منتديات شبكة الإقلاع ®


الصفحة الرئيسية البحث انظمة شبكة الإقلاع سوق الاقلاع عضويات التميز (الذهبية والفضية والتجارية) جوال الإقلاع حمل صورك من هنا من خلال فتح موضوع خاص بك
بوابة الأنباء ieqla3 اختصر روابطك من هنا البرامج اعلن معنا حساب الشبكة في موقع تويتر اعلن معنا
العودة   منتديات شبكة الإقلاع ® > المنتديات الإجتماعية > عيادة الإقلاع للاستشارات النفسية و الاجتماعية
التسجيل التقويم التأشير على جميع الاقسام بالمشاهدة



 الاستمارة هنا


إضافة رد
 
أدوات الموضوع طريقة عرض الموضوع
قديم 21-05-2019, 05:08 AM   #1
مايؤرقنا
إدارة المنتدى
 
الصورة الرمزية الخاصة بـ مايؤرقنا
مايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحب
هل طريقنا مسدود ؟

البيانات الشخصيّة:


‎العمر : 30
‎الجنس : ( أنثى )
‎مكان الإقامة : ( الرياض)
‎الحاله الاجتماعيه : ( متزوجة )
‎اذا كنت متزوج مدة الزواج : 5 سنوات
‎اذا كنت متزوج عمر الشريك وتعليمة : 35 - ثانوي
‎وجود اطفال من عدمه : لايوجد
‎طبيعة العلاقه بين الزوجين ( غير مستقرة )
‎مصدر الدخل : ( وظيفة )
‎الحالة المادية : (متوسطة )
‎المستوى التعليمي : دراسات عليا



تزوجت قبل خمس سنوات وإلى الآن ربي مارزقنا بأطفال، زوجي سبق له الزواج وزواجه الأول مادام أسبوع وانفصل بحجة أنه ما ارتاح أبدا. من وقت تملكنا وبداية زواجنا كان دائما يسألني أنتي مرتاحة معي؟ إذا مو مرتاحة ترى عادي ومن هالكلام. كنت أرد بإيه مرتاحة بس من داخلي ومن أول تواصل بيننا بعد الملكة جاني إحساس خفي إن احنا مانصلح لبعض لكن تجاهلته واعتبرته من الخوف وطبيعي رغم ذلك استمر الإحساس طول هالسنوات يخفت ويظهر..

بالبداية أنا شخصية هادية وخجولة ومسالمة جدا ما أحب المشاكل واعترف إن هذي سلبية أحيانا مو ميزة، زوجي العكس تماما جرئ ومنطلق ومرح ومحبوب بس دمه حار ما يسكت على حقه أبد حتى لو توصل مد اليد -وتوصل كثير-. في البداية جذبتني شخصيته كثير بحكم إنه مناقض لشخصيتي وللبيئة اللي عشت فيها.

بتكلم عن مواقفه معي من البداية واعتذر عالإطالة والتفاصيل مقدما لكن عشان تستوعبون كيف تفكيره وشخصيته. حاولت قد ما أقدر أكون حيادية وما اتحيز لنفسي.

من ثاني يوم زواج حرفيا ثاني يوم لبست عباتي بنطلع وهو مجرد ناظرني بس عصّب مرة وقال ماتطلعين معي بهالشكل! وخبط بالباب ورجع بعد نص ساعة معه نقاب "أستر في نظره من نقابي" وقال البسيه. قاومت شوي بس وقتها الخوف وخجل العروس ورهبة الموقف خلتني البسه وسكت وكملنا الوضع عادي (للعلم عبايتي سوداء سادة وطرحة ونقاب زي أي امرأة طبيعية والنقاش هنا مو عن الحجاب لكن عشان أوضح لكم تفكيره)

أول ليلة بشهر العسل لما سافرنا مزحت مزحة بسيطة وفهمها غلط وعصّب قال لي تبين نرجع للرياض ترى الحين احجز! سكت برضو وجلسنا نص السفرة وهو كذا يزعل على أشياء من مخه ونروح نتمشى ما نكلم بعض. (للأمانة كانت العلاقة الجنسية لسا ماضبطت معنا بسبب خوفي فكنت أقول بنفسي يمكن هذا مبرر لتصرفاته)

وبشهر العسل بعد اكتشفت انه يدخن مع إنه كان من أول شروطي زوج ما يدخن وسألنا وقلنا لأهله كثير عن هالشرط وكانوا ينكرون هالشيء وهو ينكر بحجة إنه كان وقتها بس يشيش! أنا أكره الدخان وريحته بطريقة غير طبيعية، وحاولت معه كثير -بالحسنى- انه يتركه وفعلا يتركه كم شهر بس يرجع له أقوى. وللأسف هو يدخن بشرااهة جدا وهالتدخين مسبب له مشاكل صحية ثانية ودايم الأطباء يهاوشونه لكن هو حتى العلاجات يرفض ياكلها ولو اخذ يأخذ أسبوع ويوقف، عنده سكر وما ياخذ حبوب المنظم ولا يهتم بأكله باختصار إنسان مطنش وما عنده أي رغبة بالتغيير أو التحسين.. (هذا الموضوع بالذات يكسر ظهري لأني ما اتخيل أبد أجيب أطفال أبوهم يدخن 24 ساعة همه متعته وبس، أدري بتقولون نص الشعب مدخن لكن أنا شخصيا عندي عقد كثيرة من موضوع الدخان وما أقدر اتقبله أبد)


المهم، رجعنا من شهر العسل بعدين طلب مني أغيّر عبايتي لشكل ثاني، رفضت بحكم إنه يدري عن عبايتي من وقت الملكة وما قال شيء، حاول كثيييير وجادل كثير ومرة اشتراها لي غصب ورفضت البسها، قام عصب مرة وشبّ فيها النار ورماها عليّ وأنا جالسة أبكي، كسر كاس كان موجود بطريقه وطلع وخلاني مع إني كنت معزومة عند أهله عزيمة على شرفي لكن صرّفهم وقال تعبانة.. بس استمريت على رفضي الين رضخ بعدها وماصار يجيب طاري هالموضوع أبد.


بعدها بكم شهر كننا طالعين بمحل شاورني في حاجة وما سمعته والتفت اشوف شيء ثاني الا يضربني بيده بقوة على كتفي كذا علنًا. والسبب إنه كان يحسبني سافهته وملتفته على العامل اناظره! حتى لما طلعت وركبت السيارة صادة وساكتة كان يقول ليه ما تسولفين انا ماطلعتك عشان تسكتين! وعصّب وصار يسرع لما وصلنا البيت رحت الغرفة جلست أبكي بعدين جا واعتذر مني وبرضو مشيّتها له!


هذا الموقف والمواقف اللي بتجي عقب لا تسألوني ليه سكت ومشيّتها له لأني أنا نفسي الحين مدري ليه وودي أذبح نفسي وأنا بس جالسة أتذكر. لكن كنت دايما أفكر إن الحياة الزوجية تبي صبر وهذه أكيد طفّته ببداية الزواج وبعدين بيعرفني صح ويقدّرني لكن للأسف..

بالإضافة لهذا كل مرة نطلع مع بعض طول الطلعة تكون عبارة عن اسحبي نقابك عدلي عبايتك عدلي وقفتك، مع إن مافيه أي شيء يتعدل وأنا شكلي بالعباية مب ملفت نهائيا. لا تنحنين عشان تجيبين أي غرض من رف سفلي مثلا ولاتتكيّن على رجلك وأنتي واقفة أو على الجدار أو على أي شيء! (بشهر العسل كنت متكية على ممسك المصعد وقال لي أنتي تتميعين عند الرجال!). ممنوع اشرب موية أو قهوة إلا بالسيارة بس عشان ما يوضح وجهي من تحت النقاب بزعمه إذا جيت اشرب. ممنوع أتكلم مع أي رجل حتى لو موظف الاستقبال. ممنوع اطلب شيء وافتح الباب لعمال التوصيل، وإذا مرة اضطريت أو أحد بيمرني يعطيني غرض لازم يكون معي عالخط ولازم أكون بعباتي مع إن مافيه أحد بالبيت غيرنا. يتحكم بلبسي طبعا حتى وأنا ببيت أهلي مثلا يقول لاتلبسين كذا وكذا عندهم وغيره.
أفكاره غريبة جدا وما أدري من وين يجيبها. أمه وأبوه سمحين وماخذين الدنيا بسعة صدر. وظيفته تقليدية مو مكان مختلط ولاهو راعي سفريات كثير ودائما دائما ينتقد البنات المنفتحات -بنظره- ويحس إنه محظوظ فيني بس أفعاله تناقض كلامه جدا!!


بعد سنتين من زواجنا رحنا مكة وكنّا تونا مخلصين عمرة وراجعين الاوتيل بالمصعد نفس الشيء حطيت يدي بعفوية على التكاية لما فتح المصعد وطلعنا طبعا هاوشني لنفس الأسباب قلت له بهدوء وش فيها حركة عفوية ومحد يفكر كذا وترانا مسافرين ننبسط ومن هالحكي حاولت امتص غضبه لكن استمر معصّب و دخلنا الغرفة وجلس طول الليل يهاوش ويتلفظ ويسوي نفسه يكلم خطابة تخطب له وحدة عاقلة مو مثلي ههههه وأنا ماخذة وضعية الجدار ساكتة تماما ومطنشته، خلاني بالغرفة محبوسة الى بكره العصر موعد رحلتنا، كنت جالسة بدون اكل اللهم حبة دونت جابها لي الظهر وصلنا بيتنا العشا دخلت سيدة عالغرفة وبديت اضف شنطتي وقلت ودني لأهلي الحين (أول مرة أنا أطلع من البيت بنفسي) ارتبك مرة وعلى أساس يهددني قال ترى اذا طلعتي مالك رجعة قلت اوكي. بالطريق قلت له الله لايسامحك حابسني ومخليني اتنافض من الجوع أو شيء مثل كذا، وقف على طول عند مطعم اخذ لي ساندوتش ورفضت اكله قام رجعني البيت ورفضت انزل كنت منهارة تماما وحرفيا انتفض من الدوخة غصبني آكل كم لقمة وبعدها نزلني عند اهلي. (قبلها قد زعل علي هو مرتين لأسباب سخيفة وطردني لبيت اهلي وكنت اروح لهم لكن ما كانت تطول عن عشرة أيام ويرجع ياخذني)

جلست شهر واسبوع عند أهلي هالمرة بعدين كلم واعتذر ورجعني (كانت وقتها أمه تضغط عليه نرجع لبعض مع انها ما تدري وش المشكلة ودايم إذا طلعت لبيت أهلي هي اللي ترجعه لي)



بصراحة أنا كنت معاه فاقدة الأمل تماما. مافيه بيننا توافق فكري أبد، أنا في عالم وهو في عالم آخر تماما. فعشان كذا ماكنت أحاول أصلح الوضع قد ماكنت بس اتحاشى غضبه واسكت وانعزل من داخلي. كنت اشغل نفسي بنفسي ومسوية زي الحاجز الوهمي بيني وبينه. كنت مشغولة بدراستي وأسوي الأشياء اللي أحبها خصوصا إن دوامه طويل فما نشوف بعض الا آخر اليوم، والويكند أكون عند اهلي غالبا وهو كان مبسوط على هالنظام ويقول عشان نشتاق لبعض. بعدين توظفت واستقليت (نفسيا) زيادة حتى كانت الخطة ببالي أجيب لي سواق أو اسوق ويصير عندي عيال ألتهي فيهم وما نصير أنا وياه نتصادم كثير. باختصار كنت مستسلمة لفكرة إن حياتي ونصيبي معاه وكنت أبين له حبي وهو نفس الشي، كنت أحاول افهم شخصيته واتجنب أي شيء يثيره وأحس وصلت مرحلة أني أعامله كحالة مرضية لا أكثر ولا أقل.

هو شخص صريح تماما معي يعني مستحيل تكون تصرفاته من باب إنه متضايق من أشياء مني ومتراكمة عليه. وأنا أي شيء ينتقده أو خاطره فيه أسويه يعني ماقصرت معه وباعترافه بعد.

-يتبع-



 

 


اخر تعديل كان بواسطة » ,,عطر,, في يوم » 21-05-2019 عند الساعة » 05:10 AM.
مايؤرقنا غير متواجد حالياً
Facebook Twitter 0 اضافة رد مع اقتباس
قديم 21-05-2019, 05:08 AM   #2
مايؤرقنا
إدارة المنتدى
 
الصورة الرمزية الخاصة بـ مايؤرقنا
مايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحبمايؤرقنا فوق  هام السحب
رد : هل طريقنا مسدود ؟

الوقت اللي ما تكون بيننا مشاكل عادي جدا نكون زي أي زوجين طبيعين نسولف ونضحك كثير ونخطط لكل شيء بشكل طبيعي جدا. نروح ونجي ونسافر وأهله يحبوني مرة بالذات أمه وأبوه ودايم يمدحوني عنده قدامي ومن وراي لدرجة انه يقولي أخاف تشوفين نفسك علي. هو يحبني متأكدة من هالشيء وهو شخص فلاوي وخفيف دم كنا نستمتع بوقتنا مع بعض وكان هذا أكثر شيء داخل البيت لكن غالبا وقت طلعتنا يروح كله توتر وقلق عشان العباية ونظرات الناس وغيره.. لدرجة صرت أحس دائما إني مسوية شيء غلط، ودائما متوترة وأنا معه أو وأنا أسولف عليه كأني مسوية شيء غلط فعلا!

لكن اللي صار قبل رمضان هذا كنا جالسين نجرب حاجة في تطبيق كريم وفتحت حسابي واكتشف هو إني كنت أروح بعض المشاوير فيه (طبعا ممنوع وكبيرة من الكبائر عنده)، أنا للأمانة كل مشاويري اقضيها مع سواق أهلي ولازم أعطي زوجي خبر عنها، لكن أوقات لما يكون السواق مشغول اروح بكريم والرجعة يرجعني زوجي وكنت أكذب عليه صراحة تفاديا للمشاكل ولأني أعرف تفكيره، طبعا المشاوير كلها بعلمه ما عمري رحت مكان دون ما أعطيه خبر مسبقا لكن هو طبعا كشخصية شكّاكة قوم الدنيا وقعدها وتلفظ علي ومدّ يده علي ووخرتها وجلس يقول لي أنتي تخونيني وأنتي اذا داومت تطلعين من البيت وعشان كذا كنت تسأليني دائما متى برجع للبيت بالضبط -وأنا كنت اسأله دايما عشان أجهز العشا بس قام يألف ويخورها- وجلس ساعة يفتش جوالي كل التطبيقات والصور وحدة وحدة! (ومو أول مرة يفتشه) قلت له وقتها أنا أعترف إني غلطت إني كذبت عليك وتأسفت لكن ما اسمح لك تشكك في أخلاقي وتربيتي بعد كل هالعمر وهالعشرة وهذي المشاوير قدامك ما عمري رحت منها شيء من وراك. لكن طبعا ما اقتنع وطردني من البيت -كانت الساعة ثلاث الفجر وقتها- ورفضت اطلع قلت مابي أروّع امي هالوقت، نمنا على أساس يهجد إذا قام لكن للأسف قومني وقال يالله ضفي عفشك. تأسفت له ثانية وطنشني وخلاني اركب وراء بالسيارة معه ههههه شر البلية مايضحك. للعلم المشاوير اللي رحتها كلها مع أخواتي أنا ما أروح لحالي أبد إلا لو كان مستشفى مثلا، وكلها على أوقات متفرقة أنا خلقه بيتوتية جدا وما أحرص عالطلعات كثير بس عشان تكونون بالصورة.

بعدها بيومين أرسلت له رسالة عتاب على ردة فعله وتشكيكه في أخلاقي حتى لو كنت أنا غلطت بكذبتي عليه لكن مو مبرر لردة فعله. خصوصا إني كل مرة كان يغلط علي ويتأسف كنت أرجع معاه طبيعية تماما وما اذكره باللي سواه نهائيا. وخصوصا بعد إن الفترة هذي أبوي فيها مريض وحالته حرجة ربي يشفيه وعافيه يعني أقلها مفروض يحترم هذا الشيء ويقدره. (في النهاية أنا اعترف إن هذي غلطة مني ومتقبلة انه يعصب ويتضايق ويزعل لكن بطريقة حضارية مو يهينني كذا ويكبر الموضوع وكل واحد ببيت)


فوق هذا أنا يوم توظفت ساعدته ماديا كثييير. وأخذت قروض عشان يسدد ديونه يعني حتى مو لاستثمار أو مشروع مشترك بيننا، السفر نتشارك فيه ومصاريف المستشفيات وغيرها عادي. حالته المادية عادية وقبل أتوظف ما عمري ضغطت عليه بالطلبات أو حسسته بالتقصير وحتى إذا طلبت ورفض اسكت وارضى ما أحن ولا أزن وهو يشهد لي بهذي. وكان يقولي مو اذا توظفتي تشوفين نفسك علي! للأمانة هو ماكان يقصر معي ولا في بيته لكن بعد الوظيفة شال يده عني تقريبا حتى يوم طلبته كسوة العيد قال مفروض أنتي تعطيني مو أنا. للأسف وظيفتي بيّنت لي وفاجأتني وش كثر هو استغلالي ومادي وكان دايما يبتزني بالعاطفة كثير عشان يأخذ فلوس وكنت أقول بنفسي ساعديه يا بنت زوجك وسندك واحنا لسا ببداية حياتنا وماجانا أطفال ومصاريف، لكن كان يتمادى ويوضح لي أحيانا انه زعلان مثلا لاني ماطلعت له سيارة جديدة! او يقترح اني اخذ فيزا تتقسط على راتبي وهو يصرفها بزعم انه بيدخل في مشروع! طبعا كنت اسوي نفسي غبية وما فهمته و كان دائما يقول لي الناس تحسدني عليك لأنك موظفة لكن ما منك فايدة. بس بالمقابل أنا احتجت منه إننا بس ننقل من بيتنا لحي آخر عشان أكون أقرب لدوامي وترجيته بس رفض لأسباب واهية وسخيفة مع إني قلت له بساعدك في مصاريف النقل والايجار قال إيه أصلا هذا بديهي أنا وأنتي واحد!


أنا مشكلتي معاه الخوف. شخصيتي أصلا خوافة وهو زادني خوف بعصبيته وتصرفاته. لما يتلفظ علي أو يهيني ما أعرف أرد عليه وقتها ياناس أخاف يذبحني! ماتعودت ولا عمري تعاملت مع زي هالشخصيات. وعلى فكرة تراه مشكلجي حتى مع الناس أي أحد يدوس له على طرف حتى لو بحسن نية يهاوشه ويمد يده عليه عادي جدا حتى لو زميله أو مديره بالدوام وهذي فعلا مو مبالغة. اللي يحزني أكثر شيء إنه هذا كله يسويه فيني وأنا أسكت أجل لو كنت أرد وأعاند وأرفع صوتي مثلا وش ممكن يسوي؟ دايم اسكت تمامااا الين يهجد بعد كم ساعة آو حتى كم يوم وأرتب كلامي وانمقه واروح له نتناقش بهدوء طبعا مع ذلك مايعترف أبدا إنه غلطان ويجلس يلف ويدور الين أطفش واجلس أغير السالفة واضحك معاه عشان بس يرضى ونرجع طبيعين..

بنفس الوقت كنت أحيانا ابرر وضعنا وأقول يمكن عشان ماجونا عيال مشاكلنا كثير وبعدين ربي يرزقنا وتخف.. يمكن عشان فرق التعليم بيننا ومع ذلك كنت أمدحه دايم وأشجعه وما عمري شفت نفسي عليه أو حسسته بالنقص لأني أنا نفسي أحب أشوفه كامل ومالي عيوني..



لكن المشكلة الأخيرة حسيت إنها جت زي الصفعة بوجهي وللحين مو مستوعبة شلون أنا صابرة على هذا كله. (وترى هذا مو كل شيء فيه مواقف كثيرة مشابهة للي قلته كلها إهانة وشك لكن ماكتبتها عشان ما أطوّل). طبعا سيناريو الطلاق مرّ في بالي وعشته 93893 مرة من يوم تزوجت، والسنة الأخيرة بالذات صرت استخير كثير في الطلاق وصرت أحس إن تأخر الانجاب -رغم كل المحاولات والدعوات- نعمة من ربي ولحكمة منه سبحانه، والحين أحس (عقلي) يقول لي خلاص اتطلقي وارتاحي خصوصا إن أهلي دروا عن بعض الأشياء -بالصدفة- وجالسين يلوموني على السكوت. لو رجعت أحس إني بهين نفسي وخلاص أصلا ماصرت أحس تجاهه بأي مشاعر.. كل المشاعر الحلوة كسرها بضربه وألفاظه وشكه واستغلاله.
ولو انفصلت بنفصل بضمير مرتاح لأني ماقصرت خمس سنين وأنا أحاول وأتعب وأبني.. أغطي عليه عند أهلي وأهله وما اذكره إلا بالخير، تنازلت عن أشياء كثيرة غيري يشوفها أبسط البديهيات عشانه وعشان حياتنا.. حسيت إني كبرت عشرين سنة خلال هالخمس سنوات.

لكن (قلبي) مازال فيه خوووف وتردد..
خايفة شلون خمس سنين تنتهي كذا فجأة..
خايفة من اللي جاي..
خايفة ومترددة جدا.. خايفة من الطلاق أكثر من خوفي من فراقه.



أنا ما أدري هل بسكوتي له صنعت منه وحش ما ينهزم وإلا هو أصلا حالة ميؤس منها وأنا اللي خسرت نفسي وعمري معاه؟




استخرت كثير الله يكتب لي اللي فيه الخير لكن كتبت مشكلتي هنا كاستشارة (وماخاب من استخار ولاندم من استشار)



 

 


اخر تعديل كان بواسطة » ,,عطر,, في يوم » 21-05-2019 عند الساعة » 05:12 AM.
مايؤرقنا غير متواجد حالياً
Facebook Twitter 0 اضافة رد مع اقتباس
قديم 21-05-2019, 11:59 PM   #3
ورد ومطر
خبير اقلاعي
ورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحب
رد : هل طريقنا مسدود ؟

اللي يضرب ويهين ويتلفظ بألفاظ دونيه ويحرم من الاكل ولا يرحم ويمارس عذاب نفسي مع شريك حياته او اهل بيته
يكون هو يعاني بالأصل من اضطراب نفسي يحتاج لعلاج سلوكي معرفي وأحيانا اذا احتاج الأمر إلى دوائي
كثير نساء يشتكون من مزاج ازواجهم السيء المستمر يعني تكون شخصيته كذا من الأصل وليست تصرفات مؤقته وزالت
يكون يعاني من قبل الزواج وربما من المراهقه من اضطرابات لا اهله ولا زوجته ولا أقربائه يعرفون ان عنده اضطراب يسمونه عصبي منفس مزاجي وبس لا هذي اضطرابات يجب مراجعة مختص
أغلب المشاكل اللي كُتبت شكوى من الأزواج اشوف انهم يعانون من اضطرابات نفسيه لان تصرفاتهم وطريقة حياتهم وأفكارهم غير طبيعيه والله اعلم
الله يختار لك الخيره المباركه ويكتب اجرك ويوفقك



 

 

ورد ومطر غير متواجد حالياً
Facebook Twitter 0 اضافة رد مع اقتباس
قديم 22-05-2019, 12:06 AM   #4
ورد ومطر
خبير اقلاعي
ورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحبورد ومطر فوق  هام السحب
رد : هل طريقنا مسدود ؟

وعذراً نسيت أضيف نقطه
قلتي اخاف يذبحني!!!!!؟
الزواج سكن وموده ورحمه لا اعرف له معنى غير اللي قاله رب العالمين سبحانه
كيف يكون الزواج ذبح وخوف وقلق وتعب نفسي وانهيارات

كما أن الطلاق شُرع فرجاً وتخليصاً من كرب وضيق ليكون بابا للسعاده باذن الله
وليغلق باب للتعاسه
ثم قال عز وجل { يغني الله كلاً من سعته}
هذا والله اعلم



 

 

ورد ومطر غير متواجد حالياً
Facebook Twitter 0 اضافة رد مع اقتباس
قديم 22-05-2019, 06:01 AM   #5
بسكويتا
عضو مقلع
 
الصورة الرمزية الخاصة بـ بسكويتا
بسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحببسكويتا فوق  هام السحب
رد : هل طريقنا مسدود ؟

انتي حبيبه بزيادة والله
واضح انك غير سعيدة وحزينه وقلقه جداً بزواجك ، وانا اقرا سالفتك جتني تكه

يعني واضح انه انسان ما ينتعايش
معيشك ب(هم - ضيق - خوف - قهر - اهانه - قلق - شك )
ولا هي اول مره ولا ثاني مره
لا !
من يوم ما اخذتيه الى يومنا هذا وهو انسان من حفرة لدحديرة

بالله عليك كذا الزواج ؟
امانه تشوفين تصرفاته انه انسان يقدر الواحد يعيش معاه ؟؟
تشوفين انه يستحقك تكفين ؟؟

وترا يمكن طلاقه من الاولى مو لانه هو ما ارتاح .. تلقين زوجته اللي ما ارتاحت وانقذت نفسها وهجت وعرفت انه انسان سيء

ماتسوى عليك والله تكملين حياتك مع انسان ما يعرف لا الاحترام ولا التقدير ولا حتى يخاف الله فيك ، وتلقين الناس اللي حولة متأذين منه بعد

الوحده تتزوج ، تبي زوج يحبها ويقدرها ويتفهمها ويعذرها ويصير فعلا "رجل" بمعنى الكلمه
وانتي تستحقين الافضل

والانفصال افضل من انك تعيشين معاه
ولا تخافين ولا شي
الطلاق مو عيب ولا عار

اجل تبين تعيشين معاه باقي عمرك وتجيبين عيال يشوفون ابوهم يهين امهم قدامهم ويعاملها معاملة سيئه ويتعقدون
وتزداد حالتك اسوء واسوء ؟؟

فكي نفسك واتركيه
صبرتي بما فيه الكفايه والله
الله يعوضك بالزوج الكفو واللي يستاهلك يارب

هو واضح ان فيه اضطراب نفسي وانسان غير ناضج نهائيا

نسال الله السلامة



 

 

بسكويتا غير متواجد حالياً
Facebook Twitter 0 اضافة رد مع اقتباس
قديم 22-05-2019, 11:25 AM   #6
Ahmed SA
عضو مقلع
Ahmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحبAhmed SA فوق  هام السحب
رد : هل طريقنا مسدود ؟

ألا وله طريقة ويمكن تعرفينها ..
أنا أقف لك احتراماً وتقديراً ..
وانصحك حاولي وحاولي واصبري واصبري ..
والله يصلح حالكم .



 

 

Ahmed SA غير متواجد حالياً
Facebook Twitter 0 اضافة رد مع اقتباس
قديم 23-05-2019, 05:21 AM   #7
sasaa6
مستجد
sasaa6 تقييمه فيه تقدم
رد : هل طريقنا مسدود ؟

الله يفرح همك يا رب ... دايم يقولون حاجتين اذا كانت في زوجك انفذي بجلدك ( الشك والبخل) لانها تكون في شخصية الانسان ومب شيء سلوكي يقدر يغيره
الانسان الشكاك حتى ولو حاول يتغاضى او يعدل من نفسه يبقى فيه اذا ما قالها بلسانه بيقولها في قلبه وللاسف شكل زوجك ماله نيه يعدل من نفسه اصلا
يعني شخص يتهمك في شرفك ،يفهم غلط ويحلل من نفسه ولا يعترف بغلطه ويبيك تتغيرين على مزاجه ولا يبي يغير من نفسه ليش صابره؟ ما ابي احرض على الطلاق بس واضح نهايتكم على المدى البعيد بيتمادى ومثل ما قالوا اللي فوق ممكن يصير يطقك قدامك عيال ويحط من قدرك بينهم وما فيه اي ام ترضى بكذا.
وبالنسبة للعشرة ياما ناس عاشوا مع بعض فوق العشرين سنة وتفرقوا وكلن راح في حال سبيله ورزقه ربي بالاحسن وصدق خيره ان للحين ما جاكم اطفال عشان ما ترتطبين وتتدبسين.
قدري نفسك واختاري لها اللي يقدرها سكوتك ترا ما راح يزيدك شيء لا في حق نفسك ولا في عينه
والله يفرج همك ويعوضك باللي احسن منه ويهديه لنفسه.



 

 

sasaa6 غير متواجد حالياً
Facebook Twitter 0 اضافة رد مع اقتباس
قديم 24-05-2019, 04:09 AM   #8
][Hunaini][
خبير إقلاعي مميز
 
الصورة الرمزية الخاصة بـ ][Hunaini][
][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب][Hunaini][ فوق  هام السحب
رد : هل طريقنا مسدود ؟

إقتباس »
هو طبعا كشخصية شكّاكة قوم الدنيا وقعدها وتلفظ علي ومدّ يده علي ووخرتها وجلس يقول لي أنتي تخونيني وأنتي اذا داومت تطلعين من البيت وعشان كذا كنت تسأليني دائما متى برجع للبيت بالضبط -وأنا كنت اسأله دايما عشان أجهز العشا بس قام يألف ويخورها- وجلس ساعة يفتش جوالي كل التطبيقات والصور وحدة وحدة!
هذه الأسطر ما تبشر بالخير
هو مشكلته مريض + لقى وحدة ساكتة له
ما أستبشر باستمرار علاقة يكون فيها الزوج يتهم زوجته بشرفها
مابالك بمدة يد و قلة حياء
مو شخص سوي للأسف
استخيري كثير ما ابي اخذ مسؤولية و إثم لو نصحتك بشيء ، لكن استخيري و فكري هل يصلح ابو أو لأ



 

 

][Hunaini][ غير متواجد حالياً
Facebook Twitter 0 اضافة رد مع اقتباس
قديم 26-05-2019, 02:56 PM   #9
| زح زح |
من كبار رياضيي الإقلاع
 
الصورة الرمزية الخاصة بـ | زح زح |
| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب| زح زح | فوق  هام السحب
رد : هل طريقنا مسدود ؟

يا إلهي كم إنتي طيبة وعلى نياتك وبرييييييييئه ، ليه كل هذا ؟ ليه كل هالسكوت وتقبل الإهانة والضرب ؟؟؟؟؟؟؟ على ايييييش ؟؟

وش جايك منه ؟ بتكسبي الجنه ولا بيعطيك كنوز الدنيا ؟؟؟



 

 

| زح زح | متواجد حالياً
Facebook Twitter 0 اضافة رد مع اقتباس
قديم 27-05-2019, 05:39 AM   #10
دارت الدنيا
مساند عيادة الإقلاع
 
الصورة الرمزية الخاصة بـ دارت الدنيا
دارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحبدارت الدنيا فوق  هام السحب
رد : هل طريقنا مسدود ؟

قرأت كلامك كذا مره
ارجوك من كل قلبي تقرأين ماكتبته لكِ بعقلك
بداية كلامي انا لااخببك على زوجك ولكن انصحك والخيار لكِ الاستمرار معه الم والطلاق بالنسبه لكِ الم لانك وضحتي خوفك من الانفصال
زوجك يعاني من مرض نفسي وانا اجزم بذالك
لما يوصل الشك للشرف اعتبري الزواج والحب والموده وحتى الاحترام انتهى
كنت اتمنى اعرف معرفك وارسلكِ خاااص
عموما غاليتي
هذا الشخص سبب خوفك والخوف يمنع الحياااه والخوف اذا ماقدرتي تقاومينه يتحول لامراض عضويه واحيانا نفسيه
انتي ع بر الامان لعدم وجود اطفال
اجزم لكِ لو حملتي بينكر الطفل لاابالغ لكن هذا وضعه النفسي لايسمح له باستمرار الحياه
صحتكِ النفسيه والعضويه اهم بكثييييييير من كل شي في الدنيا
اقسم لكِ في ايامنا المباركه هذه
ان الشعور بالامان في جحر خير من الخوف في قصر
اسأل الله ان يكتب لكِ الخير حيث ماكان وان يرضيكِ به
نصيحه
اتبعي طريقه التخلي والتحلي
التخلي:تخلي عن التفكير فيه وخوفك منه وحاربي الفكره بكل امر ايجابي خروج مع صديقاتك عمل تطوعي ....الخ
التحلي:حلي مكان الفكره والخوف امور انتي انجزتيها بكل ثقه في عملك مع اهلك
واخبرا لن يخيب الله دعائك وقلبك المنكسر
دمتي بود🌷



 

 


اخر تعديل كان بواسطة » دارت الدنيا في يوم » 27-05-2019 عند الساعة » 05:40 AM.
دارت الدنيا غير متواجد حالياً
Facebook Twitter 0 اضافة رد مع اقتباس
إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح

الإنتقال السريع


الوقت المعتمد في المنتدى بتوقيت جرينتش +3.
الوقت الان » 01:35 AM.

الأن حمل تطبيق منتديات الإقلاع
 

تنبيه : كل ما يطرح من مشاركات يمثل رأي كاتبه ولا يمثل رأي إدارة الموقع

ترقية وتطوير » تحميل دوت كوم
Powered by: vBulletin Version 3.8.11
Copyright ©1999 - 2019, Jelsoft Enterprises Ltd.
جميع الحقوق محفوظة منتديات الإقلاع - شبكة الإقلاع -1999-2017