انقلع يا سامج يا بثر؟
بتقنعني انه مهوب قايل له ضف وجهك ما ابي بنتي بكره يجيها داء البثاره والسماجه؟
بتقنعني انه مهوب قايل له الخلا ما ابي بنتي تنجلط من سماجتك ؟
عاد تخيل يتزوجها وبليلة الدخله يجي لها وتقول له : حبيبي تنام بالغرفه الثانيه ؟ ويقول لها : لا أنا أخاف انام لحالي اخاف يجيني وحش ..! وبتنجلط البنت وبتطلب الطلاق وتكب على وجهه موية نار ..!
لا تضحك يا جراك انا متاكد بيقولها صدقني السامج طول عمره سامج ما يتعدل
السؤال الثاني الي سئلته نفسي ... لو انه متزوج ؟ وش وضع المدام ؟ تهقى انه بمستشفى اشهار ؟ تهقى انها الحين أصابتها صدمه عاطفيه وصارت سامجه بثره ؟ انا في صدد عمل لجنه يا جراك واتمنى اشوف ثوره فعليه ضد السماجه .. او بالأحرى ضد ثامر الصيخان لأن اذا اندحرت سماجة هالآدمي صدقني منتب لاقي مخلوق سامج لأني أحسه هو منبع السماجه وهو الي يمد السماجه لباقي العالم ..!!

جراك بغض النظر عن السماجه لأن الولد شكله مبتلى فيها بلاء من الله الله يشفيه يا رب
بس وش موضوع السرق ؟ .. الحين يا بجيح يا بثر يا سامج .. تصير سامج وتسرق ؟ هههههههههه قسمن بالله ما عمري شفت بجيح مثلك ياخي اختار احد هالخيارين تصير سامج ولا تسرق او تصير كوميدي وتسرق ؟ بس تصير كل الاثنين ؟ لا يا عمي صدقني يلزمك مستشفى اشهار او مستشفى الأمل للمدمنين مع انك مالك دخل بس ولو لازم نشوف لك صرفه والله مهيب حاله هذي
ما فيها شي انا اعرف واحد كوميدي بس راعي سرق يعني على الأقل استفاد بس انت والله لو اني منك لا احاول اصرفها واختفي
ياخي اشتغل بالجمعيه الخيريه والله محد حولك ولحد يعرفك ... يجيك أجر ومنها تضبط علاقاتك والاهم انك لا تزوجت يقبلونك العالم ويغفرون لك سماجتك ويقولون ولو الولد راعي دين ..!!



إقتباس »
لعيونتس/ اجي لتس/ لو حطوكي ..!
تصدق يا جراك ذكرني بواحد معنا بالعيارين .. سعدون وللإبداع بقيه


إقتباس »
اصحاب هالمسلسل مشكلتهم انهم قطة استراحه ماصلين ويعززون لبعض وتسني اشوفهم هههههههه كفك وهههههه وربي انك فاصل وهههههههه وههههههههه انت مقلع هههههه
قسم بالله اني احتري اقرب اختلاف بينهم .. تلقاهم لا تهاوشوا على اي شي يبدأ يطلع الي بالقلب
تلقى كل واحد يقول للثاني : انت اصلاً سامج ودايم اسلك لك يالبثر
ويرد عليه الثاني : لا يا رجال طالع منها ؟ ترا كل الوضع تسليك بتسليك ولا الواقع ان السماجه مستفحله فينا
تهدى الجلسه وكلن يسكت ويغيرون الموضوع للنصر والهلال

إقتباس »
بينما استراحتكم باقيلها لوحة تحذير مكتوب عليها ممنوع الاقتراب منطقة تحوم التسبد
قسم بالله مستعد أسبح على ورا وأطب صاروخ بالافرنجي وانت بكرامه
ولا أطب مكان مليان سماجه مثل هالمكان هههههههههههه اجل اسمع يالشرير مدري وشو تراي حافر لك حفره مندي ؟ اااخ يا قلبي اااخ بس


إقتباس »
لكن ضحكني يامال الغنيمه .. اقل شي ذنبك مايروح خساره
ياخي استغفر الله احس لو يصلي وتر يومياً ويستغفر لمدة سبعين سنه احس احس مجرد احساس ان العالم بتبتل تدعي عليهم ومهيب مسامحتهم على هالسماجه والمصاله

بأحد حلقاته يا جراك جايب لي واحد يمثل انه سبايدرمان
واثنين وسط المسلسل يقولون عنه ( والله انه خبببل)ويضحكون
جراك انا انجلط ؟ ياخي ليش تجيب سيرة هالمسلسل ؟ والله حرام عليك انا ارحم الي بيردون عقبي بينجلطون وتجيهم صرعه انا احمد ربي اني بكمل الرد بدون اي مرض نفسي وبدون اي مرض عارض .. كان الله بعونهم وعون كل من يتابع هالمسلسل

رسالتي إلى ثامر :
صاحبي ثامر الصيخان أبو شدوق الي لا شفتهن والله مدري هو وجهك ولا قفاك
انا ادري وعارف ومتأكد ان النوعيات الي مثلك يبي يستمرون بالمسلسلات .. بس تكفى تكفى اسرق بس بأدب واسرق بس نبي ننبسط اسرق لين تشبع بس طلبتك ابي اروق ابي اضحك
ترا طاش ما طاش ما فيه هالسنه فلذلك تكفى مسلسلك الماصخ لا اشوفه تراي هونت لا تسرق أبد بس فكنا من شرك يرحم امك تراي كل يوم أدعي ربي انك تكف عن سماجتك
وبعدين شف شف اسمعني تراكم طايحين انتم يهالنوعيات اذا اشتهرتوا طلعتوا مقاطع يوتيوب .. فلذلك والله يا ان شفت لك مقطع يوتيوب واحد والله لا أشكيك لمكافحة السماجه الي بيطلعها جراك
ولا ترا بكتب على جدرانك وعلى سيارتك ..(سماجه ..ابتعد 100 قدم) وقسم بالله لا أحاربك بكل مكان ادري اني زلابه وواحد بس صدقني مع الأيام الناس بتلاحظ بثارتك بشكل مهول وكلهم بيقومون معي وبتشوف شوارع الرياض كلها لوحات ( أبعدوا الماصخ السامج من جزيرة العرب)

لي عوده تحسبني بخليك يالسامج ؟ ههههههههههههههه




اخر تعديل كان بواسطة » رسـام داشـر في يوم » 18-02-2012 عند الساعة » 08:42 PM.
رسـام داشـر غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 18-02-2012, 08:43 PM   #5
ملكع
من كبار شخصيات الإقلاع
 
الصورة الرمزية الخاصة بـ ملكع
ملكع فوق  هام السحبملكع فوق  هام السحبملكع فوق  هام السحبملكع فوق  هام السحبملكع فوق  هام السحبملكع فوق  هام السحبملكع فوق  هام السحبملكع فوق  هام السحبملكع فوق  هام السحبملكع فوق  هام السحبملكع فوق  هام السحب


يالله حي جراك سندي ابو شعله

شف يابعدي انا اليوم لاف نص فلل ودبلوكسات الرياض والمشكله ليتني على ذا التعب والفرفره باشتري

وكل ما مريت فله واعجبتني انغبن زود واقول يلعن ام القهر 270 متر بمليون ليه والله لو ان بلكها ذهب خالص لعن ابو ابليسك يالرياض اذا ولاية اوهايو الفله 500متر فيها بما يعادل 350 الف ريال سعودي هقوتي اني باهاجر لامريكا وخلكم للرياض وغبرته ومصاقيله

نرجع للمصاقيل اللي صراحه اول مره اشوف فيها بدو كلهم حقين كمال اجسام ووجه الواحد شبرين



صراحه انه مسلسل من اسمج المسلسلات ونقدر نعتبره من مسلسلات المقالب يعني تتوقعه زين وفي الاخير يطلع لك واحد ويقول حطوكي



هالوجه مارن علي قبل حوالي 15 سنة لابسن طاقيه زري جنيهات وراكب في ليموزين قدام يقال اني محرم لاهلي سبحان الله ما تغير وجهه اللي تقول مقفى بزر عنده تسلخات وما لبسوه حفاظته

المهم ان المسلسل فاشل بكل المقاييس وابي اعرف من هاللي تابع كل حلقاته باستمتاع عشان اقول له ياسمجك ياخي واذا كانت بنت اقول لها ياسمجكي وانا اخوتس

اكيد ان لي باك تكييف

لاني حالياً فيني غلقه وفي صدري تكه من اسعار العقار لذلك ارجوكم خلوني لحالي ابي اروح اصيح على الاطلال




اخر تعديل كان بواسطة » ملكع في يوم » 18-02-2012 عند الساعة » 09:33 PM.
ملكع غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 19-02-2012, 12:01 AM   #6
جراك
من كبار شخصيات الإقلاع
 
الصورة الرمزية الخاصة بـ جراك
جراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحبجراك فوق  هام السحب

الله لايسلطكم على قريب خخخخخخخخخخخخخخخ
انا برقد وعجزت ارقد ومدري وش السالفه ? ..
وبعد محاولات كثيره اني انام عجزت وتذكرت المقوله اللي تقول في فمي ماء
وقلت بس ياولد مالك الا ترجع للموضوع سريع اكيد ان في فمك ماء وسوس بعد على الصيخان وربعه خخخخخخ..
وادري فيكم بتقولون اني من اليوم احوس بالمنتدى الادبي وادور كلمة اقوى من كلمة قلعه (ارقتني كثيراً) وجبت في فمي ماء خخخخخ
واحب اقولكم ايه نعم اصبتم كبد الحقيقه ومعدتها بعد لاني انسان بشوع خخخخخخخخ
عاد الجد بخاطري هرجه مابي تقعد في صدري وتذبحني ..
حنا هنا المسلخ البلدي .. المسلخ البلدي ومقدمين عيد الضحيه قبل وقته..
ولايحسبونا شلة المصاقيل اننا كارهين ولا حاقدين .. حاشا وماشا ..
بس مو معقول نخليهم على عماهم وفي قلة سنعهم .. لذالك واصلو يارعاكم الله
لأن ثامر الصيخان اليوم كاشخ بالبدله والشعر السواريه < من عندي
وبكره يمكن تكبر في راسه ويروح لأمريكا يخرج فيلم عندهم ..
عاد ذوليك مايمشي معهم شغل البربسه والبربوسي يعرفونه من وجهه
ولا ظنتي فيه احد وجهه يدل على البربسه مثل مايدل عليه وجه ابو ثمره خايسه
خدود تقول من حصيان طويق لاعبتن في حسبتها عوامل التعريه..
وجبهه ولا مسطح عمارة ابوي.. على جسم لو انه عندي حطيته نطيطه لعيال اختي ..
بالله ياعيال ع طاري النطيطه هذا وشلون يرقد ؟





اخر تعديل كان بواسطة » جراك في يوم » 19-02-2012 عند الساعة » 12:14 AM.
جراك غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 19-02-2012, 12:12 AM   #7
الديلكو
من كبار شخصيات الإقلاع
 
الصورة الرمزية الخاصة بـ الديلكو
الديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحبالديلكو فوق  هام السحب

آفه وتسلط على آفه
لاحول ولا قوة إلا بالله ..!
ياخي شلة فاهمين منعمين يتعشون في مطعم روما في عماير السليكون ويفطرون في مطعم المثنى وش تبي فيهم متودس في بطونهم؟؟
إذا بتقولي بداية تصحيح لخطوات البشريه وتسليط بقعة ضوء على مطرستهم وإعلان برائه مما إقترفت أيديهم أتفق معك ..
ياخي بلادنا عامره بالمواهب البشريه والخيرات العميمه .. تنقهر إذا صارت فيه فرصه لمثل ذولا ينشرون حواقهم على حساب اللي أبرك منهم ..
إقتباس »
ومن ضمنها المسلسلات اللي ينقال عليها كوميديه واعوذ بالله من الذنوب
فما أصابكم من مصيبه فبما كسبت أيديكم ..
الله لايسلط علينا من لايخافه فينا ولايرحمنا ..! أنا متأكد إن ذولا سلطه من رب العالمين ..!
إقتباس »
مسلسل ينقال عنه كوميدي للاسف ولو جتني فكرته بالعيارين ذبيته للماصله مع اني اشك ان اللي له موضوع بالماصله بيرضى ان موضوعه يكون مع ذا الخمبقه في مكان واحد..
تحط لهم ترقيات بالماصله : من كبار الماصلين
ياخي أثر أعضائنا اللي نشره عليهم في بعض المواضيع جنه عند ذولا ..!
إقتباس »
طرسه .. حواق .. مصاله.. قلة دبره .. هذا هي المصطلحات اللي طلعت معي يوم شفت العمل وقلت بفتح موضوع للعيارين للذب على هذا المسلسل ولاشيء غير الذب لنحول المطرسه الى عمل متكامل.. والحواق الى شيء سنع.. والمصاله الى ظرافه مقبوله.. وقلة الدبره لحسن التصريف ..
اذا هم ناوين يعاقبونا رمضان الجاي ان شاءلله بجزء ثاني مع اني اعتقد انهم ارحم من انهم يسوون فينا كذا..
ههههههههههههههههههههههههههههههههه
ههههههههههههههههههههههههههههههههههههههههه
علي؟
أنت تستانس باليوم الأقشر يالأقشر
عاد تبي الصدز؟ لاجاك اللي مثل ذولا يفتح على نفسه باب .. يستاهل وحقه وماجاه ..
وتراهم بيسوون جزء ثاني .. البثر الماصل يملك طموح وتصميم وإراده مايملكن غيره .. وهذا من باب التسليط على العباد بذنوبهم ..


إقتباس »
ولاشيء غير الذب لنحول المطرسه الى عمل متكامل.. والحواق الى شيء سنع.. والمصاله الى ظرافه مقبوله.. وقلة الدبره لحسن التصريف
التصحيح والمرآه العاكسه النابعه من قلب محب عطوف ( يارب سامحني على هلسي)

إقتباس »
قبل ابدا في الانتقاد والذب على الجريمه الكونيه اللتي ارتكبت في حق الشعب السعودي من خلال هذا المسلسل احب اقول ان الاشخاص اللي قايمين على العمل لشخوصهم كامل الاحترام(ايه هين) لكن بما انهم طرحوا عمل فني لازم يتحملون وجهات النظر عليه >> فيس ناوي يستاثم
هههههههههههههههههههههههههههههههههههههههههههههههه
إحترام مين والناس إنلعن أبو إبليسها؟؟
الا راحوا مقلقل بينك وبين ربعك ..
ياخي انا مقتنع إن الناصح الصادق لازم يكون أسلوبه دموي عشان تاصل فكرته بشكل صادق ..!
ياشيخ رح مناك لانيب محترمهم ولا مشيمهم .. اجل عقب الفطور والإنصراعه والواحد مايتحمل الذبانه توقع على خشمه يشوف هالبثرين؟ ليش مستغني عن عافيته ولا مستغني عن صحته؟
اصلا يقال .. إن المعده المليئه بالطعام بعد صيام يوم كامل ماتحمل أي جهد عقلي وعاطفي ..
وذولا مسلسلهم يبيلك ساعه تركز عشان تفهم الذبه وساعه عشان تفهم المقصد والآخريه تطقك الصيحه وتقعد تحسبن عليهم اللي فككوا جوك ..!

إقتباس »
بو متعب الله يحفظه .. انشأ هيئة لمكافحة الفساد ,, وحنا بالعيارين قررنا نسوي هيئة لمكافحة المصاله ... وانا اشوف ان المصاقيل وفكر اهله هم اولى الناس بالمكافحة الجديده .. الماصل مشكلته بثارته واقتناعه بأنه ظريف وهاذي مصيبه يعني ترجاه تحب يديه يابن الحلال انت ماصل ورب الكعبه ماصل وفوق مصالتك بثارتك ارحمنا عندنا فلسطين محتله والعراق ملعون ابو كوثره والسودان قسموه وسوريا قابعه بليفه يعني لاتزيد مصايبنا مصيبه ..
هههههههههههههههههههههههههههههههههههههههههههههههههه هههههههههههه
ابو متعب يلقاها من وين ولا من وين؟ يحمدون ربهم ان ابو متعب رحيم وقلبه حنين ولا كان جمعهم في صقالة اسمنت وذبهم من فوق ساعة مكه ثم ارسل الفوج التاسع والفوج الخامس ومعهم عصي يفقشون في روسهم عشان يضمنون فنكشتهم ولا يبقى أمل إنهم يرجعون للدنيا ويسوون فينا اللي سووه ..
ياخي يوم انك اطريت فلسطين .. اليهود مايسوون سواتهم ..!
هالحين ورا الدوله ماتجيب اللي مجكومين بالإرهاب وتحشرهم مع ذولا في عنبر واحد يستخفون عليهم دمهم حتى يرجع الإرهابي للحق واراهن إنه بيقلب علماني بس يفتك من ذولا ..!





تذكرون همدي دمتي اللي في اليس في بلاد العجائب؟
املح من ذا البطريق ..!
حلالاة من ذبه في نص أفريقيا عند هالقبائل اللي تاكل الأوادم .. بيقعدون في مرقته ثلاث ايام وخدوده بس بيقعدون يشتوون فيها اسبوع ..
انت وهالشوشه ..مصارين ميب شوشه ..!
إقتباس »
يعني تخيل نصراوي ولا اتحادي شاف المسلسل ثمن حاقها فريقه كالعاده
هذا اللي صار معي .. دهر وفوقه معاويل وحمى ومع الحمى مليله ..!
والله حنا في زمن صار الضحك ينشرا فيه بالفلوس .. وذولا يسوقون للغثاثه ..والشرهه ميب عليهم الشرهه على اللي يعطيهم مساحة في حياتنا يرتكبون فيها جرايمهم ..

إقتباس »
في حلقة زياره فضائيه..
..سرق عيني عينك .. ومن مين ياسامعين؟
من جاك نيكلسون ههههههههههههههه
تسرقون واحد العالم كله يتابعه؟ اسرقوا مني ولا من قلعه على دجتنا اقلها محد يعرفنا...
في فيلم جاك نيكلسون المريخ يهاجم .. كانت المخلوقات الفضائيه احتلت الارض ولاقدروا البشر يتخلصون منهم الا بالموسيقى العاليه ..
والاخوان بدل الموسيقى حطوا ربابه ماشاءلله عليهم ذبحتهم الامانه ونخلصو منهم بالربابه العاليه ..
ويوم تفقعت روسهم هي نفس المشهد في فيلم جاك نيكسلون
وحتى اشكالهم قريبه من الي بالفيلميعني افلاس حتى الضياع
يعني سروق وماصل ومفلس بعد مالها طب ابد خخخخخخخخخ
وهذا المقطع من الفيلم
حسبي الله ونعم الوكيل ..!
ممثلي المفضل
وتدري ياجراك انه ممثلي المفضل .. هذا ملك الأدوار المركبه .. اقلها اسرق من جحلط المسلسلات الخليجيه بيقولون لو كشفوك صردان طاح على متلحف هدومه وبينسونك الناس من قلة قيمتك .. بس تشطح وتنطح لجاك نيكسلون؟
ياليته يدري عنكم بيرفع عليكم قضيه في محكمة العدل الدوليه وبيتركون بشار ومقتل الحريري وبيتلونكم مع أذونكم لأنكم خطر يهدد الوجود البشري ..


جراك ..
شكراً على شنق هؤلاء عاليا ..

الله لايخليني منكم يالعيارين .. مشرفين وأعضاء ..
منتدى يدعم البسمه ويحارب الغلقه ويناقش لك فكره ولا فيه أحسن من فكره هادفه تاصلك وأنت تضحك ..



الديلكو غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 19-02-2012, 12:19 AM   #8
نونا بدليه
مقلع وعيار
نونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحبنونا بدليه فوق  هام السحب

إقتباس »
احد ضحك؟ احد حتى ابتسم؟ وش هالسيناريو المكتوب في قهوة المسافر على خط القصيم؟
كنت راح اضحك لولا اسم القهوه اللي جاب لي اكتئاب

إقتباس »
سمع يا التنين الشرير تراني حافرن حفرتك مندي كبرك علي الملازيم ملازيم الرجال لا قالت فعلت
اني لا أقسمك ثلاث اقسام , قسمن اعشي فيه الربع وقسمن اعشي فيه الجمعيات الخيريه وقسمن برميه للتسلاب
شف انا متأكده انه مايقصد يذب بل هذا لغز وش اللي قاسمه 3 اقسام يمكن تطلع بالاخير فكرة المسلسلات الغاز >> الله العالم انها كاتبه النص معاهم بالاستراحه المنكوبه

إقتباس »
اجل اسمع يالتنين الشرير تراني حافرن لك حفرة مندي .. ياعيال اضحكوا تراه ينكت
هههههههههههههههههههههههههههههههههههههههههههههههههه ههههههههههههههههههه
هاه وش تبي اكثر من تسذا مطيت ابو الضحكه عشانك >>تحسبه عزيمه!!

إقتباس »
وفوق مصالتك بثارتك ارحمنا عندنا فلسطين محتله والعراق ملعون ابو كوثره والسودان قسموه وسوريا قابعه بليفه يعني لاتزيد مصايبنا مصيبه ..
ورا ماجبت طاري مصر !! يا صديق حصني يالك من زنديق !! >>حولي للجاده موب هنا

إقتباس »
المنتج الفني ثامر الصيخان ذات شربة هوى بعد عرض المسلسل!
اوووه هو ذا نفسه الدب اللي خدوده مطبقه على وجهه حق ام الحاله
ازين مافي مسلسله ام الحاله ام ديبوو وعزيز القعيطي
اما باقي بربرتهم شكله كتبوه في نفس الاستراحه اللي على خط القصيم

إقتباس »
تعطيني انطباع انك ماتفهم البقل وين مكانه في خضم الصميل
ههههههههههههههههههههههه >>تضحك تحسبا في حال تكون ذبه

إقتباس »
وأقام الصيخان القضية ضد خصمه لدى لجنة النظر في المخالفات في وزارة الثقافة والإعلام. وقال في بيان تلقت "الوطن" نسخة منه، "إن لديه شركة سيناريو التي تبنت أكثر من 40 كاتبا وكاتبة، وهؤلاء كفيلون بصناعة عشرات الأعمال الكوميدية من صلب أفكار مبتكرة ومتميزة دون الحاجة للتكرار أو الاقتباس".
اختلاط بالاستراحه ياكافي ولا يكون مؤلفينه حقين بهو الماريوت؟
بس لقيت حجه جراك بلغ عليهم بالاستراحه بحجة الاختلاط

إقتباس »
لقيت اسم المسلسل المصاقيل مسروق!
المصاقيل ذي دايم يرددها المدحدخ تهقى هو ثامر الصيخان؟!
سبحانه نفس البثاره فالاثنين ونفس التعزيز والترفيع وشوفة النفس والتوحد مع الذات
الله العالم انه هو!! ولا تنسى انه من مؤيدين بهو الماريوت و40 كاتب وكاتبه >> غصب تجيب له الشبهه خخخخ

إقتباس »
تسرقون واحد العالم كله يتابعه؟ اسرقوا مني ولا من قلعه على دجتنا اقلها محد يعرفنا...
يارجال قول من الاول تسذا
قاعد ومزعجنا ومسوي المدافع عن العياره والذب ومحارب للمصاله واخرتها دابل تسبدك انهم ماخذو منك شي!



جراك تهقى الصيخان داري عنك ؟ >>



نونا بدليه غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 19-02-2012, 01:23 AM   #9
men t7t lt7t
خبير إقلاعي مميز
 
الصورة الرمزية الخاصة بـ men t7t lt7t
men t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحبmen t7t lt7t فوق  هام السحب

"
يعني انا ماصله هذا قصدكم
انا لو يمر واحد من عندي ويتكرفع انفرشت من الضحك ماتبوني اضحك على المصاقيل
ليه كذا لييه كانو يضحكوني خربتو جوي انتم وذبكم جعلي ما اصير مخرجتن بديرتكم هفف
بعدين فيه شي يشفع لهم اغنيتهم بتفهموني ان محد يتنكسس عليه

ابنكس لكم احترون انتم بس


يمدحون النوم بعد الاكل مباشره خاصه الاندومي تنهضم اسرع والواحد منجضع على شقه اليمين وهو متعوذ من ابليس
77777




اخر تعديل كان بواسطة » men t7t lt7t في يوم » 19-02-2012 عند الساعة » 01:35 AM.
men t7t lt7t غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
قديم 19-02-2012, 01:31 AM   #10
رسـام داشـر
من كبار العيارين
رسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحبرسـام داشـر فوق  هام السحب

إقتباس »
الرسالة الأصلية كتبت بواسطة men t7t lt7t »
"
يعني انا ماصله هذا قصدكم
انا لو يمر واحد من عندي ويتكرفع انفرشت من الضحك ماتبوني اضحك على المصاقيل
ليه كذا لييه كانو يضحكوني خربتو جوي انتم وذبكم جعلي ما اصير مخرجتن بديرتكم هفف
بعدين فيه شي يشفع لهم اغنيتهم بتفهموني ان محد يتنكسس عليه

ابنكس لكم احترون انتم بس

يالله انك تحييها وتبقيها لعينن ترجيها
شوي واجيك لأني انا توي قايم من النوم وودي أتفلت على أقرب واحد فلذلك للأسف طحتي قدامي
وخصوصاً انك تستثيرين مشاعري وهيضتي العبد الي براسي لأن العبد ما يحب السماجه وانتي الي تمدحينه مسلسل سامج للأسف وانا كنت اتمنى هاللحظه التاريخيه الي اصب جام غضبي على هالمسلسل
برب اكمل تصليح الاندومي وأجي

***
يا بنت الحلال والله ما تهون علي إني أقولك انك سامجه لأنك حبيتي مسلسل سامج
بقولك شي .. لو شفتي صديقتك جايزن لها واحد بالعيارين سامج بشكل مجرم مثلي
بالله مهيب طايحه من عينك ؟ بالله منتب جايبه موية نار وبتصبينه على وجهه من قوة السماجه الي به عشانه جازله واحد سامج ؟
انا مدري وش معجبك بمصاقيل ؟ معجبك خد ثامر الصيخان ؟ ولا خشم عمار بكار ؟ ولا عاجبك السرق الي صاير ؟
لا وبآخر ردك تقولين أغنيتهم رهيبه هههههههههههه لوهله حسيت إنك فيفي عبده على هالجمله لعنبوا إبليسك وحنا نبي نشكشك ولا نبي نضحك وننبسط ؟ أجل بجيب موضي الشمراني وأخليها تغني اغنية لمسلسل مصاقيل ونخليها اغنية المسلسل .. صدقين بتلقين كل الخلق يحبون المسلسل لو هي على نظامك ههههههههههه
يالله ما علينا لكل جواد كبوه وبإذن الله يا (من تحت لتحت) ترجعين لرشدك وتراجعين نفسك بتقتنعين ان الي قلتيه هو مصيبه وجريمه بحق العيارين
استغفري وصلي وتر واستخيري .. منها أجر ومنها تكفير ذنوب
انا واثق إن رأيك الحقيقي مهوب ان المسلسل كوميدي أبداً .. بس الروح السلبيه الي بداخلك هي الي أقنعتك بهالشي
بداخل كل عقل منا شخص سامج وشخص خفيف دم .. وأتوقع هالسامج هو الي أقنعك ان المسلسل كوميدي ويضحك

سمي هالورده ومعها كتاب حصن المسلم لعل وعسى تهتدين




اخر تعديل كان بواسطة » رسـام داشـر في يوم » 19-02-2012 عند الساعة » 02:38 AM.
رسـام داشـر غير متواجد حالياً التبليغ عن مشاركة سيئة  
Facebook Twitter اضافة رد مع اقتباس
إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح

الإنتقال السريع


الوقت المعتمد في المنتدى بتوقيت جرينتش +3.
الوقت الان » 03:07 PM.

الأن حمل تطبيق منتديات الإقلاع

 

هام: لجميع مستخدمي ايميلات شركة مايكروسوفت (hotmail,msn,outlook......الخ)
 

في حال تاخر التفعيل او اي مشكلة طارئة او ما يخص العضوية الذهبية او التجارية من استفسارات يمكنك ابلاغي هنا وتسعدني متابعتك   

تنبيه : كل ما يطرح من مشاركات يمثل رأي كاتبه ولا يمثل رأي إدارة الموقع

ترقية وتطوير » تحميل دوت كوم
Powered by: vBulletin Version 3.8.7
Copyright ©1999 - 2014, Jelsoft Enterprises Ltd.
جميع الحقوق محفوظة منتديات الاقلاع - شبكة الاقلاع