منتديات شبكة الإقلاع ®


الصفحة الرئيسية البحث انظمة شبكة الإقلاع سوق الاقلاع عضويات التميز (الذهبية والفضية والتجارية) جوال الإقلاع حمل صورك من هنا من خلال فتح موضوع خاص بك
بوابة الأنباء ieqla3 اختصر روابطك من هنا البرامج اعلن معنا حساب الشبكة في موقع تويتر اعلن معنا
العودة   منتديات شبكة الإقلاع ® > المنتديات الإقلاعية والشعبية > منتدى مدونتي
التسجيل التقويم التأشير على جميع الاقسام بالمشاهدة




إضافة رد
 
أدوات الموضوع طريقة عرض الموضوع
قديم 13-02-2018, 07:16 AM   #1
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
اُعتمت الـ "سما" برحيل اسامه

بسم الله والصلاة والسلام على رسول الله .. اما بعد
بعد مشاورات واخذ وعطى فكرت افتح لي مكان ابربر فيه .. خلاص بالواقع محد بيبتل يتحمل
وهالعتمه طلعت على النور .. الله يستر ( مدري وراي تقل استحيت )

- سما ع.ع
- قصيمية الاب ، منشأي وموطني كحال اكثر القصمان هي الرياض .. استعمار الله وكيلك ، فرجاءً رجاء خاص اعزائي القصمان الاصليين .. لو شفتوا قلت كلمه قصيميه يعنني اشخّص وطلعت غلط مشوا لي
- وحيدة اهلي الله يكون بعونهم
- 23 سنه الله يحسن خاتمتنا
- للحين ادرس الله يعيني واياكم
- اكثر وحده تهايط وهي ماعنده سالفه .. العرق دساس D:
- راسي يابس .. منب قليلة شر .. احارش واجد واحب اعصّب الناس .. سوالفي واجد .. وكده خِلصنا ياقدعان


- كل من مر هنا وقرأ الله يخليك ادع لاسامه معك



 

 


اخر تعديل كان بواسطة » Sama.Os في يوم » 13-02-2018 عند الساعة » 07:21 AM.
Sama.Os غير متواجد حالياً
Facebook Twitter 3 اضافة رد مع اقتباس
قديم 15-02-2018, 07:07 AM   #2
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه


" فلا اشبه بنعيم الآخره الا نعيم الانس بالله
ولا اقرب من رضى اهل الجنه الا الرضى بالله
والرضى عن الله والرضا بقضاء الله
فالرضا يفرغ القلب لله .. والسخط يفرغ القلب من الله "
كتاب : #هو_الله - ل : #عبداللطيف_هاجس


سلام عليكم .. صباح الخييييييييير .. وش هالغبار اللي جانا اعوذ بالله ؟ خلص الشتا يعني ؟ وش ذا ما شفنا شتا !!!
اكلمكم من الجامعه بكل اسى وحزن .. مشكله الدوافير ضميرهم ما يخليهم يغيبون بكل سهوله
طبعا حظي بالتعب دايم حلو .. حلووووو مررررره .. تو جسمي يستوعب يتعب يوم قضى الشتا .. لك ان تتخيل انفلونزا وحر !!!! يا ربي لا تعاقبني بس
طبعا ريحتي كله فكس .. ما ينفع معي الا هو للاسف
ومع ذلك شحليلي مداومه بكل ادب وانصياع .. وقاعده اشرب قهوه يعنني باروق D:

وانا رايحه بالطريق تكلمني جدتي وتهوش عشاني مداومه بهالجو .. غاوية شقى انتي ؟ الحين ورى ما تنطقين بالبيت ؟ قلت لازم عشان افهم .. قالت عمرتس ما فهمتي .. ارجعي من الجامعه ودقي علي ما ينسمع صوتك من التعب وقولي فهمت وقتها D: .. يا بعد الجامعه وبعد سما وبعد الدنيا هذي كلها
الجدات جزء من نعيم الجنه .. امي ساره بالذات انا اشوفها جنة الله بارضه .. يا الله يا كمية الحنية اللي بقلبها كيف تكفينا كلنا ! انسانه مناضله بشكل كبير .. كنت دايم اقول لها يارب اصير مثلك .. وكان يرد جدي الله يرحمه : ليه يا ابوتس هو احد يقدر يصير مثل ساره ؟ وتبدأ تتهاوش معه بحجة انه يطقطق عليها وانه عيار .. ما يرضي الحريم شي اعوذ بالله
" الله يرحم جدات وامهات واباء واجداد المسلمين اجمعين ويتجاوز عنهم .. ويشفي مرضاهم ويمدهم بالصحه والعافيه والعمر المديد على طاعته "

لا غير الجو بعد فاتحه السناب وطلع لي فلتر " I LOVE YOU TO THE MOON AND BACK, F " ناقصين حنا بعد ؟؟ ناقصين ؟
فالنتاين وهالجو الله يعفو عنا بس
على الطاري .. تو وانا داخله " اول مره " بحياتي الجامعيه توقف لي وحده من اللي يسوقون سيارات القولف ، قالت تبين اوصلك ؟ احس اني حبيته يا جماعه
من الصدمه قلت لا ما يحتاج اتعبك .. قالت اركبي بس .. سمعا وطاعه يا قلبي

واضح ان ما عندي سالفه ؟ ادري بس كل الناس معطيه نفسه اجازه وانا جيت اصيح شوي عندكم .. اخاف اصيح عند جدتي وتقول احسن .. انا قايله لتس غيبي بس انتي تبين الشقا .. اعرف حركاتها
هذا وصلى الله وبارك .. خلص صياحي لهذا الصباح ، الحين اقدر امارس حياتي بشكل طبيعي

^ كان هذا ردي امس الصبح بس الصيانه خربت علي

يوم خلصت محاضرتي الأولى قالت لي وحده ، سما ترى تكنسلت محاضرة الظهر .. قلت الله يبشرك بالخير جت منها ، ما أمدى ركبت السياره راجعه إلا تكلمن تقول معليش ما تكنسلت .. قلت أنا طلعت خلاص ، كذا ولا كذا منب حاضرته ..
تخيلوا اكسر بخاطر نفسي وارجع للجامعه ؟ خبله انا خبله ؟!!! لا يوم اطلع 11 والمحاضره 1 .. أمدى وصلت البيت وافطرت وخلصت كلش ونمت وصحيت وما جا وقت المحاضره

امس اتحلطم خلص الشتا والحمدلله الحين كأنه رجع شوي .. ما بعد استعدينا للصيف تكفون خلونا نستانس شوي بهالهوا والبراد
اتقبل وجهات النظر واختلافها بكل شي واحترمها .. الا اللي يحبون الصيف معليش .. هذولا لا تكلمهم ابدا .. ما يخالف لا تحبون الشتا وقولوا ما نحب البرد .. بس خلوكم حياديين مع الصيف .. احد يحب الحر ؟؟ الله من زين الاخلاق بعد وقت الصيف
خاصه حقين الرياض ما يجينا شتا اصلا .. بس الصيف يا ربي رحمتك بس

اخيرا الخميس .. مساكين اللي عندهم اوف الخميس .. انا من كثر ما احب الخميس عادي اداوم من فجر الله لليل .. هو بالاخير خميس خلاص يكفي
المحظوظين صدق اللي اوفهم الاحد .. اهب
يلا ما يخالف .. ويك اند سعيد للجميع .. واللي وراهم ميد الاحد مثلي كيف تذاكرون ؟ انا يضيق صدري اذا عندي ميد الاحد .. مستحيل اعطي الماده حقها لو وش ما كانت
حطوه اثنين عادي .. بس احد لا .. الشكوى لله بعد كل ما قلنا شي وطلبنا شي قالوا لا D:

تحلطمت واجد وقلت مليون سالفه مره وحده .. يلا سلام عليكم



 

 


اخر تعديل كان بواسطة » Sama.Os في يوم » 15-02-2018 عند الساعة » 07:10 AM.
Sama.Os غير متواجد حالياً
Facebook Twitter 1 اضافة رد مع اقتباس
قديم 22-02-2018, 07:18 AM   #3
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه

6 / 6 / 1434 هـ
ما كان لمرور الايام ان تنسيني موتك
ثبتك الله في قلبي حياً الى ان اموت
( نقطة التحول الكبيره بحياتي )

صباح الفل .. صباح الخميس السعيد .. اللي لو كان يومك اطول من حياتك يظل حلو عشانه خميس
الحياه ما توقف ( ظاهرياً ) بعد فقدانك لشخص .. انت بتعيش وبتكمل حياتك وما راح تموت جسديا وتتوقف اعضائك عن الحياه ! بس انت تحسك ميت من داخل .. موت محد يشوفه غير رب العالمين ونفسك
اغلبنا فقدنا ناس كانوا لنا مثل اسامه لي ويمكن اكثر بعد .. صبروا انفسكم بانهم راحوا للي ارحم منكم فيهم .. راحوا للي يحبهم اكثر منا .. راحوا للي بنروح له كلنا سبحانه عاجلاً ولا اجلاً
هذا حال الدنيا كلنا بنموت .. ما اقول انسوهم لانه مو شيء بيدنا .. بس كل ما مروا ببالكم اذكروهم بدعوه .. بصدقه .. خلوكم صلتهم مع الله
وقبل كل شيء .. ما ابتلاك ربي الا انه يبي يشوف صبرك .. وانه يحبك .. والاهم انه ما راح يحملك شيء انت ما تقدر عليه .. او ما تتقدر تتجاوزه ( لَا يُكَلِّفُ اللَّهُ نَفْسًا إِلَّا وُسْعَهَا )
ثقوا تمام الثقه ان موتهم خيره لهم ولنا .. ولا تنسون وتغفلون عن لطف رب العالمين ورحمته الكبيره فينا
الله يرحم اسامه ويغفر له ويعوض شبابه بالجنه .. ويرحم كل من فارقونا ويتجاوز عنهم ويعوضنا بغيابهم ويجمعنا فيهم بجناته يا رب

قبل لا ابدا سالفتي .. لا تخلون بقلوبكم شيء للناس اللي تحبونهم .. لا تتركون شي ودكم تقولونه لبكرى .. لبعد شوي .. قولوه بنفس اللحظه .. الموت ما يعطيك خبر قبل ما ياخذ اي شيء منك .. ما يشاورك باقي عندك كلام ولا لا
اي شيء بتسويه للي تحبه سوه الحين .. بنفس اللحظه اللي فكرت فيها .. لا تنتظر ولا تأجل لو وش ما كان السبب
لا تخلون الموت يسرق احبابكم منكم قبل لا تطلعون اللي بخاطركم لهم .. نصيحه من محبه
( عايشه بهالمبدأ حالياً .. اي شي يجي بخاطري اقوله .. بحجة : الله اكبر كلها حياه بنعيشها مره وحده .. بس لا تجيبون العيد واجد مثلي )


خلونا من النكد .. طفولتي كانت عامره بالمغامرات والمطاقق والتصفق .. كل حارتنا وجيراننا لي معاهم صولات وجولات .. والله يا انا كنت شرانيه بعد
يوم كنا بزارين كنت انا راس الشر والفساد .. كل جيراننا يقولون لابوي يا بن الحلال انت متأكد ان ذي البنت ؟ مب طبيعيه يا ابو اسامه وش هالدفاشه ؟ اخوها ما يسوي سواتها
يا حياتي يا انا .. دايم متهمه .. حتى لو ما لي دخل وصارت مصيبه قالوا ايه من غيرها سما .. السمعه سيئه D:
اسامه من النوع اللي بحاله ولا يحب يضايق احد او يخلي احد يشكي لابوي منه من يومه بزر .. انا سمعتي تسبقني بكل مكان اروح له اللهم لا حسد
اخذ كل الصفات الزينه الله يرحمه وعطاني اشين شي .. هذي مشكلة التوائم

ماعلينا .. طفشوا ذاك اليوم عيال الحاره وقالوا نبي فعاليات .. ما عندهم الا سما اكيد .. بس وشلون يجيبونها ؟ ما لهم الا اسامه .. وهم يجون ويجلدونه كذا بدون سبب .. بس عشان تطلع لهم الغوله D:
دخل اسامه البيت وعشانه قليل شر ما جا عندي عشان ما اتهاوش معهم .. وما دريت ان عزوتي تصفق يا قلبي قلبه
الا يدخلون بنات الجيران : سما سمااااا .. العيال صفقوا اسامه وطلعوا دمه ( يبالغون بس عشان تزيد الفعاليات اللي بتصير )
طلعت للشارع بشرّي .. وجايتهم شايشه خلاص بصفقهم .. قلت مين طلع دم اسامه ؟ قال واحد ( ما اواااااااااااطنه ) انا وش بتسوين يعني ؟ قلت بصفقك وانت ما تقدر تصفقني عشاني بنت ( اعرف امسكهم بنقطة الرجوله بعد انا ووجهي ) قال لا عادي انتي مو بنت !! قلت عادي انا مو بنت وانت مب ولد ( فالحه بالمرادد ) يعني انا اقوى منك وابتدت المعركه .. وهاتك يا تصفق .. عاد سلاح العيال ضد البنات دايم الشعر .. اسحب شعرها خلاص انت كذا صرت اقوى منها .. وهو يسحب شعري عاد تعرفون من زود الطول لا سحب وصلت الارض .. وانا اتحول قطو .. والله واخمش وجهه والعيال الباقين تعزيز .. اسحب شعرها فهد اسحب قوه .. وانا بدون جمهور وتعزيز عزتي لي
كل واحد فينا يحاول ينتصر لكرامته وصورته قدام الحاره .. انتهت طبعاً بعد تدخلات عليا واسامه يسحب فيني وانا ارجع للميدان .. من زود الهياط اقول اصبر بطلع دمه مثلك .. بس والله اني قول وفعل خلوا عنكم .. وجهه صار لوحه من خمشاتي بردت حرتي به ذاك اليوم وانتصرت لي ولاسامه

ما انتهت فعلياً السالفه .. يوم وصل ابوي ويقول له ابو الجيران كل السالفه ويقول يبن الحلال بنتكم ما خلت عيالنا بحالهم وش هالبنت الموذيه .. مدري وشلون ابوي يطاوعه قلبه يصدق فيني .. هذا وانا بنته الوحيده ):
والله وابوي يجي معصب : سماااااااا .. بتموتني هالبنت بتموتني .. قلت ( بكل قوة عين ) : هو صفق اسامه وطلع دمه ( اذكر مسك ضحكته يوم شاف من نتائج المعركه اني تصفقت ) قال خلاص قلتيها اسامه مب انتي .. قلت لا انا واسامه واحد .. بعدين اضحك اضحك عااااادي اهم شي صفقته وطلعت دمه ( بي الصيحه ) قال ايه بضحك وروحي عن وجهي لا ارتكب فيك جريمه D:
شكلي وقتها برد حرة ابوي شوي .. الشكل يدل اني متصفقه وعاضه الارض .. بس والله ما اصيح واشمت العذال

عاد بالاجازه الصيفيه كنت بالقصيم عند يمه ساره ويجون جاراتها دايم .. المهم وتدخل علينا ام فهد .. وانا ودي الارض تنشق وتبلعني .. يا رب ما تذكر سواد وجهي يا رب يا حبيبي .. اقله مب قدام الباقيات وتشوه السمعه .. انا ما صدقت احد ينسى شوي .. ما امداني اكمل دعائي بنفسي الا تقول : ما شاء الله يا سما .. اللي يشوفك ما يقول ذي اللي كانت تتصافق هي وفهد .. حسبي على العدو انتي وفهد .. ناقصتكم انا ناقصتكم ؟
قلت ( وانا احاول ادور وجهي ) : ايه شفتي شلون ؟ بس ترى هو اللي كان يبدأ .. قالت والله شكل الشر للحين باقي ما قضى وانا خالتك .. والله حاله ! ولدها الدلوع يصفقنا ثم يروح يشتكي لابوه وابوه يشيش ابوي .. مشكله هالناس بعد


يلا سلام عليكم



 

 


اخر تعديل كان بواسطة » Sama.Os في يوم » 22-02-2018 عند الساعة » 11:28 PM.
Sama.Os غير متواجد حالياً
Facebook Twitter 0 اضافة رد مع اقتباس
قديم 16-03-2018, 02:53 AM   #4
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه

نهض بورارو وقال:
اعذرني إذا كنتُ ذاتياً في هذا الأمر... إنني لا أحب وجهك يا سيد رانشيت!
كاني اشوف نفسي مكان بوارو لا اشتغلت .. ما ابي اتعامل مع شخص عشاني ما هضمته ، عشاني مب مرتاحه له .. حركاتي والله : D



واضح لكم اني توي مخلصه روايه حلوه ؟ مغرمه بالقانون والقضايا واحاول اكون ملمه بهالجانب بحكم انه حب وحلم الطفوله والمراهقه اللي ما انكتب : D .. طبعا ما مثل اجاثا كريستي بهالجانب .. اسطوريه والله .. حبكها للقصه وبناءها للسيناريو والاحداث عجيب ! ما ادري كم خلصت روايه لها بس كل مره اقرا اسوي نفسي مدركه الوضع وقافطه القاتل وانا من جنبها .. ولا اتوب ! ارجع بكل مره واتحمس واخمن وابني سيناريو والدوافع من القتل ويطلع خطا .. كيف انها تخليك تشك بشخص ويطلع القاتل بعيد كل البعد عن توقعك .. بس عشان نكون واقعيين يبي لها ترويقه .. تفكك الاحداث وتربط شي بشي ويطلع عليك خطا بالاخير بس لازم تصير مروق ولك خلق .. انا عن نفسي اذا خلصت اختبارات اكافئ نفسي بروايه لها .. من الهوس مرات وضغط الاختبارات اخلصها بيوم ! تشدني بشكل وما استوعب الا وانا مخلصتها .. اسطوريه يا ام كريستي
" اللي يقرون لها اقروا جريمه في قطار الشرق .. اوووووه ، هذا اللي اقدر اقوله "

سلام علييييييييييييييكم .. صباح الخير .. صباح الفل .. النفسيه عال العال كما يبدو لكم
يا الله يا الاختبارات كيف تلعب بالنفسيه ! يكفي شيلة الهم .. كذا تحس فيه شي كاتم عليك لين يفرجها ربي وتخلص .. هذا غير الاشياء اللي ما تصير حلوه الا وقت الاختبارات .. عزايم وجمعات خوالي ما تصير حلوه وفيها اكشن واحداث الا وقت الاختبارات .. الناس اللي برى الرياض ما يفكرون يجون الرياض الا وقت الاختبارات .. لدرجة والله بدون ما ابالغ فيه وحده من بنات عماني مرتبطه بمخي مع ماده .. كل ما جت تطلع صدفه عندي هالماده .. تكررت 3 مرات .. حتى السنع ما يجي الا وقت الاختبارات .. فجأه اشتهي اسوي حلا وسلطه وعشاء .. ابوي اذا شافني مدهره قال خلاص يا بابا ارجعي على كتبك : D
يلا حمدلله خلصنا ونرتاح اسبوع ونرجع بعدين .. صح اسبوع والمفروض استحي على وجهي ولا انبسط .. بس انا قنوعه وتكفيني نومتي بدون منبه نص الليل الله ينكد عليهم

وش بعد كنت بسولف فيه ؟ لا اخفيكم ان تصير عندي سواليف كثيره وبس افتح المدونه يطير كلش .. طيب وصفصفة الكلام وين راحت ؟ السواليف اللي مرتبتها بالارقام وين ؟ ماش شكلي كل هذا اتهرب من الاختبارات

ها بنات سجلتوا لاختبار القياده ؟ الله يعينا يا اهل الرياض على الزحمه اللي بتتدبل .. والحوادث اللي بتصير بالثواني .. انا وش حليلي مخططه للمشاوير القريبه .. حركات امسك الدايري ويصدمون بي واصدمهم ما يصلح
ما ودي اضحككم علي .. بس ما اعرف اطلع من دوار .. قد جربت ونشبت به .. قعدت ادور مدري كم لين دار راسي ووقفت السياره .. يا زيني وانا مكلمتهم نشبت بالدوار طلعوني .. زين اني عند ناس وش حليلهم يخافون ربهم فيني ما فضحوني .. يعني ضحكوا علي يومين بس عاد ما يخالف .. اهم شي طلعت
انا اتخيلني بس نشبت ودقيت على ابوي .. والله يجي هو والعائله الكريمه من ورائه تقوم بالتصوير والتوثيق .. وكل ما شافوني قالوا دوار وضحكوا لما اموت هالسامجين
ما علينا .. انا سجلت وابوي يقول لي انتي مصدقه بتسوقين ؟ قلت ما يخالف يا قلبي انا بس تصير عندي رخصه نشوف مين بيسوق .. متوعد بي .. يقول ترى ان شفتك صدمتك .. قلت فدى يا قلبي ، تمون يا عمري تمون
امي ما ابدت ردة فعل .. اقول لها اوصلك طال عمرك ؟ تكشخين بي قدام صديقاتك .. قولي سواقتي الجديده ما يخالف .. تقول الله يخلي لنا سليم .. يعني وشو يمه ؟ مستغنيه بعد الله يطول لي بعمرك ؟
كلهم كوم وجدتي كوم ثاني .. تقول ما بعد انهبلت والله اركب مع بنت !! يا ربي تستر علينا .. قلت اشوفك يا حلوة اللبن تتصلين على هالعيال ويسحبون عليك ثم تدقين علي واجيك من الرياض .. تستاهلين من يتعنى لك .. انا اركب معتس ؟ بايعتن رويحتي ؟ قلت ما يخالف يمه ما بقى بالعمر شي .. وما شاء الله عشتي وشفتي عيالك واحفادهم خلاص يكفي .. الله حسيبتس يا بنت ابوتس كانتس بتموتيني قبل يومي .. قلت هو يمه ! بقى فيها قبل يومك ؟ ما شاء الله خلاص يكفي .. يا حلوها لا عصبت وقعدت تحذفني بكل شي حولها
بعد ما تسفل فيني تقول انا بروح مع عهد .. هي الوحيده اللي بضمن نفسي معها .. قلت خلاص يمه بتعرس البنت مب فاضيه لك توديك وتجيبك .. ما وراها رجل وعيال ؟ تقول يعني وشو بحتد لتس ؟ كذا تقولها ببؤس يضحكني .. جعلي اسوق بك والفلف بك الدنيا ونعطيهم شوط تفحيط لعيونك .. تستاهل ام سليمان : D

يوه يا كثر سواليفي .. ناويه اكمل بس يوم رجعت فوق حسيت اني زودتها .. خنبروح ازين لي قهوه اروق زياده .. سلام عليكم



 

 

Sama.Os غير متواجد حالياً
Facebook Twitter 0 اضافة رد مع اقتباس
قديم 20-03-2018, 08:07 AM   #5
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه

" ورايت حلماً انني التقيتك
الا ليت احلام المنام يقين "
اللهم انس حبيبي في وحشته وفي وحدته وهون عليه اهوال القبر .. وجميع موتى المسلمين



 

 

Sama.Os غير متواجد حالياً
Facebook Twitter 0 اضافة رد مع اقتباس
قديم 01-04-2018, 08:17 AM   #6
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه

" ما سر هذه الطمأنينه في وجوه الجدات دائمًا ؟ "

احبك سوسو قلبي .. الله يطول عمرك على زود عملٍ صالح وعلى طاعته وبعافيه يارب .. والله ياخذ من عافيتي ويعطيك يا بعد سما انتي : (



 

 

Sama.Os غير متواجد حالياً
Facebook Twitter 2 اضافة رد مع اقتباس
قديم 03-07-2018, 10:23 AM   #7
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه


استبدل كل شخص لا يعجبك بقهوه ،
استبدل كل شيء يثير اشمئزازك ، مشاعرك ، بقهوه


سلام عليكم ورحمة الله وبركاته .. موفقين باختباراتكم .. اجازه سعيده للجميع .. رمضان كريم .. كل عام وانتم بخير .. هذا اللي مفروض ينقال من شخص غاب هالغيبه D:

صبحكم الله بالعافيه وبالخير وبكل شيء نفسكم فيه .. وش الاخبار ؟ وش الدنيا بكم ؟ وش مسوين وش ما سويتوا ؟
اخوتي واصدقائي الطلاب ، ماذا فعلتم ؟ وش مخططاتكم للاجازه ؟ وش انجزتوا ؟ اصلًا انجزتوا شيء يذكر ؟ غششوني : (
معكم وحده كرفت برمضان كغالبية البنات ، تعلمت لي كم طبخه ، او بالاحرى تعلمت على ابوي بعد قلبي : D ، لا اخفيكم اني صرت حرّيفة برياني وللاسف ما كانت هالنقطه بصالحي .. ابوي كثير الانتقادات ، ومن النوع اللي ما يعجبه العجب لو كان الشيء حلو وولا غلطه " برأي الغالبيه " .. له نظره غير دايم للاشياء ، عادي مثلًا اشتغل ساعتين ثلاث على شيء ويقول لي بكل بساطه : ما ملحتيه زين ، ناقصه كذا ، زدتي هالشيء ، ليش حطيتي هالشيء ... الخ ، على ان ابوي مب لمّ الطبخ ابد .. لو طباخ مدري وش بزين
هي صدق صفه شينه ، بس انا متعايشه معها ، فاللي حاصل اني سويت البرياني " لأول مره " وضبط ! لا اخفيكم اني اخذت الوصفه بحذافيرها من امي ساره ، بس يعني يطلع مني .. ذاقه ابوي وما انتقد ! وانتظر يقول شيء ، ما انتقد ابد !! قعدت اسأله ، ها كيف الملح ؟ المويه ؟ الطعم ؟ جااااايز له مره .. انا انبسطت ، قلت اخيرًا كسرت قاعدة الانتقادات عند ابوي ، ما عرفت ان هالشيء فتح لي ابواب مسكره : ( .. صار ابوي يعزم كل من يعز عليه ، يلا يا شباب سما بتسوي برياني .. لااااااا يبه كذا غلط والله ، كذا غلط يا الغالي .. بدون مبالغه يمكن سويت برياني ثلاث ارباع رمضان ! نقطه ثانيه لازم اذكرها ، ابوي لو ايش ما تسحّر ، ما يعتبره سحور دامه مب رز .. حتى لو اسوي له وجبه دسمه ، لا خلاص رز يعني رز .. فاقول لكم ، ذوّق كل الناس برياني سما .. صار اذا رجع من التراويح وانّا بالطريق ، يقول لي احسبي حسابك بيتسحر عندنا فلان وفلان وفلان .. لا يا حبيبي والله ما يصير .. كنسلت اتعلم طبخات جديده ، بس لا اخفيكم اننا سبايك او ع الاقل انا سبيكه ، احس بتعب من الشغل بس اذا قال ما قصرتي اليوم ، لا تعبتي يا ابوي ، خلاص انسى كل شيء وودي اتعلم طبخات جديده لعيونه : D
عاد اكيد يستاهل ابوي ( اكيد يستاهل ، عيديته هالسنه تخليني اسوي له برياني العمر كله ) ، ان ما طبخت له اطبخ لمين ؟ على هالطاري ، انا عندي قناعه ان الاهل يستاهلون كل شيء بالحياه ، ولهم الاولويه بكل شيء حلو ، ما عندي حركات اتزوج واسوي .. لا ، اسوي لاهلي اول ولاحقين على الزواج .. يعني ادلعهم طبخات وحلويات واللي يبون ، ولاحقين نشبّع رجاجيلنا : D .. زي الولد احبه يدلع خواته ويكون لهم كل شيء ، حركات يدلعك زوجك ذي ما احبها .. طبعا ابوي يسويها دايم اذا بيقهرني ، بس خلاص يا جبل ما يهزك ريح ،
وعلى طاري الدلع .. انبسط مره اذا شفت احد كاشخ ببيتهم ، اوكي بيت ، بس برضو ان الله جميل يحب الجمال .. لنفسك عليك حق هذا اولًا ، ولاهلك بعد .. اوكي اكيد كلنا نلبس مرتب يعني وشعورنا واشكالنا مرتبه ، بس عادي تزينوا شوي .. طبعا معكم اكثر وحده ترقّع بالحياه وتعيش على الترقيع .. بس خلاص الترقيع بالغرفه ، ما يطلع لباقي البيت : D
ترى هالتأثير والله ينعكس حتى ع اللي حولك مب بس ينعكس عليك ، اذكر واحد من عماني قد قعد عندنا اسبوع وكم يوم .. كنت اذا جيت من الجامعه تسبحت ولبست ونزلت عنده ينبسط .. حتى يقول لي بيجيكم ضيوف ؟ قلت لا ليش ؟ قال اشوفك لابسه ما شاء الله .. قلت لا كاشخه عشانك .. ينبسسط يا حياتي ، عاد يوم رجع داقين بناته يهزئوني ، يقولون ابونا يقول كل يوم اكشخوا زي بنت عمكم .. واصور لهم لبسي والله عادي مب كشخه كشخه ، بس انه اكشخ بشوي من ستايل البيت المعتاد ، ترى كذا العين تحب التغيير ، وما تحب الروتين .. ولو اعتادت على شيء حتى لو كانت تحبه بتبدا تتملّله ، وعلى هالطاري .. شعري طال يا جماعه ، اول مره اطوّله لهالحد .. قصيته مره بعد وفاة اَوس ع طول الله يرحمه ، وخلاص خليته .. صرت كل ما قصيته اقصه شوي او اقص اطرافه بس .. الحين وصل لمرحلة اللي كل من شافني وقلت بقصه ع طول " حراااااااام ، لايق عليك " طبعا انا احب الوسطيه ، بس مب بكل شيء .. مثل شعري يعني اقول يا اقصه اقصه كذا قصه محترمه الى كتفي او نهاية رقبتي ، او اقص اطرافه وقضينا .. سالفة اقص شبر مدري وش ما تمشي عندي .. فاحتاج بس شخص يعزز لي ويقول قصي يا شيخه ، راس ماله شعر ، طبعا انا اقدر اقول لنفسي ، بس لا احتاج شخص عشان ما اندم واحطها براسه : D ، امي ساره من الحين تهدد وتتوعد انها بتزعل وبتسوي وبتسوي .. البنت لا قصت شعرها وش بقى بها زين ؟ من زينتس يوم تقصين شعرتس ؟ قلت غيرانه يمه .. خايفه اخطف الاضواء منك لا قصيته ، تخسين الا ابي لتس الزين .. بس جاهل وش يعرفتس ؟ طيب ليه زعلانه يمه ؟ عشانتس بقره ، تبين تشبهين بهالكافرات " عشاني وريت البنات وحده قاصه شعرها وعجبني بس : ( " ايه ما عليتس شرهه .. سفيهه .. ورااااااااااه يمه ؟ وش بك علي ؟ وحده بتسوق ما اشره عليه .. كذاااا صايره حالتنا
كل ما فتحنا موضوع دخلت موضوع القياده وجلدتني ، طبعا امي ساره عادي مع القرار بس تقول للي يحتاجه .. قلت طيب يمه الحين سواقنا مسافر وش ازين ؟ قالت انطقّي لين يرجع ، قلت طيب يمه مب ازين اروح واجي ولا اركب مع سواق ؟ قال وش يبي فيتس ؟ بعدين سليم يعرفكم من وانتي ببطن امتس يا السفيهه .. سمي يا قلبي ، سمي يا كل سما منب سايقه لعيونك : D
انا بطلع الرخصه ان شاء الله تحسبا للطوارئ ، واعرف اسوق حمدلله بس يبي لي مراجعه بحكم ان لي 4 سنوات تقريبًا عنها ، بس باقي ابوي مدري وشلون اقردنه يجيب لي سياره .. قلت جب لي اردى نوع ، عادي لا تخسر عشاني .. قال مصدقه اني بجيب لك سياره عليها القيمه ؟ وراااااااكم علي كل واحد يكسر فيني ): ؟ يقول اصبري يخلص المترو وتخف الناس وسوقي .. طيب لا خلص المترو الله يسلمك بستخدمه ، وش ابي بالسياره اسوقها ؟ ايوه هذا المطلوب : D
- وين البنات وين اللي بيملون شوارع الرياض ؟ رجعت مضطره بخلص لي شغله مهمه بالرياض ورجعت من جديد للقصيم ما شفت الا وحده تسوق .. وكنه تسوق على استحياء بعد .. شكلكم للحين تنتظرون اسمائكم مثلي ، وحابه اقول من هالمنبر لاخي من الجنس الآخر : نعم فيه قائمه وسالفه طويله عريضه .. هذي الشغله الوحيده اللي ممشينكم فيها اسرع منا .. اولويه لكم : D

اكتب هذا الرد الطويل العريض المليء بالمواضيع المختلفه والتي بلا فائده ، وانا حاطه راسي على رجول امي ساره وهي تدفدف راسي وتقول تراي معطيتس وجه ، ولك بتموني على هالرئبه تؤبريني :$
تونا مخلصين من زواج بنت عمي .. يا غثاثة زواجات الحريم ، هم على قلبك لما يخلص .. كيف عاد وانا ممسّكيني الضيافه والحجوزات ؟ يقلع ابو المسؤوليه .. بس ما عليكم بيضتها : D ، صح انها قروشتني برمضان بس تمون عهيد .. الله يهنيها بحياتها الجديده ويهني جميع المتزوجين ويرزق العزابيه
عاد تعرفون حركاتنا يا البنات لازم دراما ودموع ، اختها فاقدتها فبنات عماني مسوين مرابطه ببيت امي ساره حتى اشعار آخر ، امس اخوها يشكي ، يقول خلاص فرقوا شملكم .. ازعجتونا بالليل ما ننام زي الاوادم من اصواتكم واصوات سماعتكم .. نعم هذا ما يحصل اذا تجمعوا بنات ، وواضح ان امي اليوم بتفرق شملهم وتشوف لهم صرفه عشان ازعجوا حبيب قلبها : D
يا الله من فضلك لا اخوان اصيح عليهم ولا يصيحون علي ولا خوات .. مرتاحه ومريّحه : D

بعد كل هذا .. ومستحيه اطلب الصدق ، بس ما يخالف .. الحياه كذا ،
https://sama1os.sarahah.com
اكتبوا لي خططكم للاجازه ، كيف بتستغلونها او وش مخططاتكم .. اقتراحاتكم للافلام وللكتب اللي بتختمونها ، انا الصدق خلصت 3 روايات بس ، محمله لي كم كتاب pdf بس ما قريتهم للاسف .. وخلصت لي كم فيلم من اللست اللي عندي ، عقبال ما انهي اللست كامله

برضه اصحاب الاذواق الحلوه احتاجهم ، ابي اخلص اغراض الجامعه وابي اخذ برايكم بالاشياء اللي بطلبها .. كلموني خاص ، او بصراحه مع شيء اقدر اتواصل معكم فيه ..
وممتنه جدا لكم :$

بقوم ازين لي قهوه اصحصح واقرا لي كتاب يفيدني .. القاكم على خير



 

 

Sama.Os غير متواجد حالياً
Facebook Twitter 0 اضافة رد مع اقتباس
قديم 18-07-2018, 12:23 AM   #8
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه




سلام عليكم .. طابت صباحاتكم ، فيه تطور ؟ فيه تقدم بمخططاتكم ؟ ولا ركود وبس ؟ تذكروا كل هدف بدون خطه هو مجرد امنيه ، والخطه ما تبي لها احد ما يطبقها ويمشي عليها ; )
انا خلصت مسلسل ، وانتصفت بمسلسلين ، وخلصت كم فيلم و3 روايات *ايموجي عضلات *

اني واي ، كانت اطول اسبوعين مرت علي .. وبالنسبه لي ما اقيس طول الايام الا بكمية الاحداث والاشغال اللي فيها ، بعد ما خلصنا من زواج بنت عمي كما ذكرت آنفًا ( قريتها بكتاب والا بقولها ) مسكت معي المدينه .. ادري حر ، وادري وش هالوقت الغبي ، بس والله مسكت معي .. فاتحت امي ساره بالموضوع قبل زواج عهيد باسبوع يمكن .. وما علقت وقته ، قالت خلينا نقضي من زواجه بس .. المشكله مو هنا ، المشكله بعد زواجها بكم يوم عندنا زواج اماراتيين ، كل الدنيا بكفه وهالاماراتيين لحالهم بعيون امي ساره بكفه لحال .. قلت خلاص كنسلي روحة المدينه يا سما ، مصدقه بعد انتي .. صحتني امي من النوم تقول قومي جهزي شنطتس ، قلت وين يا قلبي ؟ قالت بكرى بنروح المدينه ! بسم الله يمه .. صادقه ؟ ليه كبرتس انا العب معتس ؟ تدري اني اقدر اروح للمدينه اي وقت ثاني ، واني ما ابي اروح الحين عشاني ما ابي اتركها ، فقررت تروح معي .. يا كبر قلبك يا سوسو
طبعًا كانت رحله سريعه جدًا ، قعدنا كم يوم ، بس قسم بالله ردّت روحي بشكل .. سبحان اللي عطى المدينه راحه وسكينه ما القاها بأي مكان ثاني ، حجزنا مطله لجهة مصلى النساء عشان اقرب لسوسو ، كانت تصلي العشاء وتاكل اي شيء خفيف وتنام ، بهالوقت انا كنت متكيه بالساحه مع وحده من البنات عرفتها من تويتر .. وشاء الله نلتقي لأول مره وصدفه بالمدينه ، كنت منزله تويته عن المدينه وكلمتني ع طول .. وهنا تكمن ميزة المدينه ومكه "فقط" ، المدينتين الوحيدتين اللي اطلع واجي فيهم بأمان نفسي ، عادي اقعد طول اليوم برى .. كذا سبحان الله امان داخلي نفس امان وسكينة رمضان ، اوكي اهلي مب قايلين شيء .. بس كذا شيئ نفسي ، المهم ونعطيكم احلى تكيه من بعد العشاء الى ما تصحى امي الساعه 1 اروح اجيبها ونرجع نكمل ، نقعد لما الشروق ونفطر مع اهلها وامي ونتفرق ، عاد اقولكم انتعشت روحي هناك لدرجة اني قررت اقص شعري رسميًا ، اوكي شجعتني نوره زود ، بس خلاص قرار شجاع قرار لا رجعه فيه ما ودي اعيد كلمة آنفًا : d ، بس قلت لكم فوق قصة الحب اللي بيننا .. فاللي حصل بعد ما رجعنا من المدينه اخذنا اوف يوم ، بهاليوم رتبنا شنطنا انا وامي ساره اقين وعلى الرياض لابو ظبي .. ( بيننا وبين هالعائله معرفه قديمه ، وماشاء الله امتدت الى الآن ، ما يجون السعوديه الا يجون للقصيم عشان امي ، حتى اي احد يجي الرياض من واجباته يمرني بعد ) ، وصلنا قبل الزواج بيوم بس ما قلنا لهم ، يقال لنا بنرتاح وما نزعجهم ، بس هيهات .. هاتك يا حلوف : D ، والله ما تقعدون بالفندق ، والله تنامون عندنا ، لا عندنا .. عشت حوسة زواج عهيد مره ثانيه الله لا يبارك بالعدو .. قضينا من زواجهم على خير وكنا طالعين انا ووحده من البنات ، قالت سما اكسري الروتين وارجعي بدون شعرك الطويل .. قلت والله ما اردك ، مشينا .. عاد كانت عندي امنيه غبيه ، سويت جديله وقلت قصيها .. هزأتني بعد العامله ، حرام شعرك ومدري ايش .. قلت يا بنت الحلال قصيه بس ، انا ما صدقت اجزم .. وقصينا الجديله ، اوكي فصلت امي علي ، بس مب واجد يعني كانت مستحيه شوي ، ودقت تشتكيني لاحفادها ، شفتوا سما وش هببت ؟ يمه شدعوه تراه قص شعر والله .. بس ما يخالف ، تمونين سوسو تمونين ، عاد اشوفها هاليومين تلعب فيه ، خلاص رضت يعني : D .. بالمناسبه ، ما اخفيكم ان نفسيتي تغيرت اكثر بعد القص تحديدًا ، اوكي المدينه وشوفة الاماراتيين كانوا بوقتهم وعشاني جبت طاريهم ، احب اقول اني احسد نفسي على هالاماراتيين اللي صايرين اكثر من اهل ، بس القص غير .. شيء باقي فيك ، مب كم يوم ويروح ، تفلسفت بتويتر بس ما يمنع اعيد الفلسفه هنا ،



لا تقول الوقت راح ، ما يمدي ، راحت علي .. يمديك ، الحين اجزم .. لا تأجل اكثر ولا تماطل اكثر ..
اي شيء يضايقك ابعد عنه ، اي شيء ينرفزك ، يكدر خاطرك ، حتى لو كان شخص .. اسحب عليه ، بتعيش مره وحده ، لا تخلي هالحياه ضيق لك ، ترى والله الدنيا ابسط واتفه من كذا .. انت وحدك قادر تحدد كيف بتكون حياتك ، تذكر هالشيء وحطه قدام عيونك دائمًا .. اما تكون صديق نفسك .. او عدوها !

قاعدين نجهز لتخرج بنت عمي بس ننتظر اختها تجي من شهر العسل على خير ، الحفله ما يعرف عنها حاليًا الا اخوانها وعروستنا بس ، مشكله لو بس وحده تعرف بنروح فيها ، بيزلّ لسانها وخلاص تعرف الخريجه وما صار فيه اي مفاجأه بالموضوع ، عاد من واقع تجربه .. وبحكم اني اقفطهم دايم بمفاجآتهم لي .. ما فيه اجمل من انك تتفاجأ ، بغض النظر كان الشيء كبير ولا صغير .. شعور المفاجأه هذا جدًا حلو ، وللاسف اني وحده بثره مرررره .. القطها وهي طايره فما يمديهم يسوون شيء حلو لي بكل اسف وحزن ، شغلتي اصوّر لحظة التفاجئ او اصير اللي تجيبهم لقلب الحدث بدون ما يشكّون او يحطون ببالهم ان فيه مفاجأه ،
مشكلتي مو بالتجهيز ، مشكلتي اشيل هم لما يخلص الشيء .. ابيه يخلص وارتاح ، كذا احس بمسؤوليه ورغبه بالخلاص فقط : D
ما شاء الله مناسباتنا هالسنه واجد ، ولادات وزواجات وتخرجات وملكه بعد .. الله يجعلها دايمه ، وعؤبال عندكم جميعًا
وبهالمناسبه ، اي خدمه تحتاجونها بهالخصوص ام هير .. لا تستحون ; )

- كنتوا كريمين جدًا بالتقييم او بصراحه ، اعجز عن شكركم وتعبير امتناني الكبير لكم ..
الناس السبيشل بالنسبه لي اللي يسحبون علي وعلى سواليفي ويدعون لاسامه او حتى لامي ساره .. جبتوا راسي



 

 

Sama.Os غير متواجد حالياً
Facebook Twitter 1 اضافة رد مع اقتباس
قديم 16-08-2018, 12:57 PM   #9
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه


جوي ياخي جوي : (



 

 

Sama.Os غير متواجد حالياً
Facebook Twitter 0 اضافة رد مع اقتباس
قديم 15-09-2018, 04:39 PM   #10
Sama.Os
عضو نشيط
Sama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحبSama.Os فوق  هام السحب
رد : اُعتمت الـ "سما" برحيل اسامه


ميس يو قايز



 

 

Sama.Os غير متواجد حالياً
Facebook Twitter 0 اضافة رد مع اقتباس
إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح

الإنتقال السريع


الوقت المعتمد في المنتدى بتوقيت جرينتش +3.
الوقت الان » 03:08 AM.

الأن حمل تطبيق منتديات الإقلاع
 

تنبيه : كل ما يطرح من مشاركات يمثل رأي كاتبه ولا يمثل رأي إدارة الموقع

ترقية وتطوير » تحميل دوت كوم
Powered by: vBulletin Version 3.8.11
Copyright ©1999 - 2018, Jelsoft Enterprises Ltd.
جميع الحقوق محفوظة منتديات الإقلاع - شبكة الإقلاع -1999-2017