PDA

عرض كامل الموضوع : افضل مكتبه بالرياض ...!!!!!


كوكب زحل
02-03-2007, 11:53 AM
السلام عليكم و رحمة الله وبركاته ...

اخواني و اخواتي الله يعافيكم ....

ياليت تعطوني اسماء افضل مكتبات لبيع الكتب بالرياض ... يعني من ناحية وفرة الكتب و قوتها في المكتبه ...؟؟

انتظر اجابه بارك الله فيكم ,,,,

باهي1
02-03-2007, 03:25 PM
انا اعتقد المكتبة التراثية على طريق الملك عبدالله

فاصخ مخه
02-03-2007, 03:33 PM
التراثية حراميه ...سرقه عيني عينك

والله قبل تقريباً شهر اشتريت رواية رأيت رام الله لمريد البرغوثي ب 30 ريال

تفاجأت لما حصلتها في جرير ب 16 ريال


وروايات كثيرة والله احصلها ب60 و70 ريال وصفحاتها ماتتجاوز ال 500 ورقة

مع انها موجودة في أغلب المكتبات

ليه السرقة بس ؟ استغباء ولا استغفال ولا أنا حرامي شوفوني ؟


غريبه المكتبة هذي لها زبائنها مع ان تعاملهم مع الزبون زفت فوق ما انهم حرامية

وسَن القناديل
02-03-2007, 03:38 PM
^
^
يؤ!!
معقولة ؟؟
بالعكس دائما ً لما أجي أشتري من عندهم أقارن بين أسعارهم وأسعار جرير ماشوف فيه فرق " أقصد بالروايات وكتب الفكر "
بحكم إني معششة بالمكتبات عندي فكرة عن أسعار الكتاب من مكتبة لثانية , ولا شفت إن المكتبة التراثية مبالغة بالأسعار
ممكن تفرق بـ ريال ,ريالين بس !!
أذكر إني اشتريت من عندهم رواية " الحرب والسلم " لـ / ليو تولستوي بـ 150 ريال ( 4 مجلدات ) , أشوف سعرها معقول جدا ً
والمجلد الواحد ضخم ضخم جداً .. ولما رحت لجرير لقيتها عندهم بـ 149 ريال, فرق ريال يعني : D

أما بالنسبة لتعاملهم .. مادري صراحة أحس عادي أذكر اليمني " مشرف المكتبة سابقا ً " كان بشوش ويخدم وزيادة ..
والسوداني " مشرف المكتبة حاليا ً " ماشفت منه شر .. بس لا تلومه المكتبة كلها فوق راسه وماشاء الله زوارها كثييرر

لا تقل " لأنك إمرأة ,تختلف المعاملة " رجاءً :D
-------------

أهلاً .. زُحل

حاليا ً أرى أن المكتبة التراثية " الكتاب حاليا ً " توفر كُتب جيدة ..
وأيضا ً أرى أنها توفر كتب تحت تصنيف ديني ممتاز ..

هناك مكتبة العبيكان .. توفر كتب جامعية " ذات أسعار معقولة "
بعكس مكتبة جرير تستغل حاجة الطلبة
أذكر أني قد ابتعت كتاب جامعي وكان سعره 90 ريال
وبنفس المشوار ذهبت لمكتبة العبيكان وبمحض الصدفة
وجدت الكتاب أمامي فلما رأيت ثمنه كان بـ 30 ريال !!

لذا دع جرير آخر مكتبة تذهب إليها ..
ابحث في مكتبة العبيكان فإن لم تجد كتابك حينها توجه لجرير ..

أيضا ً هناك مكتبة " دار المريخ "
تقريبا ً هي مكتبة جامعية لكنها تحوي كتب متنوعة الاتجاهات ..
تهتم بكتب العلوم التطبيقية / الطبية وغيرها من التخصصات الجامعية ..

مكتبة المناهل أيضا ً جيدة ..
مكتبة ابن رشد " يطغى عليها المجال الديني "

عموما ً .. العبيكان والكتاب في الصدارة ..

أتمنى أن تكون إضافتي ذات إفادة ..


وسَن ..

مس شموسه
02-03-2007, 03:49 PM
شف اذا كتب دينية او عربية او تاريخية عندك الرشد حلوة ورخيصة وكتبها اتعب وانا اقول قيييييمة والحلو يجيبون لك الكتاب باكثر من طبعة وتحقيق يعني تبيه ملون والا ابيض واسود :D غلافه يجيب الهم والا عليه رسومات اللي تبي >>> بزر مهيب جامعية pb095

العبيكان مبدعة بالكتب المتخصصة
جرير مبدعة بالكتب المترجمة
التراثية بالكتب الممنوعة

بس نصيحة
ياخي ربعنا مرة يبالغون بالاسعار
اذا تعرف احد في مصر وصه على اللي تبيه ;)
قيمة الكتاب عندهم بقيمة شوكلاته عندنا pb034

وسَن القناديل
02-03-2007, 04:04 PM
شف اذا كتب دينية او عربية او تاريخية عندك الرشد حلوة ورخيصة وكتبها اتعب وانا اقول قيييييمة والحلو يجيبون لك الكتاب باكثر من طبعة وتحقيق يعني تبيه ملون والا ابيض واسود :D غلافه يجيب الهم والا عليه رسومات اللي تبي >>> بزر مهيب جامعية pb095

العبيكان مبدعة بالكتب المتخصصة
جرير مبدعة بالكتب المترجمة
التراثية بالكتب الممنوعة

بس نصيحة
ياخي ربعنا مرة يبالغون بالاسعار
اذا تعرف احد في مصر وصه على اللي تبيه ;)
قيمة الكتاب عندهم بقيمة شوكلاته عندنا pb034




معليش تحمست للموضوع ..

حي الشميسي بعقب على نقطة

بس نصيحة
ياخي ربعنا مرة يبالغون بالاسعار
اذا تعرف احد في مصر وصه على اللي تبيه ;)
قيمة الكتاب عندهم بقيمة شوكلاته عندنا pb034

أنا كنت أقول كذا .. وسمعت أن كتبهم برخص التراب ويبيعونها بالشوارع
كنت أنتظر متى أروح لمصر عشان أحمل من هالكتب
بس يوم رحت :confused:

كتبهم أغلى من كتبنا بكثيرر .. خصوصا ً الكتب السعودية !!
أذكر شريت كتاب لعبدالله باجبير .. صغير هو حجمه
مثل حجم كتاب " لاتهتم لصغائر الأمور فكل الأمور صغائر " إذا كنتِ تعرفينه ..
ماذكر كم سعره بالضبط بس كان أغلى من عندنا ..

يستغلون السياح pb093 ويسعرون الكتب على كيفهم ..

يعني امسك قردك لايجيك اللي أقرد منه:D
بلا مصر بلا هم ..
متى أروح للساقي بس : (


وسَن ..

مس شموسه
02-03-2007, 05:36 PM
تدري مرة وصينا مصري يجيب كتب
ويوم جابها قلنا لازم نعطيه المبلغ ورفض قام اخوي وطلع مية مدري ميتين ورفض
قال انه مكسوف اوي لان المبلغ ماينذكر ابد
الخلاصة ان الكتب كان سعرها حاجة بالعشرات مدري 30 او 40 او اقل بعد وحلف ماياخذ المبلغ :D

باختصار شكله ملعوب عليك pb095
وال ان الكتب اللي انت ماخذها سعودية واي شيء سعودي غالي
لان الكتب اللي طلبتها كانت لجبران وتوفيق الحكيم جبران كانت حلوة طبعته مرة بس تبع الحكيم اوراقه كانها اوراق ساندوتش مرة متعبة في القراءة pb036

باختصار متى اروح مصر pb189

بارق الشوق
02-03-2007, 06:11 PM
هلابك ياسيدي

والله المكتبات في الرياض كثير بس الجيد قليل

عندك من أفضل المكتبات :

المكتبة التراثية

متوفر فيهاأغلب الكتب

بس مبالغين في الأسعار

جرير لاباس بها

بس جرير ابداعهم كما تفضل الأخوان في الكتب المترجمة

والعبيكان متخصصة بشكل كبير يعني اذا نت تبحث عن كتب في مجال الاعلام

روح الى العبيكان ولاتشاور لان العبيكان تجد فيها مبتغاك

والرشد أسلامية متطووور جداً

بارق الشوق
02-03-2007, 06:16 PM
والله يااخوان من ناحية في مصر الكتب برخص التراب

هذا كلام واقعي مره

والله الكتب عندهم رخيصة جداً لدرجة لاتتصور

بس ياأخون لاترحون للبسطات اللي في شارع جامعهة الدول عند هارديز وتبغى كتب رخيصة معصي

روح للكشكات اللي في سور الازبكية والله راح تلقونها رخيصة مره

اما تروح للمنطقة للسواح العرب والخليجين وتدور الرخيص مش معقول الكلام ده

مس شموسه
04-03-2007, 05:47 PM
لو سمحتوا ارقام المكتبات الله لايهينكم
بدينا الترم وماعندي كتب :sm1:
شلون ادرس

Bloodthirsty
04-03-2007, 06:12 PM
انا اكثر شي احب العبيكان والقويفل وفيه مكتبه رهيبه بالعليا بس نسيت اسمه الظاهر الخرجي

عباير اقلاع
05-03-2007, 09:47 AM
ماعليش ممكن تعطوني وصف المكتبه التراثيه لاني ما اعرفها الصراحه وودي اروح لها واجيب لي كم كتاب فرصه ؟

وسَن القناديل
05-03-2007, 11:35 PM
^
^
إذا تعرفين ( ممشى طريق الملك عبدالله ) راح تحصلين المكتبة على نفس إمتداد الممشى بس قبل
واضحة مرة ..

بس لو أعرف من وين تجين أني شرق ولا غرب ولا شمال

إذا كنتي جاية غرب ( من عندي ستي بلازا ) بتجيكِ اشارة تعديها وابتلي بيجيك خط خدمة ادخلي منه تلقين المكتبة على يمينك ِ ولوحتها كبيرة مرة مكتوب عليها الكتاب .

أتمنى إنكِ عرفتي ..

وسَن

عباير اقلاع
06-03-2007, 09:11 AM
مشكوره وسن ماقصرتي

!..أبو يـارا..!
06-03-2007, 11:05 AM
هناك مكتبة العبيكان .. توفر كتب جامعية " ذات أسعار معقولة "
بعكس مكتبة جرير تستغل حاجة الطلبة
أذكر أني قد ابتعت كتاب جامعي وكان سعره 90 ريال
وبنفس المشوار ذهبت لمكتبة العبيكان وبمحض الصدفة
وجدت الكتاب أمامي فلما رأيت ثمنه كان بـ 30 ريال !!

غريبة

جرير عندي أرخص بكثير ..كتب الجامعة أحصلها في جرير
أرخص من العبيكان ..وأغلب الشباب عندنا في القسم مقاطعين العبيكان
بسبب التلاعب في الأسعار ..! أتذكر خذت مجموعة كتب للجامعة من جرير بـ 560
وخذها واحد ثاني من العبيكان بـسبعميه ومدري كم ..!

.

.

أما مكتبة التراثية فحدث ولا حرج :D
الله يصلحه صاحب المكتبة مايعرف يتلاعب بالأسعار أبداً
يعني الفرق لا خمسة ولا عشرة ..الرجال يضرب بالمليان 30 و40 ريال :D
لو تلاحظون أسعار روايات عبده خال وعبدالرحمن منيف أسعارها توصل الـ 70 ريال
والغريب أن الأسعار تتغير ..ساعة يرفعونها وساعة ينزلونها ..!

عندي رواية للدكتور غازي صفحاتها تقريباً 215 ورقة
سعرها 30 ريال ;) ..سعر مبالغ فيه جداً
رواية مثل هذي مايتجاوز سعرها الـ 15 ريال ..!

كمان فيه رواية " سقف الكفاية " سعرها في جرير 30 ريال
وفي التراثية تقريباً 45 ريال ..!



عباير إقلاع

ماعليش ممكن تعطوني وصف المكتبه التراثيه لاني ما اعرفها الصراحه وودي اروح لها واجيب لي كم كتاب فرصه ؟


اذا ضعتي هذا رقمه ..2255170 عبدالرحيم ..!

وسَن القناديل
06-03-2007, 01:42 PM
^
^
ممكن أسعارهم بالكتب العربية أرخص !!

(( فعلا ً الكتب العربية أسعارها معقولة ..
حتى أذكر إني أشتريت من العبيكان كتاب
كان سعره أغلى من جرير ))..

لأن أغلب اللي أخذهم من مكتبة جرير تكون أجنبية ..
وأسعارهم مرة عالية كتاب مايتعدى 100 صفحة بـ 90 أو أكثر

..

أما بالنسبة للمكتبة التراثية .. فما حصل لي وصادفت غش بالسعر
والله مستغربة من كلامكم !!

عموما ً ..
إذا الكتاب متوفر بمكتبة ثانية ممكن تتصل عليهم وتشوف كم سعره , أما إذا كان موجود بس بالتراثية
مالك إلا تدفع .. :/


كل مكتبة فيها الجيد / السيئ ..

وسَن ..

R. Emerson
08-03-2007, 12:12 AM
التراثية حرامية من جد والله أنا حرمت أشتري من عندهم.

جرير متميز بالانجليزي بلا شك واللي يقراء بالإنجليزي راح يلاحظ. وأسعارهم طيبة ومعظم كتبهم بسيطة يعني مو متخصص مثل العبيكان كل شيء عنده بالعربي ماشاء الله. الأسعار في العبيكان تكاد لا تذكر لكنها بلا شك مرجع اساسي للقراءة العربية.

موفقين

كوكب زحل
08-03-2007, 09:33 AM
الله يجزاكم خير ...

لكن وين الفرع الرئيسي للعبيكان ..؟؟؟

وسَن القناديل
08-03-2007, 05:50 PM
^
^
شكلك توك ناقل للرياض :D معقولة محد يعرف وين مكتبة العبيكان !

عموما ً هي بطريق الملك فهد مقابل برج المملكة ( تعرف المملكة ولا ؟:D) وهذا رقمهم :

4654424

وأظن فاتحين فرع في سوق غرناطة ..

وسَن ..

سميرا ميس
09-03-2007, 02:19 AM
بسم الله الرحمن الرحيم

السلام عليكم ..............

لوسمحتوا .....أنا مدمنة كتب تاريخية بس المشكلة إني طايحة في كتب جريرلحد النخاع وماتملي عيني غير كتبهم وأشوف

أسعارها جدا مناسبة عكس العبيكان ولو إنى فيها كتب قيمة جدا ورائعة بس المشكلة لما تخلص النسخة ما يجيبون

غيرها.......

تخيلوا في كتاب لي سنتين أسأل عنه وكل مرة يقولوا بعد أسبوع يوصل وأخيرا لقيته بمكتبة تهامة ........

بس سمعتكم تتكلموا عن مكتبة رشد ......ياليت تعطوني الوصف .....

ولكم مني جزيل الشكر..........

تقبلوا مروري...........

baas-jeddah
09-03-2007, 02:31 AM
ماذا عن مكتبات جدة

Q.U.E.E.N
09-03-2007, 11:32 AM
وش رايكم بمكتبة تهامة

انا دايم اشتري من عندهم توفر بعض الروايات اللي مالقيتها

عند جرير بس جرير اسعارهم معقولة

تحياتي

Q.u.e.e.n

Day 25
09-03-2007, 11:55 AM
انا اعتقد ان مكتبة الكتاب المستعمل هي احسن مكتبة :d

يمدحون لي مكتبة الرشد ولا رحت شفتها للحين...

بس سمعتكم تتكلموا عن مكتبة رشد ......ياليت تعطوني الوصف .....
هي مقابل وكالة ( لكزس ) اللي على طريق الملك فهد...

اذا كانك بتجينها تعالي لها مع طريق التخصصي كنك متجه للثمامه واول نفق بيقابلك ارقي معه يمين لا تنزلين وخلك ماسكه الخدمه لين يجيك تقاطع الملك فهد همن ادخلي يمين مع الاشارة بتلقينها على اليمين...

ان شاء الله وفقت في الوصف :d

سميرا ميس
09-03-2007, 03:23 PM
بسم الله الرحمن الرحيم

السلام عليكم .........

بس جدة ... أنا شفت أفضل مكتبات جدة...جرير في القمة دائما...العبيكان حاليا كتبها رائعة لأنها مفتوحة جديد...تهامة

فيها كتب نادرة. تقريبا مو كل المكتبات توفرها بس عيبها غير مصنفة ومرتبة محطوطة عشوائيا......

صحيح أختي كوين كلامك ...بس أسعارها شوي غالية...ومو كل الكتب متوفرة بس فيها كتب نادرة......

مشكورة أخوي 25 داي على الوصف كفيت ووفيت......... يعطيك العافية

تقبلوا مروري..........

عراب الاقلاع
15-03-2007, 06:03 PM
الله يخلي لنا البحرين :)

T U L I P
16-03-2007, 04:29 AM
..::..

ياليت تعطوني اسماء افضل مكتبات لبيع الكتب بالرياض ... يعني من ناحية وفرة الكتب و قوتها في المكتبه ...؟؟

مثل ما تفضلوا الاعضاء .. التراثيه ستجد كل الانواع ( مع انهم نصابين ) pb058 ..

وجـرير .. العبيكان .. وتهامه .. الخرجي ..


الكتاب المستعمل .. راح تحصلون فيه مُرادكم ... طبعا بعد ( التنبيش زين ) .. << لقيت كنوووووووووز وحالتها ممتازه pb030



يسعد أيامك bp039 ..

..::..

مس شموسه
16-03-2007, 11:37 AM
^
^
انتي سحلية مثلي ؟
بس بسالك متى تروحين لمكتبات الكتاب المستعمل
يختي كلللللللللللها رجال اذا رحت اطلع ورقة كاتبه فيها اسم الكتاب وهو يعطيني
وانا قلبي يفرك ودي ادور بين هالكنوز الثمينة بس ماالقى موطى لرجلي مرة استحي زحممممممة pb094

T U L I P
16-03-2007, 06:37 PM
..::..


^
^

هههههههههههههه ايه سحليه :D


يا قلبي انا اغلب طلعاتي تكون الصبح ( تكاد تخلو من الزحمه pb034 ) .. واحيانا العصر وبعد العشاء ..

بس ياختي ماني طاقـّه هالمشواااااار عشان اقول زحمه ( صدقيني اني استحي اكثر منك pb094 ) ..صحيح انه مرررره

ضيقه الممرات ويالله تكفي لشخص واحد ..

بس ما عليه ( ليدي فيرست ) << هالحكمه متعلقه فيها بس للاسف هينا ماحولك احد pb131


الله يعين بس pb030 ..


..::..

جـنــون مهـــرة
19-03-2007, 04:01 PM
ماتلاحظـون إنه المكتبات في الرياض قليلة ؟!

جرير أنا زعلانـة عليهم :( من غير مبالغة أروح لها بين فتـرة وفتـــرة والرفوف نفسها ماتغيرت !!

إلا من روايات ماأدري اللي راح يشتريها بكامل قواه العقلية :confused:

العبيكان سبحان الله ماأحبهـا آخر مره رحت لها قبل سنتين ويمكن أكثر وماأتذكر إني شريت منهم شيء !

مره رحت لمكتبة المؤيــد أغلبها مجلدات وكتب جامعية أكثر من إنها روايات حلوة أو كتب لموضوعات مميزة .

الكتب المستعملة ماقد دخلت لها ومابقى إلا هي بروح لها وإن شاءالله ألقى شيء يشبع عطشي :cool:






لا تقل " لأنك إمرأة ,تختلف المعاملة " رجاءً :D




اليمني كرهتــه لما كانت بفرعها القديم اللي بين مخرج 11 و10

معاملته بايخـــة وإنبسطت لما رحت لها بعدين وتغير وصار مكانه السوداني

ومسألة الحرامية ماقد قارنت لأني ماأصدق ألقى كتاب تعبت أدور عليه

لكن بركّز وبقارن المرة الجاية pb030

LaUoOoNa
22-03-2007, 12:48 PM
اذا لكتب الجامعه هذي المره رحت دار الزهراء جمب الخريجي
ومو متوقعه الاقي كتبي لاني كنت ابغى كتاب محدد طلعت مصدومه
لاني لقيت كل كتبي وهذي اول مره تصير لي بالعاده ادور الرياض
كلها وعلى مده اسابيع وبالموت احصل الكتب

فيه مكتبه بعد كويسه اسمها دار امام الدعوه للكتاب المستعمل
هي اسلاميه بس حلووه تلقون كتب نادره

معالي الوزيرة
25-03-2007, 11:04 PM
متى تسكر مكتبة الكتاب؟ أحد يعرف؟
هم رقمهم كذا صح؟ 2255170 ؟

Just Friends
26-03-2007, 04:19 AM
أخواني التراثية = مبالغة بالأسعار بس عندهم أشياء صعبه تلقاها عند جرير والعبيكان

جرير مميزة عندي أكثر من العبيكان

الرشد ممتازة جداً بعد

أختي الكريمة وسن فيه فكره نعطيك الفلوس وانتي تشترين لنا الكتب من التراثية لانك الوحيدة اللي ما اشتكيتي من أسعارهم ( صورة واحد طاق لطمة )

بالتوفيق