[10969taka]

أصدقائي

الأوفياء .. الخونه !

[10969taka]

11 / 1

مساء الخيرات ‘
أخر تدوينه كانت قبل 41 يوم ’
طبعا للأسف صار دي الفتره إني خبصت نظامي جدا
كنت ملتزمه شهر تقريبا
رغم أنو ما يعتبر إلتزام كامل زي ما ذكرت أول في المدونه
لكن نقصت وقتها 3 كيلو ولأنو نظام غذائي معاه رياضه
فَ اللي صار أنو الثلاث كيلو دي كانت جدا واضحه في الملابس
إشياء كنت ألبسها بدايه زواجي ضيقه طلعت عليا تجنن
أنو جسمي صار أحسن حتى من قبل حملي !
بس عاد أختكم في الله دماغها تبن < مقهوره من نفسي
وبعد دا النجاح الهائل جا أسبوع عمليه بنتي ونفسيتي شويه
سيئه وَ بدأت أخبص خلصنا عمليه وأنا لسى أخبص
خاصه أنو الكيلوات ما رجعت على طول ‘
بس اللي قتلني دي الفتره القولون
ممكن لأنو أرتاح من نظامي السيء في الأكل لفتره
وبعدها رجعت أفتريت في اللأكل الحار خاصَه
فَ صارت تجيني تشنجات لدرجه حتى ما أقدر أطلع مشاوير قصيره
ودا الشيء دخلني في حاله أقرب للإكتئاب

إلى الآن أحاول أعالج نفسيتي من دا الأثر السلبي اللي لقيتو بعد التخبيص
عانيت من القولون إسبوعين ولا زلت أعاني حتى اليوم
أي ضغط أو خروج من البيت أنا بطني تتعب ..

ما بَ أقول إني راح أرجع ألتزم من اليوم لأني كذابه في وجهي لسى
العزيمه مو نفسها اللي كانت قبل لا أبدأ الشهر الذهبي اللي قبل فتره
وكل يوم أدخل أقرأ عن القولون لأنو جدا مأثر على نفسيتي
ونفسيتي تأثر عليه < دوامه القولون السودا *

أرجو من الله إني أقدر أرجع ألتزم بنظام صحي من جديد ,
وأول ما ح أرجع أن شاء الله حَ أسجل دا الشيء في مدونتي دي
لأنها ساعدتني قبل زواجي أني أنقص تقريبا 4 كيلو
وكان وقتها على تخفيف أكل و مشي بَس ..


دي الأشياء البشعه اللي صارت قبل نهايه 2017 *

أما الأشياء الجميله قبل نهايه 2017
في إنسانه جدا لطيفه قرأت مدونتي وقيمتني تقييم جدا حبيته
أتمنى أنها تشوف دي التدوينه وأحب أقول أنو لمن قريت كلامها الإبتسامه شقت وجهي شقق
C A R L S لوف يو يا فتاه ع كلامك الحلو

وَ كمان رجعت أرسم رغم بس طبعا رسمي يُعتبر copy
لأني لازم أشوف شيء قدامي وأقلده لسى ما وصلت للإحتراف اللي
يجيب لي إلهام وأرسمه ‘
دا رابط آخر رسمه في 2017
http://www.vb.eqla3.com/attachment.p...5&d=1515668666

[10969taka]

29 | 1

أول شيء شكرا على الحُب اللي بيوصلني سواء في التقييم أو ع الأسك
كل ما أفكر أترك المدونه الأقي كلام لطيف يخليني
أرجع أشارككم مشاعري هنا *

دي الفتره للأسف مش ورديه كفايه للمشاركه
أحس حياتي محتاجه أنطلاقه جديده ‘

+ أنا إنسانه بسيطه جدا على باب الله أتمنى لو
يعطيني النور و الباور عشان أكون شخص مميز
فكره التمييز دي تؤرقني كثير لدرجه الوسوسه و الإكتئاب
وبمناسبه الحديث عن الإكتئاب مرات كثير أشخص حالتي على إني مكتئبه
لكن ما أعرف كيف أخرج من دي الحفره
مرات أمارس الكتابه - مرات أتفرج أفلام - مرات أسمع أغاني
وأخيرا حاولت أطلب المساعده بس مو من أحد متخصص
لأن الوصول لشخص متخصص صعب ’

لكن الحال أنو الشعور يختفي لفتره ولمن أتوقع أني أتخلصت منه للأبد يطلع لي من جديد ويحاصرني

شاركت دي المعلومه عشان ممكن أحد يحس نفس ما أحس
بس ما عنده الشجاعه الكافيه أنه يصارح نفسه بدي الحقيقه
أنا أعترف فيها هنا وأتمنى في يوم زي ما لقيت الشجاعه
إني أكتب دا الكلام إني أكتب لكم إني تجاوزت
دا الألم

[10969taka]

في سالفه بَ أحكيها لكم
حصلت معاي السمستر اللي فات ‘
أول مرا أقابل إنسانه وأحس أنو يا لطيييف إيش دي النفس الشينه أعوذ بالله !
طببعا أنا أدرس في جامعه ما أداوم الا وقت الإختبارات
ف المهم كنت أداوم 3 أسابيع الإختبارات
وأنا كرشتي قدامي كنت وقتها في الشهر الثامن

المهم إلا في يوم كدا وأنا أنتظر سيارتي جات وحده ما أعرفها إلا تسألني
عن إختباري وكدا < تبغى تسولف وأنا أعطيتها مجال
وقتها كنت مبتسمه و متفائله و الجو لطيف الحمد لله وإختباري كان جميل
إلا شويا تقول دحين إنتي حامل صح ؟
أنا : أيوا < في مخي أقول كرشتي أصلا واضحه ما يحتاج ذكاء ههه
إلا تسألني عن زوجي وأنا من النوع اللي
مرات أتجرجر بالكلام بسهوله
يمكن لأن عندي قناعه أن الناس كلهمم كويسين
فَ أكون خبله مرات أعترف
إلا عرفت أنو زوجي عنده الجنسيه سعودي
بس في الأصل كان أهله وأجداده مو من السعوديه
وتقول كيف أهلك وافقوو ؟
أنا : أوك وافقو عادي لأنو سعودي وأبوه سعودي .
إلا تقول : أنا خطبني واحد بس عشان مو سعودي أهلي ما وافقو وأنا كنت أبغاه
< المشكله تقولها وهيا تطالع نظره كأنها بتاكلني !!!! سلامات إيش سويت لك أنا !!

أنا هنا بديت أخذ بريك حياتي وأضغط فرامل لأن الأخت واااضح جدا
أنها ماخذه موقف وَ بتطلع عقدتها عليا
إلا قلت لها بكل براءه يعني عادي عيالك يطلعو مو سعوديين ؟
طبعا أنا ما قصدي اقلل من أي أحد بس
معروف أي شخص في أي بلد قوته أنه يكون عايش في البلد دي
ك مواطن لها مو كمواطن لدوله غير إلا رجعت تقول عادي و الشرر يتطاير
من عيونها < طيب يا بنتي مو أنا اللي وقفت زواجك والله ليه دا الحقد


إلا شويا تسألني فين ساكنه عطيتها أسم حي أهلي إلا تقول أوه
يعني كم راتب زوجك دامه مسكنك هنا ؟ < أيش دخلك
- ما أعرف كم راتبه
- إيش أسم الشركه اللي يشتغل فيها
- ما أعرف نسيت إسمها
- فين سويتي زواجك ؟
- في جده < عاد هنا أستعبطت عارفه قصدها على القاعه
مدري الأخت بدأت تحلل حاله زوجي الماديه المشكله الزق دوبي قابلتها
باقي شويا تدخل جوا ملابسي من اللقافه !

إلا تسألني عندك صور لزواجك في الجوال ؟
طبعا أنا ما عندي صور بس إلا مقاطع فيديو لكل شيء
بس معصي تشوفها يكفي طول الوقت تتكلم وكأني سارقه حلال أهلها
قلت صور كيف يعني وتقول فجوالك ما أتصورتي يوم الزواج
قلت لا بس عندي ألبوم طبعا

لا وطول الوقت تشمق في الرايح و الجاي غير أنها سبت في وحده
وهيا ما تعرفها و لسانها أعوذ بالله كأنه سم والله
أنا أول مرا فحياتي أقابل أحد بذا الشكل وحكيت لماما
وخاصمتني لأني قلت لها أسم عائله زوجي في البدايه
قبل لا أكتشف أسلوبها بس كانت زي الدرس ليا أني أنتبه في الكلام مع أي أحد
وربي وقتها كان كل اللي أبغاه أنو سيارتي تجي بسرعه
أصلا صرت ألعب في الجوال ومطنشتها عشان لا تتكلم زياده
وتغثني ‘ للأمانه أحس لو أنها صديقتي
وأتزوجت بأسحب عليها لأنها من النوع اللي يخوف إدا دا كله سوته في قعده ما كملت ربع ساعه كيف أضمن وحده زيها تدخل حياتي !

[10969taka]

2 / 6 / 2018
صباح الخيرات

بكرا إن شاء الله عندي موعد مع صديقتي من 11 سنه تقريبا
وَ ليا حدود السَنه ما قابلتها جدا مبسوطه
بس الغبار اللي في المجالس نكد عليا و تعب ظهري
> دا اللي يصير لمن تكون شخص أنطوائي ولا تعزم أحد

أخر مره أحد دخل بيتي كان في العيد
ووقتها كنت في الشهر التاسع يعني مدللـه لا كرف ولا تنظيف
كلو عَ الشغاله

المهم أكلمك في فتره إستراحه المُحارب < على بال تنشف الأرضيه
لسى ورايا كرف الله يعين لا أستقبلها بكرا ووجهي مفقع
من السهر

[10969taka]

7 // 2

أكتشفت أنو في الإقلاع فيه قسم لجامعتي أههخ
بسم الله مدري كيف ما شفته طول دي الفتره


ليا يومين دخلت في نقاش شبه عقيم في قسم المششاكل الزوجيه
و لقيت لي أول تقييم سالب لي في مسيرتي الإقلاعيه
من واحد يقول

إقتباس »

يا بزر المكان مب لك

!!

للأمانه كان فيه تقيممات إيجابيه كمان بس ضحكني التقييم دا ‘
يعني حتى لو بزر فَ بزر متزوجه حتشارك غصبا عنك

اليوم كان جميل صحيت بدري على الفجر ولأول مرا قررت أشرب قهوه تركي
رغم إني جربتها قبل ولا دخلت مزاجي بس صديقتي فتحت نفسي
إني أعطيها فرصه ثانيه حسيت إني ممكن أتقبلها أكثر لمن أبدا
نظام صحي وأستمتع بالأشياء اللي من غير سكر

إن شاء الله قريب طفشت وأنا أأجل دي الفكره وأخبص في الأكل و النوم و الحياه

[10969taka]

صباح الفُل عَ الكُل ..
خلوني أتفلسف لكم شويه عن هوايه الرسم اللي كنت أحبها من طفولتي
حتى مرحله المتوسط ‘ طبعا أنا من المغرمين
بَ الإنمي حتى وقت قريب خف الموضوع
فَ كانت هوايتي إني أرسم الشخصيات اللي أحبها خاصه عيونهم
كان الإنمي يبدأ وأنا أحاول أحفظ ملامح الشخصيه عشان أرسمها
ومرات أمسك الكراسه وَ الإنمي شغال وأرسم

حتى مرحله المتوسط لمن بدأت أدخل لعالم النت فَ صار سهل
أوقف اللقطه وأحاول أرسمم ..
بس فجأه صدمني شخص جدا قريب عليا أن الرسم حرام
وأن الله حيقول لي خليها تعيش معرف إيه ومن دا الكلام المرعب فَ تركت الرسم

حتى وقت قريب جدا ,
يعني حدود العشر سنين من عمري وأنا تاركه شيء أحبه
بسبب الرعب اللي أتقال لي عن الرسم ‘
العشره سنين دي كانت كفيله تخلي رسمي
يوصل لمرحله جدا متقدمَه لكن أنا غلطانه إني كنت أسمع لهم


دحين بَ أشرفكم برسمه هذا الصباح الخايسه المليانه أغلاط

*
أمنيتي أصير زي الرسامين الرايقين اللي يقعدو ع الرسمه من 4 ساعات
وأكثر بدون ما يزهقو ويركزو ع التفاصيل بس حدي ساعه بالكثييير ‘
كمانا بنتي الله يحفظها لازم تعمل فواصل تخليني الوضع شخمطه
وخلاص قفل عَ الرسمه

[10969taka]

12 / 2
صباحو بعد منتصف الليل ‘
يا جماعَه أنا عندي لعبه عَ ال ps4 منرفزتني
وطايحه عَ وجهي عندها لعبه Fortnite

فكرتها أنو تدخلي مَع 100 لاعب أون لاين وأخر واحد يبقى هوا الفايز
أنا أتنرفز لأني ع طول أنقتل التصويب عندي سيء
* أتربش وأضيع الأزرار في يد التحكم *
من أمس وأنا أحاول أقتل لاعب واحد ع الأقل
والحمد لله قتلت كم واحد بس غدرات ههه
أما وجه لوجه ما قتلت إلا وحده بعد كفاح طويل

نورتي عاد أنا احب قسم المدونات وأحب أعمل الكوفي وأروق عليه
فَ أنو يتعمل كوب كوفي عششان مدونتي بس
دا شرف كبير ليا ‘ تعالي كل يوم






أنا سمعت أكثر من رأي أن الرسم مثلا لو أجزاء من الجسم مو مكتمله
زي الوجه لحالو وكدا فَ هي جائزه و رسم الأنمي ( الكرتوني ) جائز
وأن التحريم سببه مضاهاه خلق الله
و البعض قال المقصود النحت
فَ أنا من أول مو مقتنعه أن الرسم حرام
واللي خلاني أوقف الخوف بس من غير قناعه
فلو أستفتيت قلبي فَ أنا مع الرأي اللي بيقول أنه جائز
شكرا ع مرورك

[10969taka]

Ask me *
https://ask.fm/askseeen


عِش من أجل نفسك
أدر ظهرك لكل من لا يستحقك
فلا غياب إلا غياب راحتك ‘ ولا فقد إلا فقد ذاتك ..

[10969taka]

13 \ 2


أعظم تخبيصات الأكل عندي تحصل في حالتين
لمن أروح بيت أهلي ‘ لمن أكون لوحدي في البيت ليلا ‘
لدرجه عندي إستعداد أقوم وَ أطبخ حاجات كلها زيت وكالوريز
من مكرونه لبطاطس مقليه لفرينش توست أو شيبسات لكل دي الحاجات
الفضيعه جدا ‘

* معرفه المشكله نصف الحل *
في مخي فيه كم حل لدي الحاله لو ألتزمت فيها راح
أرجع أكتب هنا إن شاء الله

المهم لسَى إدمان لعبه
Fortnite
مستمر معايا دا الأسبوع
أبشركم بدأ لعبي يتحسن بنسبه 5% تقريبا