مساكم الله بالخير
والرضا ..
كل مافي الموضوع ان صديقتي قبل فتره حكت لي عن سالفة او بالأصح موقف حصلها
كان مضحك ومؤلم بنفس الوقت
قلت ليه ما انزله هنا واشوف نفسياتكم
قصدي آرائكم ..
لو واحد مكان البطله وش بيسوي /تسوي ؟
صديقتي هذي الله يعينها مااختلفوا أبد كل المشايخه اللي قرت عندهم عن اصابتها بالعين وبعضهم قال يمكن سحر ....بسبب المشاكل اللي تتمشكل فيها في كل وظيفه تحصل عليها ...
وطلاقها السابق ...وملكاتها من بعده اللي ما تدوم أكثر من أسبوع ....ومصايب كثيره الله ياجرها وماشالله عليها هي صابره ومثابره ومن قلب تعمل بالاسباب وعندها امل كبير الله لا يخيبها ,,
الموهم ..
وفي ذاك اليوم قال لها الشيخ ...ألحي بالدعاء الليله في صلاة الليل ان الله يوريك اللي اصابتك بالعين .....يمكن الله ما يحرمك وتاخذين من أثرها !!
سوت اللي قالها ودعت الله من قلبها ونامت
ورأت في منامها عّمة زوجها السابق تتقلب بين حيات !!!!
وصحت
مفزوعه !! وبنفس الوقت مستغربه
لأن اللي شافتها إنسانه تعزها ولا توقعت يجي منها هالشي !!
واتصلت على الشيخ وعلمته وقال : عادي يمكن تكون عين اعجاب اللي صكتك فيها ...المهم انتي جا دورك ودبري نفسك وخوذي منها ..
شوفي مكان تكون ماشيه عليه درج أو زي كذا ..وجيبي فوطه رطبه وامسحي أثرها واعصريها واغتسلي به ...
المشكله ان علاقتها فيهم منقطعه ولا في أمل تروح لها أو تكلمها ولا قدرت حتى توصي أحد ...
حاولت , وحاولت , وحاولت , ماش ما لقت حل الا انها تروح بنفسها ....
وفي صباح يوم باكر ...واختارت الصبح لان المره اللي هي العّمه موظفه ..وقالت أفضل بتصير العتب طازه !!وتوها واطيه عليها ..وبتنجح المهمه
وراحت الضحى ......ولكن كنها حست انها ضيعت في الباب
...احتارت بين اثنين!!!!
قالت للسواق وقف !!
نزلت ,,,ورنت جرس واحد منهم ..
ردت الشغاله ::مين؟؟؟؟
هي:بيت الفلان ؟
الشغاله :إيوه ,مين ؟
هي
........وراحت تركض تجيب الفوطه الرطبه بتمسح العتبه
لكن وهي راجعه تفاجأت بسياره واقفه خلف سيارتها
طلعت العمه وزوجها مستاذنه و راجعه للبيت لأن ولدها مريض...وتفاجأوا بهاللي ترنرن بابهم
{شكلهم يحسبونها شحاذه ولا سحاره ولا من هالعصابات ولا بتخطف أحد!!!!!!!!؟؟؟؟؟؟؟؟؟ }
صديقتي حاولت تخلص نفسها منهم هي وفوطتها الرطبه خخخخخخخخخخخخ
وركبت وانسحبت ...لكن الرجال حط مرته وراح يلحقها !
وهي قامت تفرفر على بالها بتضيعه ...لين أشّر هو للسواق ووقفهم
تقول حاولت استقوي عليه :ونزلت القزازه وقلت خير ياخوي ؟
قال انتي اللي خير ...تدورين وتحورين عند بيوت العالم بهالضحويه وتنافخين بعد يابنت الفلان
<<طلع اسمها من رقم السياره بظرف دقايق ..
وقال عالعموم ...دقايق واستدعي محمد الفلان نتفاهم معه يشوف لنا حل معك << محمداخوها اللي باسمه السياره . << بيغسلها غسل
هي:
تكفى الله يخليك طلبتك ان تخليني ..وانا اعرف ام فلان زوجتك والليله بكلمها واعلمه السالفه تكفى
هو رحمها واخلى سبيلها ...وهي فركت لبيتهم ...وفي الليل دبرت رقم المره وكتبت لها رسالةٍ
طويلةٍ عريضه ...شرحت سوء حالتها وظروفها القاسيه , وسبب جيتها وغرضها..وارسلتها لها .....
توقعون العمه وش كان موقفها ؟؟
.
.
.
.
.
.
.
.
تقول زميلتي من بكرا ارسلت لي رساله (خوذي المويه اللي عند بابكم ..توضأت بها وربي يشهد ..وأسأل الله أن يطهرك ويشفيك)
...وش رايكم ..وربي انه انسانه
عاد انا اقول العين حق ...ولا أحد يبرىء نفسه ...ياترى لو احد طلب منا مثل ما طلب من العمه كيف بتكون ردة فعلنا ؟!
الرسول صلى الله عليه وسلم يقول (واذا استغسلتم فاغتسلوا ) بس انا اتكلم عن التطبيق هل حنا
فعلا بنتفاعل
ولا بنقول: وع من زينها وش انحتها عليه
.........................
وبس أعذروني ,,ترى الموضوع وليد اللحظه
وكان ودي اسرد أحاديث وأحداث بس
(
) << لي انا وياكم