PDA

عرض كامل الموضوع : عيـــــب يــابنــــــت !!!


راعي العليا
07-08-2003, 04:46 AM
كتبت موضوعي الاول في منتداكم على استحياء وشجعني الاخ صحن شكشوكة والاخت الشيهانه :) ويوم كتبت هالموضوع حسيت ان بعض الافكار تنقصني وفكرت ارسل لكل واحد منكم بس خفت اطولها وهي قصيره همن تطيحون وجهي:( .. قمت استعنت بالاخت بنت نجد بحكم انها من شيبان الاقلاع مثلي :( وبصراحه ماقصرت وعطتني افكار ساعدتني وشجعتني واتمنى وكل امل ينال استحسانكم..
-------------------------------------

- هو: ليه كل شوي تطلعين من الماسنجر عسى ماشر ؟

- هي: يا اخي ابوي غثني مدري وش يبي ذا :( ؟

- هو: ياقلبي على الي يخافون ( يمون مافيها شي ;) ) بهالكبر وتخافين من باباhttp://www.eqla3.com/vb/images/icons/icon66.gif .

-هي: انقلع قال اخاف قال ( خخخ ايه هين :( ) لعلمك انا اتمتع بكامل حريتي اسمع كل انواع الميوزك .. البوب والجاز والراب والهارد روك واعرف ارقص من السامري للسامبا ;) ولو احكي عن لبسي ماراح اسكت خذ مثلا الجنزات وانواع التي شيرت والبدي وغيره يوووه ما راح اسكت لو أكمل :rolleyes: اييييييه وحاطة صورة على سني مثل مادونا تصدق:p وحاطة بعد صورة ريكي مارتن وشم في بطني ::rolleyes: .

- هو: تحكين جد Tpb02 Tpb02 ما تلبسين عباية يعني؟

- هي: عسى ماشر يابو الشباب ( قاطعين سرها في النسيم :( ) قال ما البس عباية قال عييييييييييييييييب ذولي البسهم تحت العباية.


تركت الصديقين على الشبكة وبدأت أسأل نفسي عما تعنيه مفاهيم بابا:) ...
الحرية - الحضارة - العيب عند هذه الفتاة؟!

ابوها: مستبد يفرض بالقوة مايريده وحسب ونقيضه الحرية التي تعني ان تخترق حاجز الممنوع ولو خالف قناعاتك!!
الحضارة: فيديو كليب لشاكيرا أو تقليعة لبريتني سبيرز ومرادفها العيب..
العيب : شيء يجب أن تغطيه بالعباية ليصبح غير عيب:rolleyes:..

لقد فشلنا بكل بساطة أن نقنع أبناءنا بخصوصياتنا وقيمنا واكتفينا بإصدار لائحة بالممنوع والمسموح وطالبناهم بالالتزام ولم يكن بإمكاننا أن نقيم جدار بيننا وبين العالم من حولنا الذي يزداد كل يوم إبهاراً وصغراً ومحاصرين بحضارات لم نعدّ أنفسنا للتفاعل معها وبقينا مرتهنين بأحد أمرين إما الذوبان والتخلي عن هويتنا دون مقابل لأننا غير مؤهلين للعطاء في حضارة أضيع من فيها المستهلك والمتلقي وإما العدائية وإعلان الحرب عليها ونحن عاجزون عن المواجهة.. والهزيمة نتيجة في كلا الحالتين :( ..

هذه الهزيمة هي التي تشكل هذا الفصام في بناء شخصية الجيل العاجز عن مزاحمة الأجيال من حوله والرافض للاعتراف بهزيمة يشعر أنه غير مسئول عنها وجعل منه وضعه الاستهلاكي وثقافة الأمر والنهي التي تربى عليها دون نقاش مسخاً بين حضارة لا يمثلها وأخرى عاجز عن الإتنماء إليها مكونا من شكليات لا تحمل مضموناً لأي منها
مشتتاً بين "العباية" و"التي شيرت" وبين "الكبسة" و "الهمبورقر" ومتحدثا عن إصطلاحات يجهل معانيها.

إننا بحاجة إلى تأسيس وعي قيمي يستند إلى الإقناع وبناء حضاري يقوم على ثقافة إنتاج تستوعب فيه إجيالنا الفرق بين صناعة الجينز وارتدائه وأن العباية يمكن أن تكون تعبيراً عن حريتك في إظهار خصوصيتك تماماً كالمايوه على البلاج .

إننا أيضاً بحاجة أن تستوعب أجيالنا أنه لو كان لمصر مثلا مكانة الولايات المتحدة في العالم لكانت أكشاك الطعمية تنافس سلسلة المطاعم الأمريكية "ماكدونالدز" ولما كان لمادونا بجوار فيفي عبدو ذكراً وما كانت "مارلين مونرو" أكثر إغراء من نادية الجندي ( الله يقرفهم كلبوهم :( ).
تحياتي :)

حــلــى
07-08-2003, 06:44 AM
up

الشـيـهـانـه
07-08-2003, 07:42 AM
سلخيييييييييييييير


- هي: يا اخي ابوي غثني مدري وش يبي ذا ؟

- هو: ياقلبي على الي يخافون ( يمون مافيها شي ) بهالكبر وتخافين من بابا .

-هي: انقلع قال اخاف قال ( خخخ ايه هين ) لعلمك انا اتمتع بكامل حريتي اسمع كل انواع الميوزك .. البوب والجاز والراب والهارد روك واعرف ارقص من السامري للسامبا ولو احكي عن لبسي ماراح اسكت خذ مثلا الجنزات وانواع التي شيرت والبدي وغيره يوووه ما راح اسكت لو أكمل اييييييه وحاطة صورة على سني مثل مادونا تصدق وحاطة بعد صورة ريكي مارتن وشم في بطني : .


القهر الفهم الغبي للحريه
تناقش مع احدى البنات اللي شايفه نفسها انها من الطبقه الارستقراطيه اللي تتمتع بحريه تامه
( بدايه النقاش كانت بسبب مسلسل مشاعل اللي يتابعونه الكثير اما انا لا :) )
قالت هي الام اذا كانت آدميه ماحد يرميها ‌‌‌‍‍@@
من هنا حبيت اناقشها و اشوف تفكيرها
نقاش طويل النتيجه منه :

الحريه بنظرها تعيش لوحدها و تطبق اللي قالته البنت جينز و بوب و غيره و اشياء تااااااااااااافهه و طبعا لا تخلوا من الدشره اللي مالها سنع سفر لحالها عيشه غلط بغلط

توقعتها بتقول الحريه ان يكون لي مطلق الخيار في قرارت حياتي مثلا !
او تقول اني لي الحريه في عملي ! دراستي !
هذا اقل شي توقعته
لكن انصدمت بسيدة ( البنت ) تحتل منصب مرموق في اهم قطاع في الدوله
الحريه بنسبه لها دشاره ( سوري على الكلمه ) لا اكثر و لا اقل

و هنا بداية الاختلاف بين جيلين
اظن اهلنا مهما كانوا تفكيرهم قديم و شديد الا فهمهم للحريه افضل بكثير من جيل حالي
الحريه عنده روك و سامبا و يا قلبي لا تحزن

راعي العليا
ردي يمكن راح بعيد
لكن هالموضوع قاهرني من ناقشت البنت اللي تكلمت عنها ( من اسبوع يقرقع في قلبي )
و موضوعك اعطاني المجال للفضفضه


تحياتي

عبير نجد
07-08-2003, 09:13 AM
نحن الآن نعيش إختلافاً جذرياً لمعاني كثير من المصطلحات
الحرية = التحرر من كل مباديء وقيم وعقائد
الحضارة = الإنحلال
الجهاد = إرهاب
7
7
وقس على ذلك

نحن قومٌ ضـــــــــائعون الا من رحم الله

تغريد
07-08-2003, 12:25 PM
مرحبا

منى في السوق مع امهاشافت بنطلون جينز وبدي..
يمه ودي اشتريه
لا لاتشترينه
طيب ليه يمه
هذا البس ماينفع لنا

منى عند التلفزيون قاعده تتفرج على فيديو كليب
وتقول في نفسها
الله ودي البس مثلهم
والرغبة تكبر وتكبر في داخلها
لحد ماصارت امنية من امانيها

وتحاول بعد كم شهر تقنع في امها..وتلاقي نفس الرد
قلت لك لا يعني لا ..هذا ماينفع لك
يمه بنات كثير يلبسون كذا
وش علينا من الناس (ويمكن الام اصلا مارفضت هاللبس الا عشان الناس ماينقدون عليها وعلى بنتها)

واخيراً من اللي اخطأ في هالحالة البنت ولاامها

يعطيك العافية يااخوي على هالموضوع

ASSASSIN
07-08-2003, 02:06 PM
حلووووووووووووووووووووووو ببرد حرتي والله يابعض البنات يقهرون

شف ياراعي العليا البنت في داخلها انحلال وشلون تبي تغطي هالانحلال بالعباية مثل ماقلت وطبعا ما اقصد صيغة الجمع انا اتكلم عن مثال وهو بصراحه المنتشر والغالبية العظمى ..
اذا البنت ياراعي العليا ما استحت من خالقها وشلون تستحي من الناس يعني هي تستر نفسها بس عشان كلام الناس مثل ما قالت الاخت الي فوق لكن بينها وبين نفسها هالشي حلووو وعادي ما تشوف انه من الخطأ تقليد الغرب وذا نتاج عن الذوبان الي ذكرته مع حضارات ما ننتمي لها واذا ماعرف يذوب قام يفجر خخخخخخخخخخ :D مهوب صاحي الي فجر الظاهر ماعرف يلبس بدي قام لبس حزام فيه قنابل :( ..

البنات وصلت فيهم الجراءه ياراعي العليا انهم يكتبون على الملآ ومهوب منتدى القهوة ( انا لابسة تنوره فوق الركبه ولا انا لابسه جينززز وبدي ياااي ) من زين جسمها عشان تلبس جنز يعني تلقى جسمها يابعد تسبد امها جسم حاشي طاقته الحصبة .. يعني انا ابي افهم وشلون تلبس تنوره مثلا فوق الركبه حتى لو كانت في بيتهم وبين اهلها ترضى ان اخوها يشوفها في هالوضع طيب اخوهااو ابوها وشلون يسمحون لها تلبس هاللبس يعني اكبر ههم بس انها تتحشم قدام الخلق وتلبس العباية
يعني العيب هو فقط قدام الناس وداخلنا انحلال وتقليد للغرب في قلة حياهم ؟
وش استفدنا من لبس العباية اذا البنت اصلا داخلها انحلال قيمي ذا هو مربط الفرس وذا الي فهمته من موضوعك وذا هو الشي الي المفروض البنت تناقش نفسها فيه.
تعجبني البنت الانيقة بس الاناقة ما يعني التفصخ وقلة الحياء ومايعني التقليد الاعمى للغرب.

انتوا يالبنات فريسة لنظرات شرهة من الطرف الاخر اذا والله شافكم المفترس لقمه سائغة وشي يستاهل راح تتضاعف فرص افتراسه لك عشان كذا اتقي الله في نفسك وافهمي انك لو جلستي اربعين سنه تفركين في ركبتك بليفه وصابون ماراح تصيرين مثل بريتني خخخخخخخخخخ :D
انا ما اقصد بس ذولي لهم اشكالهم ووضعهم وحنا لنا اشكالنا ووضعنا وحنا ميزنا الله بجمال النفس قبل جمال الشكل والمظهر.
واقول واكرر ترى العباية مهيب كل شي وما يعني انك اذا لبستي عباية فوق الراس ولا تحت الراس صرتي تستحين
الحياء اولا واخيرا حياء النفس

ودي احكي مابعد بردت حرتي وقسم:( يمكن ارجع لاشفت ردود سنعة
يعطيك الف عافية ياخالي

كتكوته مفترسه
07-08-2003, 04:25 PM
المشكلة في كون الطفل ينشأ في بيئة تعتبر عاداته و تقاليده سبب في تقييد حريته ,,
خاصة البنت ,,
و بعضهم يستحي من عادات المجتمع اللي اغلبها احكام دينية واجبة :rolleyes:
و اتوقع اغلب هذا نشوفه اذا سافرنا ,, تقول ما صدقوا يطلعون منها !!
لا تلومهم اذا عرفت ان تربيتهم الغلط هي السبب اولا و اخيرا ,,
يعيشون في مجتمع يمجّد الغرب و يرى كل ما عندهم مثير و مثالي ,,!!

************************************************** *************

البنت تنشأ على كلمة عيب ,, الناس وش يقولون لو شافوك كذا؟؟!!
المصيبة ان ما عندهم مشكلة لكن الناس وكلام الناس هو المهم :rolleyes:
ما يدرون ان المشكلة هي في التقليد الأعمى و الخجل من الأصل !!
لو استبدلوها بكلمة حرام!! وش بيصير !!

لو اتكلم عن نفسي و انا بنت عنيدة و امي دايم تقول هبلتي بي :(
مستحيل اغير رايي علشان كلمة عيب!! لو ينتحرون اهلي كلهم :rolleyes:
بس اذا قالولي حرام هونت ,,و ما اتوقع احد تقوله كلمة حرام و ما يعيد النظر في الموضوع ,,:)
غير كذا بعضهم يسمح فيها للولد و البنت لا عيب ,,
ممكن ما ترضى اصلا بتقول وش معنى اخوي !! و لها حق ,,
لكن لو فهمت انه حرام ,,على الاقل تصحى لنفسها
اغلب البنات تعترض على صرامة اهلها بهالمواضيع ,,
ان جينا للحق رغم انها كبرت و فهمت لكن اغلب الخطأ يقع على الأهل :(
لانهم ما فهموها اصلا ان فيه فرق بين الحرام و العيب ,,
لو لاحظنا تصرفات الناس تلقاهم عادي عندهم اي شي بشرط ان ماحد من جماعتهم يشوفهم ,:)
و هذا انا اشوفه بعيني محد يقولي عنه ,,
ممكن اكون شطحت شوي عن اساس الموضوع لكن كلها مشاكل تكمل بعض ,,

باختصار لو يتربى الواحد منا على اساس انه مختلف و له كيانه و شخصيته المستقلّة اللي لا يجب ان تتغير او يأثر فيها اي مجتمع آخر (ممكن يقال عنه تخلف لكن هذا هو الصدق :) )
و يفهم ان المفروض عليه تطبيق الدين فقط و لا شي آخر من اوامر و نواهي ( العيب) اللي ترجع بنا لورا اكثر ,, كان ما شفنا هالنماذج اللي تعور القلب ,,

scent of soul
07-08-2003, 05:48 PM
جيت على الجرح ..كلنا نتكلم عن هالموضوع واغلبنا يحمل نسبة من هالمشكله ..اما مسؤوليه او معاناة ّ!!

دارسو رياضيات الحاسب يدركون ان الصائب ممكن يؤدي لصائب او الخطأ ..لكن الخطأ ابداً لا يؤدي للصواب..
برأيي هذه لا تنطبق على قوانين الرياضيات فقط انما على الحياة بأكملها ..

مشكلتنا اخي اننا نعيش حالة افصام رهيبه ..بين الأهل والأبناء من جهه ..وبين قيمنا ومانؤمن به يقينا في دواخلنا من جهه اخرى !! وللأسف

:::::

الإشكالية تنطلق من الأهل من الموجهين من المربين من القدوة من المدرسة من الحاضن .. كافة المفاهيم هم من يغرسها في الأبناء ..

الوضع الحاصل الآن في البيوت الأب غائب او مغيّب عن دوره ..صدقني مايعرف عن بناته او اولاده اي حاجة ..وممكن يشوفهم لكن بدعوى الحرية وانه قرار شخصي لهم يتركهم
وتلقاه دايم يردد (بكره يكبرون ويعرفون الصح من الغلط ويعرفون مصلحتهم )
والأم صارت هي اللي تخاف من بناتها ولاحظه في اللي حواليك ..

و من جهه ثانية ايضاً الأولاد يتحملون جزء .. لما يكبرون ويعرفون ..

احيانا نستبشر بالخير وان هالإنفتاح خير لنا ..لكن يبدو ان علينا دفع ضريبه غالية لحد مانستوعب اللي حوالينا ..

لي عوده في بالي كلام كثير لكن هذا اللي قدرت ارتبه من افكاري ..

دمت بخير ..

ASSASSIN
07-08-2003, 08:40 PM
طيب من الردود حق الاخوات انا عندي شوي اسئلة :

هل يابنت اللوم كله راجع على أهلك طبعا انا ادري ان لهم يد والسبب الرئيسي راجع على الاهل اولا واخيرا بس هل انتي مالك يد بالموضوع اطلاقاً وهل ماعندك عقل تفكرين فيه وتقولين في لحظة مصارحه مع نفسك ان هالشي الي تسويينه نوع من التفاهة مثلا ؟

الشي الثاني هل فعلا فيه بنات يحطون وشم في جسمهم ترى انا سمعت ها لسالفه من مصادر موثوقه بس هل صحيح هالشي ؟؟ وفيه عندنا بالرياض بنات يتوشمون طيب وهالوشم يسوونه اساسا في الرياض ولا برا ؟ لو صحيح ما اقول الا الحمد لله على نعمة العقل ؟

الشي الثالث : بنات الغرب يعني معروفين ان اجسامهم تناسب هالملابس الي ما ندري وش تبي بس لا تواخذوني بهالكلمه فيه بنات عندنا هالملابس ما تليق فيهم اطلاقا :p يعني ما تحس هالنوعيه من البنات بالقرف من شكلها مثلا وهي لابسة بدي وكرشتها الين ركبها ؟ وليه ما تختار الشي الي يناسبها هل ذا نقص في عقلها ولا هي ما تشوف نفسها ؟

السؤال المهممممممممممم : اهلك وش يقولون لتس وانتي لابسه هالملابس ؟؟

اخخخخ ياليت يجاوبوني على اسألتي وبكل صراحة.

انتعاش
07-08-2003, 08:54 PM
في ظل مجتمع تربية ابناءه قائمه على التربية الاسلامية بشكل سطحي..
لكن في صلب هذي التربية فهي قائمة على العادااات والتقااااليد..
شيء طبيعي نتيجة لهذه التربية..انك تلاقي الجيل وصل لهذي المرحلة..
اضرب لك امثلة..:)
..
(1)ابو نورة...رافض تماما الشوفة الشرعية..وهي في ديننا :)
يقول "عيب"..بنتي تطلع على غير محرم ؟!!!
وبنفس الوقت يلبسها عباية وعلى الراس..ماعتقد ان الدين هو اللي احتكم له 100%
في فرض العباية على الراس على بنته..:)

(2)ابو فيصل...مسك ولده يكلم بنت.."يغـــازل"..
يمكن ارضاءً لكبريائه كأب...هزئه كم تهزيئة وقام يقال اني زعلان..
بس لا اخذ مفتاح السيارة..ولا امتنع عن الكلام معه لكم يوم..
ولا بين له انه مستاء من هذا التصرف..
لان ابو فيصل..نسى ان ديننا "يحرم"...الغزل والصياعه..
وعقابه واحد "للبنت"...و "للولد"..

(3)خالد مسافر مع زوجته وبنته الصغنونه..
في فلوريدا كانت زوجته "متحجبه"...عشان اصحابه موجودين..Tpb02
بس يوم راحوا النمساا فكت حجابها..لان اصحابه ماجوا للنمسا..
وكل هذا كان بنفس السفرة :)

..
في ظل هالمواقف اخوي تتوقع تربية هالاباء لابنائهم ولبناتهم..على مبدأ عيب ووش يقولون الناس عننا..
تجاهل التربية على "قال الله عز وجل "..و قال "الرسول صلى الله عليه وسلم"..
تجاهل دينه واسس دينه...وعزة دينه..
هذا اللي جنيناه للأسف جيل مستهلك..مقلد ..أعمى..ذليل..مافيه عزة بدينة..مافيه وطنية قوية ..
وانا احكي عن الفئة الاغلب..
..
لي فترة افكر..الفرق بينا وبين ايام الرسول عليه الصلاة والسلام والصحابة وايام التابعيين..
لما اقرأ عنهم...احس وجهي علامة استفهام..
علماء ..فقهاء..ادباء..حكماء..طفل مايتعدى 10 سنين..قاريء متمعن..يحاول يستقطب العلم..
يبحث في كل مكان..
لكن في وقتنا هذا..رجل..امرأة..لايملكون من الثقافة الا الشيء القليل..على الاقل الرجال نقدر نقول..
لهم نصيب في القراءة ...لكن تجي للنساء...للاسف النسبة الاغلب ماتقرأ..ولا تهتم للتفقه في دينها..
فكيف تربي ابنائها التربية اللي نتطلع لهاا.. ومعروف ان التربية مسؤولية الام بنسبة 80%..
..
ولما نلتفت للغرب..في كل وقت في الباص..في الانتظار عند المستشفى..في اي مكان..
الكتاب موجود معهم..حتى اطفالهم ربوهم على اهمية القراءة..
النصارى..ربو ابنائهم على العزة بدينهم...وعلى اهمية نصح اللي حولهم بحلاوة دينهم..
و الكل يلاحظ العكس موجود عندنا وهذي الفئة للاسف تمثل الاغلب...
..
والله ياخوي اني تفاجأت بأمهات بنات اعرفهم شخصيا...ماتعرف غير السواليف عن فلان تزوج على زوجته
وعن فلانه بنتها اعرست على فلان وعن فلانه ولدها تعب وسافرت لامريكا تعالجه..
ويمكن تطلع الجريدة على كاركتير "الهليل":cool:
..
اخوي النقاش في هالموضوع يطووول..
وله ابعاد كثيرة..
بس يمكن ارجع
..
ودمت مميز :)
..
تحياااتي

RESCUER
07-08-2003, 10:48 PM
انا بصراحه البس كل الي قلت عنهم يعني هالشي خلاص تعودنا عليه وصديقاتي بعد نفس الشي بس طبعا اذا طلعت السوق ذا شي ثاني انا اقصد مع صديقاتي وبين اهلي ما في تحفظات واجد احس ان اهلي اقرب لي من صديقاتي ما ادري يمكن انا غلط بس هالشي صار بحكم العادة وما اعرف بصراحة وحده من صديقاتي متحفظة مره بملابسها واتوقع هالاشياء خلاص صارت لنا عادية
حنا نشوف هالسوالف في كل مكان يعني لو رحت محل ملابس اهتمامهم ينصب اولا واخيرا على هالنوعيه من الازياء انا اشوفهم في كل مكان في التلفزيون اشوف صديقاتي كذا واذا غيرت لبسي احس اني نشاز بينهم وبالتالي انا تعودت
اتمنى ما اصير كذا بس ما اقدر اعيش نشاز بين الكل مجتمعنا صار كذا واكثر البنات كلهم يقلدون
بس في تقليعات طبعا مستحيل اسويها مثلا اني احط وشم لا مستحيل هالشي انا حدي الملابس لكن ما انكر انا رحت حفلات دي جي مثلا وشفت بنات يحطون وشم واشياء مالها داعي ذولي بالذات استغرب وشلون اهلهم يسمحون لهم يسوون كذا واتوقع الوشم مايروح الا بعملية او مدري وشلون طيب اذا اعرست وش راح تسوي مع زوجها وهل زوجها راح يتقبل هالشي منها؟
ما احلاني وانا اعرس وانا موشمه نفسي بصورة فنان
انا معك لو تعودت على شي معين يمكن ماراح اشوف نفسي نشاز بين صديقاتي لو مالبست مثلهم بس يمكن لو ماشفت صديقاتي كذا ولو ما طالعنا هالفضائيات الي كل يوم تعرض ازياء ونشوف اشياء ماشفناها من قبل وبصراحه تبهرنا يعني ما اتوقع ان فيه وحده هالايام ما تتابع الموضه وعروض الازياء لكن بصراحه لبسي برا فيه احتشام يعني لا طلعت مثلا السوق لازم احتشم وعباتي راس بعد
تحس اني صريحة بزود ؟

المنفجر
07-08-2003, 11:24 PM
هههههههههههههه ASSASSIN انت وش حارق رزك يا اخي :rolleyes:
يلبسن الي يبون وش دخلك انت :(
يعني عشانك اعرست ما تبينا نشوف :(
والله ما خربنا الا هالنوعيات تلبس عباتها وتسنها مفصخة
ووتتعمد ترفعها عشان نشوف وش لابسه من عله الله ياخذهم بس
والي يقهرك ان اخوها جنبها ولا ابوها وتسنه يقول ناظروا اختي ;)
ياهي انيقة وحنا من عايلة ارستقراطية ياشيخ ناس ماكلين لحم خنزير وقسم بالله
والبنت من ذولي وجهها خلاص مغسولن بمرق
بس ترى رد على سؤال الي فوق انا بالنسبة لي لو اتوهق واعرس واشوف زوجتي حاطتن وشم
ماراح ارجعها بيت اهلها تسذا لا ابشيل هالوشم بسنوني ثمن ارجعها
ياجعلها للساحق الماحق قال وشم قال

تسلم يازميل المرجوج على هالموضوع الرايق
<< ناداك برتبتك يتميلح خخخخخ :D

بنت نجد
08-08-2003, 12:23 AM
الموضوع حامي ههههههههههههه الله يعينك يا راعي العليا:)

<------ تقتل القتيل وتمشي في جنازته:rolleyes:

اسلوب رائع , كما تعودنا منك يا راعي العليا:)

==========

هذا مكاني, ولي رجعه;)

كتكوته مفترسه
08-08-2003, 12:24 AM
معليه راعي العليا باتلقف شوي بس كيبوردي ياكلني مقدر ما أرد :p

رد على واحد من الردود,,
قلنا ان الناس تربت على عيب فا مهيب مقتنعه انها غلطانه ابد علشان العيب :D
ولا انا وش قلت ,,
لو فاهمين انه حرام !! كان ماحد ارتكبه ,, سواء ولد ولا بنت ;)
لان ياما بلاوي زرقاء عند العيال عارفين انها حرام مهوب بس عيب و يرتكبونها
فهل هم ما عندهم عقل لا سمح الله و يحسون بالتفاهه مثلا :D

يعني المسألة مهيب مسألة تفاهه,,المسألة انهم ما فهموا اصلا انهم بغنى عن هالتفاهه,:)

و ترا ماله داعي نحصر تفكيرنا باللبس ,,لان فيه مصايب اللبس عندها يعتبر عادي مررة :)

لؤلؤة الشرق
08-08-2003, 12:26 AM
Tpb05Tpb04Tpb05

تصدقون فشلانه وانا أرد على الموضوع .. بصراحه إحتكاكي بالمجتمع قليل (مجتمع البناات خاصه Tpb07) يعني كل اللي بحيكه شفته او سمعته من صاحباتي او اهلي :)

صاحباتي لبسهم محترم .. (تنانير/ تنانير قصيره وماترتفع فوق حد الركبه Tpb06/ بناطيل/ فساتين سبور / كذلك بالنسبه للبلاوزز .. مافيه تجاوزات ) والسبب مو عن انه عيب .. بس لأنه حرام ..

اللي أشوفه بالأعراس صدق شوي يخوف .. مثلاً فتحات الى آخر الظهر وطبعا فتحات الصدر و فتحات تصل لفوق الركبه بشوي Tpb05
بس شنشوي .. هم يلبسون كذا بكل مكان .. فـ مايختلف عن لبسهم بالاعراس (أغلب هاللي يلبسون كذا متزوجات .. بس ترى مو الكل بعض الطبقات هي اللي تلبس مثل كذا Tpb05)

التاتو والملابس الفاصخه بالنسبه للبنات سمعت عنها كثير .. الشوف يمكن شفت بعض اللي حولي (الله يهديهم) بس مو دايم كذا لبسهم
ودايم هاللبس يجي بحفلات DJ وحفلات التخرج ..

بإعتقادي اخوي راعي العليا ان اللي تلبس لبس مدري شيبي كنها مذيعه بايخه .. هذي فيها نقص .. وميه بالميه هي تعرف ان اللي تسويه مو من "الدين" وتكون فاهمه معنى الحضاره غلط Tpb05

الحضاره مو لبس وتاتو و خرابيط .. الحضاره أشياء كثير حولنا المشكله ان اغلب العرب بصفه عامه .. نستخدم كل شيء بطريقه خطأ
سواء كان جوال& نت & مواقع & ..... وانت ماشي

ماأقول الا الله يهدينا ويصلحنا ويبعدنا عن كل شيء بيكون سبب في بعدنا عن الجنه ..

ذكرت شيء .. أحد الردود تطرقت لنقطه هل ابوها يشوف وش هي تلبس ؟؟ او اخوها ؟؟

انا أقول لك .. الأب وقت الشراء ما يشوف بنته .. وعلى الطاري (وحده تقول لو أشتري سياره بالماستر كارد مادرى عني ابوي .. ونفس الشيء وحده ثانيه تشتري من ماستر كارد زوجها تقول لو أشتري بيت مادرى عني Tpb09) هذا أعتقد انه غلط .. وترى هالشيء منتشر بقوووه بين البنات .. تشتري اللي تبي وتلبس .. أحيانا يكون ابوها عنده كل شيء فري .. وحده أعرفها كذا .. النوع الثاني الله يصلحهم .. اخوها يكون مو راضي .. بس عندها السلاح الثاني مامتها Tpb07 وامها مع ابوها ضد الولد .. وهي تسوي كـل شيء Tpb05 نوع أخير .. تسوي اللي تبي بدون علم أهلها .. تجي لصاحبتها قبل الحفله .. تبدل وتصير وحده غير عن اللي طلعت من أهلها .. وهنا دور الصديقات عاااد في الخراب Tpb05

ع العموم .. مشاهداتي في هالمجال قليله نوعا ما والحمدلله ..

تشكرات عالموضوع المهم يافندم Tpb09

-----

8
8
8
تكلمت عن اللبس فقططط و كيف تكون تقبل الاهل لشكل بنتهم

بالنسبه للعيب .. الخطأ الأكبر من الوالدين لأنهم مازرعو في أولادهم الحرما وشو والعيب وشو Tpb05

الله يعين على ذا الدنيا بخير

لؤلؤة الشرق
08-08-2003, 12:42 AM
على فكره .. بس حبيت أوضح نقطه ..

إن البنت " وكذلك الولد" من تبدأ تعرف تميز بين الصح والغلط .. بين الحلال والحرام ..

مايحتاج إن اهله يقولون له غلط .. لانه هو عارف الحكم .. صح ؟؟

وعليه يترتب .. إنه بيوم القيامه .. بيحاسبه ربي علشان لبس والا مكالمات والا ... والا ...

محبتي ..

Tpb09

ASSASSIN
08-08-2003, 12:54 AM
ياراعية الماستر كارد انا اكلمك عن البنت داخل البيت يوم تلبس اشياء مالها داعي مثل هالجنز الضيق ما ادري هي تلبسه ولا هو لابسها.
يعني ابوها بالله مايقولها شي ولا قدامه تسوي فيها اخلاق
لو الاب يناظرها كذا ومايقولها شي عاد ما اشره عليها لو سوت كذا واكثر
العيب هو ان اهلها مايربونها لو سوت كذا ومايطقها اخوها بعقاله لو شاف
منها مصاخة وقلة حيا والعيب كل العيب انها تسوي كل شي على هواها واهلها
يناظرونها ولا عليهم منها .. انا طبعا ما اقصد كل البنات انا اناقش عن فئة معينة

وكتوكته مفترسه الا البنت تدري انه حرام من قالك ما تدري بس ابوها الدلخ ما زرع
فيها مبادئ ومفاهيم يوعيها ويفهمها وش معنى حرام وحنا نتكلم عن اللبس لانه مثال
ما نبي نتطرق لكل شي لاننا راح نتعب.
وتراني ما اقصدك تحديدا انا اقصد كل بنت من هالنوعية وانا ادري ان اهلها هم السبب
الرئيسي وشرهتي على البنت قليله ترى
اخخخخخخخخخخخ ياجعلهم للطاعون الي يريحنا منهم شوهوا سمعتنا
هالنوعيات.

عدلت ردي عشانك يالؤلؤة الشرق :
لا يالؤلؤة حنا ممكن ناخذ الدين بشكل سطحي اذا ما غرسوا اهلنا فينا جذوره وتعلمناه على اصوله موب شرط اني ادري ان ذا حرام وما اسويه لا الناس يدرون ان ذا حرام بس وشلون نخاف من الحرام ذا هو المطلوب.

راعي العليا
08-08-2003, 01:36 AM
ما ابي نتناول الموضوع بشي من السطحية وماذكرته عن الملابس فقط مجرد مثال.
انا برأيي الهدف من الموضوع اكبر .. الموضوع يندرج تحت اطار عدم القدرة على الاحتفاظ بهويتنا او على الاقل الظهور بهوية ذات بصمه تمثل حضارتنا وقيمنا.. بعيد عن التقليد للغير او محاربتهم.

ASSASSIN
تناولت بعض الي قصده في موضوعي بس ابيك تناقش معي وشي السبل الي من خلالها ممكن تصير لنا هويه خاصه فينا بعيد عن التقليد؟ وليه وصلنا إلى ماوصلنا إليه ذا الغرض الاساسي الي ابييك تناقشه :).

سوبر ستاره
08-08-2003, 02:43 AM
اخي الكريم راعي العليا وانا اقرأ موضوعك والردود كانت تتداعى الافكار في مخيلتي لمحاولة إكتشاف هذا الخلل الذي تبحث عنه في موضوعك لأجده بين الردود

اخي الفاضل تدري وين مشكلتنا شف ردود الاعضاء وانت تعرف يعني لما اجي بناقش مشكله وخاااااااااصه لما تكون تمس فتاه راح تصادفك مثل هذه العبارات:

وافهمي انك لو جلستي اربعين سنه تفركين في ركبتك بليفه وصابون ماراح تصيرين مثل بريتني خخخخخخخخخخ

ياشيخ ناس ماكلين لحم خنزير وقسم بالله

يعني أسلوب النصح والتوجيه الله بلخير حنا عندنا احسسسسسسن ناااااااااس ينتقدون وعندهم عبارات محدده لكل قسم ( وهذا عن جد الاسلوب السعودي بغض النظر عن المنتدى وإنه إضيفت هذه العبارات لدعابه)
يعني شي يخص البنت تبي تلاقي هالمصطلحات: خكري- ديوث - مهب رجل - مالقت احد يربيها

يعني بالله هل ترجوا إصلاح من ورا هذا الكلام؟؟؟؟؟
وإلا هالكلام يتم كتعليق بعد ماتكون نصحت بسلوب لبق فانت إذا منافق وباحث عن الاثاره لا حلال مشاكل
إذا العيب بمجتمعنا ككل
العيب بتفكيره العيب بتناوله للامور العيب بسطحيته

وانا أقرا موضوعك جا ببالي مقوله لعلي بن ابي طالب رضي الله عنه( لاتجبروا اولادكم على اخلاقكم فإنما ولودوا لزمان غير زمانكم)

يعني حنا لو كانت التربيه تنبع من الاهتمام بالشخصيه وإعدادها من الاساس وفق الحلال والحرام ومبدء
لاتقل يوما خلوت *** ولكن قل علي رقيب
تعزيز الثقه بالنفس والمسؤليه والقدوة الحسنه

يعني لما كنا أطفال ونسافر الوالد والوالده كان تعاملهم معانا مهو غطو عيونكم عيييييب لا كان تعاملهم إنهم كفار والله زعلان عليهم مايحبهم عشان عصوه وماراح يدخلهم الجنه وناخذ لنا وقت نتناقش في هالمسئله لين صرنا انا وخواني نغطي عيوننا عشان حرام وعشان ربي مايزعل علينا

مشكله عندنا ركزو على مسئلة الرعايه بحيث تشوف كلام الشرهه على أهلها الشرهه على ابوها الشرهه على اخوها طيب بكل بساطه وزي ماذكرت اخواتي قبلي يمكن اهلها مايدرون عنها اساسا يمكن هي وحيده امها ويمكن عشرين الف سبب إنه الخطأ خطئها هي اولن واخيرا ثم البحث عن الاخرين

نجي لنقطه ثانيه وخاصه إنك إخترت عبارة عيييييب لموضوعك وهي:
مفهوم العيب وإختلافه ضمن كل طبقه واخرى يعني مثلن تروح لناس نص الكم عييييييب عندهم تروح لناس ثانين الكت عادي بينهم<------لاحظ كله ضمن الحلال
ممكن تتوسع الدائره لتتسع وتحوي دائره إختلاف الاراء بين الفقهاء مثل الحجاب فحصر العيب صعب
ولكن حصر الحلال والحرام ممكن وثابت لانه يستند على ادله وثوابت تقدر تقنع اولادك وتربيهم عليها حتى لو صادف إختلاف في هذا المفاهيم ولكن هو يعلم أإن تميزه بمذهبه هذا وعندك تلاحظ اصحاب المذاهب المخالفه اكثر تمسك واقوى مجادلة من اهل السنة لييييييييييه؟
لانهم يربون ابنائهم على هذا المذذذذذذذهب فتحصل اصصصصصصصغر طفل عندهم تميزه بين كل الاطفال ولو نطق وجادلته راح يجادلك لانه مربى على اسس هذا المبدئ

إذا المشكله بإننا نفهم إنه عهد التلقين المباشر وعهد الكتاب والعصى لمن عصى ولالالالالالالالى وراح الحين عصر المسجات عصر الاقناع عصر الابهار فهذا هو زمان هذا الجيل
ولكي نحافظ على هويتنا يجب إقناعهم بجمالها وأصالتها وعدم تشويهها وربطها بالفشيله وعدم التمدن يجب المفاخره بهويتنا وفرض إحترامها لانها جزء منا ولكن كااااال هالاشياء يتم ضمن إعادة هيكلتها لتتماشى مع هذا العصر يعني نطور الماضي لكي يعجب الحاضر :)

العجيّز
08-08-2003, 06:30 AM
الشرهه على الوالدين
على الأقل نضمن ان اغلبهم ماعاشوا الا بمجتمع محافظ جدا :)

اكثر مايقهر
يوم تجيك البنت منفتحه بقووه على قولتهم
وخلفها..عجوز.. ايامها قليلة في الدنيا الله يرحمنا برحمته :( :(


انا اتفق مع اختي كتكوته اللي قالت. ننصحهم بالدين
بالفعل نظل مسلمين :)

برايفت خربز
1)ابو نورة...رافض تماما الشوفة الشرعية..وهي في ديننا
يقول "عيب"..بنتي تطلع على غير محرم ؟!!!

من قال بتطلع بدون محرم :confused:


قبل فتره..وانا في المستشفى مع مجموعة الطالبات
قاعدين نستمع للدكتور
المهم.. البنات عليهم قعدات انما ايه..قمة الإحترام :rolleyes:
كويس مافيه بالقاعة عيال..والا كان علوووووم
كان مافيه اضاءة..واول مافتحت البنات جالسين جلسات الدكتور طردهم عقبهااا ;)
نزلت في البريك.. توقعت وضعيتهم بالقاعة تتغير
لقيتهم نفس الشي.. البنطلونات الضيقه..البرمودا :D
والعباية..بس مجرد اسم.. والا وشاح يزين ملابسهاا
مااقول الا الله لاتبلانااا :)

الشي الثاني... جابوا لنا تقيم.. للدكاتره كالعادة
المهم استلمناهم...
اشوف ورقة اللي جمبي
تكلم المنظم اللي في المستشفى كان دايم يجي.. يضبط لنا القاعة
عبدالعزيز انت رهييييييييب.. وتجنننننننن...,كيوووووووووت :D
على العموم هذا رقم موبايلي
انفجعت :mad: .. معقوله صارت البنت هي اللي ترقم الولد
واللي استغفر الله.. واعدت اكثر من واحد... واللي واللي :(

امهات قاموا يرسلون بناتهم للرذيله.. :)

وشي السبل الي من خلالها ممكن تصير لنا هويه خاصه فينا بعيد عن التقليد؟ وليه وصلنا إلى ماوصلنا إليه ذا الغرض الاساسي الي ابييك تناقشه
غير الكتاب والسنة لاتدوّر.. :)


الموضوع قيّم جدااا...

http://distortedkick.jeeran.com/Mo7abath.jpg

RESCUER
08-08-2003, 07:17 AM
العجيّز

اقتباس:
--------------------------------------------------------------------------------
وشي السبل الي من خلالها ممكن تصير لنا هويه خاصه فينا بعيد عن التقليد؟ وليه وصلنا إلى ماوصلنا إليه ذا الغرض الاساسي الي ابييك تناقشه
--------------------------------------------------------------------------------


غير الكتاب والسنة لاتدوّر..

ذا كلامك يالعجيّز وانا معك في المبدأ بشكل عام بالعفل حنا مالنا غير الكتاب والسنة وهالشي من الثوابت بالنسبة لنا والكل يعرف الحلال والحرام بس اساس الموضوع او الهدف من السؤال في اعتقادي والي قصده راعي الموضوع وشلون نوصل هالفكره لاولادنا يعني لنا وبما يتناسب مع العصر الموجود دائما معظم الردود في معظم المواضيع تحمل هالعصبية تمسكوا بسنة الله ورسوله وسنة الله ورسوله هي الاساس ويجب ويجب حلو بس الشي المهم وشلون الاهل يغرسوا هالمبادئ في اولادهم هذا اولا الشي الثاني مثلا الاب ماراح يقول خديجة كانت تلبس كذا البسي مثلها لا لا حنا راح نلبس مثل خديجة ولا خديجة رضي الله عنها من عصرنا القصد وشلون نحتشم بما يتناسب مع عصرنا وانا اقصد احتشام احتشام بس طبعا بملابس عصريه محتشمة انا ما اقصد المعنى اللفظي طبعا من هالمثال الي ذكرته انا اقصد المفهوم بشكل عام
ثانيا قلت لك كلنا نعرف الحلال والحرام وكلنا نقول الكتاب والسنة بس في ناس يخافون من الحرام وهم يعرفونه وفي ناس يتساهلون وهم يعرفونه بعد هذي هي الغرسة الاساسية الي زرعت فينا هذا هو التوجه السليم الي اهلنا وجهونا له وشلون اخاف من الحرام واعرف ان السنة النبويه وكتاب الله اساس خلاصنا ونكيف هالشي مع روح العصر والي اقصده من هالمصطلح بالذات اني ما اسوي مثل بعض الي يسمون انفسهم بالمتشددين ويقولون الدباب لانه يشبه البغال والخيول والسيارة حرام لانها عصرية وما اتى الله بها من سلطان
وشلون ناخذ الي يناسبنا وننبذ الي الرذيلة عننا وشلون نتكيف مع هالعصر مع الاحتفاظ بهويتنا الي هي تمثل كل شي بالنسبة لنا ولمجتمعنا وخصوصياتنا.

صاحب الظل الطويـــــل
08-08-2003, 07:30 AM
السلام عليكم

أخوي أبو عليا
قريت الموضوع
وجتني أفكار كثيرة أبي أرد فيها
لكن كل ما قريت رد راحت فكرة
الين ما قضت الردود وصفيت بشرّاب زهري وبسكوت ريكو وصفحة بيضة بدون رد:D

فأرجوا أن لا تشره , وتراها ميب رد من نوع ((مشي حالك)) بس من جد شفت مشاركة عجيبة مشالله
الله يقويكم على الخير ويهدينا له

تحياتي لك ولقلمك

أبو ظل:)

صاحب الظل الطويـــــل
08-08-2003, 07:41 AM
عندي بس اضافة لكل (صريحة);)

أرجوا قبل ما أي أحد (يقص) على نفسه في تبرير أي شي يحط في باله إن
"الحلال بين والحرام بين"
وبعد يكذ يسوي تجربة بسيطة
اعتبري ان الرسول صلى الله عليه وسلم قدامك
واسألي نفسك هالسؤال
((هل بيوافق على اللي أنا قاعد أسويه والا بيمانع؟ ,,, هل اذا أحد زوجاته كانوا ناويين يسوون نفس الشي , هل كان بيرضالهم أو لأ ؟ ));)

ترا المسألة واضحة
والجواب أوضح

بس المشكلة ان كل انسان لمن يجي يسوي شي يحط لنفسه ستين ألف عذر وعذر بمبدأ إنه هو "غير"

غفر الله لنا ولكم

تحياتي

أبو ظل:)

مساحة ود
08-08-2003, 08:55 AM
سأنتظر مستمتعه بكل الحروف :)

فقط لو عرضت موضوعك سيدي بحرف ابسط ..

عنايديه
08-08-2003, 09:35 AM
ما أدري ووش جا على بالي ..
لكن فعلا .. الاحظ كل ما مر الوقت بهالدنيا .. و كل ما قلنا اننا تحضرنا .. و كل ما كثروا مثقفينا .. كل ما احس هالبساطه تنعدم .. و الأمور تنفهم غلط .. و كل انسان عنده حدود يرسمها بنفسه .. اذا شاف غيره متعديها أطلق عليه ما أراد من أحكام حسب مفهومه هو ..

...

كل زمن و كل عصر له مشاكله .. وله (نوع الخراب) و العلل و الأمراض الخاصه فيه .. فيه أشياء ما نقدر نمنعها .. الا اذا كنت بتمنع طفلك من التلفزيون والاختلاط مع العالم اللي عايشين مشاكل عصره و تمنعه من النت و الاشياء الجديده اللي طالعه في وقته ..

...

وش اللي يمنع ان الانسان يسمع بوب و جاز و ويحب الافلام الامريكيه و يقول هاي و باي و قودمورنينق وسي يو .. لكن شخصيته تبهرك .. افكاره راقيه .. مناقشته حتى لو كان فيه اختلاف لوجهات النظر فيها متعه .. و عندك اصحاب بعض الردود لا يعرفون الجاز و لا البوب و ضد اللي يصير في ايامنا و ضد ان البنت تلبس كذا و كذا لكن فعلا ردودهم ما اقدر اقول عنها غير (مقززه) ..

...

و بس تعليق على المثال اللي حطيته للبنت .. أغلب البنات و أنا منهم .. الوالد ما يدري عنها اذا دخلت المسنجر .. و أدخل من وراه .. ما أدري اذا من حقي أو لا .. لكن ما اعتقد ان فيه اشياء تقيس عليها عشان تقول على البنت هذي مشالله عليها و البنت الثانيه الله يهديها ..

...

يمكن اذا راجعت نفسك و شفت انت وش الاشياء اللي تسويها و المجتمع مو راضي عنها .. او انك تسوي شي بس عشان المجتمع بيرضى لو سويته حتى لو مو مقنع فيه .. تفهم وش اقصد ..

...

على العموم بس بغيت أقول من هذا كله .. ياليت نبعد عن المظاهر في حكمنا على الناس :)

الشـيـهـانـه
08-08-2003, 10:00 AM
سلخييييييييييييييييييييييير


راعي العليا بعد اذنك برد على ASSASSIN


****

ASSASSIN

أولا
و انا اختك من الصعب نعمم اي صفه على شريحه كبيره تمثل نصف المجتمع ان ما كانت اكثر ... في البيت الواحد ممكن تلقى كل التناقضات في الصفات وشلون نقدر نعمم انكل البنات سيئات مثلا !

ثانيا
بالنسبه للبس اما البنت اللي تجي و تكتب رد ثلاث ارباع تميلح و انا لابسه و انا حاطه هذي وانا اختك اغسلت يدك منها ما قالت ذا الحكي الا عشان توضح ان هي فري و هي قمة في التخلف @@
نجي للبس بالنسبه للبنات البنت اذا بتلبس اي نوعيه من اللبس في وجود بنات هذا حرية شخصيه طول ما هي اذا طلعت سترت نفسها بعبايه تستر مو تفضح اكثر ... سواء جينز و الا قصير او غيره ماهو حرام اذا كل الموجودين بنات ... فهالشي ماهو غلط كل البنات يحبون اللبس و الستايل ... بعدين بالنسبه للبنت المتزوجه يعتبر اللبس جانب من الجوانب اللي ترضي زوجها فيها !
ياخوي ليه معتبر اللبس احلال ! احنا ما نقول تلبس لبس مقرف لكن ماهي عيب ولا حرام اذا لبست جينز مثلا دام مافيه الا بنات وشفيها @@
هنا نحط تحت " عبايه تستر ما تفضح " الف خط
يعني دام البنت ما صارت فرجه و منظر مغري لكل رجل يمر عليها و ما ابرزت مفاتنها سواء بعبايه فاضحه و ضيقه او من غير عبايه بعد فماهو غلط ابد انها تلبس ستايل و لبس مرتب

ثالثا
الأهل و التربيه طبعا كل شي يعتمد على الاهل في البدايه لكن البنت توصل عمر تصبح هي قادره على تحديد الصح من الخطأ و هنا تبدأ المشكله و الخلاف مع الأهل و الاخوان اذا البنت ماسكه الجاده :(
في بنات كثير رغم عمرهم الا انهم مو قد المسؤوليه و لا يحفظون اسمهم و عايلتهم حتى لو ما تخطي لكن تلقى تصرفاتها خطا بخطا من باب الحريه :(
الأهل الاساس و البنت اذا اصبحت راشده تكون هي الوحيده اللي تتحمل المسؤوليه لانها ماهيب بزر او ما تفهم



رابعا
" الحياء شعبه من شعب الأيمان "
" و أن لم تستحي فافعل ما تشاء "
الحياء هو الاساس
لكن الحمدلله ما زال في بنات كثير و كثير جدا مازال الحياء يزين اخلاقهم

خامسا
ASSASSIN
كلاااااااااااااااااامك يقهررررررررررررر و فيه تعصب كثير


التعميم صعب و عمره ما كان صحيح

راعي العليا
08-08-2003, 10:30 AM
انا عادة اذا جيت ابكتب موضوع يردون علي خمسه عشره 15 بالكثير واكثرهم تماسيح وارد عليهم بردود اعرفها مسبقا وتعارفنا عليها بس وانا اشوف هالعدد بصراحه لو دريت ماكتبت الموضوع واكثرهم بنات الله يعين :(

حلي ، الشيهانة ، هلا بعبير ، تغريد ، ASSASSIN, كتكوتة ، SCENT OF SOUL
خربز ، RESCUER , المنفجر ، بنت نجد ( اجل تردين على موضوعك :) ) ، لؤلؤة الشرق ، سوبر ستارة ، العجيز ، صاحب الظل الطويل ، مساحة ود ، عنايدية : شرفتوا ولا عدمناكم :)

عموما انا اببعد عن التقليديات وماراح ارد على كل عضو فيكم شرفني لان الموضوع مو مجرد تساؤلات طرحتها هي واقعية للأسف والنقاش هو سبيل للبحث عن مسببات وحلول وانا ابعتبر نفسي فقط مشارك وابوضح بعض الامور الي يمكن اسلوبي المتواضع اضاف عليها طابع الغموض ما ادري قالت لي الاخت مساحة ود اكتب بحرف ابسط .. عندك حق بس للاسف هذي بصمتي وهذا اسلوبي عموما بحاول :)

توضيح بسيط: انا ما اقصد بالموضوع اني اقول للبنت ليه تلبسين ذا او ما تلبسينه اطلاقا مسألة اللبس او الاغاني هذي حسابها على ربها مهوب انا الي احاسبها هو مجرد مثال لاشياء كثيرة .. انا تطرقت لشي ابعد شوي .. وش مفهوم الحرية عند البعض هل هو اللبس الي تلبسة أو الاغنية الي تسمعها؟ وهالحريه تحمل طابعنا ولا طابع مقلد ؟ وليه تخلينا عن هوية توارثناها مئات السنين ؟ يعني وشي الاسباب ؟ وش اسباب هالتقليد الاعمى؟ .. وش دور الأهل في تجذير هالمفاهيم وغرسها في أفكارنا ؟ وشلون نستعيد هالهويه الي فقدناها وانا يوم احدد واقول هويتنا اقصد فيها ديننا وعاداتنا وأعرافنا وكل ماهو عربي اسلامي مايحتاج اوضح هالنقطه الكل يعرفها.. انا ما وجهت اصبع الاتهام لاي فرد في المجتمع الي قبل ما نعلق اخطائنا عليه لازم نعرف إننا اجزاء منه ومن مكوناته انا فقط ابحث عن أسباب وطرحت رأيي وانتظر تعليقاتكم مو أكثر :)

طيربالسما
08-08-2003, 10:36 AM
انا اشوف ان بنات حوااااااااا مساكين ...
تلاقيها المسكينه من وين ولا من وين :( ....

خاصه بوجود مفاهيم خاطئه ساعدت على الشي ذا :

كثر المقارنات الي تصير بين بنات البلد وبين المذيعات والممثلات .. بتسوي فيها عقدة غصب طيب عشان تتخلص من برقع مدري عباءة امهاااااا ... عشان تصير فتاة عصريه تواكب التطورر والموضه ... وبصراحه هالشي مطلوووب لا تبققون عيونكم علي بس باعتدال اذا ماكنت متزوجه وتااخذ راحتها على الاخر اذا تزوجت ... بس اغلب هالفئه الامور عندهم تصير معكوسه ... بس تتزوج تصير سيم سيم امهااا ... وماتصدق انها ذيك الي كانت ذابحه عمرها عشان الموضه .... وياخذ الرجال اكبر مقلب بحياته :) ....
ماظن انه في رجال بالدنيا هذي مايفرح لما يشووف زوجته كاشخه اربعه وعشرين ساعه وكل يوم شكل ...يعني غصب عليها تتابع وتقلد عشان ترضيه :) ....


المفهوم الخاطيءء للحياة الارستقراطيه او الطبقات العليااا ... يحسبون انه كل ماكان الشي قصيرررر وضيق ويفضح اكثر مايستر بيدل على انها بنت هااااااااي وبنت نعمة ... وعاد ششوووف ياكثر الي عندهم نقص ويحاولون يحتكون بالطبقات العليااااا بتفصخهم :D
وكان الستر تهمه تحاول ابعادهااا عنهاااا عشان مااا يطلق عليهااا لقب رجعيه او قديمه ومتخلفه ياااي :p
هذا نوع من انواع السقوط ... اسميه " السقوط الى اعلى " ...

وبعدين في شي ثاني لازم ناخذه بعين الاعتبار وهو عامل السن والنضج :) ... وخاصه سن المراهقه الي اقرب مايشبه فيه اعلان سيارة فورد " كروان فيكتوريا " الي بين امريكي واماراتي ذاك الي يقول فيه " انا عندي اثنين كروان فكتوريا " ... بصراحه العقل يكون على قده وهنا يجي دور الاهل والوازع الديني وان ماجاااا بيجي تاثير الرفقه والصحبه " سمعتي اغنيه ريكي مارتن " ... " شفتي لبسسس شاكيراا " .. وغيره وغيره ....
والضعيفه تنجرف هنا وهناك بس عشان تساير سديكاتهااا ويصير عندها سالفه لمااا تتكلم معهم ...
واعتقد انه يزول بعامل النضج :) وبوجود راقل حمشششششش ;)

ودمتم

scent of soul
08-08-2003, 11:15 AM
السلام عليكم ..

تقول اخوي وش مفهوم الحرية عندنا ..

ببساطه الشخص هو من يرسم حدود حريته بحسب قناعاته وطريقة تفكيرة ...بعيد عن الحرية المعطاه له اساسا من اهله ..

يعني مثلا انا احس ان اللبس زي ماذكرت مافيه شئ ومايخل بشخصيتي بشئ ,طبيعي ان مفهوم الحرية في نظري بيكون مهمش على مظاهر حياتيه زي اللبس وغيره .. وقابل للتوسع حسب الموضه ..هذا مثال .


واللي صاير الأن ان الشباب (من الجنسين للأسف ) بدت تميع عندهم المصطلحات لحد مايوصولون لقناعاتهم اهمّ ..
وكثرة الشئ مع الوقت تخليك تستيغ هالمناظر

** نقطة كذا على السريع ..**

احيانا يكون مظهرنا الخارجي مايعطي انطباع صادق عن هويتنا كمسلمين ..ودايم نقول والله نيتنا موب شينه بس مافيها شئ هي يعني ملابس ولا هي (فاصخه مره) ..
النية يترجمها مظهرك بإختصار .

وشي ثاني كلمة قالتها لي وحده و وقتها ماوافقتها فيها لكنها ظلت في بالي وحسيت انه معاها حق ..
كانت تقول ..
مظهرنا وان كان فيه بعض الأشياء مالها حكم شرعي صريح الا انها مستورده ..تخليك بالتدريج مسخ مشوه منهم ..

:::::

في المحصله ثقافتنا الآن هلامية بدون ملامح ..
نتيجة ظروف كثيرة.. سياسية واقتصاديه واجتماعييه ..
حتى عادا تنا تغيرت للأسف ..وكانت اول محافظه على هويتنا ..

لا تقولون ان العادات ماهي المحكم الرئيسي ..لها دور وكبير ..وكانت لها خلفيه دينيه ..

:) :) :)

عطيات أم البنات
08-08-2003, 12:56 PM
اهلين اخوي راعي العليا بصراحه طرحت موضوع روعه ودايم في بالي واتمنى اطرحه ولكن ينقصني الاسلوب اولا واخاف اشارك معكم بموضوع الاقي نفسي عند باب المنتدى ثانيا:(
.....................
وش مفهوم الحرية عند البعض هل هو اللبس الي تلبسة أو الاغنية الي تسمعها؟ وهالحريه تحمل طابعنا ولا طابع مقلد ؟ وليه تخلينا عن هوية توارثناها مئات السنين ؟ يعني وشي الاسباب ؟ وش اسباب هالتقليد الاعمى؟ .. وش دور الأهل في تجذير هالمفاهيم وغرسها في أفكارنا ؟ وشلون نستعيد هالهويه الي فقدناها ?
8
8
ممكن تسمح لي ارد على تساؤلاتك وتعذرني عالاسلوب :) اولا قبل ارد بنوه لشيء مهم بالنسبه للاخوات اللي يحبون يواكبون الحضاره ويصيرون فري والله المستعان... انتم لو تشوفون كم يحسدونا الغرب على حجابنا وتحفظنا وتمسكنا بعاداتنا ماتصدقون .... من جد عن تجربه تمسكي بحجابي ومحافظتي على عادات بلدي وتقاليده تعطيني ثقه بنفسي اولا واحترامهم لي ولديني ثانياوالله مهي مبالغه بس ذا الواقع :) لدرجة في المعهد حاطين لنا غرفه صغيره وكاتبين عليها مكان للصلاه للنساء تخيلو لأي درجه فرضنا احترامنا عليهم:) معليش اخوي راعي العليا بطول عليك بس موضوعك جا عالجرح

واسمحلي اجاوب على بعض اسألتك <<<< والله النشبه:(
وش مفهوم الحرية عند البعض هل هو اللبس الي تلبسة أو الاغنية الي تسمعها؟
الحريه في نظري هي حرية الرأي في اتخاذ القرارات المصيريه مثل اختيارها تخصصها في الدراسه ؛اختيارها شريك حياتها ؛وغيره من الامور الشخصيه:)
اما مفهوم الحريه عند اغلب بناتنا والله المستعان اني اصير إمعه للغرب بكل سخافاته...:mad:
مايمنع الوحده تكون ستايل وانيقه لكن بحدود العقل والحلال(ولو اني احس ان التحريم يشمل اشياء صعب الوحده تتركها خاصه فيذا :(ولكن الوحده تقاوم الحرام قد ماتقدر ولها الاجر) مو تروح ترسم خرابيط على جسمها وتلون شعرها الوان قوس قزح Tpb06

وليه تخلينا عن هوية توارثناها مئات السنين ؟ يعني وشي الاسباب ؟ وش اسباب هالتقليد الاعمى؟ امممممم الاسباب سلمك الله اولا البعد عن الدين ونقص الوازع الديني ثانيا التربيه اتوقع لها دور كبير مثلا يجيك الاب يقول لولده لاتدخن وهو يعسل ويدخن بعد:confused::confused: يعني الواجب الاب والام يكونون قدوه لاجل يقتنع الاولاد بان تربية اهلهم صح
ثالثا اعتقد ان الانفتاح اللي حصل لمجتمعنا عن طريق الفضائيات والانترنت وغيره له دور كبير لفقدنا هويتنافيه مثل حليو يقول كثر المساس يفقد الاحساس يعني من كثر ماتشوف البنت هالساقطات بالقنوات الفضائيه تحس انه صار شي عادي لو قلدتهم او شافتهم والاهل نفس الشي صار هالمنظر مو غريب عليهم عشان كذا لو شافو بناتهم او خواتهم كذا مايتحرك فيهم شي (يعني تبلدت الغيره عندهم :()
واسباب التقليدالاعمى عدم وجود القدوه اللي تقتدي بها الفتاه او الشاب يضطرون يقلدون اكثر شيء يحتكون فيه الا وهم ابطال القنوات الفضائيهTpb06
لاتقولون ماللقنوات الفضائيه دور كبير بالعكس قبل ظهور الدش امانه كنا نشوف بناتنا يطلعون ببنطلونات ويطقون المطاعم والاسواق ولا همهم احد؟؟؟ابد ابد كانت الوحده اللي تبي ذا الشي يمنعها نظرة المجتمع لها وانتقاداتهم لها بس اذا المجتمع كله او اغلبه متقعمز قدام رزان مغربي وطقتها ماتبونه يتبلد الغيره والاحساس عنده :confused::confused:
وش دور الأهل في تجذير هالمفاهيم وغرسها في أفكارنا ؟ وشلون نستعيد هالهويه الي فقدناها ?
اما عن دور الاهل فهو الدورالاساسي بالتأكيد لكن اذا كان رب البيت بالدف ضارباً فشيمة اهل بيته الرقص ;)
شلون نستعيدها هذي يبيلها علووووووووم يعني من جد صعب صعب صعب نستعيدها الا بمعجزه ورحمه من رب العالمين لان حالنا وحال أمتنا الله المستعان لا يبشر بالخير :( ضيعنا هويتنا ودينا فأضعنا الله :( طبعا الا من رحم الله وقليلاٌ ماهم :(

اخيرا اعذرني اخوي عالاطاله بس من جد موضوعك لو اكتب الين بكره مارح يبرد الحره اللي فيني :(:(

تقبل تحياتي

ASSASSIN
08-08-2003, 12:59 PM
والله ياراعي العليا لو تنقل موضوعك للعيارين ابرك اشوف البنات شابات علي وانا ماقصدتهم ولا جبت خبرهم اصلا وانا ما اعني الا نوعيه معينة بس الظاهر اكثرهم على روسهم بطحات << مدري كذا جمعها.
الي تتفلسف وتقول ردود مقززه طيب يامقززه كان رديتي على الأسألة وبطلتي هالفلسفة مع احترامي وتقول بملئ فمها وش الي يمنع الانسان يسمع البوب والجاز ويقول قودمورنينق خخخخخخخخ :( لله الحمد والشكر واتوقع ياخالي هذي هي الهوية الي فقدناها وهذا هو التقليد الاعمى الي قصدته بموضوعك والي هاوشتني عشانه عموما انا مسامحك عشان الخمسين الي عندي :(.

ياراعية البوب والجاز في الف عالم صاحوا من القهر وهم يقولون المعازف حرام والاغاني حرام وانتي تقولين وش فيها وذا دليل رقي واهم شي ان شخصيته تبهرك وقول قود مورنيينق وهاي ؟؟ ليه ما تقول السلام عليكم وصبحك بالخير ذا دليل على نقص وهويه مفقوده ما تملكينها وتقليد سخيف للغرب مهيب ثقافة ولا تحضر والظاهر ذا مفهوم الحرية عندك ؟؟ ما اقدر ارد عليك اكثر من كذا لاني غاسلن يدي خلاص واتمنى اني فاهمك غلط لاني حزنت عليك وقسم.

الشيهانة
ولو انك مشرفه لكن ابحط راسي براسك من قالك تطرين اسمي :( . شوفي يامشرفتنا العزيزه انا ماقصدت صيغة الجمع وذا جزء من كلامي الي قلته " شف ياراعي العليا البنت في داخلها انحلال وشلون تبي تغطي هالانحلال بالعباية مثل ماقلت وطبعا ما اقصد صيغة الجمع انا اتكلم عن مثال وهو بصراحه المنتشر والغالبية العظمى .. "
بس كود تشوفون اسمي وتحسون اني اطخم ومملوح تطقكم الغيره وتشبون علي وانا ماسويت شي.
وانا تكلمت باسهاب عن موضوع نزلته مشرفتنا العجيز ببراءه شديدة في منتدى القهوة وشفت فيه انواع الردود السخيفة من بنات اقل وصف يستحقونه بالسخيفات الي محد رباهن وما اقصد الكل ترى انا اقول بعض الردود يعني بالله عليك بنت تجي وقدام خلق الله الي في المنتدى وتقول انا لابسه جنز والي تجي تقول فوق الركبه وتحت الركبه يعني ما تخاف من ربها وتقول والله ذي خصوصياتي وان فيه تماسيح يوم يقرأون هالكلام وبزران ومراهقين .. هذي الحريه بمفهومها ؟ وهذا هو التطور وترى انا قلتها على الملأ وكلمت حنش قلت له لو ذا انفتاحكم اجل لابوه منتدى وكان رده رائع وأكد لي انه مادرى عن هالسواليف الي صارت عموما ما ابي اسهب بهالموضوع انا اقصد فيه عينه فقط وموجوده بينا في المنتدى ولا تقولين اني استخدم صيغة الجمع.

بالنسبة لثانيا الي قلتيها تلبس الي تبي واهم شي تغطيه بالعباية لا يامشرفتنا سامحيني هنا ابدعس فرامل من قالك تلبس الي تبي حنا لنا اخلاقنا وعاداتنا وفي ملابس محتشمه ليه تلبس ملابس عارية حتى ولو قدام بنات ياشيخه في ملابس قمة في الاناقه وقمة في الاحتشام وش فيها الا تبي تقلد الممثله فلانه والمغنية علانه والمذيعة السخيفة في الفيوتشر ولا LBC ذا فقدان للهويه بعد ( عشان لايقول راعي العليا اني طلعت من الموضوع ) ليه الغرب مايقلدونا حتى في ملابسنا ليه دوم حنا نسعى لتقليدهم وصدقيني البنت لا تعودت على هالملابس حتى قدام صديقاتها بالتأكيد جزء كبير من الحياء راح تفقده.

البنت بنت سامحيني وهي تحت شور اهلها ومتى ما فقدوا اهلها السيطرة عليها صاروا خكاريا وموب رجاجيل يعني مثلا انا تتوقعين ابسمح لاختي تلبس ملابس قليلة حياء ومالها داعي صح انا احترمها واقدرها واوفر لها كل طلباتها بس لكل شي حدود اذا ما احترمتني ماراح احترمها.

واخر نقطة ادري ان كلامي يقهر لان ذا الواقع والواقع دائما مؤلم ومافيه تعصب وانا والله اناقشكم بكل حب وود بس انا اشره على نوعيات اتوقع ان فناءهم من المجتمع افضل من وجودهم لانهم مثل السرطان ينتشر للاسف وصعب حصره في مكان محدد؟

ماخرجت من الموضوع ياراعي العليا طيب :(

الظل الطويل : عجبني ردك:)

عطيات أم البنات
08-08-2003, 01:19 PM
ASSASSIN <<<<< ياخخخخخي احبك في الله جعل ام(ن)جابتك الجنه ووالديها :)

بعلمك شي مايعرفه الا ذوات الجنس الناعم <<< يمديك على ذوات

اللي تقول البس جنز واتميلح قدام الله وخلقه ولا تقول البس فوق الركبه ومدري ايش <<< هذي حدها جلابيه من حلة القصمان :D بس تبي تغطي احساسها بالنقص بهالحكي ;) وترى الكلام عام ماقصد فيه احد لا تبلشونا :(

تحياااااتي يالذيب :D وشكل لي باكات مهو باك واحد خخخخخخ

عنايديه
08-08-2003, 02:00 PM
ما زلت في نفس مشكلتك :)
شف العالم يا استاذي بيتغير بيتغير .. رضيت إنت ولا اتعبت أعصابك بيتغير ..
اذا على مفهوم الحريه ..
الحريه إني أسوي اللي أبي أسويه لكن أحط في اعتباري شيئين .. محد راح يتضرر .. و يكون اللي أسويه في نطاق احترام المجتمع و تقاليده ..
الحرية إني أتخذ قرارتي بنفسي و اتحمل مسؤولية تبعاتها ..
الحرية إن الانسان يفكر مثل مايبي .. يقول رأيه باللي يبي .. لكن مو على حساب غيره و لا على أساس إن الراي الثاني غلط ..

ماراح أقعد أرد عليك .. و على وصفك لي راعية بوب و جاز و هاي و باي .. لأن كل الاوصاف اللي قلتها لا تمت لي بصلة :).. هذا أولا .. ثانيا استاذي .. حنا مو في موضع نقول الأغاني حرام أو مو حرام :rolleyes:.. و رد عليك راعي العليا و قالك هذا شي راجع للشخص نفسه و ربي بيحاسبه .. ثالثا مو على كيفك تحور كلامي عشان تطلع بطل ;) ..

ارجع و اقول لك كل اللي يهمني من الانسان اللي اتعامل معه .. (الفكر و الشخصيه) مو اهتمامات خاصه فيه و طريقة كلامه و نوع ملابسه ..

و على فكره ردي اللي فوق كان واضح :confused: .. بس شكلك تفهم الشي على كيفك :rolleyes:..
و مو ذنبي ان فهمك على قدك :)

ASSASSIN
08-08-2003, 02:23 PM
عنايدية
ماراح ادخل معك بمهاترات وارد عليك واقولك انتي الي فهمك على قدك ويحلفون انك ما تفرقين بين دمجه وجح وابحاول ارد عليك في صلب الموضوع..
اذا تغير هالعالم للأسوء وللأنحلال ولقلة الحياء هل نحن ملزمين بالتغير معه ؟
هذي النقطة الاولى وياليت تكتبينها وتحفظينها تالي الليل وتعالي بكره عشان اسمعها لك.

قلتي ايضا ان الحرية انك تسوين الي تبينه وتحطين في بالك ان محدن يتضرر ويكون في نطاق احترام المجتمع وعاداته وتقاليده وهالرد الي قلتيه ايتها السيدة الفاضلة يناقض كلامك الاول تماما وينسفه لان البوب والجاز وغيره مهيب من تقاليد مجتمعاتنا ولا من عاداته.

قلتي ان حريتك ان تختارين قراراتك بنفسك وانتي المسؤولة عن تبعاتها واقولك ياسيدتي الفاضلة ان كلامك يخلو تماما من الصحة ودليلي على ذلك المثال الاتي اذا كان هناك بيينا فاسق يشرب الخمر( لاحظي تراني اكلمك فصيح عسى تفهمين علي ) والمخدرات و و و هو نظريا يضر نفسه فقط ولكن تناسيتي ايتها الفاضلة ان هذا الانسان وتصرفاته مثل خلية السرطان في جسم الإنسان قابلة للإنتشار والتوسع إن لم يتم استئصالها وانتي بحريتك التي قد تحمل فكر غريب ومظاهر غير لائقه يمكنك أن تأثرين بغيرك وهذا هو السرطان بحق ويجب إستئصال فكرك في هذه الحالة الإضرار بالغير ياسيدتي لا يشترط ان يكون ملموسا ولكن التأثير المعنوي أبلغ خطرا < -- لا عدمتك ياسيباويه :(

قلتي ابحترم الانسان الي قدامي لفكره وشخصيته بغض النظر عن ملابسه واهتماماته الخاصة ؟؟ شيء غريب بصراحه ومضحك في نفس الوقت فكر الإنسان وشخصيته لا يجزء ابقولك مثال عشان تفهمين علي ؟؟
الله يعافيك إنسان شفتيه حليل وطيب ومثقف وشخصيته قويه ومدري وشو هذا الظاهر وبالتالي هو إنسان يشرب الخمر ويعاشر النساء وفاسق و و و الخ ؟ هل هذا انسان يستحق الاحترام عشان جزئية معينه والجزئية الثانيه مالي شغل فيها ؟
وبالتالي انسان متشبه بالغرب مثلا ولا يحمل هويه وانطباع يمثل مجتمعه وتقولين ابحترمه عشان شخصيته امحق احترام وشخصية:)
الحين تأكدتي ان فهمي على قدي :) ؟؟؟؟؟؟؟
تحياتي واحتراماتي

كتكوته مفترسه
08-08-2003, 03:34 PM
راعي العليا,,
المشكلة في كون الطفل ينشأ في بيئة تعتبر عاداته و تقاليده سبب في تقييد حريته ,,
خاصة البنت ,,
و بعضهم يستحي من عادات المجتمع اللي اغلبها احكام دينية واجبة

^^
و تبي اكثر من كذا :(


ASSASSIN ,,
ياخوي هد اعصابك الله يصلحنا وياك ترا اسلوب على راسه بطحا و انتي بنت ما تستحين ما ينفع حتى مع البنات الصغار :)
ياخي افهم ان المسأله اكبر من مسألة لبس و عادات و تقاليد ,,!
بلاوي بس ما يقدر يفهمها الا واحد ناوي فعلا انه ما يتحيز لأي طرف :rolleyes:
و رجاء لاحظ و انا ارد اني منيب احاول ابرر لنفسي على قولتك,,لا انا صدق اشوفها مشكلة لأن عندي اخوان و اخوات صغار شايلة مسؤؤليتهم ,,

الشـيـهـانـه
08-08-2003, 03:58 PM
سلخيييييييييييير



راعي العليا ادري انك ودك تصفقنا لكن ASSASSIN هو السبب


ASSASSIN
بالنسبه للبس انا ما قلت تلبس لبس ما يلبسونه الا الدشير ( سوري على الكلمه ) لكن اقصد جينز و ربعه ماهوب عيب ولا حرام و لا فيه تجاوز على عاداتنا يعني صعب انك تحكم البنت في كل شي حتى اللبس البسيط نحط عليه قيود و ما يجوز لان كثر الضغط يولد الانفجار
و انا رأي ان اللبس ( طبعا اقصد اللي في حدود الأدب ) بما انه بين بنات و لا فيه حرام مافيه شي
و خالص احترامي لوجهة نظرك :)

أما بالنسبه للاهل اللي ان خلوا بنت على كيفها فهم خكاريا انا اقول ماهوب بس خكاريا الا بعد ليتنا نقدر نلبس رجال براقع عشان يضفون وجيهم @@
انا بالنسبه لكلامي كنت اقول ان اللوم على الاهل لكن في سن معين يكون من البنت نفسها
@@


برايفت ASSASSIN :
انت كذا pb018

:)
تحياتي

ASSASSIN
08-08-2003, 09:34 PM
عطيات أم البنات
امين يارب واياك واحبك الله الذي احببتني فيه :)

كتكوته
ادري ماكله حبحر وتردين علي انا مدري وش مسوي لك الانسان الناجح الي مثلي لازم يرمى بالحصى عشان كذا حاقدة علي لكن ابرد عليك وماراح اسوي فيها ثقل .. انا ومن خلال رد سابق على الشيهانة قلت لها يامشرفتنا العزيزة انا ما استخدمت صيغة الجمع انا تطرقت لنوعية معينة صح هم كثر بس انا تكلمت عنهم وما جمعت ولا قلت كل البنات كذا وهالنوع انا حاقدن عليه وما اطيقه والي يدافع عنه وش رايك فيه ؟ اكيد من طقته فأنا ما حبيت ان وحده تدافع عن هالنوعيه لانه شي فاسد ويبي له غسيل مخ عسى بس ربي يهديه ،، خليك معي الله يعافيك وركزي وافهمي كلامي انا مثلا جبت مثال موضوع كتب في القهوة وكتبته الاخت العجيز وهي طبعا كانت هدفها برئ منه وعادي بس بعض البنات الله يهديهن قالوا كلام ما ينقال وانتي من المشاركات في هالموضوع بس كلامك كان محترم يعني فيه فرق بين هالنوعيه وبينك اجل انا ما تكلمت عن نمونتك هذا مجرد مثال ترى وكنت اتمنى اصلا ما تشاركين عقب ما شفتي هالكلام الي ماله سنع بس هدفك كان برئ ومنتي مثل البقية ذا مثال ترى ؟؟
وانا يوم تكلمت عن فئة معينة من البنات وقلت كذا وكذا وكذا كانت لهجة الخطاب موجهه لهم وبالتالي ما اتوقع ان هالشي يزعلك وكنت اتمنى تشاركيني لغة الخطاب مهوب لو تكلم بزارين اصلا لو اكلم بزارين راح يفهمون بس هالنوعيه ما تفهم وبعدين لا تحاولين تدخلين نفسك بسوالف انا ماقصدتك فيها خلك بالزاويه ولا شاركيني برأيك طيب ؟
تحياتي وتراك كاتبه مميزه بس حاولي تفهميني << يمديك ؟


المشرفة الشيهانة
خخخخخخخخ تسني انا راعي الموضوع .. اولا يسلم فمك ياشيخة كلامك ولا اروع وبالنسبة للملابس انا قلت فيه ملابس محتشمه ومؤدبه مافيها شي انا اعتراضي على الملابس الفاصخة مره وياراعي العليا لا تزعل انا اقصد من الملابس هو التقليد والتقليد هو البعد عن هويتنا < -- يرقع :(
وبالفعل لومك للأهل في محله وما اختلفنا ابد وتسلمين ياخاله :)

ريانه
08-08-2003, 09:34 PM
راعي العليا
موضوع رائع و ذو شجون ...<<<< توها طالعه من الجاده :(
راجعه لك ...
بس حبيت ابدي رايي فيه :)

بنت نجد
08-08-2003, 10:35 PM
رجعت , وبرد فيذا Tpb08

اول حاجه ابي اقولها ان كلمة " العيب " كلمه اختلقها المجتمع ,يعني مالها اساس ولا معايير ثابته, كل مجتمع صغير له قيوده والاشياء الي يصنفها من ضمن " العيوب" تتفاوت مابين عائله واخرى , وانا بصراحه مااستصيغ هالكلمه, يعني لما ام تقول لبنتها مثلا لاتلبسين ذا عيب؟ يعني كنها خايفه من القيل والقال ومن كلام الناس وماخوفت بنتها من " الحرام " ومن عقاب ربها, يعني حتى لو الام قالت هالكلمه لبنتها, وش ترجى منها؟ تخاف الناس؟ هذا لو كانوا الناس اكبر همها , بس الي مايهمها احد فها" العيب" راح تلغيه من قاموسها, وتركض ورى رغباتها تحت مسمى(بيقطعون راسي عاد؟), عشان كذا وعشان يكون كلامي بليغ ومقنع , فلازم اخوف البنت بخالقها مهوب بكلام فلانه وعلانه , وقتها راح اغرس فيها مبادئ تتبعها طول عمرها مهوب بس في السلوك الفلاني ولا اللبس العلتاني الي مدري وش يبي..Tpb08

فيه بنات كثير للاسف تلقاهم يلبسون هالملابس قدام اهلهم, بناطيل ضيقه وتنانير للركبه قدام اهلها واخوانها وعااااادي تحت ستار " الفري والتمدن والحضاره" بدون اي ذره حياء؟ والبعض الاخر تلقى اهلها "يستعيبون " هاللبس سواء اكان بدافع الحرام والحلال , او من القيل والقال , هذولي تلقاهم قدام اهلهم يطلعون بلبس محتشم وتنوره طويله , لكن بس يوصلون للمكان تلقاهم يبدلون لبسهم , هذا ان ماكانوا لابسينه تحت تنانيرهم وهالشي شفته بعيني.. يعني خافت من اهلها ولا خافت من ربها ؟ :)
طيب حتى لو اهلي ربوني على مفهوم الحضاره الزائفه والانحلال في اللبس مثلا,, انا وين مخي؟ انسانه لنفرض انها متعلمه ودارسه وفاهمه الفرق بين الحلال والحرام والصح والغلط , ليه ماتعيد نظرتها في نمط لبسها, ونمط سلوكها بناء بغض النظر عن مجتمعي واهلي؟ يعني كون اهلها ربوها على كذا , فهالشي مايعفيها من المسؤليه اجل ليه الله ميزنا عن البهايم بالعقل؟ مهوب عشان نفهم وندرك ونميز الحلال من الحرام؟


الموضوع شائك , واكبر من مجرد " لبس", الموضوع يمس مفاهيم تربويه تحت مسمى التمدن والحضاره وتمجيدها, وابتعادهم عن المنبع الصافي (كتاب الله وسنه رسوله عليه الصلاه والسلا)

هذا الي براسي الحين, وان كان لي عوده عدتTpb08

كتكوته مفترسه
08-08-2003, 10:56 PM
ASSASSIN
انا اعتذر اذا كنت فهمتني غلط ,,
لكن اعتراضي كان على اندفاعك و انت تتكلم عنهم,,
كلامك معقول و ما عليه اي غبار ,, لكن ما ننسى ان هالفئات اللي نتكلم عنها ضحية,,:)
قبل لا امشي بس اوضح لك اني لا ماكله حبحر و لا شي ههههههههههههههههه
بس الظاهر شكل ردودي يطلع كذا !!
و انا ما قلت انك تقصدني :( لاني دارية انك ما تقصدني اصلا
لكن قلنا بدون اندفاع و ما ننسى ان فيه فئات تحتاج مساعدة بدل السب فيها :rolleyes:

شكرا :)

راعي العليا
09-08-2003, 01:09 AM
عطيات ام البنات ، طير في السماء ، ريانه يعطيكم العافية :)

صرت موظف تشريفات وانت راعي الموضوع يا ASSASSIN :(

شي حلو ان الواحد يرسم حدود حريته بس اكيد فيه ضوابط وموانع عندها تنتهي هالحريه في حدودها.. هالضوابط وش يحددها اكيد اشياء كثيره الدين وعادات وتقاليد واعراف متبعه .. ودور الاهل بالدرجه الاساسية هي التوعيه باهمية هالحدود وتعريفنا عن مدى المساحة الي يفترض ما تتجاوزها حريتنا ومحاولة غرس هالشي فينا عن قناعة واقتدارمع مراعاة المتغيرات وبما يتلائم ويتكيف مع وضعنا الراهن.
اذا فعلا وصلنا لهالنقطه وتفعلت فينا اتوقع امتلكنا هوية تحمل طابعنا الخاص.. بس المشكله الاساسية هي وشلون الاهل يزرعون هالشي فينا.. مثلا انا اعرف ناس الام مدري وش صار لها في عقلها وجابت لاولادها مربية بريطانية يعني هوس كبير عشان تعلمهم الاتيكيت على الرغم ان هالقرار لاقى اعتراض مو طبيعي من الاولاد انفسهم وهالسالفه صارت عندنا في الرياض :( وغيرها اكيد الكثير والكثير من الامثلة اذا كانوا الاهل مثلا مفهومهم للتطور خاطئ وناتج عن جهل وش ابتوقع مثلا من الجيل الي يليه؟ ..
بهالحاله فقدنا كل شي مو هويتنا وبس.

كتكوته مفترسه تعليقك حلو بس عاد وش اسوي اطمع منك باكثر وانتي كريمه وحنا نستاهل :)
بنت نجد : رغم انك صاحب الموضوع الاساسي وراعية الفكره بس تعليقك لا غبار عليه سلمتي ياخاله :)

عموما ذا تعليقي والردود كلها بدون استثناء بصراحة اروع والله يعطيكم الف عافية :)

سيدة الأرض
09-08-2003, 02:36 AM
الأزدواج في الشخصية ناتج عن الأزدواج في التربية وتعليم السلوك مابين المدرسة والبيت..
لو فيه تكامل بين المدرسة والبيت ماحصل الأزواج ..:)
بالمناسبة موضوعك رائع جداً وأسلوبك لطيف جداً :D

wind_rose
09-08-2003, 03:01 AM
بعد اذنك راعي العليا ....

يعني ابوها بالله مايقولها شي ولا قدامه تسوي فيها اخلاق
لو الاب يناظرها كذا ومايقولها شي عاد ما اشره عليها لو سوت كذا واكثر
العيب هو ان اهلها مايربونها لو سوت كذا ومايطقها اخوها بعقاله لو شاف
منها مصاخة وقلة حيا


يا أخ ASSASSIN :)
هالحين هذا الي وصلنا له ؟؟ ان الشرهه على الاخو الي ماطقها بعقاله ؟؟
يعني برأيك إن الضرب هوا الحل للمشكلة ؟
انت بتغير قناعات البنت بالضرب ؟؟
المشكلة مو بإنها لبست كذا وبس !! المشكلة بقناعاتها وتفكيرها الي يعكسه هالسلوك .
بالعكس الضرب اساسا مهو اسلوب تعامل وهو حيلة الضعوف بصراحة .. والي تفكيره على قده هوا الي يستخدم قوته العضليه :mad:
لأن الي عنده عقل متفتح يقدر باسلوبه انه يحاور هالبنت ويشوف هي ليه تلبس كذا او تتصرف بهالشكل الشاذ
وبالحوار يقدر يحل المشكلة ويجتثها من جذورها بدال الحلول المؤقته الي ماتجدي " الضرب وفرد العضلات "
ويمكن بإن اساسا سبب تصرفاتها هذي هي الضرب واسلوب التعامل الخاطئ الي أهلها و " أخوها " يعاملوها فيه...دفعها انها تحاول تتمرد أكثر وتشذ عن العادات وتعاند ..
ياعزيزي فيه طرق كثيرة أرقى من الضرب الي مايجدي ..
صدقني البنت بحاجه انها تحس بالأخو كصديق مو رقيب على أفعالها ..
تلاقيه مايعرف اخته إلا عشان يهاوشها ويحاسبها ليه سويتي كذا والا ليه لبسك كذا ..
لكن يشاركها يشوف هي ليه متضايقة والا يحاول يتلطف معاها لا هذا عيب وانتقاص من رجولته !!

عنايديه
09-08-2003, 05:49 AM
تسأل و تقول إذا تغير هالعالم أتغير معه أو لا
لا أبدا .. انت محد غاصبك سواء كان هالتغير للأسوأ أو للأفضل محد قايل لك تغير .. بس أرجع و أقول .. الجاز و البوب و هاي و باي .. مالك حق تسميها قلة أدب .. براحتك ماتبي بوب و جاز و لا تبي تقول هاي و باي شي راجع لك شي مثل ما ان الاختيار راجع لغيرك في الاختيار .. لكن مو تحكم على اللي يسمعها بإنه أسوأ منك أو تطلق عليه لفظ قليل حيا .. و بعدين أنا استغرب منك اذا قلت أسوأ و انحلال ..

نجي للحرية ..
و الى الآن و أنا على كلامي يا سيدي الفاضل .. و اذا على مجتمعي على عيني وراسي .. حقه وواجب علي احترمه .. بس مو في مسائل شخصيه .. مو في لبس أنا لابسته تحت عباتي أو نوع موسيقى أسمعه أو نوع عملي أو اختياري لزوجي .. يعني اذا قابلت واحد بالشارع يسمع بوب .. باقوله لا تسمع .. يقول ليش ؟ أقول مو من عاداتنا و لا تقاليدنا :confused: ..
و اذا على سالفة المقارنه مع الخمر و المخدرات .. مافيه وجه مقارنه بين اللي نتكلم عنه و بين اللي انت جايبه :confused: .. وش جاب شي الواحد يحب يسمعه و انت ماراح تنضر اذا سمعه .. و بين مخدرات و خمر اذا شربها الواحد و تعاطاها عياله بينضرون و جيرانه بيتأذون .. أضف إلى ذلك إن الخمر و المخدرات مسألة أخلاق سيدي و ليست مسألة تقليد .. و لا عمرها كانت تقليد لأن الخمر كان موجود عند العرب قبل لا يكون عند الغرب .. مدري بس مافيه وجه مقارنه :confused: ..


قلتي ابحترم الانسان الي قدامي لفكره وشخصيته بغض النظر عن ملابسه واهتماماته الخاصة ؟؟ شيء غريب بصراحه ومضحك في نفس الوقت فكر الإنسان وشخصيته لا يجزء ..
لايجزء يا أخي في مثالنا اللي جالسين نتكلم عليه .. اذا كل ماقلت شي بتنط لمشكله تختص بأخلاق الواحد و تقول مالها علاقه بشخصيته .. وش جاب الحين صاحب الخمر و معاشر النساء في كلامنا ؟ اذا انعدمت الأخلاق يا سيدي ممافيه مجال للشك ان شخصيته بيتبعها انحلال .. لكن اهتمامات شخصيه و ذوق والله عجبني و أخذته من حضاره ثانيه هذا إنت ليش مضايقك دامه ماضرك ؟

وبالتالي انسان متشبه بالغرب مثلا ولا يحمل هويه وانطباع يمثل مجتمعه وتقولين ابحترمه عشان شخصيته امحق احترام وشخصية
ارجع و اقول لو قلت هاي و باي و لبست جينز و سمعت بوب وجاز مجتمعي ماله علاقه باللي اسويه .. و مو من مجرد سويت هالاشياء يعني خلاص تشبهت بالغرب .. و لو شفت واحد متشبه بالغرب (حسب ما أنا فاهمه مفهوم التشبه) ماراح أنبذه و لا راح أقول أنا أحسن منه و هو قليل حيا دام أخلاقه و تعامله معي مافيها شي .. و لا رح أقول أنا أحسن منه و الله عشان أنا ما تشبهت بالغرب ولا لبست الجينز .. ما أدري على أي أساس ربطت بين قلة الأدب و موضوعنا :confused: ..
اللي له علاقة بقلة الحيا أخلاقيات و هذي أنا معك فيها بأي شي تبي تقوله ..

الحين تأكدتي ان فهمي على قدي ؟؟؟؟؟؟؟
والله مدري وش اقول لك .. بس انا اتكلم بوادي و انت تجيب لي رد في وادي ثاني عشان شي ودك تتكلم فيه .. و ماله دخل باللي أقوله :o

ASSASSIN
09-08-2003, 06:13 AM
والله اني في الدوام وشين في قلبي يقرقع تسني داري انكم راح تستغلون فترة غيابي
وتحشون فيني لكن هين راجع ارد عليكم بنت بنت وابقنعكم يعني بقنعكم وتشوفون
وماراح اطلع عن مفهوم الهوية ياراعي العليا والفكره وصلت وماراح ارد عليهم
الا بناء عليها يعني تطمن بس خلني اخذ راحتي وباسلوبي خخخخخ الخوف مليح :(
اذا رجعت البيت صار خير :)

RESCUER
09-08-2003, 07:08 AM
بصراحة الكل كذا الوضع كذا ما استثني الا شوي البنات كل تفكيرهم كذا والشباب بعد
المجتمع صعب صعب اصلاحه وشلون نكون هويه من اللاشي وحنا افتقدناها وماصار شي يقنعنا والغرب فعلا كاسرين عيونا كل شي غربي حلو مهما كانت درجة قذارته بس حنا نستصيغه ما ادري ليه وكل شي عربي شين ومتخلف مهما كانت درجة جماله هذا هو الوضع ببساطه ياسيدي انا اعترف البس مثل غيري ملابس موضة واتابعها بشكل دائم وقلت لك الكل كذا والي مو مصدقة وتكابر تروح اي حفلة عرس او دي جي او تخرج أو اي تجمع فيه بنات راح تشوفهم كلهم كذا صار هالشي طبيعي والله ماعندنا انتماء لشي معين كل انتمائاتنا مثل ما قلت مقلده بس تعايشنا معها وصرت احس اني انتمي لهالشي ما اقول ذا ضعف ايمان مني مثلا ابد السالفه اني نشأت على هالشي من الصغر وانا اصلي واصوم بس ما اشوف هالشي عيب او مخزي مره لاني اذا طلعت اتغطى وذا الشي الطبيعي بالنسبة لي ولغيري هل هالشي عيب طيب اذا كان عيب وشلون نصلحه وشلون تصلح من أمه بكبرها اذا كان مجتمعنا هو من من المجتمعات المحافظة والمتمسكة بالعادات والتقاليد بل افضلها السالفه من وجهة نظري صعبه ويبي لها معجزة..
سالفة الهوس كيبر الي ذكرتها ترى فيه مثلها واجد فيه امهات اكثر ارستقراطية من ابنائهن وفيه اشياء افظع من كذا..
ذا ردي باختصار بناء على توضيحك الاخير وأكرر الموضوع رائع
يعطيك العافية :):)

ASSASSIN
09-08-2003, 10:32 AM
كتكوته
اشوا تفاهمنا ووصلنا لكلام مرضي للطرفين عموما هذا هو الهدف من النقاش دائما مهوب التعصب الغير مسئول واقنعني غصب ولا اقنعك غصب خلاص صافي يالبن :)

wind_rose
اختك اذا احترمتها وقدرتها وسويت عشانها كل شي وهي بالمقابل لا تحترمك ولا تقدرك ولا تسمع كلامك وما اقصد تصير ديكتاتوري عليها لا انا اقصد تحاول انك تفهمها الشي الصح وهي لا زالت مقتنعه بمبدأ الحرية الي وضحته احدى الاخوات بهالحالة ما اشره عليك لو تفحط فوق بطنها بتريلا مهوب سيارة. وانا معك الاخت محتاجة لاشياء كثيرة والإنسان المختل بس هو الي يعيش لنفسه وينسى ان فيه انسانه من دمه ولحمه محتاجته ولنصائحه تحس ان فعلا فيه انسان يهتم فيها وظهر تستند عليه.
اتوقع كلامي واضح :)

عنايدية
انا ما ادري وش بيني وبينك تدخلين ومستشره ومدري وش فيك مع اني احاول اناقش بكل عقلانية ..
من قالك ان هالتغير الي للاسوء مايضرني انا موب عايشن بالحالي عشان العالم يتغير وانا لا انا مو عايشن لنفسي انا حريتي ترتبط بحريات الاخرين وبالمجتمع الي انا فيه ذا مفهوم الحرية ان حريتي لها ارتباط مباشر بعقيدتي بمبادئي بالارض الي انا عايش فيها انا حريتي مهيب شي مطلق ابد حريتي مرتبطة بحريات الاخرين ومشتركه معهم في مفاهيم كثيرة.. هذي هي الحرية وارجع واقولك ترى الكلام الي تقولينه ذا مالك فيه حظ ولا نصيب وقلت لك وكررت هالامثلة توضيحية وان كانت بعيدة شوي بس تأدي الى نفس الغاية مجتمعنا يرفض اشياء ما اقول لا انا حر ابسويها ديننا يرفض اشياء ما اقول لا انا حر ابسويها شخصية الإنسان غير مجزئة ما اخذ جزئية واقول هالشي عاجبني فيه خلاص الباقي ماعلي منه ويوم تقولين اذا انسان ماسوا فيني شي واخلاقه معي تمام وفي نفس الوقت متشبه بالغرب ومتاثر بهم ومدري وشو عاد وين مبدأ الأمر بالمعروف والنهي عن المنكر( ترى ماطلعت من الموضوع اصبروا علي ) مو هذي الهوية الي قاعدين نتناقش فيها اذا ضيعتيها بمفهومك الخاطئ وشلون تتوقعين راح نستعيدها وصرنا اصلا نفكر تفكير مسلسل مكسيكي ؟
يا اختي الله يخليك عيدي التفكير بكلامك ما ابي ارد عليك واذكرك مرة ثانيه اسلوبك وكلامك فعلا غلط :)

wind_rose
10-08-2003, 02:06 AM
صبــــاح الخير :):):)
ASSASSIN
مدري ليه معصب وآخذ المسأله بعصبية !!
إحنا نتناقش مو نتهاوش !!
ياعزيزي المشكلة أعمق من كونها سلوكيات خاطئة .. إحنا الهدف الي نبغى نوصل له
كيف إننا نحل المشكلة هذي من الأساس يعني وش الي دفع البنت تتصرف كذا ..
وليه تفكر بهالشكل ؟؟
بعدين أرجع وأقولك الضرب حل مؤقت وغير مجدي ..
لأن سلطة الأب أو " الأخ راعي العقال " مؤقته ..
يعني دامها هي مقتنعة انها تتصرف بهالشكل لابد يجي يوم تتحرر فيه من قيود الأهل
وتسوي الي براسها .. مثلا يسافر اخوها يتزوج .... بترجع لنفس سلوكها الي أول ..
وبكذا مانكون استفدنا شي بالعكس يمكن تزيد بالعناد وبالتحرر .

حــلــى
10-08-2003, 06:06 AM
نقاشكم توووووبhttp://smilies.sofrayt.com/%5E/w/thumbs.gif

عنايديه
10-08-2003, 08:23 AM
لأول مرة أحد ينبهني إن الاختلاف في وجهات النظر صار شر :confused:
مع اني احاول اناقش بكل عقلانية
طيب خلاص نصير عقلانيين (و مدري ليش يعني منيب عقلانيه :confused: )..مع إني طرحت لك كذا فكرة وما رديت عليها و نفيتها .. و بينت لك إنك كل اللي تتكلم عنه أخلاق مو اهتمامات و هوايات ..

طيب خلاص يا أستاذي .. لنفرض كلامك صح .. و اللي يسمع البوب انسلخ من عاداته .. و اللي تلبس جنز تحت عباتها خلاص هذي قليلة حيا .. واللي يقول هاي و باي هذا أهله ما ربوه .. على حسب وجهة نظرك .. خلاص أنبذ هالشخص ؟ و اذا كلمني و صار بيني و بينه سلام و أخذ و عطا و لاغلط عليك ولا شي .. و التفت و مشى .. أقول من وراه (منسلخ من عاداته و لابس جنز و يسمع بوب ..امحق شخصيه .. قليل الحيا pb010) ..
^
^
^
سؤالي سيدي على اللي مكتوب أعلاه pb010 ..
كذا تتعامل مع الموضوع و على التغير اللي صار في بعض الشباب ؟
بتقول لي أمر بمعروف و نهي عن منكر ؟
إنت شايف شلون وضع الأمر بالمعروف و النهي عن المنكر .. و عارف وشلون شبابنا يتقبلون الكلمه منهم :) ..
و اعذرني أقولك لو كان أسلوبك معي في كلامك و طريقة نقاشك هي اللي بتتعامل على أساسها مع هالشباب اللي خليتهم قليلين حيا .. إنت عارف وش بتكون ردة فعلهم ;) ..
اللي أبي أوصل له .. إنت وش شايف الحل ؟
أروح أقول للبنت :

البنت في داخلها انحلال

من زين جسمها عشان تلبس جنز يعني تلقى جسمها يابعد تسبد امها جسم حاشي طاقته الحصبة

انتوا يالبنات فريسة لنظرات شرهة من الطرف الاخر
^
^
شرهه !! <<~~ هذا هو الانحلال ;)

وافهمي انك لو جلستي اربعين سنه تفركين في ركبتك بليفه وصابون ماراح تصيرين مثل بريتني خخخخخخخخخخ
^
^
من اللي عاجبه الغرب الحين ؟ :)

وحنا ميزنا الله بجمال النفس قبل جمال الشكل والمظهر.
^
^
يكون بعلمك مميزين بجمال النفس و المظهر في آن واحد .. لكن بريتني شكلها عاجبتك :)

لو صحيح ما اقول الا الحمد لله على نعمة العقل ؟

يعني ما تحس هالنوعيه من البنات بالقرف من شكلها مثلا وهي لابسة بدي وكرشتها الين ركبها ؟
^
^
:confused:

العيب هو ان اهلها مايربونها لو سوت كذا ومايطقها اخوها بعقاله لو شاف منها مصاخة وقلة حيا
^
^
!!!!
لاتعليق

بس ابوها الدلخ ما زرع فيها مبادئ ومفاهيم يوعيها
^
^
برضو لا تعليق :)

اخخخخخخخخخخخ ياجعلهم للطاعون الي يريحنا منهم شوهوا سمعتنا هالنوعيات

^
^
^
^
^
أسلوبك يا (أستاذي :) ) يرد عليك .. و يكفي يخليني أعرف مع أي عقلية أنا أتكلم :) ..

معد فيه شي أقوله .. وجهة نظري و كانت واضحه من أول رد .. والله يوفقك في تغيير الانحلال اللي صار في مجتمعنا Tpb08 ..

دمت أخا.. و أشكرك على فتح المجال للنقاش و على ردودك .. تحياتي لك :) ..

ريانه
10-08-2003, 09:58 AM
هلا بك اخوي راعي العليا
سطورك كانت رائعه
بينت لنا في سطورك السابقه
فهم كثير من الاشخاص لمفهوم الحريه بالشكل الخاطئ !!
الحريه مطلب ضروري، لكن بحدود
الاب يعطي ابنائه الحريه ...
ولكن من الضروري عدم سماحه لهم بأي شي منها الا بعد
ان يشرح لهم مفاهيمها الصحيحه وهي بأختصار في نظري ...
ا((اخذ ما ينفعنا في حياتنا واجتناب ما يعود علينا بالمضرات))
لا البس ولا التصرفات هم من مصطلحات الحريه... قد تكون اشياء جانبيه
واقرب مالها ... نقص العقل والغباء بنظري
لكل منا حريته الخاصه في فعل ما يحلوا له
وقد يخطئ البعض منا ...
لكن بعد فعله لبعض الاخطاء ..يبدء بمحاسبة نفسه
ويتوجه لله سبحانه بطلب العفو والمغفره منه
ولا اخفيك سرا ...
بانه قد يرجع لاقتراف نفس الشي من جديد!!
ويعيد الكره في الاستغفار وطلب العفوا من الله
اذاً لديه حريه ...ولديه قلب يذكرة بالاستغفار
وجود الضمير الصاحي لم يتواجد من عدم؟!
اعطيا حريه بقدر معقول ...ومعها مفاهيمها الصحيحة
قد يخون مفاهيمها التي اهديت لة بباقه من الحب والحنان والثقه الابويه
وخيانتة لها تأتي نادره بريئه... ولكنة للاسف خانها


طرحت مثالين :
البنت ووصفها للبسها ...
(من وجهة نظري)
اللبس بحدود ...(نلبس قصيرو نلبس طويل ونلبس محزء ونلبس كل الي نبيه)
لكن بحدود واحترام!
في وجود الوالد الله يحفظه ...
له احترامه وتقديره ومستحيل اسمح لنفسي
بلبس اشياء تبين اكبر قدر من (جسدي )
لكن لو دخل علي وانا لابسه شي من ذا النوع ...
صدقني هو راح ينسحب علشان يعطيني المجال بتغيره ولا يسبب لي احراج
( نظرة شخصيه لانه هذا الحاصل بالنسبه في وسطي العائلي )
اما بالنسبه للبس في الزواجات والحفلات والزيارات العائليه
واذا كانت نسائيه بحته ...اتوقع قاعده بين حريم ‍!
(يعني مافيها شي !! )
اما بالنسبه للبس تحت العبايه
اذا كانت الوحدة تضمن ان مايطلع شي من جسمها
وهي ماشيه ...من وجهة نظري انه عادي (لان الجو عندنا يجيب الموت ...)

اما من ناحيه :

- هو: ليه كل شوي تطلعين من الماسنجر عسى ماشر ؟

- هي: يا اخي ابوي غثني مدري وش يبي ذا ؟

اتوقع البنت هنا ماعندها حريه ...عندها حقاره ودنائه
اجل تقول : ابوي غثني .؟؟
الله سبحانه وتعالى قال : (( ولا تقل لهم اف ولا تنهرهما ))
وهذي قالت غثــــــــني ؟!
بجد سماجه وقلت حياء ...
انا في حياتي الخاصه اتمتع بنوع من الحريه
الحريه في كل شي ...لكن بحدود
ممكن انا ارسمها بنفسي اكثر من كون احد يفرضها علي
لاني ابخص بنفسي وادرى بعمري ...
ولا اتوقع احد راح يفهمني اكثر من فهمي لنفسي...
ممكن امنع اشياء اهلي ما منعوها علي ...
ما تضر بس احسها ممكن تجيب لي اشياء مضره
وما اسوي اي شي الا قبل ما استأذن فيه اهلي
كان ماكان هذا الشي
وممكن احصل الرفض في بعض منها
احاول اناقشهم فيه بطريقه عقلانيه ...ممكن يقنعوني فيه ..فأحرص على الابتعاد عنه
وفي اشياء ثانيه ممكن اهلي يطلبونها مني ...لكني ارفضها ..وبنفس النقاش العقلاني
وممكن يعجبون بوجهة نظري من ناحيه الموضوع ..وينسونه

بأختصار شديد ...
الحريه مطلب ضروري وموجود ولا هو صعب ...الصعوبه تكمن في كيفيه بلورة انفسنا اتجاهها !!

راعي العليا ...
لك مني كل الشكر والتقدير على طرح قضيه بالغه في الاهميه ،،
تحياتي لك ،،

برايفت عناديه ...
ماشفتي شي Tpb08

صاحب الظل الطويـــــل
10-08-2003, 11:01 AM
Assassin , عنايدية , Rescuer , الشيهانية , كتكوتة مفترسة , وغيركم اللي تفضلوا واشتركوا في النقاش :)

عندي كلام عـــام ومتفرّق أرجوا انكم تسمعونه ...مدري تقرونه :)

*اختلاف الرأي لا يفسد للود قضية :)

*تبدأ سيّدي الفاضل حريّتك عند انتهاء حريّة غيرك

*من الغباء بأن يكون عذر "خرابك" في علاقة أو مجتمع هو خراب الطرف الآخر

*الأمر بالمعروف والنهي عن المنكر ليس مخصص لرجال الهيئة ولا مخصص لأسلوبهم :) بل من الممكن أن تكون بابتسامة أو اهداء كتاب أو اهداء شريط أو نقاش أو موقف أو موضوع في منتدى أو حتى رد في منتدى ;).
سهلة هي على أي شخصة حريص وغيور :)

*الأغاني ... هههههههه ... يسمعها الكثير رغم علمهم بـ"حرمتها" ,انهم يتساهلون لا أكثر ... وهذا شائع :)
المشكلة في من يحلّلونها ويعتبرونها حريّة شخصية:)

*بالنسبة للضرب في التربية والتأديب , من المعروف أن أن النبي صلى الله عليه وسلم , لم يضرب ((أقصد الضرب اللي عندنا اللي هو لعن خيّر وشق ثياب)) أحدا قط , حتّى خادمه :)

*الكثير من يتعلل بالعادات والتقاليد ... أنا أتعلل بالدين ((القرآن والسنة))
توجد عادات خاطئة , وتقاليد محرمة
فدعنا منها , ولنتمسك بمصدر عزتنا الوحيد ... الإسلام :)

*بالنسبة للمجتمع وتجديفنا (معه أو ضده) فيكفي قول المصطفى عليه أفضل الصلاة والتسليم -بما معناه -((بدأ الاسلام غريبا وسينتهي غريبا , فطوبا للغرباء))

*ما في شي السمه صعب , (صعب نصلح المجتمع) (صعب نقنع) (صعب...) ... من استصعب شيئا حيل بينه وبين هدفه , ومن استسهله أصاب :) ... وبيزة على بيزة توديك عنيزة :)

*((الحلال بيّن والحرام بيّن))
تجربة بسيطة
عندما تهم لتحديد صحّة فعلك من عدمه
اعتبر ان الرسول صلى الله عليه وسلم أمامك
واسأل نفسك هالسؤال
((هل بيوافق على اللي أنا قاعد\ه أسويه والا بيمانع؟ ,,, ))

*يقول أحدكم أن نترك كل منحرف وضال لأنه...منحرف وضال
أقول إن اهتم كل (مهتدي) في هداية من جنبه فقط ,,, لاهتدت الأمة
المسألة مسألة (انتماء) و (غيرة) و(نهضة) بالإسلام :)
ما يصلح أن نتكرهم بحجّة ضلالهم ... بل نتقرب اليهم رغبة في إصلاحهم

*نأخذ المفيــد من أي انسان مهما كانت اتجاهاته أو أفكاره أو عقيدته ونترك المفسد فيه
مخرج : العالم نيوتن يهودي الديانة ;)

*عندما يأتي (غربي) الى ديارنا لدعوته الى الإسلام , يأتي الينا وعند وصوله أحد الشوارع يسمع مسجّل سيارة قد فقعت أذنيه بأحد الأغاني الأجنبية... يمشي قليلا في الشارع ويرى شباب بجينزات وااااسعة وتي شيرتات حمراء فسفوري والآخر أصفر فاقع وربطة رأس بنفسجية مكتوب عليها "once your black you never come back" ... وفي بيتنا وقد حان موعد العشاء , نشّغل له موسيقى هادئة , ثم يأتي الضيوف .." hi guys "...ثم نجلس للعشاء ونتكلم عن شيكسبير وشوبان ونهز رؤوسنا على عزف موتزارت وبيتهوفن ثم ينتقل الحديث عن آخر أغاني المغني أو المغنية الفلانية ... وعن آخر انتاجات المخرج الفلاني ... وفي الجهة الأخرى من الجدار زوجة ذلك الغربي بين بناتنا الأولى بفستان فوق الركبة والأخرى بتنورة أقرب ما هو الى تحت السرة;) , وتأتي البنت الصغيرة وهي تقول Hello everyone ثم يقومون جميعهم ليشاهدوا حلقة اليوم من The Bold and The beutiful وبعدها يتناقشون أحداث الحلقة ...

بأي وجه ستقابله وتقابلها عندما تريد أن تدعوها الى دينك ؟
بأي وجه ستخبره و تخبرها عن الإسلام و"عزّته" ؟
بأي وجه ستبيّن لها "غنى" الإسلام ؟

أين ذهبت تحيّة الإسلام ؟ ((السلام عليكم ورحمة الله وبركاته))
أين ذهب قوله صلى الله عليه وسلم - بما معناه - " أكثروا بذكر هادم اللذات -أي الموت-"
أين ذهبت مجالس الذكر ؟
أين ذهبت مجالس الكلام بالآخرة والكلام عن يوم القيامة , وأحداث الساعة ؟
أين قصص الوعظ والموت ؟
أين النقاش السياسي ؟
أين الثقافة ؟

*أكرر نأخذ المفيــد من أي انسان مهما كانت اتجاهاته أو أفكاره أو عقيدته ونترك المفسد فيه


* أخيرا ... ملايين أسلموا وأهلهم كانوا كفّار ... فلا عذر لمن يقول أن أهلي لا يجيدون الإقناع ;)

تحيّاتي لكم

أبو ظل:)

ورقة و قلم
10-08-2003, 11:11 AM
7
7
7
beautiful
:p

صاحب الظل الطويـــــل
10-08-2003, 11:38 AM
8
8
8
8
تركت السالفة كلها وطبيت على هذي

هههههههههههه

خطأ مطبعي ... ومنيب معدله , لأنه خطأ مطبعي:)

العجيّز
10-08-2003, 11:50 AM
:)

راعي العليا
10-08-2003, 10:30 PM
لا شك ان الردود اثرت الموضوع ولاشك اننا تطرقنا لاشياء كثيره وعالجنا الموضوع من كل جوانبه تقريبا هناك تباين طفيف ولكن ينصب كامله في صالح الموضوع.. انا طرحت وجهة نظر وما اعتبرت نفسي صاحب الموضوع وبالتالي ارد على كل واحد منكم واناقشه لاني ماكتبت شي وقلت لا هذا الصح وناقشوني.. موضوعي كان يحمل من التساؤلات ماهو أكثر وإن لم ترد بصيغة استفاهمية ..
ما قصرتوا بصراحة ردودكم كانت رائعة وعشان نستفيد من الموضوع اكثر ابحاول اذكركم بردودكم بشي من الاختصار وأتمنى التوفيق وسامحوني على القصور ..

مشرفتنا الشيهانة ..
معترضة تماما عن مفهوم الحرية عند البعض ملمحة لان البعض فهم الحرية بمعناه السطحي والساذج وأكدت ان الجيل السابق كان يعي الحرية أكثر من الاجيال الحالية.
بغض النظر عن كوني اختلف معك او اوافقك بس كلامك يندرج في نفس اتجاه الموضوع وهو ان الحرية لها مفهوم خاطئ حالياً وذا كلام واقعي بالتأكيد.. لكن اختي الشيهانة انا معك يمكن مفهوم الحرية سابقا كانت اصح السؤال هو ليه فشلوا بتجذير هالمفهوم للاجيال الحالية ؟
كلامك رائع اختي الشيهانة

هلا بعبير..
قالت أن المفاهيم الحالية للمصطلحات صارت تحمل معناها المعاكس بسبب تفسير خاطئ وجهل طبعا :)
كلامك جميل اختي هلا بعيبر..

تغريد..
أكدت في ردها والي ذكرت فيها بعض الامثلة بشكل رائع أن ما يهمنا حاليا هو كلام الناس مو أكثر بمعنى ان العيب هو الي يحدده الناس حتى لو كان مافيه شي ..
انا معك بهالشي بكل تأكيد..

ASSASSIN..
ياكثرك خخخخخخ :) .. عموما العزيز assassin تشعب لعدة نقاط منها أن البنت بسبب انعدام مفهوم الحرية وتلاشي الهوية صارت تقلد تقليد أعمى بغض النظر عن كون هالشي يناسبها او لا وأشره عليه انه تناول بعض الأمور بنوع من الحدة بس الواضح انها غيرة على بنات جلدته وهالشي يحمد عليه وإن كنت اختلف معك ببعض الاشياء الي ذكرتها.. رائع يابعدي..

كتكوتة مفترسة..
في ردها أكدت ان من المستحيل تغير رأيها اذا كان العيب هو السبب ولكن عند شي محرم هنا تفرمل وتطشر ببسيتها :) كلامك رائع لا شك ... وأكدت بأن الطفل ينشأ في بيئة سبب تقييد حريته وخاصة البنت هي العادات والتقاليد ..

scent of soul..
وضحت أن الاشكالية تنطلق من الأهل والمربين والمدرسة والقدوة .. الخ وفشلهم في غرس المفاهيم الصحيحة لمعنى الحرية الي تتناسب مع عقيدتنا وحضارتنا وأكدت ان الأب مهمش دوره في معظم البيوت نتاج لإهمال منه وتحمل الأم المسؤولية الأكبر.. كلام جميل بالتأكيد :)

خربز..
ذكرت بعض مواقف من صميم الحياة وبصراحة رائعة .. المهم حملت الأهل المسؤولية بسبب خلطهم بين العيب والحرام :) ..

RESCUER..
كلامها كان يحمل فحوى صريح وبرئ في نفس الوقت حمل ردها في طياته تساؤلات عديدة لوضع مجتعمنا يعيشة وما استثنت نفسها .. ردك وتساؤلاتك قمة في الروعة :)

المنفجر..
يشره على بعض المواقف الي يقوم فيها البعض ويبدي استياء شديد من أهمال الأهل وعدم مبالاتهم لبعض تصرفات بناتهم :)..

لؤلؤة الشرق..
تؤكد في ردها ان النقص هو السبب الرئيسي في ضياع هالمفاهيم رغم علمهم وداريتهم بالحرام والحلال.. وبالتالي فهمهم للحضارة بفهوم خاطئ .. اكيد هالشي موجود انا معك :) بس اتوقع انه مو كل شي .. كلامك فيه الكثير من المنطقية :)..

سوبر ستاره..
تؤكد انه مامن سبيل للاحتفاظ بهويتنا الا باقناع الجيل التالي بجمالها وأصالتها وعدم تشوييها وربطها بعدم التمدن ولازم تتكيف مع عصرنا الحالي بما يتماشى مع نص المفهوم .. انا معك بالتأكيد ..

العجيّز..
مشرفتنا حمل ردها المسؤولية على الأهل المحافظ جدا .. وذكرت مثال يقهر بصراحة :( .. واكدت انه لا سبيل لنا إلا بالتمسك بكتاب الله وسنة رسولة :)..

صاحب الظل الطويـــــل..
أكد ان الحرية يجب أن لا تتعارض مع حريات الآخرين .. ووجه سؤال منطقي ما معناه عنده الهموم بعمل شيء يجب علينا توجيه السؤال لأنفسنا .. هل كان سيرضى سيد الأنام صلوات الله وسلامه عليه بما ههمنا به ؟ كلام جميل يابو ظل :)..

مساحة ود..
تتابع باهتمام النقاش ووجهت لي نصيحة بأن اكتب بحرف ابسط عشان يفهمون علي :( مع اني من خلال نقاشي معهم حسيت ان حروفي تلاشت امام جودة ردودهم وقوة فكرهم.
عموما بالتأكيد بحاول أن شاء الله :)..

طيربالسما..
تؤكد ان الأناقة ما تعني الإنحلال والتفصخ ممكن تصير أنيقة وفي نفس الوقت محتشمة ذا الي فهمته تؤكدها المظهر وذا كلام رائع بالطبع :) وتأكد أن النيات تؤكدها المظاهر..

عطيات ام البنات..
تؤكد ان الغرب يحسدنا على هويتنا وطابعنا الي نحملها ما ان تمسكنا بها وتؤكد بعد ان الحريه في نظرها هي حرية الرأي في اتخاذ القرارات المصيريه مثل اختيارها تخصصها في الدراسه ؛اختيارها شريك حياتها وغيره من الامور الشخصيه .. كلامك صحيح بالتأكيد :) ..

بنت نجد..
صاحبة الفكرة آلت إلا أن ترد .. بنت نجد تؤكد ان العيب هو ما زرع فينا مستبدلا بكلمة حرام بمعنى أن الخوف من الأهل علينا هو من العيب ولكن ان كان حراما فقد يهمش وتؤكد ان هالشي ممكن يدفع النشئ بغض النظر عن الجنس لعدم الإقتناع وبالتالي ركضهم وراء رغباتهم متجاهلين اشياء لم يقتنعوا بها.. وذكرت مثال اكثر من رائع :)

ذكية ولكن..
ردها يؤكد ان السبب الرئيسي الأزدواج في الشخصية الناتج عن الإزدواج في التربية وتعليم السلوك وتؤكد انه لو وجد التكامل بين البيت والمدرسة لما نتج هذا الإزدواج .. وأثنت على موضوعي وأسلوبي ( وجه مستحي :) ) لا عدمناك ياخاله..

wind_rose..
ترد على ASSASSIN وتؤكد له ان الضرب ابد مايفضي إلى نتيجة أو حل جذري ولكن ترسيخ القناعة هو الحل المؤكد..

عنايدية..
تؤكد أن المجتمع ليس له علاقه بأشياء شخصية قد تندرج تحت اطار مايسمى حرية مثلا اللبس الذي تلبسة ونوع الموسيقى الذي تسمعه .. همن قامت تتهاوش مع ASSASSIN :( .. يعطيك العافية .

ريانه..
وعدتنا ووفت :) .. الاخت ريانه تشره على تصرفات البنت التي ذكرت كمثال في الموضوع .. وتؤكد عدم التجاوز في اللبس وكل شي له حدود وفهمت من ردها أن اذا كان أي شي مايخالف الشرع فلا ضير .. وذكرت امثلة تؤكد إن النقاش لغرض الوصول لقناعات من كل الاطراف شي ضروري .. كلام في الصميم :)

ورقة وقلم أيدت كلام ابو ظل :)



هذي بالطبع مقتطفات من ردودكم ما ادري وش اقول عنها او بوشو أعلق لكن بالتاكيد هي أكثر من رائعة والمتابع راح يكتشف هالشي بنفسة بغض النظر عن بعض الاختلافات لان هالشي بديهي وبالتأكيد كلنا استفدنا من هالنقاش وبالتأكيد أيضا وصولنا لنتائج وقناعات وهذا هو الغرض الحقيقي من كتابة أي موضوع :)..
شاكر لكم تفضلكم بالردود ونقاشكم المثري :)

عبير نجد
11-08-2003, 01:47 AM
هلا ريانه

كيفك وكيف مماعط الشوش معك http://smilies.sofrayt.com/%5E/r/grins.gif ؟؟

والله زمان حاسة يدي تاكلني ووددددددددي لو ....... !

بس ربطوا يديني http://www.jp3d.net/yahoo/images/new/28.gif يا حساااافة على ذيك الأيام

بس ولو فيه حل بأستحدث يوزر انتحاري لتمعيط الشوش http://smilies.sofrayt.com/%5E/r/winknudge.gifhttp://smilies.sofrayt.com/%5E/r/nahaha.gif <<<< أبو طبيع ما يجوز عن طبعه http://www.eqla3.com/vb/images/smilies/crooked.gif

بس حبيت أشاور لك على خطأ في ردك الرااااااااااااااائع اللي فوق .... والخطأ في الآية الكريمة

(( ولا تقل لهمـــــا أفٍ ولا تنهرهما وقل لهمـا قولاً كريماً ))

وفقني الله وإياك http://smilies.sofrayt.com/%5E/r/smile.gifhttp://www.alsaha.com/newimg/flower.gif

يالله نشوفكم على خير http://www.jp3d.net/yahoo/images/new/05.gif

ASSASSIN
11-08-2003, 08:48 PM
تاخرت عليكم بالرد لكن موب مشكله هذاني جيت

عنايدية
تدرين وش مشكلتك انك تحاولين من خلال نقاشك تبررين تصرفاتك او على الأقل تصرفات انتي مقتنعة فيها او تمارسينها او تواجهينها عاد اختاري اي حالة من الحالات السابقة الذكر..
معقولة تناقشيني عن بديهيات وتبيني ارد عليك؟
طيب موضوع راعي العليا متشعب مهوب يرتكز في إطارة على نقطة معينة والي هي وش مفهوم العيب..
هو قال وش مفهوم العيب ووين هويتنا وليه ماعرفنا نحتفظ فيها
وش السبل لا ستعادة هوية خاصة فينا.. ومن هالنمونة
طيب وشي هويتنا انك تبررين للي يسمعون مثلا البوب والجاز والي يقولون هاي وبونجور؟
هذي هي الهوية الي نبي نسترجعها اسمحي لي اقولك امحق هوية وامحق تبرير
بغض النظر عن كونها حرام ما تحسين ان ذا انسلاخ من جلدتك ومحاولة تقليد سخيفة
وتجين وبكل برود وتبررين وتعيدين كلامك :(
المرة الاولى قلت يمكن البنت مفطرة فول ومهيب مركزة بس للاسف تكررين كلامك لأكثر من مرة
كلهم حاولوا يلمحون لك ولا فهمتي لكن وش اسوي لك عاد بصراحه تعبت
والأمثلة الي جبتها ابد مهيب بعيدة عن الموضوع او عن محور النقاش بالعكس هي في صميمها
وقيسي عليها بس اصلا مثل ماقلت لك انتي ما تردين عشان النقاش انتي تحاولين تبررين تصرفاتك
او تصرفات مقتنعة فيها على الأقل
حشى قال بنجور قال والله لو اقولها كان شفتي نص شباب الرياض يطمرون وراي :(
وباقي تعليقاتك مدري وش تبي حسيت انك أبلة عواطف وتصححين درس تعبير.
معليش إذا اتفقنا على المبدأ وعرفتي ان كلامك ماله داعي وناقشتي في إطار أوسع
وبعدتي عن توافه الأمور وبطلتي تفطرين فول ..... بهالحاله تعالي اكتبي ردك
تحياتي

wind_rose
أنتي بالذات احس انك تسكرين المكيف وتردين مدري وش فيك :(
مشكلتنا حتى بكلامنا نستخدم مجرد شعارات ونحاول نقتبس كلمات لعلماء نفس
أو منطق او فلسفة على غير سنع
أبطرح مثال وابدعي ربي انك تفهمينة
رسولنا الكريم عندما وجهنا لحث أبناءنا على الصلاة وجهنا لاتباع مراحل متدرجة
أولا اللين اذا ما نفع نستخدم الضرب كوسيلة
راح يجي واحد من المحدثين والمستشرقين ويقول يااي وش هالقسوة ليه تضرب ولدك
هذي مو تربية انتم متوحشين :o
نفس الشي أمرنا بضرب الزوجة ضرب غير مبرح وهالنص مذكور في القران الكريم
في حالة عصيانها وعدم طاعتها لزوجها طبعا فيما يرضي الله
تجي وحده من المفكرات المتأثرات بالغرب وتقول أحنا متوحشين يالمسلمين وش ذا
ليه يضرب زوجته هذي همجية ..
ابقولها صدق الله وكذبتي .. هذي بس عينة بسيطة عن المتأثرين بأفكار الغرب
وبالقياس ياوخيتي اذا والله اختك عاملتها باللين وحاولت تفهمها الصح والغلط
وسويت كل شي عشانها وهالشي ذكرته في رد سابق يعني لو ترجعين لكلامي راح تشوفينه
خلاص استنفذت كل مجهوداتك بهالحالة إضربها وماعليك ملامه وهالضرب في صالحها
مهيب همجية ولا قسوة ولا تقولين حنا متوحشين ولا شي
صدق الله وكذبوا ...
ها وش تبون اكثر اتوقع ردود مسكته ومحد يجي يتفلسف عقبها :(
تحياتي

wind_rose
11-08-2003, 10:02 PM
ASSASSIN :):):)


مشكلتنا حتى بكلامنا نستخدم مجرد شعارات ونحاول نقتبس كلمات لعلماء نفس
أو منطق او فلسفة على غير سنع
أولاً :انا اتكلم من قناعتي الشخصية ...
ومشكلة الي يظن إن كل الناس مايفهمون ويحتاجو يقتبسو من علماء عشان يعبرو عن أرائهم .. لا وباخر الرد محسب انك افحمتنا .. المشكلة اننا لسه بنرد عليك جاي تقولنا ردي مسكت يعني اول مره اشوف احد كذا بصراحة :)
ثانياً :أحسن شي انك جبت أمثلة من السنة والقرآن .. إلي مايختلف احد على جدواها ونفعها وبإنها هي فعلاً الطرق السليمة ..
لما أمرنا الرسول علية الصلاة والسلام بإننا نضرب الصغار .. ماجا وقال والله هذا مايصلي امسك العقال عليه ولا تفكه الين مايصير مايترك ولا فرض !!
الحديث ( مرو أبناكم للصلاة لسبع واضربوهم عليها لعشر ) يعني ثلاث سنين تقعد تحاول فيه بالاقناع وبالأمر بالحسنى .. عاد بعد الثلاث سنين هذي وقتها يحق لك الضرب ..
نفس الحكاية للمرأة بالأول نجيها بالإقناع بعدين بالهجر بعدين بالضرب " الغير مبرح " .. يعني الضرب ماكان إلا بعد هالمراحل كلها .. وضرب للتأديب مو عشان تكسرها .. انت تقول تبغى تتدعسها بمدري ايش هنا :

بهالحالة ما اشره عليك لو تفحط فوق بطنها بتريلا مهوب سيارة .. هيا شوف كيف الحين القرآن يقول لا تضربها بقوة انت تجي تقول الا بتريلا هههههههههههههه .
الله يهديك ويهدينا يارب :) :) :)

ASSASSIN
11-08-2003, 10:35 PM
win_rose
شايفه انك صرتي تصرفين على غير سنع :)
في البداية كان ردك يحوي مضمونه ( يمديك على الثقافة :( ) ان الضرب
وسيلة مرفوضة وما تفضي لأي نتيجة وشي مقزز وشي مخجل وشي مال امه داعي
والحين خقيتي وصرتي تقولي ضرب خفيف وباللين وغير مبرح
ذا مشكلة الي يهذري بكلام وما يدري وش عواقبه..
عموما وعشان ما نطلع عن مضمون الموضوع وعشان لا يزعل علينا بعض الناس
وعشان النقاش يظل لغرض النقاش مهوب هواش وكلام ماله سنع وعشان نثري الموضوع
تأكدي اني في أحد ردودي ضربت مثال اختي : قلت اني لو وفرت لها كل شي وعاملتها
بالطيب واحترمتها وقدرتها وهالشي يشمل الاقناع ويشمل كل هالجوانب
وجت وما احترمت كلامي وما احترمتني في هالحالة أبد محد يلومني
شايفه انك تردين بس عشان الرد ومنتي عارفه ساسك من راسك ؟
مشكلتكم والله تحاولون تشوفون مبررات لتصرفاتكم طيب ليه ؟
حنا ما نخلي من العيوب بس ليه نبرر لهالعيوب ليه ما نعترف فيها
كخطوة أولى للإصلاح .. والإصلاح هو عشان نظل في صلب الموضوع
الأعتقاد بخطأ تصرفاتنا الي ابعدتنا عن هويتنا والاعتراف بأنها شي مقلد
ولا تمت لحضارتنا بأي صلة وهذي طبعا أول خطوة نحو الإصلاح ومن ثم
تكوين هوية ذات طابع خاص مو مقلد.
الي تجي وتقول مثلا انا حرة وهذي تصرفاتي وهذي حدودي ابقولها لو المشكلة
مشكلتك عاد ماراح تمثلين شي للمجتمع بس للأسف في يوم من الأيام راح تصيرين
أم وربة أسرة وحرام أولادك يتعاملون مع عقلية مثل عقليتك وبالتالي يتأثرون فيك
وكلامي موجه لفئة معينة لا تنقز علي بنت وتقول لا تعمم ؟؟؟؟
هالمره حاولي تقراين ردي بكثير من التمعن وحاولي تفهمينه اذا كان براسك رد
أو اقتنعي هدانا الله واياك ولا تكابرين طيب ؟

على فكره: البنت لو وصلت مواصيليها لشي مال امه داعي حلالاه الي يحطها تحت قطار
مهوب تريلا :)
تحياتي

wind_rose
11-08-2003, 11:31 PM
كنت اتخيل اني لما أدخل للنقاش في موضوع أقل ما أتوقعه إن الي بيناقشني بيتكلم باحترام ..
لكن انت جالس تتكلم باسلوب استفزازي وتغلط على كيفك عموما..
أنا قلت صعبة أغير قناعات الناس برد أو بموضوع ..
لكن قلت ابقول وجهة نظري وافقتني كان بها ماوافقتني اوكي ماقلتلك الا اقتنع غصب وقعدت اغلط عليك وقلت انت ماتفهم والا ماعندك سالفه ..
ولما احنا تكلمنا عن الضرب كان اعتراضي على اسلوبك
يعني انت قلت الشرهه على اهلها الي ماربوها وعلى اخوها الي ماضربها .
وقتها انا رديت وقلت لك ان الضرب وسيلة غير مجدية .
جيت انت قلتلي الا وجبتلي امثلة .. قلتلك طيب في هالحالة يعني اذا بتضربها خلاص يصير طبق الشرع صح مو تكسرها بالعقال والا بتريلا وتقول والله القران قال اضربوهم !!

وصدقني .. لما يكون الأخ قريب من اخته ويراعيها وتغلط ويجي يكلمها ويبين لها حبه لها وخوفه عليها مو انو رقيب يتصيد اخطائها صدقني بتتفشل وبتكره نفسها ولا رح تكرر الغلط ولا رح تحتاج للضرب وغيره طبعاً إلا في حالات شاذة وقتها لوعجز ويبغى يضربها
لازم يراعي انه الضرب هذا للتأديب مو عشان يضرها ويهينها بالعقال !!

بكذا انا قلت الي عندي ووضحت وجهة نظري .. واخر شي بقوله بإني لو ابي ارد بس عشان الرد كان مالقيت عدد ردودي 137 وانا لي سنتين واكثر بالاقلاع .
الله يهدينا ويهديك :):):)

ASSASSIN
11-08-2003, 11:44 PM
أولا انا ماغلطت عليك ولا أبي اغلط عليك
أنا ارد في صلب الموضوع وإن شفتي تجاوزات هي فقط عشان نحتفظ
بنكهة اقلاعية في الموضوع مهوب أكثر
حنا هنا أخوة وبنات الإقلاع كنهم من أهلنا والسخيف فقط هو الي يحاول
يغلط على بنت يفترض انه يعتبرها مثل أخته.. عموما انا مو من هالنوع ياوخيتي
انا بصراحة حبيت أناقشك مهوب أكثر وما حبيت استفزك بس ماعجبني كلامك
وحبيت ارد عليه ونتناقش
الشيء الثاني هداني الله واياك انا قلت لك لأكثر من مره انا ضربت مثال وقلت
ابتعامل معها بما يرضي الله وأبحترمها وهالشي يشمل اللين وغيره بس لو ما احترمتني
وما قدرت كلامي ولو قلت لها ترى ذا غلط وسوت نفسها مهيب فاهمه
او تجاهلت كلامي والغلط الي أنا اقصده هو الشيء الي مايرضى فيه الله ولا رسوله
وماترضى فيه العادات والتقاليد الي عرفناها والي تتجاوز حدود العقل والمنطق
وما ذكرناه في سياق من عادات مقرفة يتضمنها.....
بهالحاله اطلاقاً محد راح يلومني لأن هذي أولا وأخيراً
أنا المسؤول عنها ومصلحتها من مصلحتي وخوفي عليها حق وواجب
والي ما تدري وين صالحها أهلها يدرون ويصححونه بالطريقة الي تعجبهم
إن نفذت السبل << وذا من واقع ردودي بس الله يهديك ماتبين تفهمين كلامي غصب
عموما لا تدخلين الحساسيات بالردود حنا أخوه قبل كل شي
وما جينا النت الا عشان نستفيد ونوسع صدورنا لو خرجنا عن هالإطار
حراج بن قاسم يضف اجهزتنا وخلصنا
تحياتي وتقديري

الشـيـهـانـه
12-08-2003, 06:19 AM
سلخيييييييييييييييييييييييييييييير



راعي العليا
الأجيال السابقه مفهوم الحرية نستشفه في أشياء كثير عندهم صحيح بالنسبه للبنت كان فيه قيود ..
السؤال هنا ليه ما ورثوا المفهوم الصحيح للحريه للاجيال الحاليه ؟

و انا اختك الاجيال الحاليه اقسام ( كليه مو اجيال )

القسم الأول
اهلهم كانوا يقولون لهم " اختاروا لكن تذكرونا وراكم @@ "
هالجيل يتربى على الحرية في اتخاذ القرار و مراعاه عاداته و تقاليده
مراعاة اهله ما يخطي خطوه الا ناسه و اهله في باله
حريته فعلا تتوقف لما يحس ان فيها ضرر له و لاهله
اذا حس انها تمس عاداته و تقاليده و دينه

القسم الثاني
اهلهم يقولون لهم " انتوا تعرفون الصح من الخطأ "
تربي طفل تقوله انت كبير و اختار و تعطيه كل الخيارات
تأكد بيخطئ ما يصير نخلي السفينه من غير قبطان و نقول اكيد بتدل المرفأ صح
هنا يا يخيب يا يصيب
يا انه بيحفظ نفسه يا انه بيدج باسم الحريه


هذا اهم قسمين
و بكذا واضح الفرق بين القسمين و كيفية فهم الحرية
@@


***

ASSASSIN

على فكره: البنت لو وصلت مواصيليها لشي مال امه داعي حلالاه الي يحطها تحت قطار
مهوب تريلا

و الله يا انا شفت بنتين قابلتهم في كورس
هذا و انا بنت تمنيت اني احطهم في مفرامة لحم عشان ما يكون لهم اثر في الحياه ابدددددددد
جد مت قهر كنت اذا سولفت لامي عنهم انقهررررررررررررر
افكر وشلون رجالهم يشوفونهم كذا و يسكتون مافيه غيره ؟ مافيه احساس ؟ مافي رجوله ؟


الحرية

عندنا في الكويت أكبر مثال لفساد الحريه
في بنات اخذوا اللي يفيدهم من الحريه و بقوا ملتزمين بعادات تقاليد اهلم و ناسهم ودينهم قبل كل شي
لكن شريحة كبيره صارت في الحظيظ

مثال على التخلف اللي يسمونه حرية @@

(( 1 ))
حفلات يسوونها بالصيف في الشاليهات DJ Party كس بنات و شباب اللي يجي يدخل
و انوااااااااااااااااااااع البلاوي اقل شي الدشره و الشرب اذا بغيت اكثر توصل الى المخدرات

(( 2 ))
وحده مع قريبتي في العمل عندها بنت مرتهقه 18 سنه تحضر حفلات مكس
و الأم تثق فيها لانها تربت تربيه اوبن و متفتحه
قريبتي (بنت عمتي) نصحت الأم :
لا تخلين بنتك تروح حفلات مكس ما تدرين وش ممكن يصير و الشيطان شاطر
ردت الأم :
بالعكس بنتي متفهمه و عقلها متفتح ( ايه هين ) و تفهم الصح من الخطأ وهي تقرر انا ربيتها كذا
رجعت البنت من الحفلة اللي كان فيها شخص يرسم تاتو ( ووووشم )
البنت حطت وشم في مكاااااااااااااااااان حساس جدا المفروض كبنت تستحي حتى من البنات انها تكشف جسمها قدامهم الأم صارت كذا @@
قالت لبنتها من كان موجود و انتي تسوين التاتو ( لاحظ الام ما قالت التاتو حرام )
الا ترد البنت كلهم فلانه و فلانه و خالد و أحمد و و و و و
@@
هذا نهاية الحرية دشره و انحلال لا اخلاقي



الحرية المطلقه و عدم الخوف من الله ثم الأهل مصييييييييييييييييييييييبه للبنت و الولد
البنت اكثر لانها شرف و ان ضاع ما عاد رد و هذا ماهو تخلف رجعي هذا تفكير واقعي
@@



الحرية بالنسبه للبنت المفروض تعطيها شخصيه اقوى
الحرية تعطي البنت ثقه في اتخاذ القرار
الحرية ماهي لبس و اشياء تافهه
الحرية حياة متكاملة تعطي البنت الرضى عن النفس في اي خطوة تخطيها


@@


و بس
تحياتي

جريح الشوق
12-08-2003, 07:09 AM
في البداية اهنيك اخوي على طريقة طرح الموضوع...

اما عن الموضوع

فـبصراحة ماودي اتشعب في الرد لان الاخوان ماقصروا

لكن احب اقول ان الخطا مشترك بين الاسرة والبنت

فالمفروض من الاهل انهم يربون بنتهم على ان العباية شي يبعث للفخر

ويخلونها تلبسها عن اقتناع

مو يربونها على ان العباية شي مكروه ولازم تلبسه

طبعا انا ماقصدت العباية بحد ذاتها لكني استخدمتها كمثال.....

ASSASSIN
12-08-2003, 02:03 PM
تخيلي معي يالشيهانة
بعد عشر سنوات من الان اذا لم ياخذ الله الارض بمن فيها
الامريكان صاروا جيرانا يعني بينا وبينهم خطوات وبنفس القاره وبنفس المنطقة :)
هين يطلعون انا موب متفائل ابد
المهم بدل ما نتاثر بأفكارهم وهم بعيد عننا بصراحه ماقصروا جاءوا بافكارهم الين عندنا
المهم البنت تلبس تبي تطلع مع خويها امها تقولها وين رايحه قاعده تتزينين ؟
تقولها ابد خالد خويي جاين الحين ولازم اطلع معه رايحين حفلة :)
الام تشوف بنتها بهالحاله تقولها افا ورا ما لبستي زين وش هالملابس
البنت تناظر امها و تقولها طيب اختاري لي انتي :)
الام تفتش بالدولاب وتشوف فستان الصدر عاري وبدون ظهر ولفوق الركبه
تعطيه لبنتها وتقولها احتشمي يابنت والبسي مثل الخلق البسي ذا :mad:
البنت تناظر امها وتقول : تبين البس هالملابس في عز الحر :(
الظاهر البنت كانت لابسه قطعتين بس :)
الله لا يورينا مثل هاليوم يارب
واذا كانت الحرية تبي توصلنا لهالمواصيل اتمنى من ربي يخسف بنا الارض قبل لا نشوفها
تحياتي لك اختي الشيهانة

خفوق
12-08-2003, 06:45 PM
باختصار اخوي
ولا احب كثر الحكي
انت حر بشروط
انو اللي انت تسويه ؟
لا يكون
عيب
ولا
غلط
ولا
حرام

اذا ركزت على ها الثلاث مطالب؟
بانت حر و بكيفك تسوي اللي تسويه

اما مسئلة تجي و تخرش كل شي و تخربط و تخنبق و تبربس؟

اقول ضف عفشك اذا مهوب عاجبك و قدم لك على منحه في القطب الجنوبي واسكن هناك

ماطاح من السما اخف للنجوم

وسلامتك

الشـيـهـانـه
12-08-2003, 07:02 PM
سلخيييييييييييييييييييييييير


ASSASSIN
هههههههههههههههههههههههههههههه
ههههههههههههههههههههه
هههههههههههه


و انا اختك الرشاش ما حط في المكتب الا حق ذا العلم @@ ( اسم الله علينا )
لكن جد يقولون " مادون الحلق الا الايدين " يعني اذا وصلت الى ذا الحد
يكون وصلنا قمت التخلف و التخلف ما يعالج الا بالتخلف

يعني الموت @@
تذبح البنت و تموت أشرف لأهلها
^
^
^
البدو بدو مهما بنو بيوت و تطوروا و درسوا و صاروا مهندسين و دكاتره ( من غير قصور في المبرمجين @@ ) لكن الدم ما يبرد و يصير فيمتو.. !

ASSASSIN
13-08-2003, 12:16 AM
والله يالشيهانة اني ابي احط ردك في كتاب جواهر الادب
والاغاني للاصفهاني وكل الكتب الي سمعت عنهم وماقريتهم
ودي اضيف ابيات منه لمعلقات عنتره وامرؤ القيس
ولا اقولك ابحطه معلقه بالحاله
هكذا الردود وإلا فلا بس وين الي يتعلمون
يعطيك الف الف الف عافية :)

مستهبله بكيفي
13-08-2003, 11:43 PM
اهلين يااجمااعه ماشاء النقااش حمي شوي ويسيل الدم:D

في البدايه خلني اجااوب راعي العلياااا عن تسااؤلاته من وجهة نظري المتواضعه:cool:>>>اموت

بالتواااااااااااااااضع

عدم القدرة على الاحتفاظ بهويتنا او على الاقل الظهور بهوية ذات بصمه تمثل حضارتنا وقيمنا.. بعيد عن التقليد للغير او محاربتهم

يااخي دول انسخلت ماتبي الشعوب:( لوووووووووووووووووول<<<<<<< بتنجلد طبت سيااسه

والسبب في لااي شي هناا الله يرحمنا برحمته نحسبه عاادي وبسيط :( وكن للاسف هو اسااس بلاويناااا

وضاايع هويتناااا الا وهو ابتعاادنااا عن دينااااا الاسلاامي وسبحان الله وانا اختك ببتعادنا عن الدين

صرنااا ضعااف وهوايتنااا ضعفت فالواحد من صاار يدور على القوه واللي للاسف اغلب النااس يشوفنهاا

متمثله بالثقافه الغربيه عمومااااو باامريكااا خصوصاااللي الاعلااام الامريكي مصوره ام الحضارات والقيم مايدرون ان مااعندهم الا الضيااع;)

هذا من نااحيه يااخوي ومن النااحيه الاخرى مفهوم الحريه الخاطىء وطريقه التربيه الخطا اللي يزرعهااا

الاهل في ابناءهم تلعب دور كبير في اللي صاير:(


ASSASSIN

هلااااااااااااااا خيوه انا اتفق معك في بعض كلامك مو كله ولو اني اعترض على اسلوبك

بس مارا ح الومك لاني اتدرين ان ذا من زود غيرتك علينااااااااا<<<<<<< تبي تصرفهااا

شوف يالبي مو كل شي عيب يعني حراااااام يعنى فيه اشياء واجد في المجتمع تحصله عيب عندناااا

ونحسب لهاا الف حسب وهي مجرد عاادات وتقاليد ممكن تكون صح وممكن تكون غلط اوكيك هذا اولااا:D

>>>>>>>>>لووول قاعده له:cool:

ثانياااا مو معنى ان البناات تلبس قصير او بنطلون جنيز او حتى عبااية كتف انهاا خلاص بنت قليلة ادب

ومتستحي ومن ذا الكلاام ترى مو معنى كلامي ان ايدهم لا تفهمني غلط>>>>>>>>بيجي الحين ويمردغها

بالعقاال:D ولكن هذا الواقع عمر البس ماكان مقيااس على الاخلاق والعقل والادب يااما شفنااا

بناات متغطين مااتشوف منهم شي من زود الستر وعااملين بلااوي وبناات فري بس قمة الاخلاق والادب

يعني الواحد على تربيته وقنااعته الداخليه مو شي ثاااني ;)

ASSASSIN
14-08-2003, 08:19 AM
مستهبلة بكيفي

انا قلتها قبل هالمره عشاني طيب بس تدورون سالفة وتلزقونها بظهري
اولا انا ما قلت ان كل عيب حرام احيانا والله تصير ويحرمون حلال ويقولون عيب
وما انزل الله بها من سلطان بس وش نسوي ذا تخلف وجهل بالدين ذا اولا
الشي الثاني كل شي بحدود ترى انا مو ضد أناقة المرأه بالعكس ما احب المرة
الي يدخل زوجها عليها ويحس انها سعلوة مهيب انسانة بس انا ضد التتبرج الي ماله داعي
يعني مثلا تخيلي بنت لبسها يظهر جميع مفاتنها وتكلمني بأدب وأخلاق :)
ابقول مو مهم اللبس المهم الاخلاق ؟
لا يا اختي مظهرك هو دليل أخلاقك .. لأن اخلاقك بالتالي هي الي راح تحدد
انتي وش راح تلبسين وش الشي الي يستر مفاتنك وغيره ؟؟
وترى تكلمت عن هالسالفة واجد بس انتي جاية مدرعمه من منتدى الهلاليين
الشباب يمردغونك هناك وانتي تدورين حرش هنا خخخخخخخخخخخخ :(
عادي فضفضي ياوخيتي الكبت شين :D

مستهبله بكيفي
14-08-2003, 08:36 AM
ASSASSIN

يا شيابناوانت فيك حيل عشان نلزق فيك شيء بس انا راح اتحملك عشانك شايبنا وعشان اخذ اجر في ذي المسكينه اللي ما خذتك;)

الحين الشباب اللي يلبسون جينز وملابسهم كلها سبورت مهب رجاجيل لانهم ما تمسكوا بعاداتهم والرجاجيل اللي يلبسون دشاديش هم العقل والدين والرزه اكيد لاء لان اللبس ما هو مقياس لا خلاقهم :rolleyes:

نفس الشيء البنت ما هو مقياس لاخلاقها الحين تقدر تقول لي ان البنت المنقبه ما تاخذ رقم ولا توسي اي شيءTpb02 وان البنت الفري دايم تاخذ الارقام ومغازلجيه :rolleyes: يعني في بنت منقبه تغازل وفي بنت فري تغازل لا لبسهم منعهم ولا سترهم:rolleyes:

ولا عشانهم يمردغونك في الجاده جاي تحط حرتك فيني :D

>>>>راحت تشيك على منتدى الهلاليين:( خخخخخخخخخخخخخخخخخخ

ASSASSIN
14-08-2003, 08:44 AM
مستهبله بكيفك
بصراحه ما ادري من وين تفهمين خخخخخخخخخخخخ :)
شوفي وانا اخوتس عشان ما نطلع عن اطار الموضوع حنا تكلمنا عن الحرية
كل واحد تكلم عن الحرية بمفهومه الخاص وقارناها بالهوية او الطابع الي يحمله
مجتمعنا والواقع ان كل شي صار مقلد يعني ماعندنا خطاب حضاري خاص فينا
< -- زارفها من الجادة :(
حنا مجرد مقلدين وبالتالي البنت يا اختي ليه تلبس اصلا ملابس مالها داعي
يعني الاناقه بالتفصخ والفري لا ما اعتقد حنا لنا عادات واخلاق وقيم
وترى المثال الي محطتيه ماله داعي يعني البنت لها حدودها وما تتجاوزها
ذا الي اقصده يعني مافيه شي اسمه فري الا بحدود وكل شي بحدود وخصوصا
البنت لانها مو مثل الولد ومافيه مجال مقارنة راح تجيك الحمية وتقولين ليه البنت غير
ابقولك يعني انا لو طلعت الشارع بصروالي السنه محد راح يجيب خبري :(
لا تقعدين تتفلسفين وانتي من جنبها وافهمي الموضوع زين همن ردي
خخخخخخخخخخخخخخخخ :(
عسى بس يضفونك الهلاليين والله انهم جايبين فيك العيد :D

مستهبله بكيفي
14-08-2003, 09:07 AM
ASSASSIN

ياااشيابنا وراك انخفيت اركد شوي الله يهديك
وانا افهم من وين يفهمون العالم :cool:
ندري انك نتكلم عن الحريه وانا قايله انك تكلم عن اختراع الذره>>>>زارفتها من العام:cool:
مو سالفه تقليد الغرب لكن يمكن انها يريحها في اللبس والبنطلون مريح اكثر خاصه في الاسواق والتمشي
بعدين اللبس ما يحدد قيمي ومبادئ انا متمسكه في قيمي ومبادئي في افكاري وتصرفاتي يعني واذا كل شيء لزقناه بالغرب والتقليد بتصير حتى قعده النت تقليد:rolleyes:

بعدين تراني رحت شيكت على الهلاليين محد قرب صوبي :cool:

ما عليش راعي العليا قطينا بموضوعكTpb07

ريانه
14-08-2003, 10:14 AM
سوري على الرجعه يا ابو العليا :)

بس ودي اذا تسمح وبعد اذنك اسلم على هلا بعبير !!!

بعد اذنك هاه :D
اذا ماودك عادي اضف خلاقيني :)

هلا بعبير ..
هلا وغلا
بالنسبه لمماعط الشوش الحمد لله عدا على خير
باقي لي كم خلصه بعد ما طاحت :p
تكفين اذا شفتي شعور طاحيه بالجاده شيليها وجيبيها لي اطلع منها شعري
ورجعي الباقي لمكانه ... اخاف اهله يبونه :p

اما بالنسبه للايه ...
تراه غلط مطبعي ماحسيت فيه الا بعد ملاحظتك له
جزاك الله كل خير ...
تحياتي لك عزيزتي

ابو العليا .... تشكر ،،

راعي العليا
15-08-2003, 09:09 PM
للي ردوا وشاركوا بهالموضوع ما اقول الا الله يعطيكم الف عافية ..

شي جميل إن الواحد يطالع هالموضوع ويشوف فيه مختلف الاراء

الي تقريبا تحمل نفس المعنى وإن اختلفت الصيغ

مع وجود شي من التباينات او الاختلافات الطفيفة الي ما تاثر على صلب المعنى

أو جوهر الموضوع والأجمل هو طرحكم لاراءكم بكل تلقائية

بعيد عن زخرفة الكلمات عشان كذا انا متأكد ان الفائدة وصلت للجميع وانا منهم :) ..

شكري وتقديري لكل من شارك بالموضوع :)