منتديات شبكة الإقلاع ®


الصفحة الرئيسية البحث انظمة شبكة الإقلاع سوق الاقلاع عضويات التميز (الذهبية والفضية والتجارية) جوال الإقلاع حمل صورك من هنا من خلال فتح موضوع خاص بك
بوابة الأنباء ieqla3 اختصر روابطك من هنا البرامج اعلن معنا حساب الشبكة في موقع تويتر اعلن معنا
العودة   منتديات شبكة الإقلاع ® > المنتديات الإجتماعية > عيادة الإقلاع للاستشارات النفسية و الاجتماعية
التسجيل التقويم التأشير على جميع الاقسام بالمشاهدة



 الاستمارة هنا


إضافة رد
 
أدوات الموضوع طريقة عرض الموضوع
قديم 30-07-2017, 01:30 PM   #1
حورية3
مستجد
حورية3 تقييمه فيه تقدم
مالي..امي..الخوف من العقوق

البيانات الشخصية:

العمر : 31
الجنس : ( أنثى )
مكان الإقامة : (الرياض- )
الحاله الاجتماعيه : ( متزوجة )
اذا كنت متزوج مدة الزواج : 6
اذا كنت متزوج عمر الشريك وتعليمة : : 34
وجود اطفال من عدمه : طفل واحد
طبيعة العلاقه بين الزوجين ( مستقرة" )
مصدر الدخل : ( وظيفة حكومية )
الحالة المادية : ( متوسطة )
المستوى التعليمي :جامعي

البيانات الأسريّة :

نوع السكن : ( شقة ) ، وهل هي : ( ايجار )
عمر الأب : متوفي عمر الأم : 56
مستوى تعليم الأب والأم ؟ الأب: متوسط ، الأم: ابتدائي
عدد الأخوة والأخوات: 5 ، ترتيبك بينهم ( رقمياً ) : 3
الجو الأسري في البيت العلاقة بين افراد الأسرة : متوتر
طبيعة علاقة صاحب المشكلة مع بقية أفراد العائلة : جيدة
الجو الاسري بشكل عام في العلاقة فيما بينهم : ( متوسط )


البيانات الطبيّة :

هل يوجد أمراض عضوية تعاني منها ( آلام الظهر )
هل يوجد أدوية تستخدمها حالياً ، ( لا )
الوضع الصحي والبيئي في الحي السكني
من ناحية الخدمات والمرافق : (متوسط )



البيانات الدراسيّة :

هل التحاقك كان في سن نظامي ؟نعم
هل كان هناك اي تعثر في مستوياتك الدراسية انسحاب او رسوب او انقطاع : ( لا )
مستواك الدراسي على مختلف المراحل الدراسة: ( ممتاز )
المرحلة الدراسية المتواجد بها حالياً( جامعي واسعى للماجستير )
اذا كان هناك تخصصات في مستواك الدراسي .. فما هو تخصصك : كيمياء



البيانات الإجتماعيّة :

هل هناك أي هوايات او أنشطة أو ممارسات تتقنها : الالقاء ..القراءه..حب الاستطلاع
هل لديك ميول للاختلاط الاجتماعي والمشاركه في أنشطة ومناسبات مع افراد الحي او زملاء الدراسة والعمل او الاقارب :نعم
وهل هناك معوقات تحول دون ذلك : لا
الجو الاجتماعي العام حولك ( اصدقاء - زملاء - جيران - اقارب ) من ناحية علاقتك معهم : ممتاز

المشكلة:

مشكلتي معقده.. وممكن تكون صعبه وتتفاوت فيها الارآء
بحكم انها تخصني مع أمي.. وصعب ان الانسان يشتكي من امه..
لكن ارجوكم ابي حلول توافق مبدأ الدين..مابي أأثم لكن بنفس الوقت مابي حقي يضيع..
انا نشأت في عائلة لي اخت متزوجه و4 اخوان
ابوي قبل وفاته يحبني كثير ويشجعني ويدعمني وكريم جداً..
والحمد لله بفضل الله ثم بفضله (الله يرحمه) وصلت لمستوى نجاح عالي جداً تعليمياً ومهنياً..
امي مااذكر اني عشت معها بقرب..كان فيه حواجز من الطفوله..ماكنت تضمني او تهتم فيني او في مشاعري
كان اسلوبها معي اوامر فقط ..فيه جفاف كبير بيني وبينها..
كنت طفله ومكتفيه بحب ابوي..
كبرت وفهمت ..عرفت امي ليش تعاملني كذا..
السبب(مبدأ تفضيل الولد على البنت) في كل شي.. كان تقريباً تربيتي على يد ابوي بينما تربية اخواني على يد امي بحكم وفاة ابوي وانا اكبر منهم .. يعني توفى الوي وهم بمرحلة متوسط وابتدائي..
توظفت مبلغ زهيد جداً1000 ريال وفرحت كثير ..كنت طموحه وافكر كيف اطور نفسي مهنياً عشان ازيد من دخلي.. كان تفكيري مختلف تماما عن تفكير امي واخواني..كان التحطيم من امي كبير ..
لانها وظيفه ماتسوى على قولها.. واكثر مااسمع هالكلام لما كنت اصحي اخوي من النوم عشان يوديني الدوام مؤقتاً الى ان القى سواق.. كانت تتضايق اني اصحيه من عز نومه عشان وظيفه بألف..!
كنت احب اجمع فلوسي عشان ادخل دورات واشتري كتب لكن كانت تحطمني بأني اضيع فلوسي على الفاضي!!
والحمد لله هالشي مااثر فيني ولا احبطني لاني استمريت على مبدأي وطورت نفسي وصرت بمستوى ثقافي علمي ممتاز..

علاقتي مع زوجي ممتازه..ونفكر كثير بالمستقبل وكيف نطور وضعنا وظيفياً ومادياً وكيف نأمن ابنائنا للمستقبل..


الآن نجي لأساس المشكلة وهي الامور المالية:

تزوجت ..استلمت المهر وكان بنيتي اجهز مبلغ 2000 ريال بهديه حلوه واقدمه لأمي..
لما استلمت المهر دخلت غرفتي وخبيته وطلعت..
لقيت امي متضايقه وزعلانه مو فرحانه لي ابد..
اما ابوي كان يردد الله يوفقك ويبارك لك فيه..
ردت امي بعصبيه: انا ابي منه 5000 ريال .. انا هنا انخنقت .. قلت ناويه والله
ورحت سحبت الخمسه واعطيتها وفرحت وتغيرنفسيتها وقالت :متى بتبدين تتقضين!!
تمنيت انها مااستعحلت وفرحت لي باستلام المهر.. قد مافرحت ب5000 ريال..
تزوجت انا ..توفى ابوي..صار راتب امي التقاعدي 2500 ريال لكن البيت ملك الحمد لله..و زاد راتبي وزادت مصاريف اخواني .. كل سنه تدخل واحد مدرسه اهليه بحجة بيجيب نسبه ويكمل دراسته..
فكرت اعطيها من راتبي 1000 كل شهر .. راتبي وقتها اقل من 5000 ريال..
لكن كان فيه مشكله مضايقتها..ان اخوي ماعنده سياره يروح لمدرسته!! ومايبي يروح باص..
قلت لها تبين اعطيك 1000 كل شهر او اطلع له سياره اقساط بنفس القيمه1000 شهرياً..
لاني اعرف رضا امي من رضا اخواني..
وافقت بفرح بالسياره.. طلعت السياره وهذي اول غلطاتي.. تبهذلت من الاجراءات وانا حامل غير المخالفات المروريه اللي صارت علي من اخوي..
انجبت ولد .. ووقتها قلت احط الصباح ولدي عند امي وكنت بالمقابل اعطيها 500 ريال حق تعبها..ماطلبت مني للامانه لكن كذا طبعي اخذت الكرم والذوق المادي من ابوي الله يرحمه..
سافرت مع زوجي بفلوس حصل عليه من ارض باعها( وضع زوجي المادي اقل من المتوسط بحكم انه دخل في امور ماليه شبه خاسره) امي لما بلغتها اننا بنسافر بانت على وجهها الصدمه ، ماشفت ابتسامه ابد ..!
سافرنا ورجعنا.. بعدها بفتره كانت تسولف عن اختي بأنها سافرت لدوله خليجيه وقالت بالحرف الواحد: تلعب بالفلوس واحنا ماعندنا شي!!
(اختي مو موظفه) عرفت وقتها سبب ضيقة امي .. باعتقادها ان السفره مع زوجي من فلوسي انا..



( للمشكلة بقية)




 

 

حورية3 غير متواجد حالياً
Facebook Twitter 0 اضافة رد مع اقتباس
قديم 30-07-2017, 01:32 PM   #2
حورية3
مستجد
حورية3 تقييمه فيه تقدم

بعدها حصلت تغيرات:
اخواني تخرجوا من الثانوي بنسب سيئه..( كان اساساً غيابهم كثير بالمدرسه وماكانت امي تتخذ موقف بهالشأن بحكم انها مدرسه اهليه والامور بتمشي) حياتهم الآن سهر ونوم..
اذا قالت لهم امي توظفوا قالوا مالقينا ..في الحقيقه فيه وظايف لكن موب راضين برواتب قليله للاسف..!
4 منهم عاطلين وواحد موظف .. اعمارهم في العشرين والثلاثين.. واحد طالب (القعده) .. وللاسف متعود على الدلع ويومياً مصروف 50 ريال..
اسلوبهم مع امي سيء.. يطلبون منها فلوس.. بطريقة سيئه واصرار وازعاج الى ان تعطيهم..
اما انا توظفت في قطاع حكومي وزاد راتبي الان.. وطريقي للدوام عباره عن مشقه وسفر يومي..
رحت قدمت على خادمه لأمي من افضل الجنسيات براتب 1500 ريال..لكن زادت التزاماتي.. راتب سواق للدوام2000 .. والشغاله وقسط قرض اخذته عشان قيمة تقديم الخادمه واعطيت اخوي الثاني (غير اللي شريت له السياره)منه 25 الف عشان يسدد مخالفاته ويدفع مقدم سياره بحجة انه ببتوظف ويتغير..(ماتغير طبعاً توظف كم شهر وفصل وانسحبت السياره منه )

واي مبلغ يجيها يكون لاخواني..
كنت اول اعطيها من دون ماتطلب كل فتره في المناسبات وصرت الاحظ انها تخبيها لهم..
غيرت الخطه وصرت اعطيها هدايا عينيه بس للاسف صارت تبيع الهدايا..
مره شريت لها طقم ذهب وكم شهر باعته..
شريت لها هديه جوال وباعته..
اذا فيه مناسبه اجتماعيه ورحنا مشغل اخذها معي واقول سوي اللي تبين على حسابي و ادفع عنها..
اهديها جلابيات فخمه للعيد احس ماتفرح فيها زي ماتفرح بالمبلغ المادي ..
لكن القهر انه يروح لاخواني مو لها ولاتدلع نفسها فيه..
اعطيتها مره مبلغ لما رحنا معرض اسر منتجه قلت اشتري اللي نفسك فيه..شرت ب20 ريال والباقي خبته بالشنطه وادري لهم..!!
سافرت مره ثانيه مع زوجي وهالمره دفعت معه (ربع) مبلغ الرحله ومن نفسي تقديراً لوقفاته معي.. واهله معنا لكن كل واحد من اهله دافع قيمة رحلته من أ الى ي.. زوجي كان مسؤول عني انا وولده فقط ..ونفس الصدمه لما علمتها ان بعد اسبوع بنسافر..بعدها بيومين.. عرفت انها تحاول تصلح جوازها.. المقصد (بسافر معكم مثل مااهله بيروحون..
بحكم انك موظفه اكيد دافعه انتي فلوس الرحله وانا اولى من اهله)
على عيني وراسي لو تروح معنا ومنى عيني تكون مبسوطه لكن بتتكل اتكال كلي من لبس وشرب واكل وشراء احتياجات واحنا اللي معنا يادوب يكفينا انا وزوجي وولدي..!
لمحت لي مره قالت: اختي مسافره اشوف سنابها ..اكيد رايحه مع وحده من بناتها..
قالت اختي ويمكن رايحه مع عيالها .. قالت لا مااظن.. وفعلاً طلعت رايحه مع ولدها..
واخوي الموظف سافر كم مره ماتقوله بروح معك..
قلت لها ليه ماتقولين له بروح معك..تقول اذا ماقال من نفسه والا كيفه!!
الولد عندها مقدس وماينقال له شي..

اما البنت ملزومه بالعطاء ومهما اعطت عطاء الولد عندها غير .. تطلعه لسابع سماء من المدح لو اعطاها 500ريال
..الآن انا في ديون.. وزوجي في ديون.. وعندنا اجار الشقه..وامي تطلب مني كل فتره مبلغ تقول سلف اخوانك يبون والثلاجه فاضيه( ومايرجع ولا اطالب فيه حتى) ..
لما كنت ادرس بالجامعه كنت اجمع مكافأتي اشتري لاب توب واحتياجاتي لاني ماكنت أحب اثقل على ابوي وكنت احب اكون مستقله لكن كانت (تجبرني) اسلف اخوي من مكافأتي عشان يصلح سيارته (وطبعاً المبلغ مايرجع)
مره وانا مسافره كنت داخله جمعيه ولما تجمعت الجمعية قلت للحرمه خليها عند امي واعطتها امي ..وقلت لامي خليها عندك امانه لين ارجع.. رجعت واعطتني اياها وناقص منها 1500 ريال،
قالت: احتجت واخذتها وبرجعها لك ( ومارجعت)
فكرت اخصص لها مبلغ معين كل شهر وارتاح لكني مضغوطه مادياً ولاني جايبه لها شغاله يعني كأني اقدم لأمي شهرياً1500ريال..
اخوي الموظف مايقصر وتحمل مثلي ديون الآن لأمي عشان ترمم البيت ..
وهي وصلت فيها تدور وظيفه (طبعاً مالقت بحكم عمرها فوق ال50) وكل هذا عشان تحسن من وضعهم المادي واخواني مازالوا نوم وسهر ومافيه اي ذرة احساس بالمسؤوليه ..
شجعتها تدخل مشروع بيع قهوه بحكم قهوتها زينه وطبعت لها بزنس كارد واعلنت لها عند وحده مشهوره.. باعت لفتره ووقف الطلب..
قالت بتحطيم:مشروعي فشل..
قلت: يمه مشروعك خسرتي فيه ريال ؟ قالت لا قلت: يعني نجح بس ارباحه قليله..
مااقتنعت من كلامي!!
احس امي متسرعه بالنتائج وتبي شي سريع ومبهر وهالشي لاحظته بعد ماتوظف اخوي بشركة ماكانت تشجعه ،تقول راتبها موب زين مايعيشك دور غيرها ..

وللامانه امي عودتهم على كذا..غير مبالين وغير مسؤولين .. اذا ناموا ماتحب تصحيهم عشان ماينزعجون .. حتى لما كانوا طلاب يغيبون بالاسابيع وتسكت!!
والآن تشتكي من جلوسهم بدون وظايف.. وتصرف عليهم ولو قلنا ليش تعطينهم قالت يزعجوني لين اعطيهم!!!
الموضوع مستفز جداً جداً منهم..
الآن.. انا وزوجي نخطط على تضامن لشراء بيت .. انا وزوجي متفاهمين جداً ونحب بعض.. وللامانه ماعمره اخذ من فلوسي.. ان احتاج تسلف ورجعها مباشره ..وان صار وضعه ذاك الشهر زين دلعني مررره ..فلوسه مو له.. كريم وحنون واحتواني كثير..في ولادتي كان معي كل لحظة.. وامي قبل اولد كانت تقول اذا ولدتي علميني عشان مااشتق معك .. (فهمت انها ماراح تكون معي وانا بكر)
ودي تتغير نظرة امي ان راتبي يروح لكن ماتصدقني..اذا طلبتي وانا مامعي الا 100مره يضيق صدري اعطيها اياه وانا اقول ربي بيعوضني ان شاء الله..
واذا حلفت لها ان مامعي ماتصدقني ابد..
وصارت تتصل تطلب من زوجي بدون ماتقول لي.. وهالشي يحرجني ..
آخر نقاش معها في موضوع الزواج من موظفات.. قلت ان مو كل موظفه تساعد زوجها قالت يعني انتي بتقنعيني انك ماتساعدين زوجك؟!!!

هنا فهمت..فهمت انها حاطه ببالها اني اصرف على زوجي واني مدلعته.
ماتدري ان زوجي يشتغل في كريم عشان يزيد مدخولنا.. لاني ماعلمت احد بهالشي..

ماتدري ان زوجي يبحث الان عن وظيفه ثانيه لزيادة وتحسين الدخل..
ماتدري ان يمر علينا اسبوع الثلاجه فاضية..
ماتدري اني دخلت بمشاريع فاشله عشان احسن وضعي..
لكني مااطلب.. ولا اشكي.. مستحيل اشكي لأمي او احد ان ماعندنا!! اقول ربي يفرجها وبتزين ..
دايم اقولها عندي قررض عندي رواتب سواق وشغاله وعندي التزامات تقول الله يعينك .. وكم يوم وترجع تطلب من جديد!!
ومهما اعطيت تنسى عطائي..
ايه امي والمفروض ماانتظر رد عطاء منها لكن ابي شوي تقدير بس..
اخر موقف استفزني ..
كنت طالعه الصباح وكلمتها اسولف وعرفت اني برا البيت قالت اذا قريبين جيبوا لي معكم خبز ماافطرت ( ومعها بداية سكر وضغط) ولازم تاخذ علاجها بعد الفطور ..انصدمت وين اخواني ليش ماجابوا لك؟؟!
قالت نايمين!!!!
عادي تجلس بدون فطور بس ماتصحيهم وتزعجهم..
تلخيص مشكلتي:
امي تفضل الولد على البنت وكنت اتحسس من هالشي بس بعد زواجي ماعاد يهمني لان زوجي عوضني واحتواني..
كذلك تفضل اختي علي لانها الكبيرة يمكن؟ او يمكن لان جوها من جو امي طلعات وجمعة حريم وانا موب كذا؟!
او يمكن تساندها في الرأي في بعض الامور وانا اذا طرحت رأيي من وجهة نظر علميه ثقافيه ماعجبهم كلامي!!
ماركزت كثير في محبة او تفضيل امي لاختي لاني اعرف شخصية اختي قوية وعادي تطلع للناس بوجهين لذلك دائماً اقول الاعمال بالنيات واتجنب التفكير بهالامر..
بتقولون يتهيأ لك بقولكم مثال بسيط جدا
بديت مشروعي مالقيت اي تجاوب او تشجيع او تعليق من امي، فتحت اختي نفس المشروع شفت دعم وتشجيع ودعوات لها من امي ..
مثل ماقلت لكم ماركزت على هالامر لاني كبرت عقلي عن هالامور وقلت يكفي اني قاعده احقق انجازات واعمال تطوعيه للمجتمع اللي كثير استفادوا منه واللي امي ماتشوفه شي ..!
اللي متعبني الآن اعتقادات امي:
-تعتقد اني بنك متنقل.
-تعتقد انها اولى بفلوسك متى ماطلبت اعطيها.. ولو قلت مامعي ماتصدقني .. وكذا مره يجي واحد من اخواني يطلبني لاني سمعت منها مره ( رح خذ من اختك انا ماعندي).
مع العلم اني قريت شرعاً لايجوز اخذ مال احد الابناء واعطائها لإبن آخر..
-مهما اعطيتها وجا يوم وقلت مامعي تعتبرني مقصره وكل عطائي السابق ولاشي..
و كل ماقلت لها عن التزاماتي تكذبني وان عندي بس مابي اقول!!
-تحكم من الظاهر فقط.. مثال( في رمضان افطرت انا وزوجي يوم واحد بس بمطعم بوفيه مفتوح) .. هاليومين سمعتها تتكلم مع بنت خالتي العروس ( لاتشيلين هم انك عروس ورمضان.. افطروا بمطاعم مثل بنتي مايصلحون فطور.. يروحون مطعم)!!
هنا فهمت ان امي من موقف تعمم.. يعني اعتقدت اني طول رمضان في مطاعم وهي مره وحده بس!!
للعلم: تحدثت معها عن وضعي وديوني واحسب لها كم يروح من راتبي ووش عندي من التزامات بس ماتقتنع..
.
.ابي حل:
انا مابي آراء تدعي للمثاليه..
انا فقط ابي آراء تلهمني بتصرف اتخذه و يريحني دائماً بدون ما ادخل في العقوق او الاثم..
ابي ابني نفسي..ادلع نفسي.. بدون مااقصر على امي شرعاً..
الان حامل بالثاني..
وراتبي مثل ماقلت مصاريف سواق وشغالة امي..وقرض.. والان بيزيد القرض ضعف بسبب شرائنا للبيت.. وبيبقى من راتبي1000 ريال فقط..واللي بيبقى مع زوجي يادوب يكفي مصاريف البيت وفواتير ..
والمبلغ اللي بيبقى معي مايكفي احط عيالي بالحضانه اذا صرت بالدوام.. وماقدر احطهم عند امي بحكم بُعد البيت عن بيتي ودوامي..
فكرت آخذ الشغاله من امي بحكم ان مابقى لها الا 9 شهور وتسافر واخليها عندي تمسك طفلي..واعوض امي شهريا ب 500 ريال ..
بس خفت انه يكون عقوق اني آخذ شغالتها اللي انا جبتها..
ابي لما اطلع مطعم او اسافر مااحس بالذنب لاني مااخذت امي معي.. او اني قصرت معها..
صرت اعلم امي وين رحت ووين جيت ووش اكلت لانها تظن ان معي فلوس ومابي اعطيها وهي مجرد جزء مستقطع للترفيه من رواتبنا مثلنا مثل اي شخص..
كثير اسمع استشارات و اقرا مشاكل من ابناء لاهلهم..
يكون الرد : انتبه هذا عقوق..!
امي واحنا صغار اسمعها تكرر .. اذا سويت كذا معي عيالك بيسوون فيك نفسي الشي..
لدرجة خايفه ان شكواي هذي عقوق💔
عشان كذا انا عندي هاجس من العقوق وخوف منه..




 

 

حورية3 غير متواجد حالياً
Facebook Twitter 0 اضافة رد مع اقتباس
قديم 30-07-2017, 01:33 PM   #3
تايد مع مبيض
حكيم عيادة الإقلاع

 
الصورة الرمزية الخاصة بـ تايد مع مبيض
تايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحبتايد مع مبيض فوق  هام السحب
حورية ..
مهما سويتي ما راح تغيرين أمك .. و نظرتها تجاه أخوانك
لكن تقدرين تغيين أخوانك و تنبهينهم بخصوص مسئوليتهم تجاه امهم و البيت اللي هم ساكنينه

هم المفترض ياخذون زمام الأمور و يتعبون على أمك .. انتي ما قصرتي .. تساعدين باللي تقدرين عليه .. لكن هم بكل بجاحه متهاونين.

اذا هم متخرجين من الثانوي ولا لقوا جامعه تقبلهم .. الآن فيه معاهد مهنية و الا تقنية .. و الا عسكريه .. بحيث انها تعلمهم حرفه يعيشون عليها ..
اذا اخوانك كل ما احتاجوا شيء راحوا لأمك .. و امك باعت اغراضها او تسلفت عشانهم .. ما راح يحسون بالمسئولية .. و لا راح يشقون طريقهم في الحياة ..

انا اشوف التصرفات اللي انتي تسوينها و بظنك انك تتحاشين العقوق .. هي اللي مسببه لك المشاكل .. ليه تجيبين شغاله لأمك؟ هل تشوفين الشغاله شيء أساسي و الاكمالي؟ ما عندك أخوات في البيت؟ اخوانك ما يرتبون غرفهم و امورهم؟
اذا انتي تشوفينها اساسي .. برأيي شغاله تجي 3 مرات في الاسبوع تنظف و تغسل و تكوي .. ب 600 -800ريال افضل من 1500 ريال كراتب و اكلها و اقامة و تذاكر

خصوصاً ان البلد بيصير فيها تغييرات كثيره جداً .. و بترتفع الأسعار .. من ناحية مواد غذائية او اسعار الطاقة .. كالكهرب و البنزين .. او سعر الموية.

1- ان اخذتي الشغاله من امك .. بتزعل و تشره عليك .. لذا من الآن بلغيها .. يا امي يا حبيبتي .. ترى ان راحت الشغاله ما اقدر اجيب لك ثانيه او اعطيك راتب لشغاله .. والسبب ان راتب خمسة الاف .. يروح لراتب السواق و لقرض البنك سواءً الشخصي او حق البيت)
2- حاولي تشيلين يدك من مصاريف أهلك .. مع شرح الأسباب اللي ذكرتيها .. و بلغي امك قبل بفتره عشان تمهدين للموضوع و ما تحطينها قدام الأمر الواقع و تقول ليه ما فلتي لي .
3- موضوع الثلاجه فاضيه حاولي تتحاشينه .. لذا .. مقاضي بيتكم كخضار و فواكه .. روحي لم سوق الخضار سواءً في الشرق او الشمال كل سبت .. و اشتري بالصندوق .. و اقسميه بينك وبين اهلك .. ما يكلفك ولا 150 ريال في الاسبوع اذا انتي من النوع اللي ينوع بالخضار.
4- امسكي اخوانك انتي و اخوك الكبير و شبوا عليهم .. يدورون لهم وظيفه او معهد .. لابد يستشعرون بقيمة الحياة و ان الواحد لابد يتعب عشان يحصل شيء

...



 

 

تايد مع مبيض غير متواجد حالياً
Facebook Twitter 0 اضافة رد مع اقتباس
قديم 30-07-2017, 01:33 PM   #4
حورية3
مستجد
حورية3 تقييمه فيه تقدم
إقتباس »
الرسالة الأصلية كتبت بواسطة تايد مع مبيض »
حورية ..
مهما سويتي ما راح تغيرين أمك .. و نظرتها تجاه أخوانك
لكن تقدرين تغيين أخوانك و تنبهينهم بخصوص مسئوليتهم تجاه امهم و البيت اللي هم ساكنينه

هم المفترض ياخذون زمام الأمور و يتعبون على أمك .. انتي ما قصرتي .. تساعدين باللي تقدرين عليه .. لكن هم بكل بجاحه متهاونين.

اذا هم متخرجين من الثانوي ولا لقوا جامعه تقبلهم .. الآن فيه معاهد مهنية و الا تقنية .. و الا عسكريه .. بحيث انها تعلمهم حرفه يعيشون عليها ..
اذا اخوانك كل ما احتاجوا شيء راحوا لأمك .. و امك باعت اغراضها او تسلفت عشانهم .. ما راح يحسون بالمسئولية .. و لا راح يشقون طريقهم في الحياة ..

انا اشوف التصرفات اللي انتي تسوينها و بظنك انك تتحاشين العقوق .. هي اللي مسببه لك المشاكل .. ليه تجيبين شغاله لأمك؟ هل تشوفين الشغاله شيء أساسي و الاكمالي؟ ما عندك أخوات في البيت؟ اخوانك ما يرتبون غرفهم و امورهم؟
اذا انتي تشوفينها اساسي .. برأيي شغاله تجي 3 مرات في الاسبوع تنظف و تغسل و تكوي .. ب 600 -800ريال افضل من 1500 ريال كراتب و اكلها و اقامة و تذاكر

خصوصاً ان البلد بيصير فيها تغييرات كثيره جداً .. و بترتفع الأسعار .. من ناحية مواد غذائية او اسعار الطاقة .. كالكهرب و البنزين .. او سعر الموية.

1- ان اخذتي الشغاله من امك .. بتزعل و تشره عليك .. لذا من الآن بلغيها .. يا امي يا حبيبتي .. ترى ان راحت الشغاله ما اقدر اجيب لك ثانيه او اعطيك راتب لشغاله .. والسبب ان راتب خمسة الاف .. يروح لراتب السواق و لقرض البنك سواءً الشخصي او حق البيت)
2- حاولي تشيلين يدك من مصاريف أهلك .. مع شرح الأسباب اللي ذكرتيها .. و بلغي امك قبل بفتره عشان تمهدين للموضوع و ما تحطينها قدام الأمر الواقع و تقول ليه ما فلتي لي .
3- موضوع الثلاجه فاضيه حاولي تتحاشينه .. لذا .. مقاضي بيتكم كخضار و فواكه .. روحي لم سوق الخضار سواءً في الشرق او الشمال كل سبت .. و اشتري بالصندوق .. و اقسميه بينك وبين اهلك .. ما يكلفك ولا 150 ريال في الاسبوع اذا انتي من النوع اللي ينوع بالخضار.
4- امسكي اخوانك انتي و اخوك الكبير و شبوا عليهم .. يدورون لهم وظيفه او معهد .. لابد يستشعرون بقيمة الحياة و ان الواحد لابد يتعب عشان يحصل شيء
شكراً اخوي على التجاوب والرد
كلامك صحيح وحلولك منطقية





ياليت يتم نقل موضوعي عام لتجاوب الجميع

.....



 

 

حورية3 غير متواجد حالياً
Facebook Twitter 0 اضافة رد مع اقتباس
قديم 30-07-2017, 01:52 PM   #5
raneem4
حكيم عيادة الإقلاع
 
الصورة الرمزية الخاصة بـ raneem4
raneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحبraneem4 فوق  هام السحب
رد : مالي..امي..الخوف من العقوق

أشوف الحل الأنسب انك تجمعين خواتك و أخوانك وتخصصون حساب للوالده وتحولون فيه كلكم 500 كل شهر وهالـ 500 تخصص لجوالها وراتب الخدامه و ممنوع أحد من العيال ياخذ منه
ويكون الحساب بيدك أو يد أختك أو أخوك الكبير الموظف ! مو أحد من العاطلين !

+ انك تجمعين اخوانك الـ 4 وتتكلمين معهم أن أمك خلاص كبرت ومحتاجه وتبي منهم وهم وراهم زواج وبيوت ومسؤولية لازم يعتمدون على أنفسهم

+ أنا من رأيي انك ماتقولين لـ أمك عن أمور الرفاهيه مثل طلعتي أفطرتي برا او رحتي أو شي لانها راح تشوف هالجانب فيك بس ! ما راح تشوف انه مره بالشهر و على قولتك تشوف أنها أولى فيها !

حاولي تشجعين أمك على مشروعها مثل صديقاتي بيطلبون منك وفلانه عجبتها قهوتك وممكن تقترحين عليها تمسك أطفال الجيران الموظفات بمبلغ لو 500 ريال نهاية الشهر ممكن يطلع لها 1000-1500 .



 

 

raneem4 غير متواجد حالياً
Facebook Twitter 0 اضافة رد مع اقتباس
قديم 01-08-2017, 04:04 AM   #6
ف ’ ـم :|
من كبار شخصيات الإقلاع
 
الصورة الرمزية الخاصة بـ ف ’ ـم :|
ف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحبف ’ ـم :| فوق  هام السحب
رد : مالي..امي..الخوف من العقوق

انا اتفق بس بعد ليش مثلا ماتبين امك تطلع معك مطعم سوق اي مكان
مستحيل كل مكان تروحين له زوجك معك وان كانت فما تضر طلعه لامك كل اسبوعين مثلا او اسبوع
اشوف لها حق عليك وما حد اهتم لك ولا كبرك ورعاك واهتم فيك وخلاك حرمه كبيرة ومتزوجه الا امك
عشان كذا اقول لو تنفقين فلوسك كلها ريال ورا ريال عليها ما وفيتيها حق طلقه من طلقاتها فيك
امك مهما تسوي تبقين تحتها وماترتفعين فوقها مهما حصل اذا تبغين ربي يبارك لك بمالك وزوجك وولدك
الام مقرونه مع الله في العباده فما بالك باشياء تافه
راجعي نفسك وضميرك وغيري من نظرتك للامور
امك يمكن تحتاج اهتمام اكثر من بعد موت ابوكم
وبخصوص انها تترك اخوانك يمكن خايفه عليهم ينحرفون فتقول ماعنده ولا ريال احسن من تجيه فلوس يصرفها على الحرام
مع اني ضد هالشيء بس اتوقع امك كذا تفكيرها لانها تخاف عليهم من انفسهم
وهي المسؤله عنهم ولسى مراهقين
عشان كذا اقترح تحفزين اخوانك للعمل حتى لو براتب 3000 او 6000
كويسه تمشي حاله بس امك ماتقطعين منها شيء ما توفينه لها بسنين عمرك



 

 

ف ’ ـم :| غير متواجد حالياً
Facebook Twitter 0 اضافة رد مع اقتباس
قديم 01-08-2017, 04:35 PM   #7
Rere yasi
مستجد
 
الصورة الرمزية الخاصة بـ Rere yasi
Rere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحبRere yasi فوق  هام السحب
رد : مالي..امي..الخوف من العقوق

السلام عليكم ورحمه الله
.
.
.
أمك قاسية وحساسة وإنتي عايشه دور المظلومة المضطهدة
حبيبي شوفي إنك كملتي تعليمك وتوظفتي وتروحين وتجين وفتحتي بيت وفوق ذا تحاسبين أمك .بعدين هي عارفة إن عيالها مايسمعون كلامها إلا بالبخشيش ولا لوكانت تعاملهم زي ماتعاملك كان كل واحد ضرب الباب وزعل ثقي تماماً إنها ماتعاملك بجفاء إلا لأنها عارفة بنتها وتطمن لك أكثر وحده ومن بينهم كلهم ولا ماكان تجرأت وبتسافر معك وأرجع أقولك أنتي عايشة دور المظلومة راجعي نفسك.



 

 

Rere yasi غير متواجد حالياً
Facebook Twitter 0 اضافة رد مع اقتباس
قديم 04-08-2017, 05:08 AM   #8
WLA3H
خبير إقلاعي مميز
 
الصورة الرمزية الخاصة بـ WLA3H
WLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحبWLA3H فوق  هام السحب
رد : مالي..امي..الخوف من العقوق

الحل انك لا ترخين ريالك
والكل بيفز يدور له على وظايف



 

 

WLA3H غير متواجد حالياً
Facebook Twitter 0 اضافة رد مع اقتباس
قديم 05-08-2017, 08:24 AM   #9
Neemo.o
عضو مقلع
Neemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحبNeemo.o فوق  هام السحب
رد : مالي..امي..الخوف من العقوق

إليّ صدمني كنتي تعطين ا امك 500 مقابل تمسك طفلك مع ان مافي حضانه في العالم ب500 ريال
عزيزتي انتي جبتي الخدامه تحملي خليها تكمل عند امك لين تخلص
ثانيا انتي مانتي مجبوره تدفعين في البيت الا اذا بيكون مكتوب باسمك واسمه
ثانيا من حق امك عليك اذا انتي يمشي لك راتب وهي راتبه قليل تمشين لها.
انتي قلتي حكومي يعني مايقل عن 6000 يعني يمديك شهريا تحولين لامك 1500 وبالمناسبات حولي لها 2000 رمضان عيد شوفي البركه في مالك
بخصوص السفر اشوف عادي انها مره تروح معك ياكافي رايحين رايحين والاكل والشرب بتآكل معكم يعني امك ماتاكل الا مفطح يوم بتثقل عليكم
انتي مشكلتك متثاقله امك مشروع القهوه الي فشلت فيه كمليه انتي والأرباح عطيها اياها
الخطا الوحيد الي سويته قرض السياره. اخوانك مو ملزومه فيهم رجال يديرون نفسهم بس امك لها حق عليك
الله يحننن قلب ك على امك ويحنن قلبها عليك
ويرزقها وماتحتاج احد من عيالها ان شاءالله



 

 


اخر تعديل كان بواسطة » Neemo.o في يوم » 05-08-2017 عند الساعة » 08:25 AM.
Neemo.o غير متواجد حالياً
Facebook Twitter 0 اضافة رد مع اقتباس
قديم 05-08-2017, 09:47 PM   #10
_الجوهرة_
عضو متميز
 
الصورة الرمزية الخاصة بـ _الجوهرة_
_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب_الجوهرة_ فوق  هام السحب
رد : مالي..امي..الخوف من العقوق


حبيبتي ماراح أرد عليك رد مثالي بعيد عن الواقع
أمك بري فيها وصليها وكلميها كل يوم وزوريها بالاسبوع مرة ومرتين واذا زاد مالك عطيها بالمعروف وهدايا في المناسبات بالعيد ورمضان وبس
بحيث شي ماينقص عليك لا أكلك ولا شربك ولا ترفيهك البسيط ولا حضانة عيالك ولا بيتك المستقبلي
يكفي مال التقاعد لأمك ١٥٠٠ + خدامة ١٥٠٠ وكان عليك بعد قيمة استقدامها
البيت مافيه الا هي بلحالها وتكفيها وزيادة واختك متزوجة وأخوانك أصغر واحد طالب جامعي عنده مكافأة يعني محد يحتاج ينصرف عليه!

أخوانك اذا قل المصرف عليهم وهم رجال بالثلاثين ونصف العشرينات بيروحون يدورون لهم رزق موب عالة عليك ولا ملزومة تصرفين ولا تطلعين لهم قروض ولا تصلحين لهم سيارات ولا مصاريف يومية أبدا ..
غصب عنهم اذا مالقوا شي بيديهم بيدورون مال لهم
هذا الدلال الزايد خربهم وصاروا لا مسؤليين
ارفعي يدينك عنهم نهاااااااااائي كأن ماعندك شي ولو عندك فلوس الا مثل هدية زواج أو نجاح غيره يقومون يتحركون يدورون رزقهم بدال ماهم عالة على غيرهم !


اللحين مايبقِى من فلوسك بعد التضامن الا ألف ريال يعني يالله يكفي مصاريفك العادية
وحتى مايكفي حضانات عيالك
دورك اللحين تلتفين لنفسك وتبنين لك بيت وتدرسين عيالك وتتهنين بفلوسك وتعبك وتقضين ديونك

وشغالة أمك خليها عندها الين يخلص عقدها وتعاقدي انتي وأخوك معاك وأختك في شركة التي تجي بالساعة لأمك فقط

شدي شوي عليهم ماعليك من ردة فعلها ولا فعل أخوانك شوي ويتعودون على وضعك الجديد ماانتي ملزومة بهم دامهم بصحتهم ويقدرون يشتغلون وأمك عندها راتب تقاعدي وخدامة.
والله يفتح على أخوانك ويحسون بأمهم لأن هم المفروض الي يشوفون مستقبلهم ويصرفون على أمهم
وابدا انتي ماشاء الله بعيدة كل البعد عن العقوق .. الزيارة ولين الجانب والتقرب للأم وطاعتها هو البر مو فقط بانفاق مالك كله على أخوانك الرجال !




 

 

_الجوهرة_ غير متواجد حالياً
Facebook Twitter 0 اضافة رد مع اقتباس
إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح

الإنتقال السريع


الوقت المعتمد في المنتدى بتوقيت جرينتش +3.
الوقت الان » 06:21 PM.

الأن حمل تطبيق منتديات الإقلاع
 

تنبيه : كل ما يطرح من مشاركات يمثل رأي كاتبه ولا يمثل رأي إدارة الموقع

ترقية وتطوير » تحميل دوت كوم
Powered by: vBulletin Version 3.8.11
Copyright ©1999 - 2017, Jelsoft Enterprises Ltd.
جميع الحقوق محفوظة منتديات الإقلاع - شبكة الإقلاع -1999-2017