نظامي نباتي
افطرت اليوم تمر بجوز الهند مع زبدة اللوز + ماء
بعد ماصليت سلطة مع مخمر الملفوف + مكرونة القمح الكامل مع فول الازوكي
بعد التراويح بشوي نمت وقمت الساعه ١ وشربت سموذي موز وحليب جوز الهند والارز الاسمر
وشوية مكسرات حب شمسي وعين الجمل
الرسالة الأصلية كتبت بواسطة Farah85 »
الله يعطيك العافية وسجليني معاكم
بس حبيت أرد ع الأخت منطقة البطن تُعتبر تجمع للسكريات ، كل ماقطعتي السكريات كل مانحف بطنك بسهولة ، وأقصد السكريات بأنواعها غازيات وحلويات وأي وجبة تدخل فيها السكر مثل المعجنات ،الخبز
وأحلى شي ان أول ماتقطعينه وتكثرين موية كل ماتشوفين النتيجة سريعة بفرق أسبوع
.
إضـاءة توعويـة 💛 /
أهلينَ فيج حبيبتي ،
الكلام إلي قلتيـه صحيح ، لكن فهمجَ شوي مختلف فخليني أشرحلج بشكل أوسع ،
باختصـار ليش أطلب منكم / العمر و الوزن و الطول + الحالـة الرياضـيـة ؟
لأنها تحدد احتيـاجاتج اليـوميـة ،
نقول أنا احتيـاجاتي 2000 كالوري إذا مارست الرياضـة يوميـاً ، لكنها
تقل إذا الإسبوع إلي بعـده ما سويت أي رياضـة ، تصير 1700 مثلاً ، فجـأة أشوف
نفسي زايـدة ، شو استوى ؟
لأني مشيت على نظـام 2000 كالوري ، بس آنـا ما أسوي رياضـة ،
فكل 300 كالوري زيـادة تستوي دهون ، لا تعورون مخكم بالرياضيـات هذا مب هدفنـا ،
لكن المفهوم مجرد ما تتخطين احتيـاجاتج من الأكل على طـول رحً يصـير دهون ،
كان هالشيء نشويـات / دهون / أو حتى بروتين ( دجاج / لحم ) ، لكن ليش
في البطن مب في الفخذ ؟ لأنه جسمج قابليتـه للتخزين في هالمنطقـة أكثر عن باقي الأماكن
هل هـو لأني شكلي غلط ؟ لا ، لأن تشكليـة جسمج جيـه ،
يعني أنـا كمثـال ، مهمـا كليت من النشويـات ، زيـادتي تكون في بطني بشكل عام
بديهي مع زيـادة الوزن ، لكن ما شاء الله تبارك الرحمن على فخذي ، لـه نصيب الأسد في
التخزين ، بسرعـة أعرف أني لاعبـة في الدنيـا ،
كيف ممكن أحمي جمسي من هالشيء ؟
كلي بشكل متـوازن + ركزي في الرياضـة على هالمنطقـة و بشكل عام
الجسم كامل ، كل عضلـة في جسمج ، و راح ياخذ وقت ، شهر ما يكفي ، لكن
شيء جميل كبدايـة ، مجرد أنج تقرين الكلام إلي أنا أكتبـه و حابة تتغيرين ، إنتي أكثر
من جاهزة ، باقي تبدين فعل بسَ ؟
وصلت النقـطة بنـات ؟
فرحً سعيـدة جداً بوجودج ،
و شكراً على المداخلـة الجميلـة ،
نتريـا أكثر
أول تطبيق لكم ،
شو هي المنطـقة إلي قابلـيـة الخزين عندج عاليـة فيها ؟
الأسبـاب التي تخلي هالمنطقـة بالذات تزيـد ؟
كيف تغيرين نظـامج عشان تقللين من الدهون في المنطقـة ؟
مثـال للجواب / الفخـذ ،
الأسبـاب / البـاستـا البيـضا ، البـطاطـا المقليـة ، الشوكلت ، الأشبـاس
( أشيـاء إنتي تحبينها و تاكلينها بشكل غير متورازن / 4 شبس في اليوم )
تغيير النـظام ،
الحد من البـاستـا إلي يومين في الإسبوع ،
استبدال القلي بالشوي / بطـاطا مشويـة مع بقدونس و ثـوم ،
الشوكلت / مرتين في الإسبوع ــ Dark chocolate
الأشبـاس / الحد منها بالتدريج ، إلى أن تصل مرة في الإسبوع ،
( و يعتمد على حسب الزيـادة في الوزن هل هي كيلوين أو 3 / هل هي 20
كليـو و لازهم هنيـه نمنع )
المـكان مكانـكم ،
أبغي أشوف إجـابـات و تفـاعل ،
بنبـدأ على حسب شو تحتـاجون من المعلومـات
ركزوا على آخر نقطـة ، كيف تساعدين نفسج و أبا برد على
الكل بدون استثنـاء
إلي عدالهم قلب ، حدثـوا بفطورهم عشـان جيـه
قلوب قد الدنيـا و لي رجعـة للكل ، تعبوني شوي و أنا أرد عليكم
نزلت أول إضـاءة / أبغي أشوف أجوبـة + نظـام أكلكم لين ألحين و تقبل
الله طاعتكم ،
طموح فتـاة / إذا جد مستعدة تعطينـا من وقتج
و أي شيء ينفع البنـات أنا بسويـه / شوفي أنا حاليـاً أدرس
تدريب رياضي لكن واثقـة أنا عندج معلومات بحتاجها و أنا و كل
البنـات ، كلميني عشـان أقدر أرتب ويـاج نظـام ينفع للكل ،
مبارك عليك الشهر حبيبتي شيخه ومبروك الافتتاح
يسعدني اشارك بالموضوع
وزني 64 وطولي 157 وعمري 26
احب انقص من وزني طبعا
امس اول يوم رمضان اكلي كله صحي لكن ماسويت رياضه انشغلت لاني كنت طالعه للسوق ولاحصلت وقت للرياضه بس ان شاء الله اليوم اسوي
وطبعا اكلي اليوم راح يكون نفس أمس وهو عباره عن :
فطور ماء موزه مع ملعقه صغيره زبده فول سوداني ولبن وتمره وحده و3 حبات مكسرات لوز غير مملحه .
بعد الفطور بشوي اشرب لي قهوه ..
احسب ساعتين وأبدأ بوجبتي الأساسيه الساعه 9 ونص وهي 60 غرام رز ابيض . وصدر دجاج كامل مشوي وبروكلي مسلوق. بعدها بساعتين اخذ لي شاي بنعناع ونص قطعه بروتين بار .
والساعه 2 أبدأ السحور ويكون 3 ملاعق شوفان مطبوخ بحليب وشويه سكر ستيفيا وقرفه وقطع صغيره من دارك شوكلت فوقه وملعقه وحده كورن فليكس فيتنس عشان النكهه . وبس هذا سحوري مع ماء كثير
وش رايك شيخه كذا تمام اكلي ؟؟؟
انا مااشتهي افطر كثير لاني ماحب اكون ثقيله بعد الفطور
لو قللت الاكل احس بنشااط وطااقه. مااكل سمبوسه ولا معجنات .حتى لو صحيه تسبب ثقل ..
الطول : 153
الوزن : 55.3
الوزن المطلوب : 50
العمر: 21
الرياضة: مستمرة بتمارين أطبقها يوميا ما بين 30 - 40 دقيقة
بصراحة هالرمضان الحمدلله أمي كثير مشجعتنا ع نظام صحي غير عن الرمضانات الماضية
فطوري أمس : تمر وكوب لبن ، ومن بعدالصلاة حبتين سمبوسة وقطعة كيكة مع سلطة فواكه
والسحور : حبة موزة مع مشمش
وبالنسبة لليوم الفطور : تمر ولبن بسس هالمرة اضفت معه فطيرة بيض مع طماط وخيار
عشان بعد التراويح راح يكون فيه رز مع دجاج
والحمدلله جد م أحس أن بطني شبعان أو أكلت أكثر من حدّي أحس بخفة ولله الحمد
وبالنسبة للتمارين أنا من شهر أسوي تمارين رياضيه من برنامج عاليوتيوب
وهدفي فيه الأساسي أن أقلل من الشحوم اللي بالفخذ وأسفل البطن
لأن هالمنطقتين الوحيدات اللي مخربات جسمي وقاعدة أحاول بهالتمارين أن أحرق الدهون الموجودة فيها
أمس مارست التمارين قبل الفطور بنص ساعه
واليوم عشان موعد *الدورة الشهريه*
مارستها الظهر كان لأول مرة أتمرن تمارين Hiit حرقت فيها 1000 كالوري
وان شاء الله نواصل الهمة ونخرج من هالشهر وكلنا نكون حققنا أهدافنا
وبأجسام سليمة وصحية
الرسالة الأصلية كتبت بواسطة طموح فتاه..! »
اهلا انا بحكم تخصصي علم حركه ممكن اساعد بالتمارين الرياضيه للي حاب
اختي بسالك هل لازم اخذ راحه يوم بعد التمارين ؟؟
لاني مره فتحت فديو وشفت وحده تتكلم عن التمارين الاثقال
يوم يكون للجزء العلوي ويوم تمارين الجزء السفلي بعدها يوم راحه لازم
على قولتها اذا خذت يوم راحه ترتخي العضلات شوي ثم نكرره باليوم الي بعده ترجع تنشد اكثر من قبل..
ابي اعرف هل هالطريقه صحيحه ؟؟؟
مرحبا بكم. الله يسعدك مثل ما تسعدينا ماني هارفه ايش اسوي
ببلش بسحور امس كان نص صدر دجاج مشوي باستا بس قد كف اليد ومسلوقه
الرياضه للاسف ما سويت امس كنت مرهقه
............اليوم ثاني يوم برمضان
الفطور صحن شوربه شوفان
سمبوسه مشويه
عصير برتقال بدون سكر صنع يدي
وعلبه مويه طبعا انا ما اكل تمر
،،،،،،،،
المنطقه التي يتركز عندي الدهون
الفخذ + البطن = سكريات وزيوت كنت افرط فيها
والان نظامي انه الغي السكريات والدهون والغازيات
وتقليل المعجنات بنسبه ثلاث سمبوسه في اليوم مشويه او محمره
.....
التمارين راح امشي نص ساعه او ساعه وبحاول العب رياضه
الرسالة الأصلية كتبت بواسطة خجل ,, »
باْذن الله معاكم
بخصوص الجسم انا ابي أشده اكثر ما انه انحف
وش الرياضه المناسبه لهل الشي
وهل المشي فعليا يشد الجسم
احتاج انه جسمي ينششششد 😢💔
هالأيام ولله الحمد احاول باكبر قدر ممكن اكثر مويه وتحسنت
للامانه بهالشي وهالشي مسعدني
وشكرا لهل الموضوع الجميل الي راح يساعد الكل ♥
.
بينشـد أبداً لا تحاتين ،
شوفي للأمـانة المشي ماله تأثير قوي ، الأغلب يظنون أن هذا هو أفضل
نوع من الريـاضة ، لكن هو ينفع للي أبداً لياقتهم صفر ، بس إنتي بديتي في نادي ،
و جسمج بدا يتحسنً و هذا هـو المهم ،
كبدايـة للثلاث الأيام اليـايـة ، نجرب هالنظـام ،
إذا تمـام نكمل للأخير و مع مشي سريع قد ما تقدرين /
الثلاث أيـام كلها / 10 دقايق jogging
10 دقايق درج أو steps ،
باختصـار تختارين أي نوعين من تمارين الكـارديو ،
و توزعينها 10 دقايق و عشر دقايق ، أو التمرين الأول 20 دقيقة
و التمرين الثاني عشرين دقيـقة و تبدين توزعين لمدة 4 أيـام ،
اختي بسالك هل لازم اخذ راحه يوم بعد التمارين ؟؟
لاني مره فتحت فديو وشفت وحده تتكلم عن التمارين الاثقال
يوم يكون للجزء العلوي ويوم تمارين الجزء السفلي بعدها يوم راحه لازم
على قولتها اذا خذت يوم راحه ترتخي العضلات شوي ثم نكرره باليوم الي بعده ترجع تنشد اكثر من قبل..
ابي اعرف هل هالطريقه صحيحه ؟؟؟
،
شوفيَ ، التمارين أهم شيء ، ما تمرنين عضلتين مع بعض ،
يعني إذا مرنتي الساق يوم ، اليوم إلي عقبـه بطن ، إلي بعده يد ، وجيـه عشان
تعطين الفرصـة لكل عضلـة ترتاح ، أما بخصوص هالشيء ، رح أتأكد و أرد
عليـج ، بس لازم تاخذين راحـة على الأقل يوم في الإسبوع بتزيد بالهطريقة كفاءة
التمرين ،
اخر تعديل كان بواسطة » Shak في يوم » 19-05-2018 عند الساعة » 05:39 PM.
، بسرعـة أعرف أني لاعبـة في الدنيـا 
، 
الوضع العادي
